laj Pablo naq kixtz’iib’a jun li hu

5–11 agosto

Romanos 1–6

“A’an xnimal xwankil li Dios re xkolb’al chixjunileb’ ”

Il ru rik’in tijok Romanos 1–6, ut k’oxlaheb’ li komon sa’ laa tzoleb’aal. A’in tatxtenq’a re tat-ab’inq chiru lix yaab’ xkux li Musiq’ej naq nakakawresi aawib’ chi k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’oxla xk’eeb’al xhoonaleb’ li komon sa’ li tzoleb’aal re te’xtz’il rix Romanos 1–6, re xsik’b’al junaq raqal li nawulak chiruheb’. Chirix a’an, te’ruuq chixwotzb’al li raqal xe’xsik’ ru rik’in li ani chunchu chixk’atq.

reetalil li k’utuk

Xk’utb’al li tzolʼlebʼ

Romanos 1:16–17

“Ink’a’ ninxutaanak rik’in lix evangelio li Kristo.”

• Ma wan naq xe’eetz’uuk li komon sa’ laa tzoleb’aal xb’aan xpaab’aaleb’? B’oqeb’ chirilb’al ru Romanos 1:16–17, ut te’xk’oxla b’ar sa’ li hu Hechos kixk’ut laj Pablo naq ink’a’ naxutaanak rik’in li evangelio. K’a’ru junjunq li na’leb’ li neke’risi qaxutaan chi wank choq’ komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan? Kanab’eb’ li komon sa’ li tzoleb’aal chixwotzb’ k’a’ru xe’xk’ul, li naxk’ut naq eb’ a’an, malaj anihaq chik, ink’a’ neke’xutaanak rik’in lix evangelio li Jesukristo.

Romanos 1:16–17; 2:28–29; 6:1–11

Li qawanjik choq’ tzolom natawman sa’ lix anchalil qach’ool, ink’a’ yal rik’in li qab’aanuhom.

• Chan ru naqak’e reetal li qawanjik jo’ tzolom? Li raatin laj Pablo reheb’ laj Romano naru nokoxtenq’a re naq ink’a’ yal toowanq chixk’oxlankil li kok’ k’anjel tento xb’aanunkil, a’b’an li ch’oolej ut li musiq’ej (Romanos 2:29). Re xtenq’ankileb’ li wankeb’ sa’ laa tzoleb’aal chixtawb’al ru li na’leb’ kixk’e laj Pablo, naru taatz’iib’a li aatin sa’ Romanos 2:28–29 chiru li pizarron. Ruuchil li aatin Judio taak’e aj Santil Paab’anel sa’ Roso’jikeb’ li Kutan, ut ruuchil li aatin sirkunsisyon taak’e li aatin li sumwank. Chan ru naq a’in naxjal chan ru naq naqataw ru li kixk’ut laj Pablo? Naru ajwi’ tex’aatinaq chirix li k’a’aq re ru naqab’aanu jo’ komon sa’ li Iglees, li wan wi’chik xwankil wi b’aanunb’il “sa’ li qach’ool ut xb’aan li Musiq’ej” (Romanos 2:29). Jo’ jun eetalil, chi’ilmanq li raatin li Elder Jeffrey R. Holland chirix li tzolok ochochnal, “Aj k’amol esil re li Iglees” (Jolomil ch’utub’aj-ib’ re octubre 2016) malaj li raatin li Elder Neil L. Andersen chirix lix k’anjeleb’ li misioneer, “Jun aj yehol nawom chirix li Dios” (Jolomil ch’utub’aj-ib’ re octubre 2016).

Romanos 3–6

“B’ar wi’ kinumtaak li maak, k’a’jo’ chik naq kinumtaak li rusilal li Dios.”

