jun li junkab’al li yookeb’ chirilb’aleb’ li jalam-uuch

31 diciembre–6 enero

Tento sa’ qab’een laa’o naq tootzoloq

Naq nakawil ut nakak’oxlaheb’ rix li raqal reheb’ li loq’laj hu sa’ li tusleb’ aatin a’in, tz’iib’a resil li musiq’anb’il na’leb’ nakak’ul. A’in tixb’oq chaq li Musiq’ej naq yookat chixkawresinkil aawib’. Li hu Kim, Taaqehin—Choq’ reheb’ li komon ut li junkab’al, ut eb’ li na’leb’ sa’ li hu a’in tate’xtenq’a chixwaklesinkileb’ xch’ool li komon sa’ laa tzoleb’aal re te’xtzol li Ak’ Chaq’rab’ chiru li chihab’ a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Jun reheb’ laa k’anjel jo’ aj k’utunel, a’an xtenq’ankileb’ li komon chi tzolok sa’eb’ li loq’laj hu xjuneseb’ ut sa’ junkab’al. Naq te’rab’i li k’a’ru xe’xk’ul li jun ch’ol chik, a’an tixtenq’aheb’ chixsik’b’al xna’leb’eb’ xjunes. Chi jo’kan, sa’ xtiklajik li junjunq tzoleb’aal, tz’aama chiruheb’ li komon naq te’xwotz li raqal reheb’ li loq’laj hu li xe’xtzol li xwulak chiruheb’ malaj li xtenq’ank reheb’.

reetalil li k’utuk

Xk’utb’al li tzolʼlebʼ

Re xtawb’al qana’leb’ rik’in li Kolonel, tento taqab’aanu li nokoxb’oq wi’, "Kim, taaqehin."

• Rik’in xtzolb’al li Ak’ Chaq’rab’, tatruuq chi tzolok chirix li Kolonel ut lix tzol’leb’, a’ut jo’kan ajwi’ taatzol chan ru xtaaqenkil a’an chi mas tz’aqal wi’chik. Li aatin sa’ Mateo 19:16–22 a’an chaab’il re xtikib’ankil li k’anjel a’in (chi’ilmanq ajwi’ li video "Cristo y el jóven rico" sa’ LDS.org). Naru taapatz’ reheb’ li komon sa’ li tzoleb’aal naq te’xsik’ sa’ li esilal a’in jun na’leb’ chirix li wank choq’ xtzolom li Jesukristo, ut naq te’xwotz li k’a’ru xe’xtaw. Re xtawb’al jun chik li k’anjel chirix li na’leb’ a’in, chi’ilmanq li tusleb’ aatin choq’ re li xamaan a’in sa’ Kim, Taaqehin—Choq’ reheb’ li komon ut li junkab’al.

Re tzolok, aajel ru li k’anjelak rik’in paab’aal.

• Chan ru naq tatruuq chixwaklesinkileb’ xch’ool li komon sa’ laa junkab’al re te’xk’e xch’ool sa’ li tzolok, ut ink’a’ yal te’xkanab’ li k’anjel a’an sa’ xb’een laj k’utunel? A’in jun li na’leb’ naru taab’aanu: Ye re jun reheb’ li komon naq tixkut aawe jun ch’ina b’atz’uul, ut maak’a’ taab’aanu re xxokb’al. Rik’in li k’utuk a’in, taaruuq tex’ok chi aatinak chirix lix k’anjel li ani yoo chi tzolok ut lix k’anjel laj k’utunel sa’ li tzolok chirix li evangelio. Li raatin li Elder David A. Bednar chirix li tzolok rik’in li paab’aal, li natawman sa’ "Xkomon chik li k’anjeleb’aal," naru tatxtenq’a sa’ li seraq’ a’in.

• Re xtenq’ankileb’ li komon sa’ li tzoleb’aal chixtawb’al ru naq re xtzolb’al li evangelio tento taawanq qapaab’aal chi k’anjelak, naru taajacheb’ ru sa’ kok’ ch’uut, ut taapatz’ re li junjunq ch’uut naq te’ril jun reheb’ li jachal a’in: Markos 5:25–34; Lukas 5:17–26; ut Jwan 9:1–7. K’a’ru xe’xb’aanu li ani yeeb’ileb’ resil sa’ li junjunq raqal re xk’utb’al lix paab’aal chirix li Kolonel? K’a’ru naru taqab’aanu laa’o re xtzolb’al li evangelio ut re xk’utb’al naq wan qapaab’aal naq li Qaawa’ tooxtenq’a chixtzolb’al li yaal?

