« ថ្ងៃទី ៦–១២ ខែ ធ្នូ ។ មាត្រានៃសេចក្ដីជំនឿ និងសេចក្ដីប្រកាសជាផ្លូវការទី ១ និង ទី ២ ៖ ‹ យើងខ្ញុំជឿ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ២០២១ ( ឆ្នាំ២០២០ )
« ថ្ងៃទី ៦–១២ ខែ ធ្នូ ។ មាត្រានៃសេចក្ដីជំនឿ និងសេចក្ដីប្រកាសជាផ្លូវការទី ១ និង ទី ២ »ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២១
ចំពោះសមាជិកបុរសដែលស័ក្ដិសមទាំងអស់ ដោយ អិមម៉ា អាល់ឡេបេ
ថ្ងៃទី ៦–១២ ខែ ធ្នូ
មាត្រានៃសេចក្ដីជំនឿ និងសេចក្ដីប្រកាសជាផ្លូវការទី ១ និង ទី ២
« យើងខ្ញុំជឿ »
សូមអាន មាត្រានៃសេចក្ដីជំនឿ និងសេចក្ដីប្រកាសជាផ្លូវការទី ១ និង ទី ២ ប្រកបដោយការអធិស្ឋាន ហើយស្វែងរកការបំផុសគំនិតមកពីព្រះវិញ្ញាណបរិសុទ្ធ កាលអ្នកគ្រោងធ្វើបទពិសោធន៍រៀនសូត្រដ៏មានអត្ថន័យមួយសម្រាប់សិស្សក្នុងថ្នាក់នៅថ្ងៃអាទិត្យ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
អ្នកអាចអញ្ជើញសិស្សឲ្យបំពេញប្រយោគដូចតទៅនេះ ៖ « ខ្ញុំរីករាយ ពេលខ្ញុំអានព្រះគម្ពីរនៅសប្ដាហ៍នេះ ពីព្រោះ … » ។
បង្រៀនគោលលទ្ធិ
មាត្រានៃសេចក្ដីជំនឿរួមមាននូវសេចក្ដីពិតមូលដ្ឋានគ្រឹះនៃដំណឹងល្អដែលបានស្ដារឡើងវិញ ។
-
នេះជារបៀបមួយដើម្បីជួយសិស្សឲ្យចែកចាយអ្វីដែលពួកគេបានឃើញថាមានអត្ថន័យជាពិសេសពីក្នុងមាត្រានៃសេចក្ដីជំនឿ ៖ អ្នកអាចសរសេរលេខ ១ ដល់លេខ ១៣ នៅលើក្ដារខៀន ហើយសូមឲ្យសិស្សសរសេរនៅក្បែរលេខនោះនូវអ្វីមួយ ដែលពួកគេបានរៀនមកពីមាត្រានៃសេចក្ដីជំនឿដែលត្រូវគ្នានោះ ។ តើសេចក្ដីពិតទាំងនេះធ្វើឲ្យមានភាពខុសគ្នាអ្វីខ្លះនៅក្នុងទំនាក់ទំនងរបស់យើងជាមួយនឹងព្រះវរបិតាមាតាសួគ៌របស់យើង និង ព្រះយេស៊ូវគ្រីស្ទ ? ប្រហែលជាសិស្សអាចចែកចាយរបៀបដែលមាត្រានៃសេចក្ដីជំនឿបានពន្លឿនការសិក្សាដំណឹងល្អរបស់ពួកគេ ឬបានជួយពួកគេឲ្យចែកចាយដំណឹងល្អជាមួយមនុស្សដទៃ ។
មាត្រានៃសេចក្ដីជំនឿ ១:៩; សេចក្ដីប្រកាសជាផ្លូវការទី ១ និង ទី ២
សាសនាចក្រនៃព្រះយេស៊ូវគ្រីស្ទត្រូវបានដឹកនាំដោយវិវរណៈ ។
-
ហេតុអ្វីការបន្ដមានវិវរណៈគឺជាការសំខាន់ចំពោះយើង ? សូមអញ្ជើញឲ្យសិស្សចែកចាយអារម្មណ៍របស់ពួកគេអំពីសំណួរនេះ ។ សិស្សក្នុងថ្នាក់ក៏អាចពិភាក្សាពីរបៀបដែលគោលការណ៍នៃការបន្ដមានវិវរណៈតាមលំដាប់លំដោយនេះទាក់ទងទៅនឹង សេចក្ដីប្រកាសជាផ្លូវទី ១ និង ទី ២ ( គម្រោងមេរៀននាសប្ដាហ៍នេះនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារណែនាំពីធនធានដ៏មានប្រយោជន៍នានា ដែលទាក់ទងទៅនឹងវិវរណៈទាំងនេះ ) ។ តើយើងរៀនអ្វីខ្លះមកពីសេចក្ដីប្រកាសជាផ្លូវការទី ១ និង ទី ២ អំពីតួនាទីនៃវិវរណៈក្នុងការដឹកនាំសាសនាចក្រ ? ( សូមមើលផងដែរ មាត្រានៃសេចក្ដីជំនឿ ១:៩ និងសេចក្ដីថ្លែងការណ៍ដោយប្រធាន ហ្គរដុន ប៊ី ហ៊ីងគ្លី នៅក្នុង « ធនធានបន្ថែមទាំងឡាយ » ) ។ តើមានឧទាហរណ៍ផ្សេងទៀតណាខ្លះអំពីការបន្ដមានវិវរណៈ ដែលអាចឲ្យសិស្សគិតដល់ ? តើវិវរណៈទាំងនេះមានឥទ្ធិពលលើជីវិតរបស់យើង និងជួយយើងឲ្យកសាងនគររបស់ព្រះវរបិតាសួគ៌បានដោយរបៀបណា ?
