« ថ្ងៃទី ១៣–១៩ ខែ ធ្នូ ។ ក្រុមគ្រួសារ ៖ ការប្រកាសដល់ពិភពលោក ៖ ‹ គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ២០២១ ( ឆ្នាំ ២០២០ )

« ថ្ងៃទី ១៣–១៩ ខែ ធ្នូ ។ ក្រុមគ្រួសារ ៖ ការប្រកាសដល់ពិភពលោក » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២១

ថ្ងៃទី ១៣–១៩ ខែ ធ្នូ

ក្រុមគ្រួសារ ៖ ការប្រកាសដល់ពិភពលោក

« គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត »

នៅពេលអ្នកសិក្សា « ក្រុមគ្រួសារ ៖ ការប្រកាសដល់ពិភពលោក » នៅសប្ដាហ៍នេះ សូមពិចារណាពីសេចក្ដីពិតនានា ដែលនឹងគាំទ្រដល់ការខិតខំប្រឹងរបស់សិស្សក្នុងថ្នាក់ ដើម្បីពង្រឹងដល់គេហដ្ឋាន និងក្រុមគ្រួសាររបស់ពួកគេ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

ដើម្បីលើកទឹកចិត្តសិស្សឲ្យចែកចាយអ្វីដែលពួកគេបានរៀនសូត្រនៅសប្ដាហ៍នេះមកពីការសិក្សារបស់ពួកគេអំពី ការប្រកាសអំពីក្រុមគ្រួសារ អ្នកអាចសុំឲ្យពួកគេជ្រើសរើសកថាខណ្ឌណាមួយ ហើយសង្ខេបជាប្រយោគមួយ អំពីអ្វីដែលកថាខណ្ឌនោះបង្រៀន ។

បង្រៀនគោលលទ្ធិ

« គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត » ។

សាសនាចក្រត្រូវបានគេស្គាល់ដោយសារការគូសបញ្ជាក់របស់ខ្លួនទៅលើក្រុមគ្រួសារ ហើយការប្រកាសអំពីក្រុមគ្រួសារ បង្ហាញពីមូលហេតុខាងគោលលទ្ធិនានាសម្រាប់ការគូសបញ្ជាក់នោះ ។ ដើម្បីលើកទឹកចិត្តឲ្យមានការពិភាក្សាមួយអំពីការណ៍នេះ អ្នកអាចអញ្ជើញសិស្សឲ្យស្រមៃថា នរណាម្នាក់បានសួរពួកគេថា ហេតុអ្វីសាសនាចក្រសង្កត់ធ្ងន់លើក្រុមគ្រួសារខ្លាំងម្ល៉េះ ។ តើសេចក្ដីពិតអ្វីខ្លះមកពីការប្រកាស ដែលយើងអាចចែកចាយដើម្បីឆ្លើយនឹងសំណួររបស់បុគ្គលនេះ ?
មូលហេតុមួយដែលការប្រកាសអំពីក្រុមគ្រួសារមានសារសំខាន់ខ្លាំងនោះគឺថា វាបញ្ជាក់សារជាថ្មីពីសេចក្ដីពិតដែលត្រូវគេវាយលុកនៅជំនាន់របស់យើង ។ តើសេចក្ដីពិតអ្វីខ្លះមកពីការប្រកាស ដែលជួយយើងមិនឲ្យត្រូវគេបោកបញ្ឆោត ដោយគំនិតខុសឆ្គងអំពីក្រុមគ្រួសារនៅក្នុងពិភពលោកសព្វថ្ងៃនេះ ? តើសេចក្ដីពិតទាំងនេះមានឥទ្ធិពលទៅលើជម្រើសដែលយើងរើសយ៉ាងដូចម្ដេច ? សេចក្ដីថ្លែងការណ៍ដោយប្រធាន ដាលិ្លន អេក អូក នៅក្នុង « ធនធានបន្ថែមទាំងឡាយ » អាចជួយក្នុងការឆ្លើយនឹងសំណួរនេះបាន ។

ឪពុកម្តាយគួរតែចិញ្ចឹមកូនៗរបស់ពួកគេដោយសេចក្ដីស្រឡាញ់ និងសុចរិតភាព ។

« សុភមង្គលនៅក្នុងជីវិតគ្រួសារភាគច្រើនអាចកើតមានឡើងបាន នៅពេលធ្វើតាមការបង្រៀនរបស់ព្រះអម្ចាស់ព្រះយេស៊ូវគ្រីស្ទ » ។

