eb’ laj q’e, li yookeb’ chi b’eek chirix camello

Chalqex chixnimankil, xb’aan laj Dana Mario Wood

14–20 enero

Lukas 2; Mateo 2

Xoochalk chixloq’oninkil

Naq maji’ nakawil li na’leb’ sa’ li hu a’in, tzol Lukas 2 ut Mateo 2 ut tz’iib’a li musiq’ejil na’leb’ nakak’ul. A’in tatxtenq’a chixk’ulb’al li k’utb’esinb’il na’leb’ chirix chan ru us xtenq’ankil laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Chan ru naru nakawaklesi xch’ooleb’ li komon sa’ li tzoleb’aal re te’xwotz li na’leb’ ut li k’a’ru xe’xk’ul naq xe’xtzoleb’ li loq’laj hu xjuneseb’ ut rik’in lix junkab’aleb’? Us ta ak rab’ihomeb’ resil lix yo’lajik li Kolonel, toj wan li ak’ musiq’ejil na’leb’ naru neke’xk’ul. Maare taab’oq junjunq li komon re te’xwotz junaq na’leb’ xe’xtaw sa’ Lukas 2 malaj sa’ Mateo 2, li xe’reek’a xwankil chi ak’il.

reetalil li tzolok

Xk’utb’al li tzolʼlebʼ

Lukas 2:1–38; Mateo 2:1–12

Wankeb’ naab’al aj yehol nawom chirix lix yo’lajik li Kristo.

• Li k’a’ru ke’xk’ul laj loq’oninel sa’ Lukas 2 ut sa’ Mateo 2 naru chixtenq’ankileb’ li komon re te’xk’oxla chan ru naq neke’xk’ut lix rahomeb’ choq’ re li Kolonel. Il li tzoltzookil aatin sa’ li tusleb’aal aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Maare wankeb’ li komon sa’ laa tzoleb’aal li te’raj xwotzb’al li na’leb’ xe’xk’ul rik’in li k’anjel a’in, malaj ut taaruuq teeb’aanu li k’anjel jo’ tzoleb’aal. K’a’ut naq wan xwankil naq eb’ laj yehol nawom chirix li Kristo jalan jalanq li ke’wan wi’ chaq sa’ lix yu’ameb’? Chan ru naru naq laa’o taqab’aanu jo’ xe’xb’aanu eb’ a’an?

• Rub’elaj naq eb’ laj yehol nawom a’in ke’xloq’oni li ch’ina al Jesus, xb’een wa ke’xsik’ a’an. Re xtenq’ankileb’ li komon chi tzolok rik’in li k’a’ru xe’xb’aanu, taaruuq taatz’iib’a li jolomil aatin a’in chiru li pizarron: Eb’ laj ilol xul, xAna, aj Simehon, ut Eb’ laj q’e. Chirix a’an, b’oqeb’ li komon chixtz’ilb’al rix Lukas 2 ut Mateo 2 ut chixtz’iib’ankil chiru li pizarron k’a’ru ke’xb’aanu li kristiaan a’in re xsik’b’al li Kolonel. K’a’ru neke’xye li esil a’in chirix chan ru naq laa’o nokoru chixsik’b’al li Kristo?

  jun aj ilol karneer rik’ineb’ li karneer

  Eb’ laj ilol xul ke’wan sa’ xyanqeb’ li xb’een aj yehol nawom chirix lix yo’lajik li Kolonel.

• Maare jun ch’ina k’anjeleb’aal taatenq’anq reheb’ li komon sa’ laa tzoleb’aal re te’xk’uula jun na’ajej sa’ xyu’ameb’ choq’ re li Kolonel. K’oxla xb’aanunkil li na’leb’ a’in: K’am chaq jun sek’ sa’ li tzoleb’aal, ut chirix rilb’al sa’ komonil Lukas 2:7, ye reheb’ li komon naq te’xnujob’resi li sek’ rik’in li k’a’aq re ru xak’am chaq, reetalil chan ru naq naqanumsi li qakutan. Naq nujenaq li sek’, b’oq junaq re tixyal xch’ikb’al sa’ li sek’ jun xjalam-uuch li Kolonel. K’a’ru naxk’ut li eetalil a’in chirix xkanab’ankil jun na’ajej choq’ re li Kristo sa’ li qayu’am? K’a’ru naru taqajal re xk’eeb’al xna’aj a’an? Li raatin li Awa’b’ej Thomas S. Monson sa’ "Xkomon chik li k’anjeleb’aal" naru tatxtenq’a chixsumenkil li patz’om a’in.

Mateo 2:13–23

Eb’ li na’b’ej yuwa’b’ej neke’ru chixk’ulb’al li na’leb’ chi k’utb’esinb’il re xkolb’al rix lix junkab’aleb’.

