Roma

12–18 agosto

Romanos 7–16

“Maak’e chi numtaak li ink’a’ us sa’ aab’een, chaq’ax b’an a’an rik’in li us”

Il ru Romanos 7–16, ut tz’iib’a li na’leb’ nachal sa’ aak’a’uxl chirix chan ru xtenq’ankileb’ li komon sa’ laa tzoleb’aal chi tzolok rik’ineb’ li loq’laj hu. Sa’ xtiklajik, eb’ li na’leb’ a’an chanchan yal k’oxlahom, a’ut naq nakak’oxlaheb’, naru neke’ok choq’ chaab’il tzolom.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Us naq te’xnaw li komon sa’ li tzoleb’aal naq te’ruuq chixwotzb’al yalaq k’a’ru natenq’ank reheb’ sa’ li tzolok xe’xb’aanu xjuneseb’ malaj sa’ junkab’al, a’ut wan naq us xpatz’b’al naq te’xye li neke’xk’oxla chirix jun li na’leb’ taaye laa’at. Qayehaq, taaruuq raj taayaab’asi Romanos 10:17 ut 15:4, ut taaye reheb’ naq te’xwotz junaq raqal reheb’ li loq’laj hu li nanimob’resink re lix paab’aaleb’ malaj naxk’e royb’eninkileb’.

reetalil li k’utuk

Xk’utb’al li tzolʼlebʼ

Romanos 8:14–18

Sa’ xk’ab’a’ li Jesukristo, naru naqeechani chixjunil li k’a’ru re li qaChoxahil Yuwa’.

• Jo’ aj Santil Paab’anel sa’ Roso’jikeb’ li Kutan, naqapaab’ naq lix yaalalileb’ li ch’ol aatin jo’ “taqeechani xyeechi’ihom li Dios” ut “sum’eechaninelaqo qochb’een li Kristo” a’an naq chi tenq’anb’il xb’aan li Jesukristo, naru too’ok jo’ li qaChoxahil Yuwa’, ut taqak’ul li k’a’ru re a’an (Romanos 8:17; chi’ilmanq ajwi’ Tz. ut S. 132:19–20). Re xtenq’ankileb’ li komon sa’ li tzoleb’aal chirilb’al chan ru naq k’utb’il li tzol’leb’ a’in sa’eb’ li loq’laj hu, naru taapatz’ re xyijach li tzoleb’aal naq te’ril junjunq li raqal sa’ li Santil Hu li tz’iib’anb’ileb’ sa’ “Xkomon chik li k’anjeleb’aal,” ut lix yijach chik naq te’rileb’ li raqal sa’eb’ li loq’laj hu re roso’jikeb’ li kutan, li tz’iib’anb’ileb’ ajwi’ sa’ “Xkomon chik li k’anjeleb’aal.” Chirix a’an, eb’ li komon te’ruuq chixk’utb’al chirib’ileb’ rib’ li k’a’ru xe’xtzol. Kanab’ li hoonal choq’ reheb’ re te’aatinaq chirix k’a’ut naq nim xwankil li tzol’leb’ a’in. Qayehaq, chan ru naq naxjal li qayu’am xnawb’al naq naru “taqeechani xyeechi’ihom li Dios, sum’eechaninelaqo qochb’een li Kristo”? (Romanos 8:17).

• Wi najultiko’ qe li junelikil osob’tesink li wan choq’ reheb’ li tiikeb’ chi paab’ank, a’in naru nokoxtenq’a naq naqak’ul li aaleek malaj lix yalb’al qix (chi’ilmanq Romanos 8:18). Jun ch’ina k’anjel re xk’utb’al li na’leb’ a’in a’an xyiib’ankil xjalam-uuch jun b’isleb’ chiru li pizarron, ut eb’ li komon sa’ li tzoleb’aal neke’ru chxtz’iib’ankil chi junpak’al li b’isleb’ li yalok-ix naru neke’xk’ul li kristiaan. Chirix a’an, te’ruuq chixsik’b’al junjunq raqal reheb’ li loq’laj hu li wankeb’ sa’ “Xkomon chik li k’anjeleb’aal” ut te’xtz’iib’a chi junpak’al chik li b’isleb’ k’a’ruheb’ li junelikil osob’tesink li neke’chal sa’ xb’eeneb’ li ani neke’xnumsi li yalok-ix rik’in chaab’ilal. K’a’ru li mas nim wi’chik, li yalok-ix, malaj li osob’tesink li yeechi’inb’il? K’a’ raj ru taqaye re anihaq li tixpatz’ qe ma wan rajb’al xpaab’ankileb’ lix taqlahom li Qaawa’?

