Hihifo Mamaʻo, tā fakatātaaʻi ʻe Al Rounds

11–17 ʻOkatopa

Tokāteline mo e Ngaahi Fuakava 115–120

“ʻE Toputapu Ange Kiate Au ʻa ʻEne Feilaulaú ʻI Heʻene Tupulakí”

ʻI hoʻo teuteu ke akoʻí, manatuʻi ko hoʻo tefitoʻi taumuʻá ke tokoniʻi e niʻihi kehé ke langaki ʻenau tui kia Sīsū Kalaisí.

Lekooti Hoʻo Ngaahi Ongó

Fakaafeʻi e Feʻinasiʻakí

Kimuʻa peá ke talanoa fekauʻaki mo e ngaahi tefitoʻi moʻoni mei he vahe 115–20 naʻe ʻuhingamālie kiate koé, kole ki he kau mēmipa ʻo e kalasí ke nau vahevahe ʻa e meʻa ne ʻuhingamālie kiate kinautolú. Hangē ko ʻení, te ke lava ʻo fakaafeʻi e kau mēmipa ʻo e kalasí ke nau fakakakato ʻa e foʻi sētesi ko ʻení: “ʻOku ou houngaʻia ʻi heʻeku lau ʻa e vahe 115–20 koeʻuhí …”

Akoʻi ʻa e Tokāteliné

Tokāteline mo e Ngaahi Fuakava 115:4–6

Ko e Siasi ʻo Sīsū Kalaisi ʻo e Kau Māʻoniʻoni ʻo e Ngaahi ʻAho Kimui Ní ko ha maluʻanga mo ha hūfangaʻanga.

• ʻE lava ke fekumi ʻe he kau mēmipa ʻo e kalasí ʻi he lea ʻa Palesiteni Lāsolo M. Nalesoni “Ko e Hingoa Totonu ʻo e Siasí” (Ensign pe Liahona, Nōvema 2018, 87–90) ki ha ngaahi fakakaukau ʻe tokoni ke mahino kiate kinautolu ʻa e veesi 4–6. Ko e hā ʻoku mahuʻinga ai ke fakaʻaongaʻi ʻa e hingoa totonu ʻo e Siasí?

• Hili e laukonga fakataha ʻi he Tokāteline mo e Ngaahi Fuakava 115:4–6, ʻe lava ke aleaʻi ʻe he kau mēmipa ʻo e kalasí ʻa e founga ʻoku tatau ai ʻa e Siasí mo hono kāingalotú pea mo ha maama pe ko ha fuká. Te ke lava ʻo fakaʻaliʻali ha fakatātā ʻo ha maama-kamo ʻi ha matangi pea ʻeke ki he kau mēmipa ʻo e kalasí pe ʻoku founga fēfē ʻene felāveʻi mo e pōpoaki ʻi he veesi 5–6. Kuo hoko fēfē ʻa e fakataha ki “Saione, … [mo] hono ngaahi siteikí” ke ke maʻu ai ha “ungaʻanga mei he afaá”? (veesi 6).

  

  ʻE lava ke tau ulo atu ko ha ngaahi maama ke tokoni ki he niʻihi kehé ke nau maʻu ha hūfangaʻanga ʻi he Siasí.

Tokāteline mo e Ngaahi Fuakava 117

ʻOku toputapu ʻetau ngaahi feilaulaú ki he ʻEikí.

• Fakaafeʻi e kau mēmipa ʻo e kalasí ke nau fakakaukauloto ko Niueli K. Uitenī pe ko hono uaifi ko ʻElisapetí kinautolu, ʻa ia ne ʻi ai haʻana falekoloa lahi ʻi Ketilani ka naʻe folofola ʻe he ʻEikí ke tuku ʻena koloá ka na hiki ki Mīsuli. Hili iá, ʻe lava ke nau lau ʻa e veesi 1–11 pea vahevahe ha meʻa naʻe folofola ʻaki ʻe he ʻEikí ʻe ala tokoni ke nau fai ʻa e feilaulau ko ʻení.

• ʻE ala tokoni ha ʻū fakatātā ke fakakaukau ʻa e kau mēmipa ʻo e kalasí ki he “kiʻi momoʻi meʻa” ʻoku tau faʻa mānumanu ki ai he taimi ʻe niʻihi kae tuku ʻa e “ngaahi meʻa mamafá” (veesi 8). Fakakaukau ke fakaʻaliʻali ha ʻū meʻa hangē ko ha tulutā ʻo ha meʻi vai mo ha foʻi hina vai pe ko ha kiʻi meʻi sokoleti (chocolate chip) mo ha foʻi pā sokoleti. Mahalo naʻa fakakaukau ʻa e kau mēmipa ʻo e kalasí ki ha ngaahi sīpinga kehe. Te ke lava foki ʻo tohiʻi ʻi he palakipoé ʻa e kiʻi momoʻi meʻa mo e ngaahi meʻa mamafa pea kole ki he kau mēmipa ʻo e kalasí ke nau hiki ha ngaahi sīpinga ʻo ha ngaahi meʻa ʻoku fie maʻu ke tau “tukuange” (veesi 5) kae lava ke tau maʻu ʻa e “fuá ʻo lahi” ʻa e ʻOtuá (veesi 7).

• Kapau ne maʻu ʻe he kau mēmipa ʻo e kalasí ha ngaahi ongo lolotonga ʻenau lau ʻa e folofola ʻa e ʻEikí kau kia ʻŌliva Kelenisā ʻi he veesi 12–15, fakaafeʻi ke nau vahevahe ia. Ko e hā e ʻuhinga ka toputapu ange ai ʻetau feilaulaú ki he ʻEikí ʻi heʻetau tupulakí?

