Nāvū

Nāvū ko e Fakaʻofoʻofá, tā fakatātaaʻi ʻe Larry Winborg

25–31 ʻOkatopa

Tokāteline mo e Ngaahi Fuakava 124–125

“Ha Fale ki Hoku Hingoá”

Ke hanga ʻe he Laumālié ʻo fakamanatu mai ʻa e ngaahi tefitoʻi moʻoní ʻi he lolotonga ʻetau faiakó (vakai, Sione 14:26), kuo pau ke tau tomuʻa ako faivelenga mo fakalaulauloto ki he ngaahi tefitoʻi moʻoni ko iá.

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

Fakakaukau ke fakaafeʻi ʻa e kau mēmipa ʻo e kalasí ke nau vahevahe ha meʻa ne nau maʻu ʻi he Tokāteline mo e Ngaahi Fuakava 124–25 ne fakatupunga ai haʻanau fakakaukau ki ha tefitoʻi moʻoni ʻo e ongoongoleleí ʻi ha founga foʻou. Ko e hā ʻa e meʻa ne nau lau—fakafoʻituitui pe fakafāmili—ne liliu ai ʻa e anga ʻo ʻenau ongó, fakakaukaú, pe tōʻonga moʻuí?

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 124:15, 20

ʻOku fiefia ʻa e ʻEikí ʻi he angatonú.

• ʻI he vahe 124, naʻe fakahikihikiʻi ʻe he ʻEikí ʻa Hailame Sāmita mo Siaosi Mila koeʻuhí ko ʻena angatonú. Ke tokoni ki he kau mēmipa ʻo e kalasí ke loloto ange ʻenau ako ʻa e ʻulungaanga ko ʻení, te ke lava ʻo fakaafeʻi ke nau lau ʻa e Tokāteline mo e Ngaahi Fuakava 124:15, 20 pea fakalaulauloto ki he meʻa ne nau ako fekauʻaki mo e angatonú mei he ongo veesi ko ʻení. Ko e hā mo ha toe meʻa ʻoku tau ako mei he folofolá ʻi he “Angatonú” ʻi he Fakahinohino ki he Ngaahi Folofolá (scriptures.ChurchofJesusChrist.org) pe mei he popoaki ʻa ʻEletā Lisiate J. Meinesi ko e “Ko Hono Maʻu ʻa e Falala ʻa e ʻEikí mo Ho Fāmilí”? (Ensign pe Liahona, Nōvema 2017, 75-77). ʻE lava ke vahevahe ʻe he kau mēmipa ʻo e kalasí ha ngaahi sīpinga ʻo ha kakai ʻoku nau ʻiloʻi ʻoku nau angatonu. Ko e hā ʻoku hoko ai ʻa e angatonú ko ha ʻulungaanga mahuʻingá?

Tokāteline mo e Ngaahi Fuakava 124:22–24, 60–61

ʻOku finangalo ʻa e ʻEikí ke tau talitali lelei mo tali ʻa e niʻihi kehé.

• ʻE lava ke ako ʻe he kau mēmipa ʻo hoʻo kalasí ha meʻa mei hono fakamatalaʻi ʻe he ʻEikí ʻa e Fale Nāvuú ʻa ia ʻe ala tokoni ki heʻenau feohi mo e kakai ʻoku ʻikai ko ha Kāingalotu ʻi he Ngaahi ʻAho Kimui Ní pe kuo nau hē mei he Siasí. ʻE lava ke ke tā ha fale ʻi he palakipoé pea fakaafeʻi ʻa e kau mēmipa ʻo e kalasí ke nau fekumi ʻi he Tokāteline mo e Ngaahi Fuakava 124:22–24, 60–61 ki ha ngaahi lea ne ngāue ʻaki ʻe he ʻEikí ke fakamatalaʻi ʻaki e ngaahi taumuʻa ʻo e Fale Nāvuú. Hili iá pea nau hiki takatakai ʻa e ngaahi leá ʻi he falé. ʻE toe fakaʻaongaʻi fēfē foki nai ʻa e ngaahi lea ko ʻení ki he Siasi ʻo Sīsū Kalaisí? Ko e hā ha meʻa te tau fai ke fakatupu ʻa e ʻulungaanga talitali lelei tatau ko ʻení ʻi hotau uōtí mo hotau ngaahi ʻapí?

Tokāteline mo e Ngaahi Fuakava 124:25–45, 55

ʻOku fekauʻi kitautolu ʻe he ʻEikí ke tau langa ha ngaahi temipale koeʻuhí ke tau lava ʻo maʻu ʻa e ngaahi ouau toputapú.

• Mahalo ʻe lava ke fakakaukauloto ʻa e kau mēmipa ʻo e kalasí ʻoku nau nofo ʻi Nāvū ʻi he 1841 ʻo ngāue ki he Temipale Nāvuú ʻi hano ʻeke ange ʻe hanau kaungāmeʻa, “Ko e hā ʻoku tau kei langa ai ʻa e ngaahi temipale ko ʻení?” Ko e hā e meʻa te tau lea ʻaki ki he kaungāmeʻa ko ʻení? ʻE lava ke fekumi ʻe he kau mēmipa ʻo e kalasí ki ha ngaahi fakakaukau ʻi he Tokāteline mo e Ngaahi Fuakava 124:28–30, 37–42, 55. Kapau ʻoku ʻikai maheni ʻa e kau mēmipa ʻo e kalasí mo e ngaahi ouau ne lave ki ai ʻi he ngaahi veesi ko ʻení, fakakaukau ke fakamatalaʻi ʻa e ngaahi taumuʻa mo e ngaahi tāpuaki ʻo e ngaahi ouau ko ʻení. Vakai ki he temples.ChurchofJesusChrist.org ki ha fakahinohino fekauʻaki mo e meʻa ʻoku taau ke aleaʻi ʻi tuʻa mei he temipalé pea mo e ʻū fakatātā ʻo e ngaahi temipalé ʻe lava ke ke fakaʻaliʻali ʻi he kalasí.

