Korinto

Korinto, sa’ xtz’e li saq’e sa’ li ch’och’ Grecia, li k’ayil ut najteril poopol, b’onb’il xb’aan laj Balage Balogh

19–25 agosto

1 Korintios 1–7

“Wanqex sa’ junajil”

Li Elder Jeffrey R. Holland kixk’ut naq lix k’ihaleb’ li kristiaan neke’chal sa’ li Iglees re xsik’b’al jun li musiq’ejil eek’ahom (“Venido de Dios como maestro,” Liahona, julio 1998, 27). Naq nakawil ru 1 Korintios 1–7, k’oxla rik’in tijok k’a’ru naru nakab’aanu re taa’uxq li musiq’ejil eek’ahom sa’ laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Naru nakak’oxla xpatz’b’al reheb’ li komon sa’ li tzoleb’aal naq te’xtz’iib’a chan ru naq xe’xk’anjela li k’a’ru yookeb’ chixtzolb’al sa’eb’ li loq’laj hu. Patz’ re junjunq komon sa’ li tzoleb’aal naq te’xwotz li k’a’ru xe’xtz’iib’a.

reetalil li k’utuk

Xk’utb’al li tzolʼlebʼ

1 Korintios 1:10–17; 3

Eb’ li komon sa’ lix Iglees li Kristo tento te’wanq sa’ junajil.

• Rik’in aatinak sa’ komonil chirixeb’ li ch’ol sa’ xtiklajik 1 Korintios, maare taaruuq taawanq xnimal chik li junajil sa’ xyanqeb’ li komon sa’ li teep. Naru taatikib’ rik’in xpatz’b’al reheb’ li komon sa’ li tzoleb’aal naq te’aatinaq chirix junaq li ch’utam malaj equipo li wankeb’ wi’ li na’eek’aman wi’ naab’al li junajil. K’a’ut naq wan li junajil sa’ li ch’utam a’an? Chirix a’an, naru teetz’il rix junjunq li raatin laj Pablo chirix li junajil sa’ 1 Korintios 10–13; 3:1–11. K’a’ru neke’xk’ut li raqal a’in, jo’ ajwi’ li k’a’ru xqak’ul laa’o, chirix li k’a’ru nawaklesink re li junajil ut k’a’ru naru nasachok re? K’a’ru li osob’tesink li nachal rik’ineb’ li ani wankeb’ sa’ junajil? Eb’ li esil yeeb’il xb’aan li Awa’b’ej Henry B. Eyring sa’ “Xkomon chik li k’anjeleb’aal” neke’ru chi tenq’ank sa’ li seraq’ a’in.

• Laj Pablo kiroksi jun jaljookil ru aatin chirix jun li kab’l re xwaklesinkil li junajil sa’ 1 Korintios 3:9–17. Chan ru naq li jaljookil ru aatin a’in naru chixtenq’ankileb’ li wankeb’ sa’ laa tzoleb’aal re te’xtaw ru li junajil? Qayehaq, chirix rilb’al ru sa’ komonil eb’ li raqal a’in, naru taak’e jun ch’ina kaaxukuut che’ re li junjunq komon, ut sa’ komonil texk’anjelaq re xyiib’ankil a’ yaal k’a’ru. Chan ru naq wanko laa’o choq’ “xkab’l li Dios”? (1 Korintios 3:9). Chan ru naq li Dios yoo chiqakab’lankil chiqajunjunqal? K’a’ru yooko chixk’ab’lankil sa’ komonil jo’ aj Santil Paab’anel? K’a’ru naru naqab’aanu wi wanko sa’ junajil, li ink’a’ raj taaruuq taqab’aanu qajunes?

1 Korintios 1:17–31; 2; 3:18–20

Re xb’aanunkil lix k’anjel li Dios, tento taawanq qik’in lix na’leb’ li Dios.

• Wankeb’ li neke’k’oxlank re naq ink’a’ neke’ru chi k’anjelak sa’ li Iglees xb’aan naq ink’a’ xe’tzolok sa’ eskweel malaj moko tzolb’ileb’ ta. Wankeb’ aj b’an wi’ li neke’k’oxlank re naq ink’a’ neke’ru chi k’anjelak xb’aan naq xe’wan sa’ eskweel ut tzolb’ileb’. Xkab’ichaleb’ ink’a’ neke’xtaw ru k’a’ru nakawresink qe re xb’aanunkil lix k’anjel li Dios. A’in jun li na’leb’ re xtenq’ankileb’ li wankeb’ sa’ laa tzoleb’aal re te’xkanab’ rib’ chiru li Dios: Jach ru li tzoleb’aal sa’ wiib’ jachal, ut ye reheb’ naq te’ril ru sa’ junpaat 1 Korintios 1:17–31; 2; malaj 3:18–20 ut te’xsik’ li aatin jo’ wank xna’leb’ ut memil na’leb’. Chirix a’an, te’ruuq chixwotzb’al sa’eb’ lix jachal k’a’ru neke’xk’ut li raqal a’in chirix li wank qana’leb’ sa’ lix k’anjel li Qaawa’. K’a’ru wan sa’ li evangelio li taak’utunq jo’ memil na’leb’ chiru junjunq? Chan ru naq eb’ li na’leb’ a’in neke’xk’ut xnimal xna’leb’ li Dios? Maare eb’ li komon sa’ li tzoleb’aal te’ruuq ajwi’ chixwotzb’al lix k’ulumeb’ naq xe’xkanab’ rib’ chiru lix na’leb’ li Dios chiru lix na’leb’eb’ a’an, re xb’aanunkil lix k’anjel.