ការពិភាក្សាពីគោលការណ៍នៅក្នុងកថាខណ្ឌទីប្រាំមួយ និងទីប្រាំពីរនៃការប្រកាសអំពីក្រុមគ្រួសារ អាចជួយសមាជិកក្នុងថ្នាក់របស់អ្នកឲ្យរកឃើញសុភមង្គលដ៏ធំនៅក្នុងទំនាក់ទំនងគ្រួសាររបស់ពួកគេ ។ សូមពិចារណាសរសេរគោលការណ៍ទាំងឡាយដាក់លើក្ដារខៀន ហើយអញ្ជើញសិស្សឲ្យជ្រើសរើសគោលការណ៍មួយមកពិភាក្សាជាដៃគូ ។ ពួកគេអាចប្រើសំណួរដូចសំណួរទាំងនេះ ដើម្បីដឹកនាំការពិភាក្សារបស់ពួកគេ ៖ តើមានឧទាហរណ៍អ្វីខ្លះស្ដីពីគោលការណ៍នេះដែលយើងបានឃើញនៅក្នុងជីវិតគ្រួសារ ? តើការរស់នៅតាមគោលការណ៍នេះដឹកនាំទៅរកសុភមង្គលក្នុងក្រុមគ្រួសារយើងដោយរបៀបណា ? តើការរស់នៅតាមគោលការណ៍នេះជួយធ្វើឲ្យព្រះអង្គសង្គ្រោះគឺជាមូលដ្ឋានគ្រឹះនៃជីវិតគ្រួសាររបស់យើងបានយ៉ាងដូចម្ដេច ? តើបទគម្ពីរអ្វីខ្លះដែលអាចជួយក្រុមគ្រួសាររបស់យើងឲ្យយល់អំពីគោលការណ៍នេះកាន់តែច្បាស់ ? ( សិស្សក្នុងថ្នាក់អាចរកឃើញបទគម្ពីរដោយប្រើ Topical Guide ឬ សេចក្ដីណែនាំដល់បទគម្ពីរទាំងឡាយ [ នៅលើគេហទំព័រ scriptures.ChurchofJesusChrist.org ] ) ។ រួចហើយដៃគូនីមួយៗអាចចែកចាយជាមួយនឹងសិស្សក្នុងថ្នាក់នូវអ្វីដែលពួកគេបានរៀន ។

សូមគូសបញ្ជាក់ថា មិនថាស្ថានភាពគ្រួសាររបស់យើងបច្ចុប្បន្នយ៉ាងណានោះទេ យើងអាចនៅតែខិតខំកសាងគ្រួសារដ៏អស់កល្បជានិច្ចមួយនៅលើមូលដ្ឋានគ្រឹះរបស់ព្រះអង្គសង្គ្រោះ និងដំណឹងល្អរបស់ទ្រង់បានដែរ ។

« យើងសូមអំពាវនាវដល់ប្រជាពលរដ្ឋ … ដែលទទួលខុសត្រូវនៅគ្រប់ទីកន្លែងទាំងអស់ សូមឲ្យគាំទ្រនូវអ្វីៗទាំងនេះ ដែលបានរៀបរាប់ឡើង ដើម្បីទ្រទ្រង់ និងធ្វើឲ្យក្រុមគ្រួសារមាំំមួន » ។

តើអ្នកអាចជួយសិស្សក្នុងថ្នាក់របស់អ្នកឲ្យយល់អំពីទំនួលខុសត្រូវរបស់ពួកគេដើម្បីរស់នៅតាមសេចក្ដីពិតនៅក្នុងការប្រកាសអំពីក្រុមគ្រួសារនេះតាមរបៀបណា ? ដើម្បីចាប់ផ្ដើមការពិភាក្សា អ្នកអាចពិភាក្សាពីអ្វីដែលសិស្សក្នុងថ្នាក់បានរៀនមកពីចំណងជើងនៃការប្រកាសនេះ ។ តើការប្រកាសគឺជាអ្វី ? តើអ្វីទៅដែលធ្វើឲ្យគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់ គិតថាគ្រប់គ្រាន់ដើម្បីចេញផ្សាយការប្រកាសមួយដល់ពិភពលោកទាក់ទិនទៅនឹងក្រុមគ្រួសារនេះ ? សិស្សក្នុងថ្នាក់អាចសរសេរអ្វីដែលពួកគេគិតថាជាសារលិខិតដ៏ចម្បងនៃការប្រកាសនេះ ( សូមលើកទឹកចិត្តពួកគេឲ្យដកស្រង់វគ្គជាក់លាក់នានា ) ។ រួចហើយពួកគេអាចពិភាក្សាអំពីរបៀបដើម្បីផ្សព្វផ្សាយពីសារលិខិតទាំងនេះនៅក្នុងសហគមន៍ ឬប្រទេសជាតិរបស់ពួកគេ ។ សារលិខិតរបស់ស៊ិស្ទើរ បូន្នី អិល អូស្ការសុន « អ្នកការពារសេចក្ដីប្រកាសអំពីក្រុមគ្រួសារ » រួមមាននូវឧទាហរណ៍ដែលអ្នកអាចពិនិត្យមើលរួមគ្នាទាំងអស់គ្នា ( Ensign ឬ Liahona ខែ ឧសភា ឆ្នាំ ២០១៥ ទំព័រ ១៤–១៧ ) ។ អ្នកក៏អាចមើលវីដេអូ « Defenders of the Faith » ( នៅលើគេហទំព័រ ChurchofJesusChrist.org ) បានដែរ ។

