« 4–10 nō fepuare. Mataio 4 ; Luka 4-5 : ‘Tei niʼa iho iāʼu te Vārua ʼo te Fatu’ » Mai, peʼe mai—Nō te Haʼapiʼiraʼa Sābati : Faufa’a ’Āpī 2019 (2019)
« 4–10 nō fepuare. Mataio 4 ; Luka 4-5 », Mai, peʼe mai—Nō te Haʼapiʼiraʼa Sābati : 2019
{5}ʼUa upoʼotiʼa te Mesia i niʼa ia Sātane, nā Robert T. Barrett
4–10 nō fepuare.
Mataio 4 ; Luka 4–5
« Tei niʼa iho iāʼu te Vārua ʼo te Fatu »
ʼA tuatāpapa ai ʼoutou ia Mataio 4 ʼe Luka 4–5, ʼa pāpa’i i tō ʼoutou mana’o pae vārua. Nā te reira e ani i te faʼaururaʼa e nāhea ’ia pāhono maita’i a’e i te mau hinaʼaro o tā ʼoutou mau pīahi. E feruri atoʼa paha ʼoutou i te faʼaʼohipa i te Mai, peʼe mai—Nō te mau taʼata iho ʼe te mau ʼutuāfare ʼe teie atoʼa arataʼiraʼa nō te ʼimi i te tahi atu mau manaʼo.
’A pāpa’i i tō ʼoutou mana’o
Ani ’ia fa’a’ite mai
Tei roto i te taiʼoraʼa nō teie hepetoma i teie faʼahitiraʼa parau : « ʼUmere mai ra rātou i tāna haʼapiʼiraʼa : Te mana ra hoʼi tāna parau » (Luka 4:32; hi’o ato’a Mareko 1:22). E aha te mau ʼīrava tā te mau pīahai e nehenehe e faʼaʼite mai nā roto mai i teie mau pene o te tauturu ia rātou ’ia ʼite nō rātou iho i te mana o te parau ?
Ha’api’i i te ha’api’ira’a tumu
ʼUa hōroʼa mai te Metua i te Ao ra ia tātou i te mana ʼe te rāveʼa nō te pātoʼi atu i te faʼahemaraʼa.
-
E nehenehe te ʼāʼamu nō tō te Faʼaora pātoʼiraʼa atu ia Sātane e tauturu i te mau pīahi ’ia ʼite i te mau rāveʼa e tāmata ai Sātane i te faʼahema ia rātou. E nehenehe te mau pīahi e māʼiti i te hōʼē o te mau faʼahemaraʼa i roto i te Mataio 4:1–11 ʼaore rā Luka 4:1–13 ʼe ’ia feruri i te hōʼē ā faʼahemaraʼa nō teie tau (ʼe nehenehe te mau faʼahitiraʼa parau i roto « Te tahi atu mau rāveʼa tauturu » e tauturu). Nō te aha e mea maitaʼi ’ia ʼite ē ʼua faʼaruru te Faʼaora i te mau faʼahemaraʼa mai te mau faʼahemaraʼa tā tatou e faʼaruru nei i teie mahana ? Nō te aha i noaʼa ai i te Mesia ’ia pātoʼi atu i te faʼahemaraʼa ? Nō te tahi atu mau hiʼoraʼa nō te mau taʼata tei pātoʼi atu ia Sātane, ʼa hiʼo Genese 39:7–20 ; 2 Nephi 4:16–35 ; ’e Mose 1:10–22.
-
Hōʼē rāveʼa nō te faʼaitoito i te tauʼaraʼa parau nō niʼa ia Mataio 4:1–11 ʼe Luka 4:1–13 o te pāpaʼiraʼa ïa e piti uiraʼa i niʼa i te tāpura ’ere’ere : {45}ʼE aha tā tātou i haʼapiʼi mai nō niʼa i te Mesia nā roto mai i teie ʼāʼamu ? ’e {47}ʼE aha tā tātou i haʼapiʼi mai nō niʼa ia Sātane ? ʼA ani i muri iho i te mau pīahi ’ia ʼimi mai i te mau pāpaʼiraʼa moʼa nō te ʼite i te mau pāhonoraʼa i teie mau uiraʼa ʼe ’ia pāpaʼi i tā rātou mau pāhonoraʼa i niʼa i te tāpura ’ere’ere.
