Far West, xb’aan laj Al Rounds

11–17 octubre

Tzolʼlebʼ ut Sumwank 115–120

“Lix mayej q’axal loq’aq wi’chik choq’ we chiru lix k’iijik”

Naq nakakawresi aawib’ re k’utuk, jultikaq aawe naq laa wajom a’an xtenq’ankileb’ li komon chixch’olaninkil lix paab’aaleb’ chirix li Jesukristo.

Tz’iib’a li nakak’oxla

Xkanab’ankileb’ chi wotzok

Rub’elaj naq tat-aatinaq chirixeb’ li na’leb’ wankeb’ sa’eb’ li tasal 115–120 li xataweb’ xyaalal, patz’ reheb’ li komon naq te’xye k’a’ru xe’xtaw xyaalal a’an. Qayehaq, naru nakakanab’eb’ li komon chixtz’aqob’resinkil ru li ch’ol aatin a’in: “Ninb’antioxi naq xwil ruheb’ li tasal 115–120 xb’aan naq …”

Xk’utb’al li tzolʼlebʼ

Tzol’leb’ ut Sumwank 115:4–6

Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun ramleb’ ut muheb’aal.

• Eb’ li komon naru neke’xtz’il rix li raatin li Awa’b’ej Russell M. Nelson “Tz’aqal xk’ab’a’ li Iglees” (Jolomil ch’utub’aj-ib’ re octubre 2018) re xsik’b’al li na’leb’ taatenq’anq reheb’ chixtawb’aleb’ ru li raqal 4–6. K’a’ut naq aajel ru roksinkil tz’aqal xk’ab’a’ li Iglees?

• Chirix naq te’ril ru Tzol’leb’ ut Sumwank 115:4–6, eb’ li komon naru te’aatinaq chirix chan ru naq li Iglees ut eb’ li komon a’aneb’ chanchan saqen malaj eetalil. Naru nakak’ut xjalam-uuch jun li faro sa’ jun kawil hab’ ut taapatz’ reheb’ li komon k’a’ru rilom rik’in li na’leb’ wan sa’eb’ li raqal 5–6. Chan ru naq lix ch’utub’ankil eerib’ sa’ “xb’een li ch’och’ Sion ut sa’ xb’eeneb’ li roqechal” naxk’e “eemuheb’aal chiru li kaq-sut-iq’ ”? (raqal 6).

  

  Naru nokolemtz’un jo’ jun saqen re xtenq’ankileb’ li qas qiitz’in chixtawb’al xmuheb’aaleb’ sa’ li Iglees.

Tzolʼlebʼ ut Sumwank 117

Eb’ li qamayej loq’eb’ choq’ re li Qaawa’.

• Patz’ reheb’ li komon naq te’xk’oxla naq a’aneb’ laj Newel K. Whitney malaj li rixaqil a’an, xElizabeth. A’aneb’ aj eechal re jun nimla k’ay aran Kirtland, a’b’an li Qaawa’ kixpatz’ reheb’ naq te’xkanab’ li k’a’ru reheb’ ut te’xik aran Missouri. Chirix a’an naru neke’ril ruheb’ li raqal 1–11 ut te’xye k’a’ruhaq na’leb’ kixye li Qaawa’ li taatenq’anq reheb’ chixb’aanunkil li mayej a’an.

• Xk’utb’aleb’ jalam-uuch naru naxtenq’aheb’ li komon chixk’eeb’al reetal li “jun tz’uqul” li naqatawa sa’ xna’aj li “k’a’ru q’axal nim xwankil” (raqal 8). Wi nakawaj, k’uteb’ k’a’aq re ru jo’ jun tz’uqul li ha’ malaj jun li b’oteey, malaj jun t’orol li cacao ut jun li chocolaat. Eb’ li komon maare te’xk’oxla jalaneb’ chik eetalil. Naru ajwi’ nakatz’iib’a chiru li pizarron jun tz’uqul ut li k’a’ru q’axal nim xwankil ut taakanab’eb’ li komon chixtz’iib’ankil k’a’ raj ru tento “taqakanab’ ” (raqal 5) re taqak’ul lix “naab’alil” li Dios (raqal 7).

• Wi eb’ li komon xe’reek’a junaq na’leb’ sa’ xch’ooleb’ naq xe’ril ru li raatin li Qaawa’ chirix laj Oliver Granger sa’eb’ li raqal 12–15, kanab’eb’ chixwotzb’al. K’a’ut naq eb’ li qamayej maare mas loq’eb’ wi’chik choq’ re li Qaawa’ chiru li tumin naqataw?

