tamaloa ma le fafine o loo faia se meaai

16--22 Aokuso

Mataupu Faavae ma Feagaiga 89--92

“O Se Mataupu Autu ma se Folafolaga”

A o e sauniuni e aoao atu, mafaufau i mataupu faavae na tulaga ese ia te oe ao e suesueina vaega 89–92 i lenei vaiaso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O fesili nei e mafai ona e faaaoga e uunaia ai tagata o le vasega e faasoa mai se mea mai a latou suesuega o tusitusiga paia: o a mea na e faitauina i lenei vaiaso na faamalosia ai lou faatuatua ia Iesu Keriso? i le valaauga faaperofeta o Iosefa Samita? O a mea na e faitauina na fesoasoani ia te oe e malamalama atili ai i le fuafuaga a le Tama Faalelagi mo Lana fanau?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 89

O le Upu o le Poto o se “mataupu autu faatasi ma se folafolaga.”

• Atonu e tele tagata e vaai i le Upu o le Poto ua na o se lisi o “mea e fai” ma “mea e aua le faia.” Ina ia fesoasoani i tagata o le vasega e manatunatu loloto i mataupu faavae i tua atu o lenei faatonuga, valaaulia i latou e suesue le Mataupu Faavae ma Feagaiga 89 ma ni fesili e pei o nei i le mafaufau: Aisea na tuuina mai ai e le Atua ia i tatou le Upu o le Poto? O le a le mea ua aoao mai e lenei faaaliga ia te i tatou e uiga i le Tama Faalelagi ma Lana fuafuaga mo i tatou? O le fuaitau i le “Punaoa Faaopoopo” e mafai ona fesoasoani. Afai e te lagona o le a aoga i tagata o lau vasega, e mafai ona e valaaulia i latou e lisi i le laupapa ni faatinoga lelei ma leaga ua faailoa mai e le Alii i le Mataupu Faavae ma Feagaiga 89:5-17. Ona mafai lea ona latou iloiloina le “Soifua Maloloina Faaletino ma le Faalelagona” i le Mo le Malosi o le Autalavou (25-27) ma faaopoopo i a latou lisi mea latou te maua. Na faapefea ona faataunuuina folafolaga i fuaiupu 18-21 i o tatou olaga?

• O se tasi lenei o auala e fesoasoani ai i tagata o le vasega e talanoaina mataupu faavae i le Upu o le Poto. E mafai ona vaevae le vasega i ni vaega se tolu ma fai atu i vaega taitasi e faitau le vaega 89, ma vaavaai mo tali i se tasi o fesili nei: O a mataupu faavae e mafai ona tuuina atu le faamalosiauga i se tasi o loo tauivi e usitai i le Upu o le Poto? O a mataupu faavae e mafai ona fesoasoani ia i tatou e aua le faamasino atu i e o tauivi e usiusitai i ai? O a mataupu faavae e mafai ona faamafanafanaina i tatou pe a i ai ni o tatou faafitauli e ui lava o loo ola i le Upu o le Poto? O se vaega o lenei gaoioiga, e mafai ona e faasoa atu le aafiaga o Peresitene Dieter F. Uchtdorf i lana aoaoga ina ia avea ma ave vaalele tau (tagai “Faaauau i le Onosai,” Ensign po o Liahona, Me 2010, 58). Uunai tagata o le vasega ia mafaufau i se mea na latou lagona ai le uunaia e fai i le taimi o le talanoaga, ma tuu atu ia i latou se taimi e tusi ai i lalo o latou lagona.

  tamaiti o loo tamomoe i le matafaga

  Na faaali mai e le Atua le Upu o le Poto e fesoasoani i Ana fanau.

Mataupu Faavae ma Feagaiga 90:1--17

Ua Umia e le Au Peresitene Sili “ki o le malo.”

• O leotootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ua valaaulia ai tagata ia suesue le Mataupu Faavae ma Feagaiga 90: 1-17 e aoao ai e uiga i le Au Peresitene Sili. E mafai ona e fai i tagata o le vasega e faasoa mai mea na latou aoaoina i le fale mai lenei gaoioiga, pe e mafai ona outou suesueina faatasi nei fuaiupu o se vasega. E mafai foi e tagata o le vasega ona maua nei fuaitau i le “O Mai Faalogo i le Perofeta” (Viiga, nu. 13) po o se isi viiga e uiga i perofeta e fesootai i aoaoga i nei fuaiupu. O faapefea ona fesoasoani ia te oe le auaunaga a le Au Peresitene Sili e te iloa ai le Tama Faalelagi ma Iesu Keriso?

Mataupu Faavae ma Feagaiga 91

“O le Agaga e faaalia mai le moni”

• I le lalolagi i aso nei, ua tele savali ua tatou maua e i ai “le tele o mea … e moni” ma “o le tele o mea … e le moni” (fuaiupu 1-2). Valaaulia tagata o le vasega e vaai i le vaega 91 mo fautuaga e uiga i le Apokalifa e mafai ona fesoasoani ia i latou e iloa ai le moni i savali latou te maua. O a ni faataitaiga e mafai ona latou faasoa mai i le ala e fesoasoani ai le Agaga ia i latou e iloa ai le moni?

aikona o punaoa faaopoopo

Punaoa Faaopoopo

O le Upu o le Poto.

Na aoao mai Peresitene Boyd K. Packer:

“O le Upu o le Poto na ‘tuuina mai mo se mataupu autu faatasi ma se folafolaga’ [Mataupu Faavae ma Feagaiga 89:3]. O lena upu o le mataupu autu i le faaaliga o se upu taua tele. O se mataupu autu o se upumoni tumau, o se poloaiga, o se tulafono e mafai ona e faaaogaina e taiala ai oe i le faia o faaiuga. E masani lava o mataupu faavae e le sipelaina mai i ni auiliiliga. O iina e te saoloto ai e sue lou auala i se upumoni tumau, se mataupu faavae, e fai ma ou taula.

“E tusi mai tagata o le ekalesia pe o lea mea ma lea mea ua tetee atu i le Upu o le Poto. Ua lauiloa le lauti, kofe, ‘ava, ma le tapaa e tetee i ai. E le o faamatala maia i nisi auiliiliga. Nai lo lena, tatou te aoao atu le mataupu faatasi ma faamanuiaga folafolaina. “E tele ni masani matautia ma mea ua fai ma vaisu, e mafai e se tasi ona inu pe lamu pe manava i totonu pe tui foi i le tino, e manua ai le tino ma le agaga, o mea ia e le o taua mai i le faaaliga. …

“Faamamalu le mataupu faavae o le Upu o le Poto ma o le a e maua ai faamanuiaga folafolaina” (“O Le Upu o le Poto: O Le Mataupu Faavae ma Folafolaga,” Liahona, Iulai 1996, 19-20).

Faaleleia o Lo Tatou Aoao Atu

Tuu atu soo le molimau. O lau molimau faigofie, ma faamaoni o upumoni faaleagaga e mafai ona i ai se uunaiga mamana i luga o i latou e te aoaoina. E le tau teuteuina ma faaumi lau molimau. E mafai, mo se faataitaiga, o se molimau faigofie o faamanuiaga na e maua mai le ola ai i le Upu o le Poto. (Tagai Aoao Atu i le Ala a le Faaola, 35.)