“Agosto 12–18. Mga Taga-Roma 7–16: ‘Dag-a ang Dautan pinaagi sa Maayo’” Dali, Sunod Kanako—Alang sa Sunday School: Bag-ong Tugon 2019 (2019)
“Agosto 12–18. Mga Taga-Roma 7–16,” Dali, Sunod Kanako—Alang sa Sunday School: 2019
Agosto 12–18
Mga Taga-Roma 7–16
“Dag-a ang Dautan pinaagi sa Maayo”
Basaha ang Mga Taga-Roma 7–16, ug irekord ang mga impresyon nga imong madawat kon unsaon pagtabang ang mga sakop sa imong klase nga makakat-on gikan sa mga kasulatan. Sa sinugdanan ang imong mga impresyon mahimong morag yano lamang nga mga ideya, apan samtang mamalandong ka niini, mahimo kining makahuluganong mga kalihokan sa pagkat-on.
Irekord ang Imong mga Impresyon
Dapita ang Pagpaambit
Ang mga sakop sa klase kinahanglang mobati nga gawasnon sa pagpaambit og bisan unsa nga nakapadasig kanila sa ilang personal o pamilya nga pagtuon, apan usahay makatabang ang paghangyo alang sa mga hunahuna mahitungod sa piho nga butang. Pananglitan, mahimo nimong basahon ang Mga Taga-Roma 10:17 ug 15:4 ug hangyoa sila sa pagpaambit og mga kasulatan nga nakapaugmad sa ilang hugot nga pagtuo o nakahatag kanila og paglaum.
Itudlo ang Doktrina
Pinaagi kang Jesukristo, mapanunod nato ang tanan nga anaa sa Langitnong Amahan.
-
Isip mga Santos sa Ulahing mga Adlaw, mituo kita nga ang mga pulong sama sa “mga manununod sa Dios” ug “mga isigkamanununod uban kang Kristo” nagpasabut nga pinaagi sa tabang ni Jesukristo, mahimo kitang mahisama sa Langitnong Amahan ug makadawat sa tanan nga anaa Siya (Mga Taga-Roma 8:17; tan-awa usab sa DP 132:19–20). Aron matabangan ang mga sakop sa klase nga makakita kon giunsa pagtudlo kining doktrina sa tibuok kasulatan, mahimo nimong dapiton ang katunga sa klase nga tun-an ang pipila ka bersikulo sa Biblia nga nalista diha sa “Dugang nga mga Kapanguhaan” ug ang laing katunga nga tun-an ang mga bersikulo gikan sa kasulatan sa ulahing mga adlaw, nga anaa usab diha sa “Dugang nga mga Kapanguhaan.” Dayon ang mga sakop sa klase mahimong motudlo sa usag usa kon unsa ang ilang nakat-unan. Hatagi sila og panahon sa paghisgot kon ngano nga kining doktrina importante kaayo. Pananglitan, unsay kalainan nga mahimo niini sa atong kinabuhi nga mahibalo nga mamahimo kitang “mga manununod sa Dios, ug mga isigkamanununod uban kang Kristo”? (Mga Taga-Roma 8:17).
-
Ang paghinumdom nga ang mahangturong mga panalangin naghulat sa mga matinud-anon makatabang kanato kon mag-atubang kita og tintasyon o mga pagsulay (tan-awa sa Mga Taga-Roma 8:18). Usa ka yanong paagi sa paghulagway niining baruganan mao ang pagdrowing og usa ka timbangan [balance] diha sa pisara; hangyoa ang mga sakop sa klase sa paglista diha sa usa ka bahin sa pipila ka pagsulay nga mahimong masagubang sa mga tawo. Dayon mahimo silang mosiksik sa pipila ka kasulatan diha sa “Dugang nga mga Kapanguhaan” ug sa paglista diha sa laing bahin sa timbangan sa mga paghulagway sa mahangturong mga panalangin nga moabut niadtong matinud-anong mosagubang sa ilang mga pagsulay. Sa unsang paagi nga ang mga pagsulay matandi sa gisaad nga mga panalangin? Unsay atong isulti sa usa ka tawo nga nangutana kanato kon may pulos ba ang pagkamatinud-anon ngadto sa mga sugo sa Ginoo?