-
E aha te mea e nehenehe ai i tā ʼoutou mau pīahi ’ia pātoʼi atu i te faʼahemaraʼa ? E nehenehe ʼoutou e ani i te mau pīahi ’ia hiʼo faʼahou i te mau hi’ora’a i roto i te Mataio 4:1–11 ʼaore rā Luka 4:1–13 i reira te ʼite ʼo te Faʼaora nō niʼa i te mau pāpaʼiraʼa moʼa i te tauturura’a iāna ’ia pāhono atu ia Sātane (mā te parau atu ē, « ’ua pāpaʼihia ā »). ʼA hōroʼa i te mau pīahi i te taime nō te ʼimi ʼe nō te faʼaʼite mai i te mau pāpaʼiraʼa moʼa o te nehenehe e faʼaitoito ʼe e haʼapūai ia rātou i te taime e faʼahemahia ai rātou.
ʼO Iesu te Mesia i tohuhia.
-
Nō te tauturu i tā ʼoutou mau pīahi ’ia taʼa maitaʼi aʼe i teie ʼāʼamu, ʼe nehenehe ʼoutou e haʼamāramarama atu ē, te auraʼa nō te tiʼaraʼa te Mesia, o « tei faʼatāhinuhia » ïa. ʼA taiʼo ai rātou ia Luke 4:18–21, ʼa ani ia rātou ’ia feruri ʼe aha te auraʼa o tē parau ra ’o Iesu te Mesia, ʼaore rā tei faʼatāhinuhia. Nāhea Iesu i parau ai ē ʼo ʼoia te Mesia i teie mahana ? ʼA ani i te mau pīahi ’ia faʼaʼite mai e nāhea tō rātou ʼiteraʼa ē ʼo Iesu Mesia tō rātou Faʼaora.
-
Tē vai ra paha te tahi mau haʼapiʼiraʼa e hina’arohia ’ia ha’api’i mai ma te hi’ora’a nō te aha te mau ta’ata nō Nazareta i ’ore ai e fāriʼi ia Iesu ʼei Mesia tei tohuhia. Hōʼe rāveʼa nō te rave i te reira ʼo te faʼaauraʼa ïa i tō rātou huru i te huru ʼo te vahine ʼivi nō Zarephate ʼe nō Naamana i roto i te Faufaʼa Tahito. E nehenehe ʼoutou e fārerei nā mua atu i te mau pīahi nō te ani ia rātou ’ia haere ineine mai nō te haʼapoto i teie nei mau ʼāʼamu (ʼa hiʼo 1 Te mau Ariʼi 17:8–24 ; 2 Te mau Ariʼi 5:1–17 ; Luka 4:16–30). E aha tā teie mau ʼāʼamu e haʼapiʼi nei ia tātou nō niʼa i te mau temeio ʼe te pāhonoraʼa a te mau tāvini ʼa te Atua ? ʼUa ʼite ānei te mau pīahi i te mau poroʼi nō te mau melo nō te ʼĒkālesia i teie mahana i roto i te mau parau ʼa te Faʼaora i te mau taʼata nō Nazareta ?
Te faʼaotiraʼa ’ia peʼe atu i te Mesia o te fāriʼiraʼa ïa i tōna hinaʼaro ʼe te vaiihoraʼa i tō tātou iho hinaʼaro.
