fāmili mo e ngaahi kui ʻi he maama tataliʻanga ʻo e ngaahi laumālié

Ko Kitautolu mo Kinautolu pea ko Kinautolu mo Kitautolu, tā fakatātā ʻa Caitlin Connolly

1–7 Nōvema

Tokāteline mo e Ngaahi Fuakava 125–128

“Ko Ha Leʻo ʻo e Fiefia ki he Kakai Moʻuí pea mo e Kau Pekiá”

Fakalaulauloto ki he ngaahi lea ko ʻeni ʻa ʻEletā ʻUlise Soalesí: “Ko e faiako lelei tahá ko ha taha tā sīpinga lelei. ʻOku malava ʻo liliu e loto ʻo kinautolu ʻoku tau akoʻí ʻi heʻetau akoʻi ha meʻa ʻoku tau moʻui ʻakí” (“ ʻE Mahino Fēfē Kiate Au?” Ensign pe Liahona Mē 2019, 7).

Lekooti Hoʻo Ngaahi Ongó

fakaʻilonga ʻo e feʻinasiʻakí

Fakaafeʻi e Feʻinasiʻakí

ʻE lava ʻe he kau mēmipa ʻo e kalasí ʻo hiki ʻi he palakipoé ʻa e ngaahi kupuʻi lea mei he Tokāteline mo e Ngaahi Fuakava 125–28 ʻa ia ʻoku mahuʻinga kiate kinautolú. Tuku ke nau vahevahe ʻenau fakakaukaú ki he ngaahi kupuʻi lea ko iá. Naʻe tākiekina fēfē heʻenau ako ʻa e ngaahi moʻoni ko ʻeni he uike ní ʻa ʻenau ngaahi tōʻongá?

fakaʻilonga ʻo e akoʻí

Akoʻi ʻa e Tokāteliné

Tokāteline mo e Ngaahi Fuakava 126

“Tokangaʻi makehe ʻa ho fāmilí.”

• Ko e ngaahi uiuiʻi naʻe maʻu ʻe Pilikihami ʻIongi ke ngāue ʻi he Siasí naʻe fie maʻu ia ke ne fai ha feilaulau lahi mo hono fāmilí; ʻe lava ke ueʻi ʻe he folofola ʻa e ʻEikí kia Pilikihami ʻi he vahe 126 ha fealeaʻaki fakakalasi fekauʻaki mo e ʻuhinga ʻoku faʻa finangalo ai ʻa e ʻEikí he taimi ʻe niʻihi ke tau feilaulau ʻi heʻetau ngāué. Kuo tokoniʻi fēfē kitautolu ʻe he ʻEikí ke tau fakahoko hotau fatongia ʻi ʻapí, ngaahi uiuiʻi faka-Siasí, mo e ngaahi tapa kehekehe ʻo e moʻuí?

Tokāteline mo e Ngaahi Fuakava 127:2–4

ʻE lava ke tau falala ki he ʻEikí lolotonga e ngaahi taimi faingataʻá.

• ʻE tokoni fēfē ʻa e Tokāteline mo e Ngaahi Fuakava 127:2–4 ki he kau mēmipa ʻo e kalasí ʻoku nau ongoʻi, hangē ko Siosefa Sāmitá, ʻoku nau kakau ʻi he “vai lolotó”? ʻE lava ke ke fakaafeʻi ʻa e kau mēmipa ʻo e kalasí ke nau lau ʻa e ngaahi veesi ko ʻení pea vahevahe pe te nau fakamatalaʻi fakanounou fēfē ʻa e ʻulungaanga ʻo Siosefá ʻi hono ngaahi faingataʻaʻiá. Ko e hā ha ngaahi kupuʻi lea mei he ngaahi veesi ko ʻení ʻe tokoni ki ha taha ʻoku faingataʻaʻia? Naʻe fakafalala fēfē ʻa Siosefa ki he ʻEikí lolotonga hono ngaahi ʻahiʻahiʻí? Te tau muimui fēfē ki heʻene sīpingá?

Tokāteline mo e Ngaahi Fuakava 128

ʻOku mahuʻinga ki hotau fakamoʻuí ʻa e fakamoʻui ʻo ʻetau ngaahi kuí.

• Fakakaukau pe te ke fakalotoa fēfē ʻa e kau mēmipa ʻo e kalasí ke nau kau ʻi he ngāue fakatemipalé mo e hisitōlia fakafāmilí. ʻE ala tokoni ʻa e Tokāteline mo e Ngaahi Fuakava 128:15–18 ke nau ongoʻi ʻa e fie maʻu vivili ʻa e ngāue ko ʻení; ʻe lava ke ke fakaafeʻi ke nau fekumi ʻi he ngaahi veesi ko ʻení ki ha meʻa ʻokú ne fakalahi ʻenau holi ke fai ʻa e papitaiso maʻa ʻenau ngaahi kui kuo pekiá. ʻE ala tokoni ʻa e ngaahi fehuʻi hangē ko ʻení ke nau fakalaulauloto ki he ngaahi veesi ko ʻení: Ko e hā hono ʻuhinga “ʻoku ʻikai lava foki ke fakahaohaoaʻi ʻa kitautolu taʻekau ai ʻa hotau kau pekiá”? (veesi 15). Ko e hā hono ʻuhinga ʻoku ui ai ʻe Siosefa Sāmita ʻa e papitaiso maʻá e pekiá ko e “tefito fakaʻofoʻofa tahá ni ʻo e ngaahi tefito kotoa pē ʻa ia ʻoku kau ki he ongoongolelei taʻengatá”? (veesi 17; vakai foki, konga lea ʻi he “Ngaahi Maʻuʻanga Tokoni Kehé”). Ko e hā ha founga ʻe malaʻia ai ʻa e māmaní ʻo kapau he ʻikai ha “fehokotakiʻanga mālohi … ʻi he vahaʻa ʻo e ngaahi tamaí mo e fānaú”? (veesi 18). Kapau ʻe fie maʻu tokoni ʻa e kau mēmipa ʻo e kalasí ʻi hono kamataʻi ʻa e ngāue ki he hisitōlia fakafāmilí, te ke lava ʻo fakaafeʻi ʻa e taki ki he ngāue fakatemipale fakauōtí mo e hisitōlia fakafāmilí ke fakafeʻiloaki kinautolu ki he FamilySearch.org.