• Li jaljookil ru aatin k’eeb’il xb’aan li Elder Dallin H. Oaks sa’ “Xkomon chik li k’anjeleb’aal” naru naxtenq’aheb’ li komon sa’ aatinak chirix chan ru naru naqakawresi qib’ re toowanq choq’ “aj eechaninel” rik’in li Dios (Romanos 8:17). K’a’ruheb’ li “chaq’rab’ ut na’leb’ ” li yeeb’il resil xb’aan li Elder Oaks?

Romanos 8:18, 28, 31–39

“Ani taajachoq qe rik’in lix rahom li Kristo?

• Li aatinak sa’ komonil chirix Romanos 8 naru naxtenq’aheb’ li komon sa’ li tzoleb’aal chireek’ankil lix rahom li Kolonel. Naru taak’ut li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, malaj jalan chik xjalam-uuch li Kristo, naq yookex chirilb’al ru Romanos 8:18, 28, 31–39 sa’ li tzoleb’aal. K’a’ru neke’xk’oxla malaj neke’reek’a li komon sa’ li tzoleb’aal chirix rilb’aleb’ ru li raqal a’in? Naru taapatz’ re junjunq komon sa’ li tzoleb’aal naq te’xye resil chan ru naq xe’xk’ul xnawomeb’ xch’ool chirixeb’ li yaalil na’leb’ li tawb’ileb’ sa’eb’ li raqal a’in. Naru ajwi’ teeb’icha jun b’ich sa’ komonil (malaj taapatz’ re junaq komon naq tixwajb’a) chirix lix rahom li Dios ut li Jesukristo, jo’ maare “Koxra li Dios, ut li Ralal” malaj “Sachso ninkana” (Eb’ li B’ich, ajl 112, 118). K’a’ru li aatin malaj li ch’ol aatin sa’eb’ li b’ich a’in li neke’tenq’an reheb’ li komon chireek’ankil lix rahom lix Choxahil Yuwa’ ut li Jesukristo?

Romanos 13:8–10

Chixjunileb’ lix taqlahom li Dios tz’aqob’resinb’ileb ru sa’ li taqlahom naq toorahoq.

• Re xtenq’ankileb’ li komon chixtawb’al ru chan ru naq chixjunileb’ li taqlahom “neke’tz’aqlok ru” sa’ li taqlahom re xraab’al aawas aawiitz’in (Romanos 13:9), naru taaye reheb’ naq te’xtz’iib’a chi tzoltzo chiru li pizarron chixjunileb’ li taqlahom li naru neke’xk’oxla. Ilomaq ru sa’ komonil Romanos 13:8–10 ut Mateo 22:36–40, ut aatinanqex jo’ tzoleb’aal chan ru naq xraab’al li Dios ut xraab’aleb’ li qas qiitz’in naxk’am rib’ rik’in xpaab’ankil chixjunqaleb’ li taqlahom li tz’iib’anb’ileb’ chiru li pizarron. Chan ru naq a’in naxjal chan ru naqak’oxlaheb’ li taqlahom, ut noko’ab’in chiruheb’?

Romanos 14

Tento naq ink’a’ taqaraq aatin chirix li k’a’ru neke’xsik’ ru xb’aanunkil li jun siir chik, re ink’a’ toowanq choq’ musiq’ejil tich’leb’aal.

• Re xtawb’al ru k’a’ut naq kiyeeman li aatin sa’ Romanos 14, naru taaye naq ke’wan laj Santil Paab’anel aj Romano li neke’xwech’ rib’ chirib’ileb’ rib’ chirix li tzakemq, li ninq’ehik, ut xkomon chik li na’leb’ sa’ xtenamiteb’. K’a’ru li wan chi jo’ka’in sa’eb’ li kutan wanko wi’ anajwan? Maare eb’ li komon sa’ li tzoleb’aal te’ruuq chirilb’al sa’ junpaat Romanos 14 ut te’xye chi k’osb’il ru k’a’ru li na’leb’ naxk’e laj Pablo. K’a’ chik ru chi na’leb’ naru naqak’e chiqib’il qib’ re naq ink’a’ yooqo chi raqok aatin? Li raatin li Awa’b’ej Dieter F. Uchtdorf sa’ “Xkomon chik li k’anjeleb’aal” naru taatenqanq eere.

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru 1 Korintios 1–7, naru taaye reheb’ naq wan chi sa’ li raatin laj Pablo choq’ reheb’ li komon li wankeb’ sa’ jun reheb’ li tenamit q’axal yib’ ru ut aj loq’onihom pak’b’il dios sa’ najter kutan.

reetalil li k’anjeleb’aal

Xkomon chik li k’anjeleb’aal

Romanos 7–16

Xk’ulb’al “chixjunil li k’a’ru re” li qaYuwa’ ” (Tz. ut S. 84:38).

