K’ojob’ank wi’chik, xb’aan li xLiz Lemon Swindle

26 julio–1 agosto

Tzolʼlebʼ ut Sumwank 84

“Li wankilal re choxahilal”

K’a’ru taab’aanu re xk’eeb’al xb’oqb’aleb’ li komon chixwotzb’al li xe’xtzol naq xe’ril ru Tzol’leb’ ut Sumwank 84?

Tz’iib’a li nakak’oxla

Xkanab’ankileb’ chi wotzok

Kanab’eb’ li komon chixwotzb’al rik’in junaq chik li komon junaq li yaal xe’xtaw sa’ li tasal 84 li kixmusiq’aheb’ malaj kixtenq’aheb’ chixtawb’al ru chi us lix tijonelil li Dios. Chirix a’an kanab’eb’ junjunq chixwotzb’al ajwi’ a’an sa’ li tzoleb’aal.

Xk’utb’al li tzolʼlebʼ

Tzol’leb’ ut Sumwank 84:1–5, 17–28, 31–42

Chiqajunilo naru naqak’ul lix wankil ut li rosob’tesihom lix tijonelil li Dios.

• Li Qaawa’ naxtikib’ li “k’utb’esinb’il na’leb’ chirix li tijonelil” (xjolomil Tzol’leb’ ut Sumwank 84) rik’in xk’utb’al naq taakab’lamanq jun li santil ochoch aran Sion (chi’ilmanq li raqal 1–5). Chan ru naru taatenq’aheb’ li komon chixtawb’al ru li rilom lix loq’laj ajom li santil ochoch rik’in li tijonelil? Naru taatikib’ rik’in xtz’iib’ankil jun li patz’om chiru li pizarron, jo’: K’a’ruheb’ li rajom li tijonelil? ut chirix a’an taakanab’eb’ li komon chixsik’b’al xsumenkil sa’ Tzol’leb’ ut Sumwank 84:17–28, 31–42. Chan ru naq eb’ li santil ochoch ut eb’ li k’ojob’anb’il k’anjel re li santil ochoch neke’tenq’an chixtz’aqob’resinkil ru li ajom a’an?

• Re xtenq’ankileb’ li komon chixtawb’al ru lix wankilal li tijonelil naru nawan sa’ xyu’ameb’, naru taakanab’eb’ chirilb’al ru Tzol’leb’ ut Sumwank 84:17–28 ut te’xk’oxla k’a’ raj ru jalan sa’ xyu’ameb’ wi ta maak’a’ lix tijonelil li Dios. Waklesi xch’ooleb’ chixwotzb’al k’a’ut naq neke’xb’antioxi li tijonelil, jo’ ajwi’ lix numsihomeb’ rik’in lix wankilal li tijonelil, maare sa’ li junkab’al, sa’eb’ lix b’oqb’al, malaj sa’ lix yu’ameb’. Chan ru naru naqak’ul lix wankil li tijonelil?

• Li xaqab’anb’il aatin ut sumwank re li tijonelil (chi’ilmanq Tzol’leb’ ut Sumwank 84:31–42) nak’anjelak choq’ reheb’ li ani k’ojob’anb’ileb’ sa’ junaq opiis re li tijonelil. A’b’anan, naab’aleb’ re li osob’tesihom neke’yeechi’iman sa’eb’ li raqal a’an wankeb’ choq’ reheb’ chixjunil. Re xtenq’ankileb’ li komon chirilb’al chan ru neke’k’anjelak li yeechi’ihom a’an, naru taakanab’eb’ chirilb’aleb’ ru li raqal 33–42 ut te’aatinaq chirix chan ru naq naru “naqak’ul” li tijonelil (raqal 35), eb’ lix moos li Qaawa’, ut li Qaawa’. Jo’kan ajwi’, naru te’ril li aatin sa’ “Xkomon chik li k’anjeleb’aal” re xsik’b’al k’a’ru tento taqab’aanu re xk’ulb’aleb’ li rosob’tesihom li tijonelil. Naru taatenq’aheb’ li komon chixk’oxlankil k’a’ raj ru “chixjunil li k’a’ru re li qaYuwa’ ” (raqal 38), jo’ eb’ lix chaab’ilal ut lix yu’am li wan wi’ anajwan. K’a’ chik ru nawulak chiqu sa’eb’ li raqal a’an ut li nayeeman chi sa’?