• Maare wankeb’ sa’ laa tzoleb’aal ani te’raj xtenq’ankil re xtawb’al ru li raatin laj Pablo sa’eb’ li ch’ol a’in chirix li paab’aal, li k’anjel, ut li usilal (chi’ilmanq ajwi’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Chan ru naru nakatenq’aheb’ chi tzolok chirib’ileb’ rib’? Naru taawoksi li wiib’ esil a’in re xtenq’ankileb’ li komon sa’ li tzoleb’aal chixtawb’al ru naq ink’a’ us naq taqil li qachaab’il b’aanuhom jo’ xk’utb’al xyaalal li qatiikilal, chi moko us naq taqak’oxla naq xb’aan li rusilal li Kristo maak’a’ reek’ li qamajelal ut li qamaak. Kanab’eb’ li komon sa’ li tzoleb’aal chixsik’b’al li yaalil na’leb’ sa’ Romanos 3:20–31; 5:1–2; 6:1–2, 21–23 li te’ruuq chixtenq’ankil li xGloria ut laj Jose. K’a’ chik ru li yaalil na’leb’ sa’ “Xkomon chik li k’anjeleb’aal” taaruuq chixtenq’ankileb’ chixnawb’al naq aajel ru xb’aanunkil li chaab’il k’anjel, jo’ ajwi’ xkanab’ankil qib’ chiru li rusilal li Kristo? Naru taapatz’ reheb’ li komon naq te’xwotz k’a’ru xe’xtaw, malaj te’xye li aatin sa’ jun k’utb’esink.

Esilal 1

Wan jun laa wamiiw, xGloria xk’ab’a’, li nareek’a naq k’a’jo’ xch’a’ajkilal li wank choq’ chaab’il tzolom. Naxyal xq’e chixb’aanunkil chixjunil li tento sa’ xb’een, a’ut kok’ aj xsa’ nareek’a naq moko tz’aqal ta xb’aanuhom. “Ma tz’aqal inchaab’ilal?” naxk’oxla. “Ma tinixk’ulub’a li Qaawa’?”

Esilal 2

Wan jun aawamiiw, aj Jose xk’ab’a’, li ink’a’ mas naxk’oxla xsik’b’al ru li k’a’ru tiik. A’an naxpaab’ li Jesukristo, nawulak sa’eb’ li ch’utam re li Iglees, a’an chaab’il yuwa’b’ej ut chaab’il rik’ineb’ li ras riitz’in. A’b’anan xk’e xch’ool naq ink’a’ tixpaab’eb’ li chaq’rab’ li aajeleb’ ru re taaruuq chi ok sa’ li santil ochoch. Naq eb’ lix komon ut eb’ li ramiiw neke’xyal xq’e chixwaklesinkil xch’ool re tixkawresi rib’ choq’ re li santil ochoch, a’an naxye, “Laa’in chaab’il kristiaan. Wan inpaab’aal chirix li Kristo. A’an ak xtoj rix inmaak, ut nink’oxla naq ink’a’ tixram chiwu li choxahil awa’b’ejihom xb’aan jun li ch’ina chaq’rab’.”

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru Romanos 7–16, naru taaye reheb’ naq laj Pablo kixye resil jun li pleet sa’ xch’ool—ut sa’ qach’ool chiqajunilo. Sa’ Romanos 7–16, naqatzol k’a’ru li pleet a’an, ut chan ru xq’axb’al ru.

reetalil li k’anjeleb’aal

Xkomon chik li k’anjeleb’aal

Romanos 1–6

Li paab’aal, li usilal, ut li k’anjel.

Us ta tento taqayal qaq’e chixpaab’ankileb’ li taqlahom, ink’a’ naru nokokole’ yal rik’in xpaab’ankileb’ lix chaq’rab’ li Dios (chi’ilmanq Romanos 3:27–31). Us ta naqayal qaq’e, chiqajunilo “xoomaakob’ ut maak’a’ xloq’al li Dios qik’in” (Romanos 3:23). Xb’aan a’in, chiqajunilo naqaj ru li Jesukristo, xb’aan naq li rusilal a’an nokoxkanab’ chixk’ulb’al xkuyb’al li qamaak, ut nokoxtenq’a chixb’aanunkil li chaab’il k’anjel. Jo’ kixye laj Pablo, “B’ar kinumtaak li maak, k’a’jo’ chik naq kinumtaak li rusilal” (Romanos 5:20).

Li Awa’b’ej David O. McKay kixwotz jun jaljookil ru aatin chirix jun li al li ki’ok chi sub’e’k naq yoo chi numxik rik’ineb’ li ramiiw: “Jun reheb’ li seeb’ xna’leb’ ut kaw xmetz’ew kixmich’ chaq jun b’arb’ookil che’ sa’ jun korral, ut kixye’ li ru’uj chiru li al, li kixchap chi kaw, ut chi jo’kan kikole’.