• Jun na’leb’ naqatzol rik’in lix xikik laj Jose ut li xMaria sa’ Egipto a’an naq li Qaawa’ naru naxk’e li k’utb’esinb’il na’leb’ re xtenq’ankileb’ li na’b’ej yuwa’b’ej chixkolb’al rix lix junkab’aleb’ chiru li k’a’ru xiwxiw. Re taa’uxq li seraq’ik chirix a’in, naru taapatz’ reheb’ li komon naq te’xtz’iib’a chiru li pizarron junjunq li k’a’ru xiwxiw li nach’a’ajkilank reheb’ li junkab’al sa’ li kutan a’in. K’a’ru naqatzol sa’ Mateo 2:13–23 chirix chan ru xkolb’al rix li qajunkab’al chiruheb’ li ch’a’ajkilal a’in? Chan ru naq li k’utb’esinb’il na’leb’ xqak’ul xooxtenq’a chixkolb’al rix li qajunkab’al malaj li ani raaro qab’aan chiru junaq ch’a’ajkilal? K’a’ru li na’leb’ xe’xk’e li profeet ut eb’ li apostol re qatenq’ankil chixkolb’al rix li qajunkab’al?

• Jo’ jun raqal re li seraq’ a’in, taaruuq taatz’aama chiruheb’ li komon naq te’xb’icha sa’ komonil "Li ochoch chanchan choxa," Eb’ li B’ich, ajl 191, malaj jalan chik li b’ich chirixeb’ li junkab’al. K’a’ru naxk’ut li b’ich a’in chirix k’a’ru neke’ru li na’b’ej yuwa’b’ej chixb’aanunkil re naq tiikaqeb’ xch’ool re xk’ulb’al li k’utb’esinb’il na’leb’ re xk’amb’al xb’e lix junkab’aleb’?

Lukas 2:40–52

Naq toj saaj, li Jesus ak k’eek’o xch’ool chixb’aanunkil li rajom xch’ool lix yuwa’.

• Li resil li Jesus naq kik’utuk sa’ li santil ochoch naq yal 12 chihab’ wan re naru naxtenq’aheb’ li saaj komon li ink’a’ neke’xnaw chan ru naq te’ruuq chi tenq’ank sa’ lix k’anjel li Dios. Taaruuq taajacheb’ ru li komon sa’ sumal re rilb’al Lukas 2:40–52 sa’ komonil (k’e reetal li ak’ na’leb’ natawman rik’in li Santil Hu chi jaltesinb’il ru xb’aan laj Jose Smith—JJS Lukas 2:46). Li junjunq sumal taaruuq chixnumsinkil junjunq k’asal sa’ xwotzb’al chirib’ileb’ rib’ k’a’ru nawulak chiruheb’ sa’ li raqal a’in. Chan ru naq laa’o nokoru chixwotzb’al qana’leb’ chirix li evangelio? Ma wan k’a’ru xqak’ul laa’o li nokoru chixwotzb’al?

• Wi yookat chixtzolb’aleb’ li ninqi komon, naru tex’aatinaq chirix chan ru xtenq’ankileb’ li saaj re te’xtaw li neke’ru chixb’aanunkil. Taaruuq raj naq junaq komon tixye resil li aatin sa’ Lukas 2:40–52, ut taaruuq te’aatinaq li tzoleb’aal chirix chan ru naq li na’leb’ a’in naxjal chan ru naq neke’ril li saaj komon sa’ li Iglees. Chan ru naq naru naqakanab’eb’ li saaj komon chixb’aanunkil lix k’anjel li Yuwa’b’ej, jo’ li kixb’aanu li Jesus? (Lukas 2:49). Jo’q’e naq xsach qach’ool rik’in jun li musiq’ejil na’leb’ wotzb’il xb’aan jun li saaj komon malaj jun li ch’ina al? Naru nak’anjelak li raatin laj Henry B. Eyring sa’ li seraq’ a’in: "Naq na’aatinak junaq li nak’amok re li Tijonelil re Aaron, ... junelik nink’oxla naq tinwab’i li raatin li Dios. Moko naab’al sut ta kisach wajom, ut rajlal sachso ninkana" ("Re taanimanq ajwi’ xmetz’ew a’an,"Jolomil Ch’utub’aj-ib’ re octubre 2016).

• K’a’ru naqatzol sa’ Lukas 2:40–52 chirix chan ru naq kiwan li Jesus jo’ saaj winq? Li na’leb’ chirix li k’iik sa’ Lukas 2:52, naru naxtikib’ jun seraq’ chirix k’a’ru yooko chixb’aanunkil re toowanq jo’ li Kristo. Naru ajwi’ taapatz’ reheb’ li komon naq te’xk’oxla chan ru naq yookeb’ chi k’iik rik’in xna’leb’ (sa’ k’a’uxlej) ut rik’in xteram (sa’ tz’ejwalej), ut sa’ chaab’ilal chiru li Dios (sa’ musiq’ej) ut chiruheb’ li winq (sa’ komonil). Taaruuq ajwi’ te’xk’oxla junaq jayalihom chirix jun reheb’ li na’leb’ a’in.

reetalil li tzolok

Xb’oqb’aleb’ chi tzolok sa’ kab’l

Re xtenq’ankileb’ li komon chixkawresinkil rib’ re te’aatinaq chirix Jwan 1 sa’ li xamaan jun chik, naru taaye reheb’ naq te’xk’e reetal li junjunq sut sa’ li jun ch’ol a’an naq wan ani naxch’olob’ xyaalal li Jesukristo.

reetalil li k’anjeleb’aal

Xkomon chik li k’anjeleb’aal

Lukas 2; Mateo 2

Jun k’utb’il na’leb’ re xsik’b’al li Kristo.