-
I te tahi mau taime ʼaita roa e auraʼa i te haʼamataraʼa te arataʼiraʼa tā te Fatu e hōroʼa mai ia tātou. E nehenehe te mau pīahi e ʼimi i roto i te Luka 5:1–11, nō te hiʼo e aha tā te Faʼaora i ani atu ia Petero ʼe nō te aha Petero i fēʼaʼa ai i tāna mau arataʼiraʼa. Nāhea teie ’itera’a i te faʼahuru-’ē-ra’a i te hiʼoraʼa ʼo Petero nō niʼa i te Faʼaora ʼe nō niʼa iāna iho ? E nehenehe ʼoutou e ani i te mau pīahi ’ia faʼaʼite mai i te mau ’itera’a i reira rātou i te faʼaʼitera’a i tō rātou faʼaroʼo i te arataʼiraʼa nō te raʼi mai, noa atu e ʼe ʼaita rātou i māramarama maitaʼi. E aha te hopeʼa ’a faʼaʼohipa ai rātou i tō rātou faʼaroʼo ?
« ʼA peʼe mai iā’u, e faʼariro vau ia ʼōrua ʼei rāvaʼai taʼata » (Mataio 4:19
-
Mai te mau taʼata rāvaʼai i « faʼaruʼe i te mau mea atoʼa » nō te peʼe i te Iesu Mesia (Luka 5:11), tē vai ra te mau mea e tiʼa ia tātou ’ia faʼaruʼe nō te riro ʼei mau pipi nāna. E aha tā te Mataio 4:18–22 e parau nei nō niʼa i te huru ʼe te faʼaroʼo ʼo Petero, Anederea, Iakobo ʼe ’o Ioane ? E riro paha te reira ʼei tautururaʼa i te ʼāfaʼira’a mai i te hōʼē ʼūpeʼa iʼa i te piha haʼapiʼiraʼa ʼe ’ia ani i te mau pīahi ’ia pāpaʼi i te mau mea ʼua ineine rātou i te faʼaruʼe ʼaore rā tei faʼaruʼe-aʼena-hia nō te peʼe i te Mesia ʼe ia tuʼu atu i te reira i roto i te ʼūpeʼa. ʼA feruri i te ani i te tahi mau pīahi ’ia faʼaʼite mai, nāhea tō rātou oraraʼa i te tauira’a ʼa māʼiti ai rātou i te faʼaruʼe i te mau mea atoʼa nō te peʼe i te Faʼaora.
Faʼaitoito i te haʼapiʼiraʼa mai i te fare
Nō te faʼauru i te mau pīahi ’ia taiʼo Ioane 2–4 i roto i te hepetoma e haere mai nei, e nehenehe ʼoutou e ani ia rātou ’ia feruri i te auraʼa nō te parau « ia fānau-faʼahou-hia ». ʼA parau atu ia rātou ē e tauturu te taiʼoraʼa o te hepetoma i mua ia rātou ’ia pāhono i teie uiraʼa.
Te tahi atu mau rāveʼa tauturu
’O Iesu te Mesia.
« ’Ua parau Iesu ʼo ʼōna te Mesia » (video, LDS.org)
Te mau huru faʼahemaraʼa
I muri a’e i te aʼoraʼa nō niʼa i te mau huru faʼahemaraʼa tā te Faʼaora i faʼaruru i te medebara ra, ʼua haʼapiʼi te peresideni David O. McKay :
« E tae mai te mau fa’ahemara’a ato’a ia ’outou ’e iā’u nā roto e toru huru :
« (1) Te faʼahemaraʼa nō te hiaʼai māʼa ʼe ʼaore rā, te hinaʼaro rahi ;
« (2) Te toparaʼa i roto i te te’ote’o, te fāito ʼahu, ʼe ʼaore rā, te ahaaha ;
« (3) Te hō’ē hinaʼaro i te mau tao’a ʼo te ao nei ʼe ʼaore rā, te mana ʼe te faʼaterera’a i ni’a i te mau fenua ʼe ʼaore rā, te mau tao’a ʼo te fenua ʼa te taʼata » (Te mau Haʼapiʼira ʼa te mau Peresideni ʼo te ʼĒkālesia : David O. McKay [2003], 82).