Tzol’leb’ ut Sumwank 119–120

Naq naqatoj li lajetqil, nokotenq’an chixkab’lankil ut “chixsantob’resinkil li ch’och’ Sion.”

• K’a’jo’ raj xnimal li kawilal sa’ musiq’ej taatawmanq wi eb’ li komon te’xwotz raj chirib’ileb’ rib’ li osob’tesihom neke’xk’ul xb’aan xpaab’ankil li chaq’rab’ re li lajetqil. Naru ajwi’ neke’ril ru Tzol’leb’ ut Sumwank 119:6 ut te’aatinaq chirix chan ru naq li chaq’rab’ a’an naru “naxsantob’resi li ch’och’ Sion” ut naru naxk’e li qateep ut uq’ej jo’ jun “ch’och’ Sion” choq’ qe laa’o. Naru ajwi’ neke’ril ru Malakias 3:8–12 re xk’eeb’al reetal li osob’tesihom naxyeechi’i li Qaawa’ xb’aan xtojb’al li lajetqil.

• Wi wankeb’ xpatz’om chirix k’a’ru na’oksiman wi’ li lajetqil, naru nakakanab’eb’ chirilb’al ru li tasal 120 ut lix ch’olob’ankil a’an li natawman sa’ “Xkomon chik li k’anjeleb’aal.” (Li Elder David A. Bednar kixch’olob’ ajwi’ a’an sa’ “Las ventanas de los cielos” [Liahona, noviembre 2013, 17–20]). Chan ru naru taqatenq’a li qas qiitz’in chixk’iresinkil lix paab’aaleb’ chirix lix chaq’rab’ li Qaawa’ re li lajetqil?

Xkomon chik li k’anjeleb’aal

Li Ch’uut re Xk’anjelankil li Lajetqil

Li Elder Robert D. Hales kixye:

“Jo’ chanru xk’utb’esihom li Qaawa’, li roksinkil li lajetqil b’eresinb’il xb’aan jun li ch’uut b’ar wi’ wan li Xb’eenil Awa’b’ejil, lix Molameb’ li Kab’laju chi Apostol, ut li Obispil aj Jolominel. Li Qaawa’ naxch’olob’ tz’aqal naq lix k’anjel li ch’uut tento naq b’eresinb’ilaq “xb’aan lix yaab’ inkux laa’in reheb’ ” [Tzol’leb’ ut Sumwank 120:1]. A’an a’in li Ch’uut re Xk’anjelankil li Lajetqil.

“K’a’jo’ xchaq’al ru rilb’al naq li ch’uut a’an k’ojk’o xch’ool chirab’inkil xyaab’ xkux li Qaawa’. Li junjunq chi komon naxnaw k’a’ru yoo chi b’aanumank sa’ li ch’uut ut natz’aqon chi sa’. Maak’a’ nab’aanuman toj reetal naq wankeb’ sa’ aatin sa’ li ch’uut. Chixjunil lix tuminal li lajetqil na’oksiman sa’ lix k’anjel li Iglees, jo’—rilb’aleb’ li neb’a’ ut eb’ li wankeb’ rajom ru, eb’ li santil ochoch, xkomoneb’ chik li kab’l ut xsab’esinkileb’ li kapiiy, li tzolok—sa’ jun ajwi’ li aatin, lix k’anjel li Qaawa’. …

“… Ninwotz xnawom inch’ool chirix li Ch’uut re Xk’anjelankil li Lajetqil. Nintz’aqon sa’ li ch’uut a’an chiru wuqlaju chihab’, jo’ Obiisp aj Jolominel sa’ li Iglees ut anajwan jo’ komon sa’ lix Molameb’ li Kab’laju chi Apostol. Lix tuminal li lajetqil re li Iglees ka’ajwi’ na’oksiman choq’ re li rajom li Qaawa’ ” (El diezmo: Una prueba de fe con bendiciones eternas,” Liahona, noviembre 2002, 28).

Xchaab’ilob’resinkil li qak’utum

Kanab’eb’ li tzolb’ileb’ aab’aan chixtzolb’aleb’ rib’ chirib’ileb’ rib’. “Chi kok’ aj xsa’, us tana’ xb’oqb’aleb’ li komon sa’ li tzoleb’aal chixtenq’ankil rib’ chirib’ileb’ rib’ chixtawb’al xsumenkileb’ lix patz’om. Naq musiqanb’ilat xb’aan li Musiq’ej, naru taab’aanu a’in us ta ak nakanaw lix sumenkil li patz’om” (Li k’utuk jo’ li Kolonel, 24).