• Chixjunileb’ li komon tento sa’ xb’eeneb’ xb’oqb’al chaq li Musiq’ej sa’ li tzoleb’aal. Re xtenq’ankileb’ li komon chixtawb’al ru a’in, patz’ reheb’ naq te’ril sa’ Alma 1:26 ut sa’ Tzol’leb’ ut Sumwank 50:13–22; 88:122–23 ut te’xye k’a’ru neke’ru chixb’aanunkil laj k’utunel ut eb’ li neke’tzolok re xb’oqb’al chaq li Musiq’ej. Maare us xtz’iib’ankil li k’a’ru xe’xsume sa’ li pizarron, rik’in li aatin a’in sa’ xjolomil: K’a’ru naru tixb’aanu laj k’utunel ut K’a’ru naru te’xb’aanu li neke’tzolok. Ma us raj xtz’iib’ankil li te’xsume chiru jun nimla hu re taaruuq chi k’utmank chiru junjunq xamaan chik?

Tento taqanaw li yaal qajunes.

• Wankeb’ naab’al li raqal sa’ li Ak’ Chaq’rab’ li neke’xk’ut li na’leb’ li te’xk’am qab’e re xsik’b’al li yaal. Sa’ xyanqeb’ wan Lukas 11:9–13; Jwan 5:39; 7:14–17; ut 1 Korintios 2:9–11. Wi wankeb’ li komon sa’ laa tzoleb’aal li ak xe’rileb’ li raqal a’in naq xe’tzolok xjuneseb’, naru taapatz’ reheb’ naq te’xwotz li k’a’ru xe’xtzol. Malaj ut, taaruuq teeyaab’asi sa’ komonil eb’ li raqal a’in, ut taapatz’ reheb’ li komon naq te’xwotz chan ru naq xe’xtaw lix nawomeb’ xch’ool.

  eb’ li saaj winq ut saaj ixq sa’ jun li tzoleb’aal

  Xsik’b’al li na’leb’ rik’in li paab’aal tooxtenq’a chixtawb’al xnawom qach’ool.

• Maak’a’ naxye jarub’ chihab’ wanjenaqo sa’ li Iglees, aajel ru choq qe chiqajunqal xkawob’resinkil rajlal lix nawom qach’ool. Re xtenq’ankileb’ li komon sa’ li tzoleb’aal chixtawb’al li yaalil na’leb’ li tento te’xnaw xjuneseb’, taaruuq taatz’iib’a chiru kok’ hu junjunq raqal sa’eb’ li loq’laj hu li neke’xk’ut xninqal ru yaalil na’leb’, jo’ Jwan 3:16–17; 1 Korintios 15:22; Mosiah 3:13; Alma 7:11–13; ut Tzol’leb’ ut Sumwank 135:3. Tz’aama chiruheb’ li komon sa’ li tzoleb’aal naq te’rileb’ li raqal a’in, naq te’xye resil li yaalil na’leb’ neke’xtaw, ut naq te’xye k’a’ru neke’ru chixb’aanunkil re te’wanq xnawomeb’ xch’ool chirix. Re naq chaab’ilaq wi’chik li k’anjel a’in choq’ reheb’ li saaj komon, k’oxla xmuqb’aleb’ li kok’ hu yalaq b’ar sa’ li tzoleb’aal, ut k’e xb’oqb’aleb’ li saaj komon "chixsik’b’al li yaal."

• Sa’ Hechos 17:10–12, nayeeman resileb’ laj santil paab’anel li ke’xtzoleb’ li loq’laj hu ut ke’xtaw xnawomeb’ xch’ool chirix li yaal. Re xwaklesinkileb’ xch’ool li komon chixb’aanunkil jo’ ke’xb’aanu a’an, yaab’asihomaq sa’ komonil eb’ li raqal a’in ut patz’ reheb’ li komon naq te’xwotzeb’ li raqal sa’eb’ li loq’laj hu li xnimob’resink re lix nawomeb’ xch’ool chirix li evangelio.

Chan ru naq nokoru chixtawb’al qana’leb’ chi mas wi’chik sa’ xtzolb’aleb’ li loq’laj hu?

• Maare wankeb’ li komon li te’k’oxlanq re naq ch’a’aj li k’ayk rik’in xtzolb’aleb’ li loq’laj hu xb’aan naq moko tz’aqal ta lix hoonaleb’, lix na’leb’eb’, malaj lix seeb’aleb’. K’a’ru naru taab’aanu re xtenq’ankileb’ re te’ruuq chixb’aanunkil? Maare taatikib’ rik’in xyeeb’al li seraq’ chirix laj si’ sa’ "Xkomon chik li k’anjeleb’aal." Re xtenq’ankileb’ li komon chi wank xkawilaleb’ xch’ool chirix xtzolb’aleb’ li loq’laj hu, naru taak’ut li na’leb’ sa’ "Li na’leb’ re xchaab’ilob’resinkil li tzolok aajunes" sa’ li hu Kim, Taaqehin—Choq’ reheb’ li komon ut li junkab’al. Maare laa’at ut jalaneb’ chik li komon sa’ li tzoleb’aal texruuq chixwotzb’al li k’a’ru xek’ul rik’in li na’leb’ a’in, malaj chirix li k’a’ chik ru xek’ul rik’in xtzolb’aleb’ li loq’laj hu. Naru ajwi’ taasik’ ru jun ch’ol sa’ li Ak’ Chaq’rab’, ut teeyal sa’ komonil xtzolb’al rik’in roksinkil junjunq li na’leb’ a’in.

