o se potu o i ai ni nofoa ma ni nofoa uumi

9-15 Aokuso

Mataupu Faavae ma Feagaiga 88

“Faatu … se Fale o le Atua”

I le avea ai o se faiaoga o le talalelei, o loo ia te oe se tiutetauave e fesoasoani i lau vasega “ aoao i le tasi mataupu faavae o le malo” ma “upu o le poto” (Mataupu Faavae ma Feagaiga 88:77, 118). E faaopoopo atu i le faasoa atu o mea ua uunaia oe e aoao mai le Mataupu Faavae ma Feagaiga 88, uunaia tagata o le vasega e aoao e le tasi le isi i mea latou te aoaoina.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O nisi taimi e mafai e se ata ona uunaia le faasoa atu. E mafai ona e faaali atu se ata o se lala olive (pe tusi se lala i le laupapa) ma valaaulia tagata o le vasega e faasoa mai fuaiupu mai le Mataupu Faavae ma Feagaiga 88 e fesoasoani ia i latou e malamalama ai pe aisea na taua ai e Iosefa Samita lenei faaaliga o se “lau olive … , o le savali o le filemu a le Alii ia i tatou” (ulutala o le vaega).

aikona o le aoao atu

Aoao Atu le Aoaoga Faavae

Mataupu Faavae ma Feagaiga 88:6-50

O le malamalama ma le tulafono e o mai ia Iesu Keriso.

• Ina ia fesoasoani i lau vasega ia malamalama i le Mataupu Faavae ma Feagaiga 88:6–50, e mafai ona e tusia le malamalama ma le tulafono i le laupapa ma vaevae le vasega i vaega e lua. E mafai e le tasi ona iloilo le Mataupu Faavae ma Feagaiga 88:6–13, 40–50, ma vaavaai mo mea latou te aoaoina e uiga ia Iesu Keriso mai mau e fesootai i le malamalama i nei fuaiupu. O le isi vaega e mafai ona suesue i fuaiupu 13–26, 34–42, ma vaavaai mo mea ua latou aoaoina e uiga i le taua o le mulimuli i Lana tulafono. O a upumoni e uiga i le malamalama ma le tulafono i le vaega 88 ua aoaoina i tatou e uiga i le Faaola? E faapefea ona latou uunaia i tatou ia avea atili e faapei o Ia?

Mataupu Faavae ma Feagaiga 88:62–76, 119–26

E mafai ona tatou mama e ala i le Togiola a Iesu Keriso.

• E faalua ona faaali mai le poloaiga a le Alii ia “faapaia outou lava” i le Vaega 88 (fuaiupu 68, 74). Afai e te lagonaina le uunaia e talanoaina lona uiga, e mafai ona e amata e ala i le suesueina faatasi o faamatalaga o le upu Faamama po o le iloiloina o ni fuaitau ua lisiina i lalo o le ‘’Faapaiaga” i le Taiala i Tusitusiga Paia (scriptures.ChurchofJesusChrist.org). E mafai foi ona e valaaulia tagata o le vasega e faitau le Mataupu Faavae ma Feagaiga 88:62-76, 119-26 ma talanoaina fesili e pei o nei faatasi ma se paga: E faapefea ona avea i tatou ma e ua faapaiaina? O a folafolaga mai le Alii tatou te maua i nei fuaiupu? Aisea e finagalo ai le Alii ia tatou mama? E mafai foi ona latou maua tali i nei fesili i le savali a Peresitene Dallin H. Oaks “Faamamaina e le Salamo” (Ensign po o Liahona, Me 2019, 91–94; tagai foi “Punaoa Faaopoopo”).

Mataupu Faavae ma Feagaiga 88:77–78, 118–26

E finagalo le Alii ia tatou saili e aoao e ala i le suesue ma i le faatuatua.

• O le fautuaga na tuuina mai e le Alii e fesoasoani e faatulaga le “aoga a perofeta” i Katelani (fuaiupu 137) e mafai ona fesoasoani i lau vasega i au taumafaiga e “aoao i le tasi mataupu faavae o le malo” (fuaiupu 77). Atonu e mafai ona e sailiili fuaiupu 77-78 ma le 118-26 ma talanoaina le ala e avea ai lau vasega o se “fale o le aoaoga”(fuaiupu 119). E mafai e tagata o le vasega ona tusi ni “tulafono a le vasega” po o mataupu faavae e faalagolago i nei fuaiupu o le a taitaia lau aoaoga i le vasega. Atonu e te fai atu foi i tagata o le vasega e faasoa mai pe o faapefea ona latou faaaogaina nei mataupu faavae ao latou “saili i le aoaoina” (fuaiupu 118).

  tamaiti o loo suesue i tusitusiga paia

  E mafai ona avea o tatou fale ma nofoaga o le aoaoina faaleagaga.

Mataupu Faavae ma Feagaiga 88:119

O le malumalu o le maota o le Atua.

• Afai e mafai, ia faaali atu se ata o le malumalu e sili ona latalata ane i le laupapa, ma valaaulia le vasega e tusi i tafatafa ni upu mai le fuaiupu 119 na faaaogaina e faamatala ai le maota o le Alii. Valaaulia i latou e faasoa mai ni aafiaga e faaalia ai pe faapefea ona fetaui faamatalaga taitasi i le malumalu. E mafai foi ona e talanoaina pe faapefea e lenei fuaiupu ona taitaia o latou olaga.

aikona o punaoa faaopoopo

Punaoa Faaopoopo

Faamamāina e le Salamo.

Na aoao mai Peresitene Dallin H. Oaks:

“O le salamo e amata i lo tatou Faaola, ma o se olioli, ae le o se avega. …

“Ina ia faamamaina e le salamo, e tatau ona tatou lafoai ese a tatou agasala ma ta’uta’u atu i le Alii ma i Lana faamasino i le olaga nei i mea e manaomia ai (tagai i le Mataupu Faavae ma Feagaiga 58:43). Sa aoao mai Alema e faapea e tatau foi ona tatou “aumai galuega o le amiotonu” (Alema 5:35). O nei mea uma o se vaega o le valaaulia faisoo mai tusitusiga paia ia o mai ia Keriso.

“E manaomia ona tatou aai ma feinu i le faamanatuga i aso Sapati taitasi. I lena sauniga tatou te osia ai feagaiga ma mauaina faamanuiaga e fesoasoani ia i tatou e faatoilaloina amioga uma ma manaoga o loo polokaina i tatou mai le atoatoa lea e valaauliaina i tatou e lo tatou Faaola ia ausia (tagai i le Mataio 5:48; 3 Nifae 12:48). Pe a tatou “faafiti [i tatou lava] mai mea uma e le faaleatua, ma alolofa i le Atua ma o [tatou] manatu atoa, mafaufau, ma le malosi atoa,” ona tatou mafai lea ona “atoatoa ia Keriso” ma “faapaiaina” e ala i le faamaligiina o Lona toto ia “paia, ua aunoa ma se ila” (Moronae 10:32–33). E maeu lea folafolaga! E maeu lea vavega! O se faamanuiaga lava!” (“Faamamāina e le Salamo,” Ensign po o Liahona, Me 2019, 92).

Faaleleia o Lo Tatou Aoao Atu

Saili punaoa e lagolagoina mataupu faavae. E faaopoopo atu i fautuaga i lenei otootoga, e mafai ona e vaai mo vitio o le Ekalesia, musika, po o ata e aoao ai mataupu faavae i le Mataupu Faavae ma Feagaiga 88. (Tagai Aoao Atu i le Ala a le Faaola, 17–18.)