  

  Eb’ li k’ojob’anb’il k’anjel re li tijonelil neke’rosob’tesi chixjunileb’ li ralal xk’ajol li Dios.

Tzol’leb’ ut Sumwank 84:61–88

Li Qaawa’ tixch’olaniheb’ li neke’k’anjelak chiru.

• Us ta eb’ li raqal a’in neke’aatinak re li ani “taaxik ut tixjultika li evangelio a’in re li awa’b’ejihom” (raqal 80), naab’aleb’ re li na’leb’ wankeb’ rilom rik’in yalaq ani li taak’anjelaq chiru li Dios. Naru taakanab’eb’ li junjunq chi komon chirilb’al ru Tzol’leb’ ut Sumwank 84:61–88, ut taapatz’ reheb’ naq te’xwotz rik’in junaq chik komon li xe’xtzol li wan rilom rik’in yalaq ani li nak’anjelak chiru li Qaawa’. Eb’ li komon naru te’xsik’ ru junaq li raqal malaj jun siir raqal re xkanab’ankil sa’ xk’a’uxleb’, malaj ut xk’eeb’al b’ar wi’ naru neke’ril rajlal kutan. B’ar wan reheb’ li yeechi’ihom mas neke’saho’ wi’ xch’ool? K’a’ raj ru taqawotz reheb’ li raqal a’an re xmusiq’ankileb’ li wankeb’ choq’ misioneer malaj li yookeb’ chixkawresinkil rib’ anajwan?

Xkomon chik li k’anjeleb’aal

Chixjunileb’ naru neke’xk’ul chixjunil li k’a’ru re li qaYuwa’.

Li Awa’b’ej M. Russell Ballard kixk’ut: “Chixjunileb’ li okenaqeb’ sa’ loq’laj sumwank rik’in li Qaawa’ ut neke’roxloq’iheb’ li sumwank a’an k’ulub’ejeb’ chixk’ulb’al k’utb’esinb’il na’leb’ choq’ reheb’, chi osob’tesiik rik’in xb’eresihomeb’ li anjel, chi aatinak rik’in li Dios, chixk’ulb’al lix tz’aqalil li evangelio, ut sa’ xraqik, chi wulak chireechaninkil chixjunil li k’a’ru re li qaYuwa’ rochb’een li Jesukristo” (“Los hombres, las mujeres y el poder del sacerdocio,” Liahona, septiembre 2014, 36).

Li xb’een awa’b’ejil re li Komonil re Tenq’ank re li oqech Lago Salado kixtz’iib’a sa’ 1878: “Naqeek’a qab’antioxihom naq, rik’in li rosob’tesihom li qaChoxahil Yuwa’, laa’o, lix moos ixq, b’oqb’ilo chiqochb’eeninkil qib’ sa’ li k’anjel rik’ineb’ li komon winq re xk’ojob’ankil li rawa’b’ejihom li Dios sa’ li ruchich’och’, re tenq’ank chixkab’lankileb’ santil ochoch, b’ar wi’ tooruuq chixk’ulb’aleb’ osob’tesihom sa’ li yu’am a’in ut chi junelik q’e kutan. Sa’ chixjunileb’ li k’ojob’anb’il k’anjel neke’k’ulman sa’ rochoch li Qaawa’, li ixq nawan chixk’atq li winq, jo’ ruuchileb’ li kristiaan yo’yookeb’ jo’ ajwi’ li kamenaqeb’, rik’in xk’utb’esinkil naq chiru li Qaawa’ moko wank ta li winq chi maak’a’aq ta li ixq, ut moko wan ta li ixq chi maak’a’aq ta li winq” (Mary Isabella Horne, Elmina S. Taylor y Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, 15 enero, 1878, 123).

Xchaab’ilob’resinkil li qak’utum

K’e aach’ool chixk’utb’al li tz’aqal tzol’leb’. K’e reetal naq li seraq’ sa’ laa tzoleb’aal taawanq chi kab’lanb’il sa’ xb’eeneb’ li tzol’leb’ li neke’tawman sa’eb’ li loq’laj hu. Naru taab’aanu a’in rik’in xpatz’b’al reheb’ li komon naq te’rileb’ li raqal sa’eb’ li loq’laj hu, ut te’xwotz li na’leb’ neke’xtaw, jo’ ajwi’ li k’a’ru xe’xk’ul rik’in xyu’aminkil li na’leb’ a’an. (Chi’ilmanq Li k’utuk jo’ li Kolonel, 20–21.)