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon chi tzolok sa’ Mateo 1 ut sa’ Lukas 1 sa’ kab’l re xkawresinkil rib’ choq’ re li seraq’ sa’ li xamaan jun chik, naru taapatz’ li patz’om a’in: "Ma xpatz’man aawe jun sutaq xb’aanunkil li k’a’ru chanchan ink’a’ naru xb’aanunkil?" Eb’ li ch’ol a’in neke’xk’ut li na’leb’ naq "maak’a’ ch’a’aj chiru li Dios" (Lukas 1:37).

reetalil li k’anjeleb’aal

Xkomon chik li k’anjeleb’aal

Xk’ulb’al qajunes li musiq’ejil nawom.

Li Elder David A. Bednar kixye: "Xink’e reetal naq wan jun chaab’ilal rik’ineb’ laj tzolonel li k’a’jo’ naq xe’tenq’ank we sa’ lin yu’am. Eb’ a’an xine’xtenq’a chixsik’b’al innawom rik’in li paab’aal. Ink’a’ yal xe’xk’e xsumenkil inch’a’ajkil patz’om sa’ junpaat. Relik chi yaal, ink’a’ ajwi’ xe’xsume inpatz’om. A’b’anan xe’xk’ut li b’e chiwu, ut xine’xtenq’a chixtawb’al b’ar taawanq xsumenkil inpatz’om. ... Naq naqak’ul xsumenkil jun patz’om, ink’a’ najt najultiko’ qe, ut maare ink’a’ ajwi’ taakanaaq sa’ qach’ool. A’b’anan jun xsumenkil qapatz’om li naqataw rik’in xk’anjelankil li qapaab’aal, najultiko’ qe chiru chixjunil li qayu’am. ... Ka’ajwi’ chi jo’kan naru junaq chixkanab’ankil yal xk’ulb’al lix musiq’ejil nawom ut lix na’leb’ jalan, ut tixk’ul xjunes rib’ li usilal a’an" ("Buscar conocimiento por la fe," Liahona, septiembre 2007, 23).

Xxaqab’ankil li hoonal re xtzolb’aleb’ li loq’laj hu.

Li Hermano Tad R. Callister kixye:

"Wiib’ aj si’ ke’xyal ru re rilb’al ani taaruuq chixt’anb’al xk’ihal li toon che’ chiru jun kutan. Saqew re ke’xtikib’. Rajlal jun oor, li winq li ka’ch’in xteram naxik chi b’eek sa’ k’iche’ chiru maare 10  k’asal. Rajlal naq kixb’aanu a’in, li jun chik xse’ek, ut kixk’oxla naq a’an yoo chixq’axb’al ru. Li winq li nim xteram maajo’q’e kixkanab’ lix k’anjel, maajo’q’e kixkanab’ yok’ok, ut maajo’q’e kihilan.

"Naq kiraqe’ li kutan, li nimla winq kisach xch’ool chixk’eeb’al reetal naq li jun chik, li kihilan k’iila sut, mas wi’chik li toon che’ kixt’an chiru a’an. "Chan ru naq xab’aanu a’an naq k’iila sut xathilan?" chan re.

"Li winq li xq’ax ru kichaq’ok, "Ah, yookin chaq chixk’eeb’al xq’esnal lin maal."

"Rajlal naq naqatzoleb’ li loq’laj hu, yooko chixk’eeb’al xq’esnal li qamusiq’ejil mal" ("El gozo de aprender," Liahona, octubre 2016, 12).

Xchaab’ilob’resinkil li qak’utum

Junelik chajayali aawib’ sa’ li tz’aqal tzol’leb’. K’e aach’ool naq li aatinak sa’ laa tzoleb’aal taawanq chi k’ojob’anb’il sa’ xb’eeneb’ li loq’laj hu ut li raatineb’ li profeet. Naru taab’aanu a’in rik’in xpatz’b’al xkomon li patz’om a’in: "K’a’ru li na’leb’ chirix li evangelio li xqatzol rik’in li k’a’ru xyeeman?" malaj "Ma wan ani naru chixk’utb’al jun raqal sa’eb’ li loq’laj hu li na’aatinak chirix li yooko chi aatinak wi’?" (Chi’ilmanq Li k’utuk jo’ li Kolonel, 20–21.)