ch’utam re li loq’laj wa’ak

26 agosto–1 septiembre

1 Korintios 8–13

“Laa’ex xtz’ejwal li Kristo”

Li Elder Richard G. Scott kixk’ut naq “naru naq ink’a’ naqab’i li na’leb’ q’axal loq’ naxk’e li Musiq’ej qe” wi ink’a’ naqatz’iib’a ut naqasume “li xb’een na’leb’ li nachal qik’in” (“Cómo obtener guía espiritual,” Liahona, noviembre 2009, 8).

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Laj Pablo kiroksiheb’ li jaljookil ru aatin ut li eetalil li wankeb’ sa’ 1 Korintios 8–13, jo’ chirix jun aj alinanel sa’ jun estadio, jun li junxaqalil, ut “jun li ch’iich’ natzentzotk” (1 Korintios 13:1). K’a’ru neke’xk’oxla li komon sa’ li tzoleb’aal chirixeb’ li jaljookil ruhil aatin a’in? Chan ru naq naxtenq’aheb’ chixtawb’al ru jun yaalil na’leb’ re li evangelio?

reetalil li k’utuk

Xk’utb’al li tzolʼlebʼ

1 Korintios 10:1–13

Chiqajunilo naqak’ul li aaleek, a’ut li Dios naxk’uub’ jun b’e re taqakol qib’ chiru.

• Chan ru naru taatenq’aheb’ li komon sa’ li tzoleb’aal chixtawb’aleb’ li xninqal ru yaalil na’leb’ sa’ 1 Korintios 10:13? Jun na’leb’ naru taab’aanu, a’an xjachb’al li raqal sa’ kok’ ch’ol aatin, taak’e jun re li junjunq komon, ut taaye reheb’ li komon naq te’xye li ch’ol aatin rik’in tz’aqal li raatin. Qayehaq, k’a’ru xyaalalil naq “li Dios naxb’aanu li k’a’ru xyeechi’i,” malaj li “aaleek jo’ ink’a’ truuq teekuy”? Chirix a’an, naru taach’utub’eb’ li raatineb’ li komon ut teesik’ chan ru xyu’aminkil. Eb’ li komon maare te’ruuq chixwotzb’al li k’a’ru xe’xk’ul, sa’ li xe’xtaw wi’ naq yaal li yeechi’inb’il sa’ li raqal a’in. K’a’ chik ru li na’leb’ naru naqak’ul chirixeb’ li raqal a’in rik’in rilb’al ru Alma 13:27–28?

• Maare ink’a’ us aatinak chirix li aaleek naxk’ul junaq komon; us raj b’an xb’eresinkil li seraq’ chirix 1 Korintios 10:13 re tex’aatinaq chirix li aaleek “li neke’xk’ul chixjunileb’,” jo’ kixye laj Pablo. Eb’ li komon sa’ li tzoleb’aal naru te’tiklaaq rik’in xk’eeb’al reetaleb’ li aaleek li yeeb’ileb’ resil xb’aan laj Pablo sa’eb’ li raqal 1–12. Naru ajwi’ te’xk’oxlaheb’ li aaleek li neke’k’ule’ sa’eb’ li kutan a’in, jo’ li aaleek re tik’ti’ik, re yoob’ank aatin, malaj re raqok aatin chirixeb’ li qas qiitz’in. Chan ru naru junaq “chixkuyb’aleb’ ” li aaleek a’in, chi tenq’anb’il xb’aan li Dios? Maare teeraj xk’utb’esinkil xb’aanunkil.

• Maare us raj xk’oxlankil li wan sa’ 1 Korintios 10:13, rik’in xk’oxlankil chan ru naq laj Pablo kiraj naq te’wanq laj santil paab’anel sa’ junajil. Chan ru naru naqatenq’a qib’ chiqib’il qib’ re “taqakuy” ut re naq “us too’elq” sa’eb’ li aaleek naqak’ul? Chan ru naq li wank sa’ junajil nokoxtenq’a chixkuyb’al li aaleek?

1 Korintios 10:16–17; 11:23–30

Li loq’laj wa’ak nokoxtenq’a chi wank sa’ junajil jo’ komon sa’ lix Iglees li Kristo.

• Eb’ li raqal a’in maare texxtenq’aheb’ chi aatinak chirix chan ru naq li loq’laj wa’ak naru chixtenq’ankil laa teep chi wank sa’ junajil naq neke’xyal xq’e chi wank jo’ li Kolonel. Naru teetikib’ rik’in rilb’al ru 1 Korintios 10:16–17 ut xtz’ilb’al rix k’a’ru xyaalal li aatin sumwank sa’ li jun ch’ol a’in. Chan ru naq xk’ulb’al li loq’laj wa’ak sa’ komonil nokoxtenq’a chi wank sa’ junajil? K’a’ru naru naqab’aanu re taawanq li junajil sa’ li ch’utam re li loq’laj wa’ak? Chan ru naq li raatin laj Pablo, naq “chireek’ahaq rib’ li junjunq” naxk’am rib’ rik’in li na’leb’ a’in? (1 Korintios 11:28).