-
សូមពិចារណាអញ្ជើញសិស្សក្នុងថ្នាក់ឲ្យរំឭកអំពីសេចក្ដីប្រកាសជាផ្លូវការទី ១ និង ទី ២ ហើយចែកចាយអ្វីមួយមកពីវិវរណៈទាំងនេះ ដែលអាចជួយនរណាម្នាក់ដែលកំពុងពិបាកនឹងទទួលយកការផ្លាស់ប្ដូរគោលនយោបាយនាពេលថ្មីៗនេះ វិវរណៈ ឬគោលលទ្ធិនៃសាសនាចក្រ ។ តើសិស្សក្នុងថ្នាក់បានរៀនដើម្បីទុកចិត្តទៅលើព្រះ នៅពេលពួកគេពិបាកនឹងរឿងអ្វីមួយក្នុងសាសនាចក្រដោយរបៀបណា ? តើការសិក្សារបស់ពួកគេនៅសប្ដាហ៍នេះបានពង្រឹងដល់សេចក្ដីជំនឿរបស់ពួកគេថា ព្រះអម្ចាស់កំពុងតែដឹកនាំសាសនាចក្ររបស់ទ្រង់យ៉ាងដូចម្តេច ? ការយល់ដឹងមកពីប្រធាន ឌៀថើរ អេហ្វ អុជដូហ្វ នៅក្នុង « ធនធានបន្ថែមទាំងឡាយ » ក៏អាចជួយបានដែរ ។
វិលហ្វូឌ វូឌដ្រុព្វ ដោយ អេច អ៊ី ភីតធើរសិន
ធនធានបន្ថែមទាំងឡាយ
« ព្រះវិញ្ញាណនៃព្រះបាននៅទីនោះ » ។
ប្រធាន ហ្គរដុន ប៊ី ហ៊ីងគ្លី បានបម្រើជាសមាជិកនៅក្នុងកូរ៉ុមនៃពួកសាវកដប់ពីរនាក់ នៅពេលទទួលបានវិវរណៈដែលបានពិពណ៌នានៅក្នុង សេចក្ដីប្រកាសជាផ្លូវការទី ២ ។ ជាច្រើនឆ្នាំក្រោយមក លោកបានពិពណ៌នាបទពិសោធន៍របស់លោកថា
« វាគឺជាបរិយាកាសដ៏សក្ដ័សិទ្ធិ និងបរិសុទ្ធមួយនៅក្នុងបន្ទប់នោះ ។ សម្រាប់ខ្ញុំ វាមានអារម្មណ៍ដូចជាទ្វារមួយបានបើកចំហររវាងបល្ល័ង្កស្ថានសួគ៌ និងព្យាការីព្រមទាំងបងប្អូនប្រុសរបស់លោកដែលបានលុតជង្គង់ចុះអង្វរសុំ ។ ព្រះវិញ្ញាណនៃព្រះបាននៅទីនោះ ។ ហើយដោយព្រះចេស្ដានៃព្រះវិញ្ញាណបរិសុទ្ធ នោះវាបានកើតឡើងដល់ព្យាការីថា មានការអះអាងមួយអំពីរឿងដែលលោកបានអធិស្ឋានសុំនោះថាជាការណ៍ត្រឹមត្រូវ ថាពេលវេលាបានមកដល់ហើយ ហើយថាឥឡូវនេះ ពរជ័យដ៏មហិមានៃបព្វជិតភាពគួរត្រូវពង្រីកដល់បុរសដ៏សក្ដិសមគ្រប់រូបនៅគ្រប់ទីកន្លែង ដោយមិនគិតពីពូជអំបូរឡើយ ។
« បុរសគ្រប់រូបដែលនៅក្នុងរង្វង់នោះ ដោយព្រះចេស្ដានៃព្រះវិញ្ញាណបរិសុទ្ធ បានដឹងរឿងនោះដូចគ្នា ។
« វាគឺជាឱកាសដ៏ស្ងប់ស្ងាត់ និងអស្ចារ្យបំផុត ។ … គ្មានសំឡេងណាឮដល់ត្រចៀកនៃរាងកាយរបស់យើងឡើយ ។ ប៉ុន្ដែសំឡេងនៃព្រះវិញ្ញាណបានខ្សឹបដោយភាពប្រាកដប្រជាដល់គំនិតរបស់យើង និងព្រលឹងរបស់យើងផ្ទាល់ » ( « Priesthood Restoration » Ensign ខែ តុលា ឆ្នាំ ១៩៨៨ ទំព័រ ៧០ ) ។