Sa’ li Santil Hu

• Lukas 12:42–44

• Romanos 8:14–18, 32

• 2 Korintios 3:18

• Galatas 4:1–7

• Apokalipsis 3:21

• Apokalipsis 21:7

Sa’eb’ li loq’laj hu re roso’jikeb’ li kutan

• 3 Nefi 28:10

• Tzol’leb’ ut Sumwank 50:26–28

• Tzol’leb’ ut Sumwank 76:92–95

• Tzol’leb’ ut Sumwank 84:38

• Tzol’leb’ ut Sumwank 88:107

• Tzol’leb’ ut Sumwank 132:19–20

Li Elder Dallin H. Oaks kixye li jaljookil ru aatin a’in:

“Jun li yuwa’b’ej b’ihom kixnaw naq wi tixkanab’ lix b’ihomal rik’in jun alalb’ej li maji’ naxtaw xtz’aqal lix na’leb’ ut xchaab’ilal, taasachlemanq li k’a’ru eechaninb’il. Li yuwa’b’ej kixye a’in re li ralal:

“ “Chixjunil li wan we nawaj xk’eeb’al aawe—ink’a’ ka’ajwi’ lin b’ihomal, jo’kan ajwi’ lin wankil ut lin chaab’ilal sa’ xyanqeb’ li winq. Li k’a’ru wan we moko ch’a’aj ta xk’eeb’al aawe, a’b’anan chan ru naq wankin, tento naq taataw laa’at aajunes. Tatruuq chixk’ulb’al aaweechanihom a’ yaal jo’ nakatzol li xintzol laa’in, ut a’ yaal jo’ nakayu’ami li xinyu’ami laa’in. Laa’in tink’e aawe eb’ li chaq’rab’ ut li na’leb’ li xintaw wi’ inwankilal ut inchaab’ilal. B’aanu li xinb’aanu, tzol li xintzol, ut tatwanq jo’ laa’in, ut chixjunil li k’a’ru we taak’eemanq aawe.” ” (“El desafío de lo que debemos llegar a ser,” Liahona, enero 2001, 40).

Sum’eechaninelaqo qochb’een li Kristo.

“Eb’ laj Santil Paab’anel sa’ Roso’jikeb’ li Kutan neke’rileb’ chixjunileb’ li winq ut ixq jo’ tz’aqal ralal xk’ajol li Dios; neke’ril li diosilal sa’ li junjunq aamej sa’ li chalenaq wi’, sa’ li wankilal li wan rik’in, ut sa’ li k’a’ru taaruuq chixk’ulb’al. … Jo’ chanru naq jun ch’ina al, chirix xnumik li kutan, naru chixk’ulb’al xwinqilal lix na’ xyuwa’, jo’kan ajwi’ li diosilal li wan sa’eb’ li winq ut ixq naru chi nimank ut chi ok jo’ xdiosilal lix Choxahil Yuwa’. … Eb’ li winq neke’ru chi taqsiik xloq’al toj te’wulaq sa’ li diosilal.” (chi’ilmanq “Winq” sa’ li K’utul Raqal reheb’ li Loq’laj Hu).

Raqok aatin chirix qas qiitz’in.

Li Awa’b’ej Dieter F. Uchtdorf kixk’ut:

“Li na’leb’ a’in chirix raqok aatin chirixeb’ li qas qiitz’in naru chi jultikamank rik’in wiib’ li kok’ aatin. Naq na’ux li xik’ ilok, li pak’ok aatin, li kanab’ank, li eetz’unk, li josq’o’k, malaj li rahob’tesink, ab’inqex chiru li aatin a’in:

“Meeb’aanu chik!

“Ka’ajwi’ a’an. Tento naq ink’a’ chik taqaraq aatin chirixeb’ li qas qiitz’in, ut naq ruuchil li raqok aatin, taawanq li qach’ool chi nujenaq rik’in li rahok choq’ re li Dios ut choq’ reheb’ li ralal xk’ajol. Li Dios a’an li qaYuwa’. Laa’o li ralal xk’ajol. Qas qiitz’in qib’ chiqib’il qib’. Xinwil jun ch’ina eetalil chi letzlo chirix jun li b’eleb’aal ch’iich’, li chanchan naq josq’ b’ayaq li nab’eresink re, a’ut li aatin sa’ li ch’ina eetalil naxk’ut jun chaab’il na’leb’. Chiru a’an tz’iib’anb’il, “Matraqok aatin chiwix rik’in naq jalan chik inmaak chiru laa we” ” (“Los misericordiosis alcanzan misericordia,” Liahona, mayo 2012, 75).

Xchaab’ilob’resinkil li qak’utum

Sik’eb’ li k’anjeleb’aal li te’xxaqab’eb’ xwankil li raqal chi na’leb’. Rochb’een li na’leb’ sa’ li tusleb’ aatin a’in, taaruuq ajwi’ taajal b’ayaq li kok’ k’anjel sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, re roksinkil sa’ laa tzoleb’aal. (Chi’ilmanq ajwi’ Li k’utuk jo’ li Kolonel,17–18.)