1 Korintios  12

Tento taqasik’eb’ li maatan naxk’e li Musiq’ej, re xtenq’ankil chixjunileb’ li ralal xk’ajol li qaChoxahil Yuwa’.

• Chan ru naru nakatenq’aheb’ li komon sa’ laa tzoleb’aal chixnumsinkileb’ li maatan naxk’e li Musiq’ej li yeeb’ileb’ resil xb’aan laj Pablo, ut te’xk’e reetal lix k’ihaleb’ li musiq’ejil maatan? Naru nakakanab’eb’ chiru jun k’asal naq te’xtz’iib’a jo’ k’ihaleb’ li musiq’ejil maatan naru neke’xk’oxla. Naq xe’xchoy, kanab’eb’ li komon chixwotzb’al li k’a’ru xe’xtz’iib’a, toj reetal naq ak yeeb’il chixjunileb’ li maatan xe’xtz’iib’a. Chirix a’an, eb’ li komon sa’ li tzoleb’aal te’ruuq chixtawb’aleb’ chik xkomon li maatan ut te’xtz’iib’a, rik’in xtz’ilb’al rix 1 Korintios 12 ut lix tusleb’ aatin li Elder Marvin J. Ashton sa’ “Xkomon chik li k’anjeleb’aal.” B’arwan reheb’ li maatan a’in xe’ril li komon sa’ li tzoleb’aal chi wank rik’in anihaq li nawb’il ru xb’aaneb’? Chan ru naq xtawb’aleb’ li maatan a’in tooxtenq’a chi wank jo’ li Jesukristo?

• Re xtenq’ankileb’ li komon sa’ li tzoleb’aal chirilb’al chan ru naq xnimankil lix musiq’ejil maataneb’ tixtenq’aheb’ chixwaklesinkil raam li Iglees, naru taakanab’eb’ chixk’oxlankil k’a’ru li musiq’ejil maatan li ke’wan rik’ineb’ li yeeb’ileb’ resil sa’eb’ li loq’laj hu. Re xtawb’al chik li na’leb’, naru te’sik’oq sa’ jun reheb’ li raqal li yeeb’ileb’ resil sa’ “Xkomon chik li k’anjeleb’aal,” ut te’xwotz li musiq’ejil maatan li kiwan rik’in li kristiaan a’an, jo’ neke’xk’oxla. Chan ru naq eb’ li musiq’ejil maatan li ke’wan rik’ineb’ li kristiaan a’in ke’rosob’tesiheb’ a’an ut xkomoneb’ chik? Chan ru naru naqoksi li qamusiq’ejil maatan re rosob’tesinkil li jun siir chik ut re xwaklesinkil raam lix tz’ejwal li Kristo, a’an li Iglees? (chi’ilmanq 1 Korintios 12:12–31; chi’ilmanq ajwi’ 1 Korintios 14:12).

• Re xtenq’ankileb’ li komon sa’ li tzoleb’aal chixtawb’al ru chan ru xtawb’aleb’ li musiq’ejil maatan, kanab’eb’ chirilb’al ru 1 Korintios 12:27–31; Moroni 7:48; 10:23, 30; Tzol’leb’ ut Sumwank 46:8; ut li raatin li Awa’b’ej George Q. Cannon sa’ “Xkomon chik li k’anjeleb’aal.” K’a’ru neke’xk’ut chiqu li k’anjeleb’aal a’in chirix chan ru xk’ulb’aleb’ li musiq’ejil maatan? Chan ru naq xk’ulb’aleb’ li musiq’ejil maatan nokoxtenq’a chi wank jo’ li Kristo? Ye reheb’ li komon sa’ li tzoleb’aal naq te’xsik’ ru junaq maatan li te’raj raj xk’ulb’al, ut naq te’xsik’ xtenq’ankil rik’in li Qaawa’ re xtawb’al li maatan a’an.

1 Korintios 13

Li rahok a’an li musiq’ejil maatan q’axal nim.