1 Korintios 6:9–20

Loq’ li qajunxaqalil.

• Re aatinak chirixeb’ li raqal a’in, naru taatz’iib’a chiru li pizarron li patz’om jo’ a’in: Chan ru naq li Qaawa’ naril li qajunxaqalil? Chan ru naq jalan a’in rik’in li naraj laj Satanas naq taqak’oxla chirix li qajunxaqalil? K’a’ru xyaalalil naq li qajunxaqalil a’an rochoch li Santil Musiq’ej? Ye reheb’ li komon naq te’xsik’ xsumenkileb’ li patz’om a’in sa’ 1 Korintios 6:9–20 (chi’ilmanq ajwi’ Tz. ut S. 88:15; Moises 6:8–9).

• Sa’ aatinak chirix lix loq’al li qajunxaqalil, taaruuq ajwi’ tex’aatinaq chirix li chaq’rab’ re saq ru ch’oolej. A’in q’axal us choq’ qe, xb’aan naq jo’ aj Santil Paab’anel sa’ Roso’jikeb’ li Kutan, k’iila sut nak’eeman qe aatinak chirix k’a’ru naqapaab’ chirix li saq ru ch’oolej rik’ineb’ li ink’a’ neke’paab’ank re chi jo’kan. Maare tatruuq chixpatz’b’al reheb’ li komon sa’ laa tzoleb’aal k’a’ru xe’xtzol rik’in laj Pablo—ut rik’in chik li k’anjeleb’aal re li Iglees—li taatenq’anq reheb’ chixk’utb’al reheb’ li ras riitz’in k’a’ut naq aajel ru li saq ru ch’oolej. Junjunq li k’anjelb’aal a’in wankeb’ chi tz’iib’anb’il sa’ “Xkomon chik li k’anjeleb’aal.”

reetalil li tzolok

Xb’oqb’aleb’ chi tzolok sa’ kab’l

Ye reheb’ li komon sa’ laa tzoleb’aal naq wi te’raj chik li na’leb’ chirix chan ru wank sa’ junajil rik’in lix sum aatin, lix junkab’al, malaj lix teep, toj wan chik li aatin chirix li junajil sa’ 1 Korintios 8–11.

reetalil li k’anjeleb’aal

Xkomon chik li k’anjeleb’aal

1 Korintios 1–7

Aatin chirix li junajil.

Li Awa’b’ej Henry B. Eyring xk’ut:

“Laa’in xinb’oqe’ chi tijok rochb’een jun li junkab’al naq xinwan choq’ aj ula’ sa’ rochocheb’. Li alalb’ej mas ka’ch’in xb’oqe’ chi tijok. A’an xtijok jo’ jun li yuwa’b’ej chirix li junjunq komon sa’ li junjunkab’al, ut xye xk’ab’a’eb’. Xinte chiru junpaat li wu re rilb’al ruheb’ li jun siir chik chi kok’al ut li na’b’ej yuwa’b’ej. Xinru chirilb’al naq yookeb’ chaq chixjunajinkil lix paab’aaleb’ ut lix ch’ooleb’ sa’ lix tij li ch’ina al.

“Ink’a’ najter, xe’tijok junjunq li ixq sa’ li Komonil re Tenq’ank naq xe’xkawresi rib’ chirula’aninkil jun saaj ixq li toja’ xkam lix b’eelom sa’ raxkamk. Xe’raj xnawb’al k’a’ru xb’aanunkil, ut chan ru k’anjelak sa’ komonil re tenq’ank chixkawresinkil li ochoch choq’ reheb’ li rech alal ut li ramiiw li te’k’ulunq sa’ li muquk. … Xe’xk’ul xsumenkil lix tijeb’. Naq xe’wulak sa’ li ochoch, li junjunq ixq x’ok chixb’aanunkil jun li k’anjel. Xkawresiman li ochoch q’axal sa’ junpaat, ut eb’ li ixq xe’raho’ xch’ool naq maak’a’ chik k’a’ru naru neke’xb’aanu. Xe’yeeman li aatin re k’ojob’ank ch’oolej, ut li aatin ajwi’ xwan tz’aqal sa’ junajil. Xe’xb’aanu lix k’anjel li Qaawa’ sa’ junajil, chi kemb’il sa’ komonil lix ch’ooleb’ ” (“Entrelazados nuestros corazones en uno,” Liahona, noviembre 2008, 68–69).