-
Ang analohiya nga gihatag ni Elder Dallin H. Oaks diha sa “Dugang nga mga Kapanguhaan” makatabang sa mga sakop sa klase sa paghisgot kon unsaon nato pag-andam aron mahimong “mga manununod sa Dios” (Mga Taga-Roma 8:17). Unsa ang pipila sa “mga balaod ug mga baruganan” nga gipasabut ni Elder Oaks?
“Kinsa ba ang makapahimulag kanato gikan sa gugma ni Kristo?”
-
Ang paghisgot og dungan sa Mga Taga-Roma 8 makahatag og oportunidad nga makatabang sa mga sakop sa klase nga mobati sa gugma sa Manluluwas. Ikonsiderar ang pag-display sa tibuok pahina nga imahe sa outline karong semanaha diha sa Dali, Sunod Kanako—Alang sa mga Indibidwal ug mga Pamilya o laing hulagway ni Jesukristo samtang magbasa kamo sa Mga Taga-Roma 8:18, 28, 31–39 isip usa ka klase. Unsa nga mga hunahuna o mga pagbati ang anaa sa mga sakop sa klase human mabasa kining mga bersikulo? Mahimo nimong dapiton ang pipila ka sakop sa klase sa pagpaambit kon giunsa nila pagbaton og mga pagpamatuod bahin sa mga kamatuoran nga ilang nakit-an dinhi niining mga bersikulo. Mahimo usab kamong manganta og himno isip usa ka klase (o hangyoa ang usa ka tawo nga mopasundayag og usa ka musikal nga presentasyon) mahitungod sa gugma sa Dios ug ni Jesukristo, sama sa “God Loved Us, So He Sent His Son” o “I Stand All Amazed [Ako Nahingangha, Nahibulong]” (Hymns, mga nu. 187, 193). Unsa nga mga pulong gikan niining mga awit ang makatabang sa mga sakop sa klase nga mobati sa gugma sa Langitnong Amahan ug ni Jesukristo?
Ang tanang sugo sa Dios matuman diha sa sugo sa paghigugma.
-
Aron matabangan ang mga sakop sa klase nga makita kon sa unsang paagi nga ang tanang sugo “nalangkob niining mga pulonga” sa sugo sa paghigugma sa imong silingan (Mga Taga-Roma 13:9), dapita sila nga maghimo og lista diha sa pisara sa tanang sugo nga ilang mahunahunaan. Basaha og dungan ang Mga Taga-Roma 13:8–10 ug Mateo 22:36–40, ug hisguti isip usa ka klase ang relasyon tali sa paghigugma sa Dios ug sa atong silingan ug ang pagsunod sa matag usa sa mga sugo nga nalista diha sa pisara. Sa unsang paagi nga kining kamatuoran makapausab sa paagi sa atong paghunahuna mahitungod sa mga sugo ug pagkamasulundon?
Kinahanglang likayan nato ang paghukom sa mga pagpili sa uban ug ang pagkahimong mga babag sa espiritwal nga paagi.
-
Aron sa paghatag og pipila ka konteksto sa Mga Taga-Roma 14, mahimo nimong hisgutan nga ang uban sa mga Santos nga taga-Roma nakiglalis sa usag usa mahitungod sa lain-laing mga pamaagi sa pagkaon, mga pagsaulog sa mga holiday, ug sa ubang kultural nga mga gipangbuhat. Unsa nga susamang mga sitwasyon ang atong giatubang karon? Tingali ang mga sakop sa klase mahimong mobasa sa Mga Taga-Roma 14 ug mohatag og usa ka sentence nga summary bahin sa tambag ni Pablo. Unsa nga tambag ang atong mapaambit sa usag usa kon unsaon sa paglikay nga mahimong mahukmanon? Ang pamahayag ni Presidente Dieter F. Uchtdorf diha sa “Dugang nga mga Kapanguhaan” mahimong makatabang.
Awhaga ang Pagkat-on diha sa Panimalay
Aron madasig ang mga sakop sa klase nga mobasa sa 1 Mga Taga-Corinto 1–7, mahimo nimo silang sultihan nga naglangkob kini sa tambag ni Pablo ngadto sa mga miyembro nga nagpuyo sa unsay nailhan isip usa sa labing imoral ug nagsimba sa mga dios-dios nga mga siyudad sa karaang kalibutan.