« វាជាការធម្មតាដែលមានសំណួរ » ។
ប្រធាន ឌៀថើរ អេហ្វ អុជដូហ្វ បានមានប្រសាសន៍ដូចតទៅនេះ ទៅកាន់អស់អ្នកដែលមានមន្ទិលសង្ស័យអំពីប្រវត្តិសាសនាចក្រ ឬគោលលទ្ធិ ៖
« ធម្មតាទេដែលមានសំណួរនោះ — គ្រាប់ពូជនៃសំណួរស្មោះត្រង់តែងលេចពន្លកឡើង និងលូតលាស់ជាដើមឈើយល់ដឹងមួយដ៏ធំ ។ មានសមាជិកសាសនាចក្រខ្លះពុំស្វិតស្វាញនឹងសំណួរប្រាកដប្រជា ឬធ្វើឲ្យអន់ចិត្តឡើយនៅពេលមួយ ឬផ្សេងទៀត ។ គោលបំណងចម្បងនៃសាសនាចក្រគឺបីបាច់ និងបណ្ដុះគ្រាប់ពូជនៃក្ដីជំនឿ—សូម្បីពេលខ្លះជាដីខ្សាច់នៃមន្ទិលសង្ស័យ និងភាពមិនប្រាកដក្ដី ។ សេចក្ដីជំនឿគឺត្រូវសង្ឃឹមលើការណ៍ដែលមើលពុំឃើញ តែពិត ។
« ដូច្នេះ បងប្អូនប្រុសស្រីជាទីស្រឡាញ់របស់ខ្ញុំ—ជាមិត្តជាទីស្រឡាញ់ខ្ញុំអើយ—សូមសង្ស័យមន្ទិលរបស់អ្នកពីមុនសង្ស័យសេចក្ដីជំនឿរបស់អ្នក ។ យើងមិនត្រូវអនុញ្ញាតឲ្យមន្ទិលសង្ស័យដាក់យើងជាអ្នកទោស ហើយរារាំងយើងពីសេចក្ដីស្រឡាញ់របស់ព្រះ សេចក្ដីសុខសាន្ដ និងអំណោយទាននានាដែលកើតមានតាមរយៈសេចក្ដីជំនឿលើព្រះអម្ចាស់យេស៊ូវគ្រីស្ទឡើយ » ( « មកចូលរួមជាមួយយើង » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ២៣; សូមមើលផងដែរ Lawrence E. Corbridge « Stand Forever » [ Brigham Young University devotional ថ្ងៃទី ២២ ខែ មករា ឆ្នា ២០១៩ ] នៅលើគេហទំព័រ speeches.byu.edu ) ។
ការកែលម្អការបង្រៀនរបស់យើង
ការនិយាយពាក្យថា « ខ្ញុំមិនដឹងទេ » វាពុំមែនជាបញ្ហាឡើយ ។ ខណៈដែលអ្នកគួរធ្វើឲ្យអស់ពីលទ្ធភាពដើម្បីឆ្លើយសំណួរទាំងឡាយរបស់ពួកគេអំពីដំណឹងល្អ នោះព្រះអម្ចាស់ពុំរំពឹងទុកឲ្យអ្នកចេះអ្វីៗគ្រប់យ៉ាងនោះទេ ។ នៅពេលអ្នកមិនដឹងពីរបៀបឆ្លើយនឹងអ្វីមួយ សូមសារភាពថាអ្នកមិនដឹង ។ រួចហើយ សូមណែនាំអ្នករៀនរបស់អ្នកទៅមើលគោលលទ្ធិដែលបានបើកបង្ហាញមក ហើយថ្លែងទីបន្ទាល់ដ៏ស្មោះត្រង់អំពីអ្វីដែលអ្នកពិតជាដឹង ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៤ ) ។