  Te ke lava foki ʻo fakalotoa kinautolu ʻaki ha ngaahi veesi ʻoku fakahaaʻi ai ʻa e fiefia ʻi he ngāue fakatemipalé mo e hisitōlia fakafāmilí, hangē ko e Tokāteline mo e Ngaahi Fuakava 128:19–23. ʻE lava ke lau ʻe he kau mēmipa ʻo e kalasí ʻa e ngaahi veesi ko ʻení pea fekumi ki ha ngaahi kupuʻi lea ʻoku nau fakahaaʻi ʻa e ongo naʻe maʻu ʻe Siosefa Sāmita fekauʻaki mo e fakamoʻui ʻo e kau pekiá. Hili iá ʻe lava ke ke kole ange ke nau vahevahe ha ngaahi aʻusia ne nau maʻu ai ha ongo tatau ki he ngāue ko ʻení.  

• Koeʻuhí ʻoku makehe ʻa e fakamoʻui ʻo e kau pekiá ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻe lava ke tau maʻu ha ngaahi faingamālie ke fakamatalaʻi ʻa e tokāteline ko ʻení ki he kakai kuo teʻeki ʻaupito ke nau fanongo ai kimuʻá. ʻE lava ke fekumi ʻe he kau mēmipa ʻo e kalasí ʻi he Tokāteline mo e Ngaahi Fuakava 128 ki ha meʻa ʻe lava ke nau vahevahe ʻi ha fepōtalanoaʻaki mo ha taha ʻokú ne fehuʻi fekauʻaki mo e papitaiso maʻá e kau pekiá. Ko e hā ʻoku akoʻi mai ʻe he tokāteline ko ʻení fekauʻaki mo e Tamai Hēvaní mo Sīsū Kalaisí? Tuku ki he kau mēmipa ʻo e kalasí ke nau fakaangaanga ʻa e meʻa te nau lea ʻakí.

  talavou mo ha ʻū kaati hingoa fakafāmili

  ʻOku haʻi hotau lotó ki heʻetau ngaahi kuí ʻi hono fai ʻo e ngāue fakatemipale maʻanautolú.

fakaʻilonga ʻo e ngaahi maʻuʻanga tokoni kehé

Ngaahi Maʻuʻanga Tokoni Kehé

 

 

 

 

 

 

 

 

 

 

Naʻe pehē ʻe Palesiteni Kōtoni B. Hingikelī:

“ʻOku fakafofongaʻi ʻe he Fakalelei ʻa Sīsū maʻá e tokotaha kotoá ha feilaulau fakafofonga lahi ʻaupito. Naʻá Ne fokotuʻu ʻa e sīpingá ʻa ia naʻá Ne hoko ai ko ha fakafofonga maʻá e faʻahinga kotoa ʻo e tangatá. Ko e sīpinga ko ʻení, ʻa ia ʻoku lava ai ʻe ha tangata ʻe taha ʻo fakafofongaʻi ha tangata kehé ʻoku hoko atu hono fakahoko iá ʻi he ngaahi ouau ʻo e fale ʻo e ʻEikí. ʻI māmaní ʻoku tau ngāue ai ʻo fakafofongaʻi ʻa kinautolu kuo pekia ʻikai ha ʻilo ki he ongoongoleleí. Ko kinautolu kuo pekiá ʻoku nau fili ke tali pe taʻetali ʻa e ouau ko ia ne fakahokó. ʻOku ʻoange maʻanautolu ha faingamālie tatau mo kinautolu ʻoku nau ʻaʻeva he māmaní. ʻOku foaki ki he kau pekiá ʻa e faingamālie tatau mo e kakai moʻuí. ʻIo, hono ʻikai nāunauʻia mo fakaofo e foaki kuo fakahoko ʻe he Fungani Māfimafí ʻi Heʻene fakahā ki Heʻene Palōfitá” (“The Great Things Which God Has Revealed,” Ensign pe Liahona, Mē 2005, 82–83).

Fakatupulaki ʻEtau Founga Akoʻí

Lotua ʻa e kau mēmipa hoʻo kalasí. Lotua e hingoa ʻo kinautolu ʻokú ke akoʻí, pea fekumi ke mahino kiate koe ʻenau ngaahi fiemaʻu tukupaú. ʻI hoʻo fai iá, ʻe tokoniʻi koe ʻe he Tamai Hēvaní ke ke ʻiloʻi ʻa e meʻa ke akoʻí kae lava ke ke tokoni ke feau e ngaahi fiemaʻu ko iá. (Vakai, Ko e Faiako ʻi he Founga ʻa e Fakamoʻuí, 6.)