Dugang nga mga Kapanguhaan
Pagdawat sa “tanan nga iya sa Amahan” (DP 84:38).
Gikan sa Biblia
Gikan sa kasulatan sa ulahing mga adlaw
Si Elder Dallin H. Oaks misaysay sa mosunod nga sambingay:
“Usa ka adunahan nga amahan nasayud nga kon itugyan niya ang iyang katigayunan ngadto sa usa ka anak nga wala pa mapalambo ang gikinahanglan nga kaalam ug kahamtong, ang kabilin tingali masayang lang. Miingon ang amahan ngadto sa iyang anak:
“‘Ang tanang anaa nako akong gitinguha nga ihatag nimo—dili lang ang akong katigayunan, apan ang ako usab nga posisyon ug kahimtang taliwala sa katawhan. Kanang unsay anaa nako sayon ra kaayo nakong mahatag nimo, apan kanang unsa ko kinahanglan gayud nimong maangkon sa imong kaugalingon. Makasarang ka alang sa imong kabilin pinaagi sa pagkat-on kon unsay akong nakat-unan ug pinaagi sa pagpakabuhi sama sa akong pagpakabuhi. Ihatag nako nimo ang mga balaod ug mga baruganan diin akong naangkon ang akong kaalam ug kahimtang. Sunda ang akong ehemplo, mobuntog sa unsay akong nabuntog, ug mahimo ka kon unsa ko, ug ang tanan nga anaa nako maimo’” (“The Challenge to Become,” Ensign, Nob. 2000, 32).
Isigkamanununod uban ni Kristo.
“Ang mga Santos sa Ulahing mga Adlaw motan-aw sa tanang tawo nga mga anak sa Dios sa kahingpitan niini; sila naghunahuna nga ang matag tawo balaanon ang kagikan, kinaiya, ug potensyal. … Ingon nga ang usa ka bata makapalambo sa mga hiyas sa iyang mga ginikanan sa paglabay sa panahon, ang balaanong kinaiya nga mapanunod sa mga tawo mahimong mapalambo aron mahisama sa ilang Langitnong Amahan. … Ang kalalakin-an ug kababayen-an adunay potensyal nga mahimaya ngadto sa usa ka kahimtang sa pagkadiosnon” (“Becoming Like God,” Gospel Topics, topics.lds.org).
Paghukom sa uban.
Si Presidente Dieter F. Uchtdorf nagtudlo:
“Kini nga hilisgutan kabahin sa paghukom sa uban mahimong ikatudlo sa duha ka pulong nga sermon. Kon hisgutan ang pagkasilag, paglibak, pagbale-wala, pagbiay-biay, pagdumot, o pagpasakit, palihug sunda ang mosunod:
“Hununga kini!
“Ingon ana kasayon. Hunungon ra gyud nato ang pagpanghukom sa uban ug pulihan ang mahukmanong mga hunahuna ug mga pagbati sa kasingkasing nga puno sa gugma alang sa Dios ug sa Iyang mga anak. Ang Dios mao ang atong Amahan. Kita Iyang mga anak. Tanan kita managsuon. … Usa ka bumper sticker nga bag-ohay lang nakong nakit-an … gipapilit kini sa luyo sa sakyanan kansang drayber medyo bagis tan-awon, apan ang mga pulong diha sa sticker nagtudlo og makapahunahuna nga leksyon. Kini nag-ingon, ‘Ayaw ko hukmi kay ang akong sala lahi kay sa imo’” (“Ang Maloloy-on Magadawat og Kalooy,” Liahona, Mayo 2012, 75).
Pagpalambo sa Atong Pagtudlo
Pangita og mga kapanguhaan nga mosuporta sa mga baruganan. Agig dugang sa mga ideya sa pagtudlo niining outline, mahimo nimong usbon ang mga kalihokan gikan sa outline karong semanaha diha sa Dali, Sunod Kanako—Alang sa mga Indibidwal ug mga Pamilya aron gamiton sa imong klase. (Tan-awa usab sa Pagtudlo sumala sa Pamaagi sa Manluluwas, 17–18.)