Nō niʼa i te ʼohipa tei tupu ia Iesu i roto i te Mataio 4, ʼua haʼapiʼi ʼo Elder Jeffrey R. Holland :
« E Tamaiti ʼoe nā te Atua ra, ’a parau i teie nei mau ʼōfaʼi ’ia riro ʼei māʼa’ …
« E ’ere te faʼahemaraʼa tei roto i te ʼāmuraʼa.… Te faʼahemaraʼa, te tufaʼa o tāʼu e hinaaʼo i te faʼatumu atu, o te raveraʼa ïa i te reira mai teie te huru, ’ia noaʼa tāna faraoa—tōna māharaʼa i te pae tino, te tāmarūraʼa i te hinaʼaro taʼata—te rāveʼa ʼōhie, ma te faʼaʼohipara’a i te pūai ʼe mā te hinaʼaro ʼore i te tīaʼi i te taime tiʼa ʼe te rāveʼa tiʼa …
« ‘E Tamaiti ʼoe na te Atua ra, e haʼamaʼiri ʼoe ia ʼoe iho i raro …
« ’Ua hau roa atu te fifi o teie faʼahemaraʼa i te faʼahemaraʼa mātamua. E faʼahemaraʼa nō te vārua, te hōʼē poʼiaraʼa o te taʼata iho tei hau atu i te hinaʼaro i te faraoa. E faʼaora ʼānei te Atua iāna ? … Nō te aha ’aita e fāriʼi i te haʼapāpūraʼa pae vārua, ’ia noaʼa te hōʼē ʼāmuiraʼa taʼata faʼaroʼo, ʼe te pāhonoraʼa i teie taʼata maʼamaʼa e haʼafifi nei—teie mau mea atoʼa nā roto noa i te piʼiraʼa i te mana oʼ te Atua ? …
« ʼUa pātoʼi rā Iesu i te faʼahemaraʼa ʼo te vārua. Te faʼaʼereraʼa ʼe te haʼavīraʼa e tufaʼa atoʼa ïa nō te faʼaineineraʼa hanahana. … ʼUa tiʼa atoʼa i te Tamaiti ʼa te Atua ’ia tīaʼi. E ʼore roa te Tāraʼehara e hōroʼa atu i te maitaʼi māmā i niʼa ia vetahi ’ē ʼe ʼore atoʼa ʼoia e ani i te reira nōna iho. …
« … ‘E hōroʼa atu vau i teie nei mau mea ia ʼoe nā ’ia tīpapa mai ʼoe i raro e haʼamori mai iāʼu.’
« ʼUa ani … [Sātane], ‘E aha tā ʼoe moni hoʼo? E pātoʼi ʼoe i te faraoa māmā. E pātoʼi ʼoe i te haʼutiraʼa faʼa’ino i te Mesia, ʼaore hoʼi e taʼata ʼe nehenehe e pātoʼi atu i te taoʼa ʼo teie nei ao.. {109}ʼA faʼaʼite mai i tā ʼoe moni hoʼo.’ Tē haʼa nei Sātane i raro aʼe i tāna taoʼa mātāmua nō te ha’apa’o ʼore—te tiʼaturiraʼa hōʼē roa ē e nehenehe ʼoutou e hoʼo mai i te mau mea atoʼa i roto i teie ao nō te moni.
« E faʼatere Iesu i te ao nei i te hōʼē mahana. E faʼatere ʼoia i te mau hau hui ariʼi ʼe te mana i roto i te reira. E riro ʼoia ’ei Ariʼi nō te mau Ariʼi ʼe te Fatu nō te mau Fatu.. {111}ʼEiaha rā mai teie te huru
Haʼamaitaʼiraʼa i tā tātou haʼapiʼiraʼa
ʼA haʼamaūruru i tā ʼoutou mau pīahi. « ’Eiaha e ha’apa’o rahi roa i te ha’api’ira’a ’e e mo’ehia atu ai ia ’outou i te ha’amāuruuru i te mau pīahi nō tō rātou mau mana’o. Tē hinaʼaro nei rātou ’ia ʼite ē tē māuruuru nei ʼoutou nō tō rātou hinaʼaro ’ia faʼaʼite mai i tō rātou mau manaʼo ʼe te ʼiteraʼa pāpū » (Haʼapiʼiraʼa mai tā te Faʼaora, 33).