Nauvoo li ch’ina-us, xb’aan laj Larry Winborg

25–31 octubre

Tzolʼlebʼ ut Sumwank 124

“Jun ochoch choq’ re lin k’ab’a’ ”

Re naq li Musiq’ej tixjultikaheb’ qe li na’leb’ naq yooko chi k’utuk (chi’ilmanq Jwan 14:26), xb’een wa tento te’qatzol chi yalb’il qaq’e ut te’qatz’il rix li na’leb’ a’an.

Tz’iib’a li nakak’oxla

Xkanab’ankileb’ chi wotzok

K’oxla xpatz’b’al reheb’ li komon naq te’xwotz k’a’ruhaq xe’xtaw sa’ Tzol’leb’ ut Sumwank 124 li kitenq’an reheb’ chixtawb’al xkomon xnawomeb’ chirix junaq na’leb’ re li evangelio. K’a’ru xe’ril ru—maare sa’ junjunqal malaj jo’ junkab’al—li xjalok reek’ahomeb’, xk’a’uxleb’, malaj xwanjikeb’?

Xk’utb’al li tzolʼlebʼ

Tzol’leb’ ut Sumwank 124:15, 20

Li Qaawa’ nasaho’ xch’ool rik’in li anchalil ch’oolej.

• Sa’ li tasal 124, li Qaawa’ kisaho’ xch’ool rik’in laj Hyrum Smith ut laj George Miller xb’aan lix anchalil xch’ooleb’. Re xtenq’ankileb’ li komon chixtzolb’al li chaab’ilal a’an chi us, naru taapatz’ reheb’ naq te’ril ru Tzol’leb’ ut Sumwank 124:15, 20 ut te’xtz’il rix li te’xtzol chirix li anchalil ch’oolej sa’eb’ li raqal a’an. K’a’ chik ru naqatzol sa’eb’ li raqal reheb’ li loq’laj hu b’ar wi’ wankeb’ li aatin “Anchalil xch’ool” sa’ li K’utul Raqal reheb’ li Loq’laj Hu malaj sa’ li raatin li Elder Richard J. Maynes “Xk’ojob’ankil xch’ool li Qaawa’ ut laa junkab’al chawix”? (Jolomil ch’utub’aj-ib’ re octubre 2017). Eb’ li komon maare naru neke’xye resileb’ junjunq kristiaan neke’xnaweb’ ru li wankeb’ x’anchalil xch’ool. K’a’ut naq li anchalil ch’oolej a’an jun chaab’ilal q’axal loq’?

Tzol’leb’ ut Sumwank 124:22–24, 60–61

Li Qaawa’ naraj naq te’qak’ul ut te’qak’ulub’a jalan chik li qas qiitz’in.

• Eb’ li komon maare neke’xtzol b’ayaq lix na’leb’eb’ sa’ li raatin li Qaawa’ chirix li Ochoch Nauvoo li naru natenq’an reheb’ chi wotzok rik’ineb’ kristiaan moko eb’ aj santil paab’anel ta malaj li xe’xkanab’ xik sa’ li Iglees. Maare naru nakayiib’ xjalam-uuch junaq ochoch chiru li pizarron ut taakanab’eb’ li komon chixsik’b’aleb’ sa’ Tzol’leb’ ut Sumwank 124:22–24, 60–61 li aatin kiroksi li Qaawa’ re xch’olob’ankil li rajb’al li Ochoch Nauvoo. Chirix a’an naru neke’xtz’iib’aheb’ li aatin a’an sa’ xsutam li ochoch. Chan ru naq eb’ li aatin a’an naru neke’oksiman ajwi’ rik’in lix Iglees li Jesukristo? K’a’ru naru naqab’aanu re wank chi jo’kan ajwi’ sa’ li qateep ut sa’eb’ li qochoch?

Tzol’leb’ ut Sumwank 124:25–45, 55

Li Qaawa’ nokoxtaqla chixkab’lankileb’ li santil ochoch re naq tooruuq chixk’ulb’aleb’ li loq’laj k’ojob’anb’il k’anjel.

• Eb’ li komon maare naru neke’xk’oxla naq wankeb’ rochoch Nauvoo sa’ 1841, ut naq yooqeb’ chi k’anjelak sa’ li santil ochoch re Nauvoo, jun li ramiiweb’ naxpatz’, “K’a’ut naq toj yooko chixkab’lankileb’ li santil ochoch a’in?” K’a’ raj ru taqasume wi’? Eb’ li komon naru neke’xsik’ xna’leb’ sa’ Tzol’leb’ ut Sumwank 124:28–30, 37–42, 55. Wi junaq reheb’ li komon ink’a’ neke’xnaw ru li k’ojob’anb’il k’anjel neke’yeeman sa’eb’ li raqal a’an, naru nakach’olob’ rajomeb’ ut li rosob’tesihomeb’ li k’ojob’anb’il k’anjel a’an. Okan sa’ temples.ChurchofJesusChrist.org re xnawb’al k’a’ru naru naseraq’iman chirix rochochil li santil ochoch, ut re xtawb’aleb’ junjunq xjalam-uucheb’ li santil ochoch li naru nakak’ut sa’ laa tzoleb’aal.