Li osob’tesink re li saq ru ch’oolej.

Sa’ jun devocional choq’ reheb’ li saaj winq ut ixq sa’ chixjunil li ruchich’och’, li Hermana Wendy W. Nelson xye:

“Li saq ru ch’oolej a’an xlaawil li tz’aqal rahok. A’ yaal jo’ nimal lix saqal ru laa k’oxlahom ut laa week’ahom, laa waatin ut laa b’aanuhom, jo’kanaq xnimal laa wankil chixk’eeb’al ut chixk’ulb’al li tz’aqal rahok. …

“Jo’ jun raqal li rahok neke’xwotz jun b’eelomej ut jun ixaqilb’ej, li Qaawa’ naraj naq te’xk’ul li sahilal ut li sahil ch’oolejil li nachal rik’in li wank sa’ junajil sa’ li tz’ejwalej. …

“… Yalaq k’a’ru li naxk’e xb’oqb’al li Musiq’ej sa’ laa yu’am, sa’ xyu’am laa sum aatin, ut sa’ laa sumlajik, tixnimob’resi laa wankil chireek’ankil li junajil sa’ li sumlaak. … Ut chi junpak’al chik, yalaq k’a’ru li narahob’tesink re li Musiq’ej tixka’ch’inob’resi laa wankil chi wank sa’ junajil rik’in laa sum aatin. …

“Li tz’ejwalejil junajil sa’ li sumlaak li k’ulub’anb’il xb’aan li Musiq’ej, wan chi osob’tesinb’il xb’aan li Qaawa’, ut nasantob’resink” (“El amor y el matrimonio” Devocional mundial para adultos jóvenes, 8 enero 2017, broadcasts.lds.org).

Li Elder Jeffrey R. Holland xk’ut:

“Inyehaq eere naq li tz’ejwalejil junajil wan chi k’ulub’anb’il choq’ re jun sumal li sumsu, xb’aan naq a’an tz’aqal reetalil li junajil, xtz’aqalil li junajil li k’ojob’anb’il ut k’eeb’il xb’aan li Dios. …

“A’b’an lix tz’aqalil li junajil a’in, li k’ehok-ib’ numtajenaq nim wan wi’ jun winq ut jun ixq, ka’ajwi’ naru nachal rik’in li ch’utub’aak ut li kanaak li na’ux sa’ li sumwank re li sumlaak, rochb’een li aatin xaqab’anb’il ut li k’a’ru yeechi’inb’il—tz’aqal lix ch’ooleb’ ut lix k’a’uxleb’, chixjunil lix kutaneb’ ut chixjunil li rajomeb’ ” (“La pureza personal,” Liahona, enero1999, 91).

Li Elder David A. Bednar xye: “Li tz’ejwalejil junajil maawa’ yal li k’a’ru sa xyalb’al, junaq tz’okajik li tento xk’eeb’al chi wa’ak, malaj junaq b’atz’uul li taqataaqe re xsahilankil qib’. Maawa’ jun q’axok-u naqaj xtawb’al, chi moko yal jun k’anjel tento xb’aanunkil. A’an b’an li k’a’ru na’uxman sa’ li yu’am a’in li naxk’ut tz’aqal qadiosilal ut li k’a’ru naru taqak’ul, ut naxkawob’resi li b’ak’leb’ re ch’oolej ut musiq’ej li b’ak’b’ookeb’ wi’ jun b’eelomej ut jun ixaqilb’ej. Laa’o wanko choq’ aj b’aanunel, osob’tesinb’ilo rik’in xtaql qach’ool, ut li k’a’ru nawb’il wi’ qu, a’an li diosilal naqak’ul jo’ ralal xk’ajol li Dios—maawa’ li k’a’ru atawanb’il qab’aan, malaj lix ch’ooleb’ ut lix na’leb’eb’ li winq sa’ li tenamit wanko wi’ ” (“Creemos en ser castos,” Liahona, mayo 2013, 42).

Chan ru wank chi saq ru qach’ool.

• “La castidad: ¿cuáles son los límites?” “Yo escojo ser limpio” (eb’ li video), LDS.org

• “La pureza sexual,” Para la Fortaleza de la Juventud, 35–37

Xchaab’ilob’resinkil li qak’utum

Xch’olob’ankil lix nawom qach’ool chirix li Jesukristo. Naq yookat chi k’utuk, chijultiko’q aawe li kixb’aanu laj Pablo: “Naq xinwulak sa’ eeyanq, xinwulak chixpuktesinkil eere lix Chaab’il Esil li Dios, ink’a’ rik’in xninqal ru aatin malaj rik’in xninqal ru na’leb’ ” (1 Korintios 2:1). Lix nawom aach’ool chirix li Kolonel naru chi wank xnimal li wankilal.