Kim, Taaqehin
23–29 septiembre. Galatas: “Chexb’eeq rub’el xwankil li Musiq’ej”


“23–29 septiembre. Galatas: “Chexb’eeq rub’el xwankil li Musiq’ej” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)

“23–29 septiembre. Galatas,” Kim, Taaqehin—Choq’ re li Dominkil Tzoleb’aal: 2019

Jalam-uuch
li Kristo kixk’ut rib’ chiru laj Pablo sa’ tz’alam

23–29 septiembre

Galatas

“Chexb’eeq rub’el xwankil li Musiq’ej”

Naq nakawil ru ut nakak’oxla li hu Galatas rik’in tijok, li Qaawa’ tixk’ut chawu k’a’ru tento taawotz rik’in laa tzoleb’aal. Wi nakatz’iib’a li na’leb’ nakak’ul, yooqat chixb’antioxinkil chiru li Dios naq xatxtenq’a (chi’ilmanq Paul B. Pieper, “Mantener Sagrado,” Liahona, mayo 2012, 109).

Xtz’iib’ankil li nakak’oxla

Jalam-uuch
reetalil li wotzok

Xkanab’ankileb’ chi wotzok

Wan naq xb’aan xtzolb’aleb’ li loq’laj hu, nokoru chi aatinak chirix li evangelio rik’ineb’ li qakomon ut li qamiiw. Ma xk’ulman a’in rik’ineb’ li komon sa’ laa tzoleb’aal chiru li xamaan a’in? Kanab’eb’ chixwotzb’al li k’a’ru xe’xk’ul.

Jalam-uuch
reetalil li k’utuk

Xk’utb’al li tzolʼlebʼ

Galatas 1:6–7; 3:1–5; 4:8–21; 5:1, 13–14

Lix evangelio li Jesukristo naxyeechi’i li ach’ab’aak.

  • Ink’a’ ch’a’aj xtz’ilb’al rix jun reheb’ li loq’laj hu naq naqanaw k’a’ut naq kitz’iib’aman. Xb’aan a’in, maare us xtikib’ankil li aatinak chirix li hu Galatas rik’in jun patz’om jo’, “K’a’ut nekek’oxla naq laj Pablo kixtz’iib’a li hu a’in?” malaj “K’a’ru li ch’a’ajkilal kiraj xtuqub’ankil laj Pablo?” Kanab’eb’ li komon sa’ li tzoleb’aal chixsik’b’al xsumenkil sa’ Galatas 1:6–7; 3:1–5; 4:8–21. Chan ru naq li raatin laj Pablo aajel ru choq’ qe sa’ li kutan a’in?

  • Wankeb’ laj santil paab’anel aran Galacia li neke’k’oxlank re naq toj tento sa’ xb’eeneb’ xpaab’ankil lix chaq’rab’ laj Moises. Choq’ re laj Pablo, a’in chanchan li “wank chi b’ak’b’o” ruuchil li ach’ab’aak li yeechi’inb’il sa’ lix chaq’rab’ li Kristo (Galatas 5:1). Us ta maare ink’a’ naqak’ul li ch’a’ajkilal a’in anajwan, toj tento taqasik’ ru ma taqasik’ li musiq’ejil preexil malaj li ach’ab’aak li nachal rik’in li Jesukristo. Re xtenq’ankileb’ li komon sa’ laa tzoleb’aal chixtz’ilb’al rix li raatin laj Pablo chirix li ach’ab’aak ut li b’ak’e’k, naru taapatz’ reheb’ naq te’xye junjunq li na’leb’ ut li b’aanuhom li neke’k’amok sa’ li musiq’ejil preexil (jo’ li na’leb’ nab’aanuman sa’ li tenamit wankeb’ wi’, li ink’a’ us aj b’aanuhom, li b’alaq’il paab’aal, ut xk’oxlankil chan ru nokok’utun chiru chan ru wanko sa’ qach’ool). Jo’ yeeb’il sa’ Galatas 5:1, 13–14, chan ru naq noko’ach’ab’aak chiru li musiq’ejil preexil? Chan ru naq eb’ li komon sa’ li tzoleb’aal xe’xk’ul li ach’ab’aak li yeechi’inb’il sa’ lix evangelio li Kristo? Naru ajwi’ taapatz’ reheb’ li komon sa’ li tzoleb’aal chan raj ru naq te’xsume li ani nayehok re naq li ani napaab’ank re li evangelio, moko ach’ab’anb’il ta.

Galatas 5:16–26

Wi “nokob’eek rub’el xwankil li Musiq’ej,” taqak’ul li “naruchin li Musiq’ej.”