Tokāteline mo e Ngaahi Fuakava 119–20

ʻI heʻetau totongi vahehongofulú, ʻoku tau tokoni ai ke langa mo “fakamāʻoniʻoniʻi […] ʻa e fonua ko Saioné.”

• Fakakaukauloto ki he mālohi fakalaumālie ʻe lava ke maʻu mei hono fevahevaheʻaki ʻe he kau mēmipa ʻo e kalasí ʻa e ngaahi tāpuaki kuo nau maʻu mei he talangofua ki he fono ʻo e vahehongofulú. ʻE lava foki ke nau lau ʻa e Tokāteline mo e Ngaahi Fuakava 119:6 pea aleaʻi ʻa e founga ʻe lava ai ʻe he fono ko ʻení ʻo “fakamāʻoniʻoniʻi […] ʻa e fonua ko Saioné” pea ngaohi hotau uōtí pe koló ke hoko “ko ha fonua ʻo Saione kiate [kitautolu].” ʻE lava foki ke nau lau ʻa e Malakai 3:8–12 ke ʻiloʻi ʻa e ngaahi tāpuaki ʻoku talaʻofa ʻe he ʻEikí ki hono totongi ʻo e vahehongofulú.

• Kapau ʻoku ʻi ai ha ngaahi fehuʻi ʻa e kau mēmipa ʻo e kalasí ki he founga ʻoku ngāue ʻaki ai ʻa e vahehongofulú, te ke lava ʻo fakaafeʻi ke nau lau ʻa e vahe 120 pea mo e fakamatala ʻi he “Ngaahi Maʻuʻanga Tokoni Kehé.” (ʻOku ʻomi foki ʻe ʻEletā Tēvita A. Petinā ha fakamatala ʻe ala tokoni ʻi he “Ko e Ngaahi Matapā ʻo e Langí” [Ensign pe Liahona, Nōvema 2013, 19–20].) Te tau tokoni fēfē ki he niʻihi kehé ke fakatupulaki ʻenau tui ki he fono ʻo e vahehongofulu ʻa e ʻEikí?

Ngaahi Maʻuʻanga Tokoni Kehé

Ko e Fakataha Alēlea ki hono Fakaʻaongaʻi ʻo e Vahehongofulú.

Naʻe pehē ʻe ʻEletā Lōpeti D. Heili:

“Hangē ko ia naʻe fakahā ʻe he ʻEikí, ʻoku aleaʻi hono fakaʻaongaʻi ʻo e vahehongofulú ʻi ha fakataha alēlea ʻoku kau ki ai ʻa e Kau Palesitenisī ʻUluakí, Kōlomu ʻo e Kau ʻAposetolo ʻe Toko Hongofulu Mā Uá, mo e Kau Pīsopeliki Pulé. ʻOku fakahā pau mai ʻe he ʻEikí ʻe fakahinohinoʻi ʻa e ngāue ʻa e fakataha alēleá ‘[ʻi] hoku leʻo ʻoʻokú kiate kinautolu’ [Tokāteline mo e Ngaahi Fuakava 120:1]. ʻOku ui ʻa e fakataha alēlea ko ʻení ko e Fakataha Alēlea ki hono Fakaʻaongaʻi ʻo e Vahehongofulú.

“ʻOku fakaofo ke mamata tonu ʻi he talangofua ʻa e fakataha alēlea ko ʻení ki he leʻo ʻo e ʻEikí. ʻOku ʻilo pea kau ʻa e mēmipa takitaha ki he ngaahi tuʻutuʻuni kotoa pē ʻa e fakataha alēleá. ʻOku ʻikai fai ha tuʻutuʻuni kae ʻoua kuo loto taha e fakataha alēleá. ʻOku fakaʻaongaʻi ʻa e paʻanga vahehongofulu kotoa pē ki he ngaahi taumuʻa ʻa e Siasí, kau ai ʻa e uelofeá—tokoniʻi e masivá mo e faingataʻaʻiá—ngaahi temipalé, ko hono langa mo tokangaʻi e ngaahi falelotú, akó, nāunau fakalēsoní—ʻi hono fakanounoú, ko e ngāue ʻa e ʻEikí. …

“… ʻOku ou fakamoʻoni ki he Fakataha Alēlea ki hono Fakaʻaongaʻi ʻo e Vahehongofulú. Kuó u tangutu ʻi he fakataha alēlea ko ʻení ʻi ha taʻu ʻe 17, ʻi heʻeku hoko ko e Pīsope Pule ʻo e Siasí pea ʻi he taimí ni ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Kuo fakaʻaongaʻi ʻa e paʻanga vahehongofulu ʻa e Siasí ni ki Heʻene ngaahi taumuʻá, ʻo ʻikai ha fakaʻatā makehe” (“Tithing: A Test of Faith with Eternal Blessings,” Ensignpe Liahona, Nov. 2002, 28).

Fakatupulaki ʻEtau Founga Akoʻí

Fakaafeʻi ʻa e kau akó ke nau feakoʻiʻaki. “ʻE feʻunga ke fakaafeʻi e kau akó ke nau fetokoniʻaki ʻi hono kumi e ngaahi tali ki heʻenau ngaahi fehuʻí. ʻE lava ke ke fili ke fai ʻeni ʻo ka ueʻi koe ki ai ʻe he Laumālié, neongo kapau ʻokú ke ongoʻi ʻokú ke ʻilo e talí” (Ko e Faiako ʻi he Founga ʻa e Fakamoʻuí, 24).