• Wankeb’ li neke’k’oxlank re naq li rahok naraj naxye xtenq’ankileb’ li neb’a’, malaj chaab’ilal choq’ reheb’ qas qiitz’in. Us ta li na’leb’ a’in naru neke’xk’ut li rahok, li raatin laj Pablo naxch’olob’ wi’chik xyaalalil. Re xtenq’ankileb’ li komon chixtz’ilb’al rix, naru taapatz’ reheb’ naq te’xk’oxla sa’ raam 1 Korintios 13 ut te’xk’oxla ani neke’xnaw ru li naxk’ut xyaalal jun malaj naab’al reheb’ li aatin chirix li rahok li yeeb’il xb’aan laj Pablo. Junjunq komon sa’ li tzoleb’aal naru te’xye resil li ani xe’xk’oxla, ut k’a’ru xe’xk’ul li xk’ut chiruheb’ naq wan li rahok rik’in li kristiaan a’an. Naru ajwi’ taatz’iib’a junjunq li raatin laj Pablo chiru li pizarron ut taab’oqeb’ li komon sa’ li tzoleb’aal chixwotzb’al lix na’leb’eb’ chirix k’a’ru xyaalalil naq “wank xkuyum” ut naq “ink’a’ napo’k” sa’ junpaat (1 Korintios 13:4–5). Chan ru naq li Jesukristo kixyu’ami li na’leb’ a’in chirix li rahok? Chan ru naq laa’o naqak’ul li rahok? (chi’ilmanq Moroni 7:46–48).

reetalil li tzolok

Xb’oqb’aleb’ chi tzolok sa’ kab’l

Ma neke’xnaw li komon sa’ laa tzoleb’aal naq yeeb’il resil li tzol’leb’ chirix li kub’iha’ choq’ reheb’ li kamenaq ut li oxib’ tasal chi loq’alil sa’ li Santil Hu? Ye reheb’ naq yooqeb’ chi tzolok chirixeb’ li yaalil na’leb’ a’in naq neke’xtz’il rix 1 Korintios 14–16 chiru li xamaan a’in.

reetalil li k’anjeleb’aal

Xkomon chik li k’anjeleb’aal

1 Korintios 8–13

Eb’ li musiq’ejil maatan li maare ink’a’ xak’oxla.

Li Elder Marvin J. Ashton kixye a’in chirixeb’ li maatan “ink’a’ jwal k’utk’u” li naxk’e li Musiq’ej: “Li maatan re patz’ok; li maatan re ab’ink; li maatan re rab’inkil ut roksinkil li ch’ina xyaab’ kuxej li q’un na’aatinak; li maatan re ruhank chi yaab’ak; li maatan re risinkil rib’ rik’in li wech’ok-ib’; li maatan re wank chi chaab’il xch’ool; li maatan re ink’a’ roksinkil jar sut li aatin chi maak’a’ xyaalal; li maatan re xsik’b’al li k’a’ru tiik; li maatan re ink’a’ raqok aatin; li maatan re xsik’b’al li b’eresiik rik’in li Dios; li maatan re wank choq’ tzolom; li maatan re xk’oxlankileb’ li jun siir chik; li maatan re k’oxlank sa’ ch’oolej; li maatan re xyeeb’al li tij; li maatan re xch’olob’ankil xnawom xch’ool rik’in wankilal; ut li maatan re xk’ulb’al li Santil Musiq’ej” (“Hay muchos dones,” Liahona, enero1988, 19).

Eb’ li musiq’ejil maatan yeeb’ileb’ resil sa’eb’ li loq’laj hu.

• Genesis 40–41

• Ruth 1

• 1 Reyes 3:5–15

• Mateo 1:18–24; 2:13–15, 19–22

• Hechos 3:1–8; 5:12–16

• Mormon 1:1–5

• Eter 2:14–25; 3:1–20

• Tzol’leb’ ut Sumwank 6:5, 10–12

• Moises 6:22–27, 31–43; 7:2–4, 13, 17–21

Sik’eb’ li musiq’ejil maatan.

Li Awa’b’ej George Q. Cannon (1827–1901), re li Xb’eenil Awa’b’ejil, kixye naq tento sa’ qab’een naq “tootijoq chiru li Dios re tixk’e qe li maatan li taa’isinq re li qamajelal. … Xb’aan a’in naq wankeb’ li maatan. Maajun winq tento raj tixye, “Ink’a’ naru ninjal a’in; ak we chi jo’kan.” Moko tiik ta naq tixye, sa’ xk’ab’a’ naq li Dios kixyeechi’i naq tixk’e qametz’ew chixchaab’ilob’resinkil li k’a’aq re ru a’in, ut chixk’eeb’al qe li maatan re xq’axb’al ru. Wi junaq winq wan xmaak’a’il xna’leb’, tento sa’ xb’een naq tixpatz’ re li Dios re xk’ulb’al xna’leb’. Jo’kan ajwi’ rik’in chixjunil chik li k’a’aq re ru” (Liahona, 23 julio 2016, 80).

Xchaab’ilob’resinkil li qak’utum

Yu’ami li na’leb’ nakak’ut. Wi nakayu’ami li na’leb’ yookat chixk’utb’al, tatxtenq’a chixch’olob’ankil xyaalaleb’ li na’leb’ a’in rik’in xnimal chik li wankilal. Laj Pablo kixye, “Jo’kan ajwi’ li Qaawa’ kixchaq’rab’iheb’ li neke’puktesink re li evangelio: tento naq te’tzekanq sa’ li evangelio” (1 Korintios 9:14).