Li Awa’b’ej Thomas S. Monson kixye:

"Li k’utb’il na’leb’ re xtawb’al li Jesus junelik wanjenaq ut junelik taawanq chi juntaq’eet—li tij re anchal ch’oolej li na’el chaq sa’ jun ch’oolej li tuulan ut saq ru. ...

"Re tooruuq chi usaak sa’ xsik’b’al qajunes li Jesus, xb’een wa tento taqakawresi jun hoonal choq’ re a’an sa’ li qayu’am, ut jun na’ajej choq’ re a’an sa’ li qach’ool. Sa’ xyi lix laatz’al qu, k’iila sut wan hoonal choq’ re li b’olotzik, choq’ re li loq’ok, choq’ re li k’anjelak, choq’ re li b’atz’unk—a’ut maak’a’ li hoonal choq’ re li Kristo.

"Wankeb’ li chaq’al ru ochoch li jek’inb’ileb’ chiru li ch’och’ li wan wi’ li na’ajej choq’ re li wa’ak, li na’ajej choq’ re li wark, li na’ajej choq’ re li b’atz’unk, li na’ajej choq’ re li b’ojok, li na’ajej re rilb’al li tele, a’ut maak’a’ li na’ajej choq’ re li Kristo.

"Ma nachal b’ayaq xrahil li qak’a’uxl naq naqak’oxla li aatin kixye: "Eb’ li yak wankeb’ xjob’ sa’ pek ut eb’ li xul li neke’rupupik chiru choxa wankeb’ xsuk, a’b’an li K’ajolb’ej maak’a’ wank re b’ar wi’ tixsotob’ lix jolom." (Mateo 8:20.) Malaj ut ma naqeek’a xtoq’ob’al ru naq najultiko’ qe li aatin, "Ut kiwank li xb’een xk’uula’al, kixb’at sa’ t’ikr ut kixsotob’ sa’ xwa’leb’aaleb’ ketomq, xb’aan naq maak’a’ na’ajej choq’ reheb’ sa’ li kab’l." (Lukas 2:7.) Maak’a’ xna’aj. Maak’a’ xna’aj. Maak’a’ xna’aj. Junelik wanjenaq chi jo’kan.

"Naq laa’o noko’ok chixsik’b’al li Jesus, chi tenq’anb’il ut chi k’amb’il qab’e xb’aan li na’leb’ chirix li tijok, tento naq taawanq chi saqen ru chiqu ani yooko chixsik’b’al. Eb’ laj ilol xul najter ke’xsik’ li Jesus jo’ k’uula’al. A’b’anan laa’o naqasik’ li Jesus jo’ li Kristo, li asb’ej chiqu, laj b’aanuhom quuchil chiru li Yuwa’b’ej, laj Tojol qix, laj yo’ob’tesihom re li qakolb’al, li kiwan sa’ xtiklajik rik’in li Yuwa’b’ej; li kixk’ul sa’ xb’een lix maak li ruchich’och’, ut li kikam chi anchal xch’ool re naq laa’o taaruuq taawanq qayu’am chi junelik. A’in li Jesus naqasik’ laa’o" ("La búsqueda para encontrar a Jesús," Liahona, abril 1991, 5).

Li jalam-uuch chirix lix yo’lajik li Kristo.

K’oxla chan ru naq eb’ li jalam-uuch te’ruuq chixchaab’ilob’resinkil lee seraq’ chirix lix yo’lajik li Kristo. (Re xtawb’aleb’, chi’ilmanq Libro de obras de arte del Evangelio malaj history.lds.org/exhibit/birth-of-christ.)

Xchaab’ilob’resinkil li qak’utum

Kanab’eb’ chi tz’aqonk li ani ink’a’ xe’tzolok sa’eb’ li loq’laj hu sa’ kab’l. Us ta maare wankeb’ li komon sa’ li tzoleb’aal li ink’a’ xe’ru chirilb’al Lukas 2 ut Mateo 2 rub’elaj li tzoleb’aal, eb’ a’an neke’ru ajwi’ chixwotzb’al li chaab’il na’leb’ naq nekextzolok sa’ komonil sa’ li tzoleb’aal. K’e reetal naq taakanab’eb’ chixjunileb’ li komon chi tz’aqonk ut chi aatinak sa’ li seraq’.