  Siosefa Sāmita mo e kau tangata ʻoku nau langa ʻa e Temipale Nāvuú

  Ko Siosefa Sāmita ʻi he Temipale Nāvuú, tā fakatātā ʻa Gary E. Smith.

Tokāteline mo e Ngaahi Fuakava 124:45–55

ʻE tāpuekina ʻe he ʻEikí ʻa kinautolu ʻoku faifeinga ke talangofua ki Heʻene ngaahi fekaú.

• Naʻe fekau ki he Kāingalotú ke nau langa ha temipale ʻi he Vahefonua Siakisoní ka naʻe “taʻofi ʻa kinautolu ʻe honau ngaahi filí” (Tokāteline mo e Ngaahi Fuakava 124:51). ʻI he veesi 49–55, ʻa ia ne folofola ai ʻa e ʻEikí ki he tūkunga ko ʻení, ʻe lava ke maʻu ai ha pōpoaki ʻoku fakapapauʻi ai ki he kakai ʻoku nau fie talangofua ki he ngaahi fekau ʻa e ʻOtuá ka ʻoku taʻofi kinautolu mei hono fai iá koeʻuhí ko e fāmilí pe ngaahi tūkunga kehe. Te mou lava ʻo lau ʻa e ngaahi veesi ko ʻení mo e kau mēmipa ʻo e kalasí pea kole ange ke nau fakakaukau ki ha ngaahi tūkunga ʻa ia he ʻikai lava ai ʻe he kakaí ʻo fakahoko ʻenau ngaahi holi māʻoniʻoní koeʻuhí ko ha ngaahi tūkunga ʻoku ʻikai ke nau lava ʻo mapuleʻi. Ko e hā ha faleʻi te tau lava ʻo maʻu ʻi he ngaahi veesi ko ʻení ʻe ala tokoni ki ha taha ʻi he faʻahinga tuʻunga pehē? Ko e hā ‘oku akoʻi mai ʻe he ngaahi vēsí ni fekauʻaki mo e talangofuá?

Tokāteline mo e Ngaahi Fuakava 124:91–92

ʻE lava ke tataki kitautolu ʻe he ʻEikí ʻo fakafou ʻi hotau ngaahi tāpuaki fakapēteliaké.

• ʻE ʻaonga nai ki he kau mēmipa hoʻo kalasí ha fealeaʻaki fekauʻaki mo e kau pēteliaké pea mo e ngaahi tāpuaki fakapēteliaké? Te ke lava ʻo kamata ʻaki hano fakaafeʻi ʻa e kau mēmipa ʻo e kalasí ke nau lau ʻa e Tokāteline mo e Ngaahi Fuakava 124:91–92, ʻo fekumi ki he meʻa naʻe ui ʻa Hailame Sāmita ke ne faí. Hili iá te ke lava ʻo tohi ʻi he palakipoé Ko e hā mo e ʻUhinga pea fakaafeʻi e kau mēmipa ʻo e kalasí ke nau lau ʻa e “Ngaahi Tāpuaki Fakapēteliaké” (Tuʻu Maʻu ʻi he Tuí, 137–39) ke ʻiloʻi pe ko e hā ʻa e ngaahi tāpuaki fakapēteliake mo e ʻuhinga ʻoku nau mahuʻinga aí. ʻE teuteu fēfē ha tokotaha ke maʻu ha tāpuaki fakapēteliake? Fakakaukau ke fakaafeʻi ha kakai ʻe niʻihi kuo nau ʻosi maʻu honau tāpuaki fakapēteliaké ke nau vahevahe ʻa e ʻuhinga ʻoku nau houngaʻia ai ʻi aí. (Fakamanatu ange ke ʻoua naʻa nau vahevahe ha meʻa ʻoku fuʻu fakataautaha pe toputapu mei honau tāpuakí.) Te tau fakahaaʻi fēfē ʻetau mataʻikoloa ʻaki hotau ngaahi tāpuaki fakapēteliaké?

Fakatupulaki ʻEtau Founga Akoʻí

Lotua ʻa e kau mēmipa hoʻo kalasí. Lotua e hingoa ʻo kinautolu ʻokú ke akoʻí. Te ke lava ʻo lotu ke mahino kiate koe ʻenau ngaahi fiemaʻú pea mo ʻiloʻi ʻa e meʻa ke akoʻí kae lava ke feau e ngaahi fiemaʻu ko iá. Te ke lava foki ʻo kole ki he Tamai Hēvaní ke “teuteuʻi honau lotó” ( ʻAlamā 16:16) ke maʻu ʻa e ngaahi moʻoni te ke akoʻí. (Vakai, Ko e Faiako ʻi he Founga ʻa e Fakamoʻuí, 6.)