  

  Laj Jose Smith chire li santil ochoch re Nauvoo, xb’aan laj Gary E. Smith

Tzol’leb’ ut Sumwank 124:45–55

Li Qaawa’ taarosob’tesiheb’ li neke’xyal xq’e chi ab’ink chiruheb’ lix taqlahom.

• Eb’ laj santil paab’anel ke’taqlaak chixkab’lankil jun santil ochoch sa’ li na’ajej Jackson, a’b’an “ke’rame’ ru xb’aaneb’ li xik’ neke’ilok reheb’ ” (Tzol’leb’ ut Sumwank 124:51). Sa’eb’ li raqal 49–55, b’ar wi’ li Qaawa’ na’aatinak chirix li na’leb’ a’an, maare wan junaq aatin aj k’ojob’anel ch’oolej choq’ reheb’ li kristiaan li neke’raj ab’ink chiruheb’ lix taqlahom li Dios, a’b’an ink’a’ neke’ru xb’aaneb’ lix junkab’al malaj k’a’ruhaq chik li na’leb’. Naru nakawil ruheb’ li raqal a’an rik’ineb’ li komon ut taapatz’ reheb’ naq te’xk’oxlaheb’ hoonal b’ar wi’ eb’ li kristiaan maare ink’a’ neke’ru chixb’aanunkil li us xb’aan junaq ch’a’ajkilal ink’a’ neke’ru chixtuqub’ankil ru. K’a’ru li na’leb’ naqataw sa’eb’ li raqal a’in li naru naxtenq’a anihaq li yoo chi nume’k sa’ li ch’a’ajkilal a’an? K’a’ru nak’utman chiqu sa’eb’ li raqal a’an chirix li ab’ink chiruheb’ li chaq’rab’?

Tzol’leb’ ut Sumwank 124:91–92

Li Qaawa’ naru nokoxb’eresi rik’in li rosob’tesihom li yuwa’b’ejil aj k’anjel.

• Ma naru neke’tenq’aak raj li komon rik’in aatinak chirixeb’ li yuwa’b’ejil aj k’anjel ut eb’ li rosob’tesihom a’an? Naru nakatikib’ rik’in xb’oqb’aleb’ chirilb’al ru Tzol’leb’ ut Sumwank 124:91–92, re xsik’b’al k’a’ru kib’oqe’ chixb’aanunkil laj Hyrum Smith. Chirix a’an naru nakatz’iib’a chiru li pizarron K’a’ru ut K’a’ut ut taapatz’ reheb’ li komon naq te’ril ru “Bendiciones patriarcales” (Leales a la Fe, 31–33) re xnawb’al k’a’ruheb’ li rosob’tesihom li yuwa’b’ejil aj k’anjel ut k’a’ut naq ninqeb’ xloq’al. Chan ru naru naxkawresi rib’ anihaq re xk’ulb’al li rosob’tesihom li yuwa’b’ejil aj k’anjel? Naru taab’oqeb’ junjunq li komon li ak xe’xk’ul li rosob’tesihom li yuwa’b’ejil aj k’anjel chixch’olob’ankil k’a’ut naq neke’xb’antioxi a’an. (Jultika reheb’ naq ink’a’ te’xwotz li k’a’ru ka’ajwi’ reheb’ a’an malaj jwal loq’.) Chan ru naru naqak’ut naq naqak’e xloq’al li rosob’tesihom li yuwa’b’ejil aj k’anjel?

Xchaab’ilob’resinkil li qak’utum

Tijon chirixeb’ li komon sa’ laa tzoleb’aal. Tijon chirixeb’ li kristiaan nakatzoleb’ rik’in xyeeb’al xk’ab’a’eb’. Naru nakattijok re xpatz’b’al naq taataw ru li rajomeb’ ru ut re xnawb’al k’a’ru taak’ut re xtenq’ankileb’ rik’in li rajomeb’ ru. Naru ajwi’ nakapatz’ re li qaChoxahil Yuwa’ naq “tixkawresi xch’ooleb’ ” (Alma 16:16) re te’xk’ul li yaal li taak’ut. (Chi’ilmanq Li k’utuk jo’ li Kolonel, 6.)