ធនធានបន្ថែមទាំងឡាយ

ក្រុមគ្រួសារនៅក្នុងផែនការរបស់ព្រះ ។

ប្រធាន ដាល្លិនអេក អូក បានបង្រៀន ៖

« ពួកបរិសុទ្ធថ្ងៃចុងក្រោយដែលយល់ពីផែនការនៃសេចក្តីសង្គ្រោះរបស់ព្រះមានទស្សនៈជីវិតមួយដាច់ដោយឡែក ដែលជួយពួកគេឲ្យឃើញពីហេតុផលសម្រាប់បទបញ្ញត្តិព្រះ ជាការមិនផ្លាស់ប្ដូរនៃពិធីបរិសុទ្ធរបស់ទ្រង់ដែលតម្រូវឲ្យមាន និងតួនាទីដ៏សំខាន់នៃព្រះអង្គសង្គ្រោះ ព្រះយេស៊ូវគ្រីស្ទ ។ ដង្វាយធួនរបស់ព្រះអង្គសង្គ្រោះយើងជួយយើងឲ្យរួចពីសេចក្ដីស្លាប់ ហើយតម្រូវឲ្យយើងប្រែចិត្ត ដើម្បីអាចសង្គ្រោះយើងពីអំពើបាបបាន ។ ដោយមានទស្សនៈជីវិតនោះ ពួកបរិសុទ្ធថ្ងៃចុងក្រោយមានអាទិភាព និងការអនុវត្តច្បាស់លាស់ ហើយមានពរដោយមានកម្លាំងស៊ូទ្រាំនឹងការរសាយចិត្ត និងការឈឺចាប់នៃជីវិតរមែងស្លាប់ ។ …

ផែនការដំណឹងល្អដែលគ្រួសារនីមួយៗគួរធ្វើតាមដើម្បីរៀបចំខ្លួនសម្រាប់ជីវិតអស់កល្ប និងភាពតម្កើងឡើងត្រូវបានបង្ហាញនៅក្នុងការប្រកាសរបស់សាសនាចក្រនៅឆ្នាំ១៩៩៥ « ក្រុមគ្រួសារ ៖ ការប្រកាសដល់ពិភពលោក » ។ ពិតណាស់ ការប្រកាសរបស់វាមានភាពខុសគ្នាពីច្បាប់ ការអនុវត្ត និងការនិយាយគាំទ្រមួយចំនួនក្នុងពិភពលោកដែលយើងរស់នៅនាពេលបច្ចុប្បន្ន ។ នៅសម័យយើង ភាពខុសគ្នាដែលឃើញយ៉ាងច្បាស់មាន ការរួមរស់នឹងគ្នាដោយគ្មានការរៀបការ អាពាហ៍ពិពាហ៍ភេទដូចគ្នា និងការចិញ្ចឹមបីបាច់កូនចៅក្នុងទំនាក់ទំនងបែបនេះ ។ ជនដែលមិនជឿ ឬមិនចង់បានភាពតម្កើងឡើង ហើយដែលត្រូវបានអូសទាញយ៉ាងខ្លាំងដោយរបៀបនៃលោកិយ ចាត់ទុកការប្រកាសស្ដីពីក្រុមគ្រួសារនេះគ្រាន់តែជាសេចក្ដីថ្លែងការណ៍មួយនៃគោលនយោបាយដែលគួរផ្លាស់ប្ដូរ ។ ផ្ទុយទៅវិញ ពួកបរិសុទ្ធថ្ងៃចុងក្រោយបញ្ជាក់ថា ការប្រកាសអំពីក្រុមគ្រួសារផ្ដល់និយមន័យដល់ប្រភេទនៃទំនាក់ទំនងគ្រួសារ ដែលជាផ្នែកដ៏សំខាន់បំផុតមួយនៃការអភិវឌ្ឍដ៏អស់កល្បរបស់យើងដែលអាចកើតឡើងបាន » ( « ផែនការ និង សេចក្ដីប្រកាស » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ២៩ )។

ការកែលម្អការបង្រៀនរបស់យើង

រស់នៅតាមដំណឹងល្អឲ្យអស់ពីដួងចិត្តរបស់អ្នក ។ « អំណាចកើតមាន នៅពេលគ្រូបង្រៀនម្នាក់បានធ្វើអ្វីគ្រប់យ៉ាងដែលគាត់អាចរៀបចំ មិនមែនត្រឹមតែមេរៀននីមួយៗប៉ុណ្ណោះទេ ប៉ុន្តែរក្សាជីវិតរបស់គាត់ឲ្យស្របតាមព្រះវិញ្ញាណ » ( ប៊យដ៍ ឃេ ផាកកឺ Teach Ye Diligently [ឆ្នាំ ១៩៧៥ ] ទំព័រ ៣០៦ ) ។