Laa’o rik’ineb’, ut eb’ a’an qik’in, xb’aan li xCaitlin Connolly

1–7 noviembre

Tzolʼlebʼ ut Sumwank 125–128

“Jun xyaab’ xkux li sahil ch’oolejil choq’ reheb’ li yo’yo ut eb’ li kamenaq”

Tz’il rix li raatin li Elder Ulisses Soares: “Laj k’utunel li jwal chaab’il, a’an li nak’utuk rik’in xb’aanuhom. Xk’utb’al li k’a’ru naqayu’ami chi yaal a’an naru taareek’asi xch’ooleb’ li ani naqatzol” (Chan ru naq tintaw xyaalal?” Jolomil ch’utub’aj-ib’ re abril 2017).

Tz’iib’a li nakak’oxla

Xkanab’ankileb’ chi wotzok

Eb’ li komon naru neke’xtz’iib’a chiru li pizarron ch’ol aatin neke’xtaw sa’ Tzol’leb’ ut Sumwank 125–128 li nim xloq’al choq’ reheb’. Kanab’eb’ chixwotzb’al xk’a’uxleb’ chirixeb’ li ch’ol aatin a’an. Chan ru naq xjala xb’aanuhomeb’ chiru li xamaan a’in xb’aan li yaal xe’xtzol?

Xk’utb’al li tzolʼlebʼ

Tzolʼlebʼ ut Sumwank 126

“Yalb’ilaq aaq’e chirilb’aleb’ laa junkab’al.”

• Xb’aaneb’ li b’oqb’il k’anjel kixk’ul laj Brigham Young sa’ li Iglees ki’ajman ru naq a’an ut lix junkab’al te’xb’aanu ninqi mayej; li raatin li Qaawa’ choq’ re laj Brigham sa’ li tasal 126 naru naxtikib’ junaq aatinak sa’ li tzoleb’aal chirix k’a’ut naq li Qaawa’ wan naq naraj naq toomayejaq sa’ li qak’anjel. Chan ru nokoxtenq’a li Qaawa’ chixb’aanunkil li k’a’ru teneb’anb’il sa’ qab’een sa’ li qochoch, sa’eb’ li qab’oqb’il k’anjel, malaj sa’ jalan chik xcha’al li yu’am?

Tzol’leb’ ut Sumwank 127:2–4

Naru naqakanab’ qib’ sa’ ruq’ li Qaawa’ sa’eb’ li ch’a’ajkil hoonal.

• Chan ru naq Tzol’leb’ ut Sumwank 127:2–4 naru naxtenq’aheb’ li komon li neke’reek’a naq, jo’ laj Jose Smith, yookeb’ chi numxik sa’ “chamal ha’ ”? Naru taapatz’ reheb’ li komon naq te’ril ru li raqal a’an ut te’xwotz chan raj ru te’xch’olob’ chi k’osb’il ru lix na’leb’ laj Jose rik’ineb’ lix ch’a’ajkilal. K’a’ru li ch’ol aatin reheb’ li raqal a’in tixtenq’a raj anihaq li yoo chixnumsikil ch’a’ajkilal? Chan ru naq laj Jose kixkanab’ rib’ sa’ ruq’ li Qaawa’ sa’eb’ lix yalb’al rix? Chan ru naru naqataaqe lix b’aanuhom a’an?

Tzolʼlebʼ ut Sumwank 128

Lix kolb’aleb’ li qaxe’ qatoon aajel ru re li qakolb’al laa’o.

• K’oxla chan ru naru nakawaklesi xch’ooleb’ li komon chi tz’aqonk sa’ li k’anjel re li santil ochoch ut re li resilal li junkab’al. Tzol’leb’ ut Sumwank 128:15–18 naru naxtenq’aheb’ chireek’ankil naq aajel ru xseeb’ankil li k’anjel a’in; naru nakak’e xb’oqb’aleb’ chixsik’b’al sa’eb’ li raqal a’in k’a’ruhaq tixnimob’resi rajomeb’ chixkub’sinkil xha’eb’ lix xe’ xtooneb’. Naru neke’tenq’aak chixtz’ilb’aleb’ rix li raqal a’in xb’aaneb’ li patz’om jo’eb’ a’in: K’a’ut naq “chi moko laa’o chi maak’a’eb’ li qakamenaq nokoru chi tz’aqlok qu”? (raqal 15). K’a’ut naq laj Jose Smith naxye naq li kub’iha’ choq’ reheb’ li kamenaq a’an li “q’axal nim xloq’al re chixjunil li na’leb’ li wan sa’ li evangelio li junelik nakana”? (raqal 17; chi’ilmanq ajwi’ li aatin li wan sa’ “Xkomon chi li k’anjeleb’aal”). Chan raj ru naru namajewaak li ruchich’och’ wi maak’a’ “junaq paay chi junajinel b’ak’leb’ li te’junajiiq wi’ li yuwa’b’ej ut li alal k’ajolb’ej”? (raqal 18). Wi eb’ li komon neke’raj xtenq’ re xtikib’ankil li k’anjel re resilal li junkab’al, naru nakab’oq laj jolominel re li santil ochoch ut li resilal li junkab’al re li teep chixk’utb’al FamilySearch.org chiruheb’.