  • Wankeb’ li nach’a’ajko’ chiruheb’ xk’eeb’al reetal lix wankil li Musiq’ej. Li aatin sa’ Galatas 5 naru chixtenq’ankileb’ li komon sa’ laa tzoleb’aal re te’xnaw ru li ruuchinihom li Musiq’ej. Maare taaruuq tattiklaaq rik’in xpatz’b’al reheb’ naq te’xtz’il rix Galatas 5:22–25, re xtawb’al li aatin kiroksi laj Pablo re xch’olob’ankil li ruuchinihom li Musiq’ej. K’a’ut naq li uuchink nak’anjelak jo’ jaljookil ru aatin re aatinak chirix chan ru naq li Musiq’ej nokoxtenq’a? Maare eb’ li komon sa’ laa tzoleb’aal te’ruuq chixwotzb’al chan ru naq li uuchink a’in k’utk’u sa’ xyu’ameb’, malaj sa’ xyu’ameb’ li ani nawb’il ru xb’aaneb’. Wankeb’ chik li hu li te’ruuq chixtz’ilb’al rix, jo’ Mateo 7:16–18; Jwan 14:26–27; Moroni 7:13–17; Tzol’leb’ ut Sumwank 11:12–13; ut li raatin li Awa’b’ej Gordon B. Hinckley sa’ “Xkomon chik li k’anjeleb’aal.”

    Jalam-uuch
    li ruuchinihom jun toon li che’

    Naru naqak’ul li “ruuchinihom li Musiq’ej” a’ yaal jo’ naqasik’.

  • Wan naq nokoru chixtzolb’al jun li na’leb’ rik’in xtzolb’al li na’leb’ li wan chi junpak’al a’an. Jo’ jun eetalil, sa’ Galatas 5:16–26, laj Pablo ki’aatinak chirix “li nachalk rik’in li tz’ejwalej,” ut chi junpak’al, “li naruuchin li Musiq’ej.” Re xtenq’ankileb’ li komon sa’ li tzoleb’aal chixk’oxlankil ma yookeb’ chi “b’eek rub’el xwankil li Musiq’ej,” naru taaye reheb’ naq te’ril ru Galatas 5:16–26, ut chirix a’an te’xtz’il rix lix yu’am jo’ chanru tz’iib’anb’il sa’ li Actividad de Atributos sa’ li perel 133 sa’ Predicad mi Evangelio. Jo’ jun eetalil, choq’ re li junjunq na’leb’ tz’iib’anb’il sa’eb’ li raqal 19–23, naru te’xtz’iib’a jun patz’om jo’ “Ma ninkaqaliheb’ lin komon?” malaj “Ma naweek’a li rahok wulaj wulaj?” Ink’a’ us naq te’wotzmanq lix sumehomeb’ li komon sa’ li tzoleb’aal, a’ut naru taapatz’ reheb’ naq te’xwotz li na’leb’ ut li k’a’ru xe’xk’oxla re xtenq’ankil rib’ chirib’ileb’ rib’ chi “b’eek rub’el xwankil li Musiq’ej.” Wi ink’a’ tz’aqal li hoonal re xchoyb’al li k’anjel a’in sa’ li tzoleb’aal, naru taaye reheb’ li komon naq te’xchoy sa’ kab’l.

Galatas 6:7–10

Naq noko’awk “choq’ re li Musiq’ej,” moqon taqaq’ol li osob’tesink.

  • Rik’in xtz’ilb’al rix Galatas 6:7–10, maare tenq’anb’ilaqeb’ li komon sa’ li tzoleb’aal chixk’oxlankil k’a’ru taak’ulmanq xb’aan li k’a’ru neke’xsik’ ru xb’aanunkil. Re xtenq’ankileb’, naru taak’am chaq li jar paay chi iyaj, ut jo’kan ajwi’ li q’een malaj li ki’il q’een li nachal chaq rik’ineb’ li iyaj a’an, malaj taak’am chaq jun jalam-uuch reheb’ a’an. Eb’ li komon sa’ li tzoleb’aal te’ruuq chi k’anjelak sa’ komonil re xk’eeb’al li junjunq iyaj rik’in li k’a’ru na’el rik’in. Chirix a’an taaruuq te’ril ru eb’ li raqal 7–10 ut te’aatinaq chirix k’a’ru xyaalalil li awk “choq’ re li tz’ejwalej” ut “choq’ re li Musiq’ej.” (Li raatin li Elder Ulisses Soares sa’ “Xkomon chik li k’anjeleb’aal” maare tixtenq’aheb’.) K’a’ru li qaq’olom naq noko’awk choq’ re li tz’ejwalej? K’a’ru li qaq’olom naq noko’awk choq’ re li Musiq’ej? (chi’ilmanq Galatas 5:22–23). Naru taapatz’ reheb’ li komon naq te’xk’oxlaheb’ li musiq’ejil osob’tesink li te’raj xk’ulb’al. K’a’ru li “awk” naru neke’xb’aanu anajwan re xkawresinkil rib’ choq’ reheb’ li osob’tesink a’an? Naru ajwi’ taapatz’ reheb’ naq te’xtz’iib’a li k’a’ru xe’xk’oxla, ut wi neke’raj, naq te’xwotz.