“Chixjunileb’ ke’xye naq li al kikole’ xyu’am xb’aan li ani kixk’e chaq li kikole’ wi’.

“Yaal ajwi’ a’in, a’ut us ta kiyeechi’iman re chan ru naq tixkol rib’, wi ta li al ink’a’ xk’ul, wi ta ink’a’ xk’e lix metz’ew chixchapb’al, ki’ok raj chi ha’, maak’a’ naxye lix chaab’ilal li rochb’een” (David O. McKay, “The Gospel of Work,” Instructor, enero 1955, 1).

Sa’ xsumenkil li patz’om, ma kolb’ilo xb’aan li qapaab’aal malaj xb’aan li qak’anjel, jun aj tz’iib’anel aj Kristiano, aj C. S. Lewis kixtz’iib’a, “Laa’in nink’oxla naq a’in chanchan xpatz’b’al b’arwan reheb’ li ch’iich’ sa’ jun tijera mas aajel ru” (Mere Christianity, 148).

Esilal 1

• Eter 12:27

• Moroni 10:32–33

• J. Devn Cornish ,“Ma tz’aqal chaab’ilin? Ma tinruuq chixb’aanunkil?” Jolomil ch’utub’aj-ib’ re octubre 2016

“Moko taaruuq ta taaloq’manq li kolb’a-ib’ rik’in li tumin re paab’ank; loq’b’il b’an rik’in lix kik’el li Ralal li Dios [chi’ilmanq Hechos 20:28]. …

“Li usilal a’an jun maatan re li Dios, ut li qajom chixpaab’ankil li junjunq lix taqlahom li Dios a’an chanchan naq naqaye’ li quq’ re xk’ulb’al li loq’laj maatan rik’in li qaChoxahil Yuwa’ ” (Dieter F. Uchtdorf, “Li maatan re usilal,” Jolomil ch’utub’aj-ib’ re abril 2015).

Esilal 2

• Santiago 2:17–26

• Helaman 12:23–24

• D. Todd Christofferson, “Texkanaaq sa’ lin rahom,”Jolomil Ch’utub’aj-ib’ re octubre 2016

“Wi li rusilal li Dios a’an jun li maatan, k’a’ut naq aajel ru xpaab’ankil lix taqlahom li Dios? K’a’ aj-e xpaab’ankil lix taqlahom li Dios—malaj xjalb’al qak’a’uxl? …

“Xpaab’ankileb’ lix taqlahom li Dios nachal xb’aan li rahok ut b’antioxihom li ink’a’ neke’oso’ sa’ xk’ab’a’ lix chaab’ilal li Dios. Li tz’aqal rahok ut b’antioxihom a’in te’xjunaji li qab’aanuhom rik’in li rusilal li Dios” (Dieter F. Uchtdorf,“Li maatan re usilal,”  Jolomil ch’utub’aj-ib’ re abril 2015).

Lix aajelil ru li usilal.

“Ink’a’ ka’ajwi’ nakawaj ru li usilal re xk’ulb’al aakolb’al sa’ roso’jik, nakawaj ru lix wankil li usilal wulaj wulaj sa’ laa yu’am. Naq nakatjilok rik’in laa Choxahil Yuwa’ rik’in li yalok q’e, tuulanil, ut kub’enaqil ch’oolej, a’an tatxwaklesi ut tixk’e aametz’ew rik’in li rusilal (chi’ilmanq Proverbios 3:34; 1 Pedro 5:5; Tz. ut S. 88:78; 106:7–8). Rik’in xkanab’ankil aawib’ chiru li rusilal, nakatru chi usaak ut chi nimank sa’ tiikilal” (Leales a la Fe, 96–97).

Xchaab’ilob’resinkil li qak’utum

Musiq’anb’il laa b’oqb’al. Jo’ aj k’utunel, b’oqb’ilat xb’aan li Qaawa’ re rosob’tesinkileb’ li ralal xk’ajol. Li Qaawa’ naraj naq us tat-elq, ut wi tiik aach’ool re xk’ulb’al aatenq’ankil rik’in, a’an tixk’e aawe li k’utb’esinb’il na’leb’ nakasik’. (Chi’ilmanq Li k’utuk jo’ li Kolonel, 5.)