  Naru ajwi’ nakawaklesi xch’ooleb’ rik’ineb’ raqal li neke’aatinak chirix li sahil ch’oolejil naxk’e li k’anjel re li santil ochoch ut li resilal li junkab’al, jo’ Tzol’leb’ ut Sumwank 128:19–23. Eb’ li komon naru neke’ril ruheb’ li raqal a’an ut te’xsik’ ch’ol aatin li te’xk’ut k’a’ru kireek’a laj Jose Smith chirix xkolb’aleb’ li kamenaq. Chirix a’an, naru taapatz’ reheb’ naq te’xwotz li reek’ahomeb’ ajwi’ a’an chirix li k’anjel a’in. Xk’utb’al jun reheb’ li video wankeb’ sa’ “Xkomon chik li k’anjeleb’aal” naru ajwi’ naxwaklesi xch’ooleb’.

• Xb’aan naq lix kolb’aleb’ li kamenaq ka’ajwi’ nab’aanuman sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, naru naqach’olob’ li tzol’leb’ a’in chiruheb’ li kristiaan maajun wa rab’ihomeb’ resil a’an. Eb’ li komon naru neke’xsik’ sa’ Tzol’leb’ ut Sumwank 128 junaq na’leb’ li naru neke’xwotz sa’ junaq seraq’ik rik’in anihaq li tixpatz’ chirix li kub’iha’ choq’ reheb’ li kamenaq. K’a’ru naxk’ut chiqu li tzol’leb’ a’in chirix li qaChoxahil Yuwa’ ut chirix li Jesukristo? Kanab’eb’ li komon chixtzolb’al k’a’ raj ru te’xye.

  

  Xb’aanunkil li k’anjel re li santil ochoch choq’ reheb’ li qaxe’ qatoon naxjunaji li qaam rik’ineb’ li raam a’an.

Xkomon chik li k’anjeleb’aal

Eb’ li video chirix li k’anjel re resilal li junkab’al (ChurchofJesusChrist.org).

“No podía explicar mis sentimientos”

“La redención de los muertos me redimió a mí”

“La visita de papá”

“Conectados a familias eternas”

“Recogedores en el Reino”

“Entre ellos y yo”

“Hay para Dios alguna cosa difícil?”

Li Awaʼbʼej Gordon B. Hinckley kixye:

“Lix tojb’al rix lix maakeb’ chixjunil xb’aan li Jesus a’an jun xnimal mayej jo’ uuchilej. A’an kixk’ojob’ chan ru naq a’anaq aj aatinanel chirix chixjunil li winqilal. Li na’leb’ a’in li naru wi’ jun li winq chi k’anjelak jo’ ruuchil junaq chik nab’aanuman sa’eb’ lix k’ojob’anb’il k’anjel li rochoch li Qaawa’. Arin nokok’anjelak jo’ ruuchileb’ li ani kamenaqeb’ chi ink’a’ ke’xnaw ru li evangelio. Lix k’anjeleb’ a’an, a’an xk’ulub’ankil malaj xtz’eqtaanankil li k’ojob’anb’il k’anjel nab’aanuman. Chi jo’kan, wankeb’ chi juntaq’eet rik’ineb’ li neke’b’eek sa’ xb’een li ruchich’och’. Eb’ li kamenaq wankeb’ ajwi’ rosob’tesinkil jo’eb’ li yo’yo. Jo’kan wi’chik, k’a’jo’ xnimal ru ut xchaq’al ru li naxb’aanu li Nimajwal Dios rik’in li k’utb’esinb’il na’leb’ naxk’e re lix profeet” (“Las cosas grandes que Dios ha revelado,” Liahona, mayo 2005).

Xchaab’ilob’resinkil li qak’utum

Tijon chirixeb’ li komon sa’ laa tzoleb’aal. Tijon chirixeb’ li nakatzoleb’ rik’ineb’ xk’ab’a’ ut sik’ xtawb’al ru li rajomeb’ ru. Naq taab’aanu a’an, li qaChoxahil Yuwa’ naru nakatxtenq’a chixnawb’al k’a’ru taak’ut re xtenq’ankileb’ rik’in li rahomeb’ ru. (Chi’ilmanq Li k’utuk jo’ li Kolonel, 6.)