  • Wankeb’ li komon sa’ li tzoleb’aal li maare neke’reek’a naq “xe’lub’ chixb’aanunkil li us” Galatas 6:9)—maare rik’in naq neke’reek’a naq ink’a’ yoo chi uuchink lix b’aanuhom. Maare rik’in aatinak chirix Galatas 6:7–10 te’xtaw xtenq’ankileb’. Re xk’utb’aleb’ li raqal a’in, naru taapatz’ re anihaq sa’ li tzoleb’aal naq tixye resil jun sut naq x’ajman ru naq taawanq xkuyum naq yoo chirawb’al k’a’ruhaq. K’a’ru naru naqatzol rik’in lix k’ulum li komon a’in, jo’ ajwi’ rik’in Galatas 6:7–10, chirix li qak’anjel re “b’eek rub’el xwankil li Musiq’ej”? (Galatas 5:25).

Jalam-uuch
reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ laa tzoleb’aal re te’ril ru li hu reheb’ laj Efesio, naru taaye reheb’ naq sa’ li taqlanb’il hu a’an te’xtzol chan ru naq taaruuq te’wanq chi “xaqxo chi kaw chiru li raalenkileb’ xb’aan laj tza” (Efesios 6:11).

Jalam-uuch
reetalil li k’anjeleb’aal

Xkomon chik li k’anjeleb’aal

Galatas

Li na’uuchin rik’in xyu’aminkil li evangelio.

Li Awa’b’ej Gordon B. Hinckley kixye: “Chan ru naqanaw ru li k’a’aq re ru re li Musiq’ej? Chan ru naqanaw naq rik’in li Dios nachal? Rik’in li ruuchinihom. Wi naxk’am sa’ li usaak ut li chaab’ilo’k, wi naxk’am sa’ li paab’aal ut li xnawom ch’oolej, wi naxk’am sa’ jun b’e chaab’il wi’chik, wi naxk’am sa’ li choxahilal, a’an re li Dios. Wi naxkub’si qamusiq’, wi nak’amok sa’ q’ojyin, wi naxsach qana’leb’ ut naxk’e qak’a’uxl, wi naxk’am sa’ xkanab’ankil li paab’ank, a’an re laj tza.”

Sa’ jun chik kutan, li Awa’b’ej Hinckley kixye: “Nakak’e reetal lix wankil li Musiq’ej rik’in li ruuchinihom li Musiq’ej—li k’a’ru nakutanob’resink, li k’a’ru nakab’lank, li k’a’ru naxk’e sahilal ut naxk’ojob’ ch’oolej ut nawaklesin ut nokoxk’am chixchaab’ilob’resinkil li qak’oxlahom ut li qayehom ut li qab’aanuhom, a’an re lix Musiq’ li Dios. Li k’a’ru narumuk, li nokoxk’am sa’eb’ li ink’a’ usil b’e—a’an re laj xik’ ilonel. Ch’olch’o ru a’an, saqen ru a’an” (Enseñanzas de los Presidentes de la Iglesia: Gordon B. Hinckley [2016], 129–130).

Li awk sa’ li Musiq’ej.

Li Elder Ulisses Soares kixye, “Li awk sa’ li Musiq’ej naraj naxye naq chixjunil li naqak’oxla, naqaye, ut naqab’aanu tento tooxtaqsi sa’ li choxahilal wankeb’ wi’ qachoxahil na’ qayuwa’. A’b’anan, sa’eb’ li loq’laj hu yeeb’il resil li tz’ejwalej, a’an li aaleek li ak re li ruchich’och’il winq, li naxkanab’eb’ li kristiaan chi b’eresiik xb’aan li atawom, li rahink-u, ut li ajb’il xb’aan li tz’ejwalej, ruuchil xsik’b’al qamusiq’ankil rik’in li Santil Musiq’ej. Wi ink’a’ naqab’aanu weent, eb’ li atawank a’in, rochb’een li maa’usilal li wan sa’ li ruchich’och’, naru nokoxk’am chixyu’aminkil li yib’ ruhil na’leb’ ut maa’usil b’aanuhom, li neke’ok sa’ li qach’ool” (“¡Permanezcamos en el territorio del Señor!” Liahona, mayo 2012, 39).

Xchaab’ilob’resinkil li qak’utum

Xtenq’ankileb’ li komon sa’ li tzoleb’aal chixwaklesinkil rib’ chirib’ileb’ rib’. “Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkil rib’ chirib’ileb’ rib’ ” (Li k’utuk jo’ li Kolonel, 5).

Isi reetalil