“9–15 septiembre. 2 Korintios 1–7: “Chek’e wi’chik eerib’ chi k’ame’k sa’ usilal rik’in li Dios” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)
“9–15 septiembre. 2 Korintios 1–7, “ Kim, Taaqehin—Choq’ re li Dominkil Tzoleb’aal: 2019
9–15 septiembre
2 Korintios 1–7
“Chek’e wi’chik eerib’ chi k’ame’k sa’ usilal rik’in li Dios”
Naq nakawil ru 2 Korintios 1–7 chiru li xamaan a’in, k’oxlaheb’ chi junjunqal li komon sa’ li tzoleb’aal—eb’ li neke’chal sa’ li tzoleb’aal ut eb’ li ink’a’ neke’chal. Chan ru naq eb’ li na’leb’ sa’eb’ li ch’ol a’in te’ruuq chirosob’tesinkileb’?
Xtz’iib’ankil li nakak’oxla
Xkanab’ankileb’ chi wotzok
Kanab’ li hoonal choq’ reheb’ li komon sa’ li tzoleb’aal re te’xwotz li na’leb’ chan ru naq taaruuq te’usaaq sa’ xtzolb’aleb’ li loq’laj hu.
Xk’utb’al li tzolʼlebʼ
2 Korintios 1:3–7; 4:6–10, 17–18; 7:4–7
Lix yalb’al qix naru taawanq choq’ osob’tesink.
-
Maare wan ani sa’ laa tzoleb’aal li yoo chixk’ulb’al junaq xyalb’al rix li ch’a’aj. Li k’a’ru kixye resil laj Pablo, ut li na’leb’ kixk’e sa’ 2 Korintios, naru tixtenq’aheb’ li komon sa’ li tzoleb’aal re te’xk’oxlaheb’ li osob’tesink li neke’chal rik’in lix yalb’aleb’ rix. Re xtikib’ankil li aatinak, naru taapatz’ re jun komon sa’ li tzoleb’aal naq taachalq chi kawresinb’il chi aatinak chirix chan ru naq junaq xyalb’al rix xrosob’tesi lix yu’am, malaj k’a’ru xtzol rik’in anihaq chik li xk’uluk re junaq xyalb’al rix. Chirix a’an, taaruuq taakanab’eb’ li komon chiru junpaat chixnumsinkil 2 Korintios 1:3–7; 4:6–10, 17–18; ut 7:4–7, ut te’xsik’ k’a’ru kixye laj Pablo chirix li rajb’al ru lix yalb’al qix, ut k’a’ru li osob’tesink li nachal rik’in. Re rilb’al junjunq li raatin, chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ li komon sa’ li tzoleb’aal naq te’xwotz li k’a’ru xe’xtaw. Maare taaruuq taaye reheb’ naq te’xyaab’asi li raqal xe’xtaw wi’ li na’leb’, ut te’xwotz li k’a’ru xe’xk’ul malaj lix nawomeb’ xch’ool chirix li na’leb’ a’an.
-
Naru taak’e xhoonaleb’ li komon sa’ li tzoleb’aal re te’xk’oxla chan ru naq li xyalb’al qix naru chirosob’tesinkil li qayu’am, ut naru te’xnumsi wi’chik li raatin laj Pablo li natawman sa’ 2 Korintios 1:3–7; 4:6–10, 17–18; ut 7:4–7. Naq yookeb’ chixb’aanunkil, naru ajwi’ te’xtz’iib’a chan ru naq lix yehom laj Pablo naru natenq’an sa’ li ch’a’ajkilal yookeb’ chixk’ulb’al sa’ tz’aqal lix yu’ameb’.
-
Naq yookex chi aatinak, naru ajwi’ teeb’icha sa’ komonil eb’ li b’ich li raab’ileb’ xb’aaneb’ li komon sa’ li tzoleb’aal, li neke’xch’olob’ xyaalal li k’ojob’ank ch’oolej ut li osob’tesink neke’xyeechi’i li qaChoxahil Yuwa’ ut li qaKolonel sa’ xkutankil li xyalb’al qix—jo’ “Kawil k’ojleb’aal” (Eb’ li B’ich, 85). Chirix b’ichank sa’ komonil, naru taab’oqeb’ li komon sa’ li tzoleb’aal chixsik’b’al junaq ch’ol aatin sa’ 2 Korintios 1 ut 4 li neke’xk’oxla naq naxk’am rib’ rik’in li b’ich a’in.
Naqak’ul li osob’tesink ut naqosob’tesiheb’ li qas qiitz’in naq nokokuyuk maak.
-
Chiqajunilo wan naq “xoorahob’tesiik” laa’o malaj li qajunkab’al xb’aan anihaq chik (raqal 5). Maare eb’ li komon sa’ li tzoleb’aal te’ruuq chixtz’ilb’al rix 2 Korintios 2:5–11, re xtawb’al li raatin laj Pablo chirix k’a’ru xb’aanunkil re li ani xrahob’tesink qe. Naru taapatz’ reheb’ li komon naq te’xnumsi wi’chik Lukas 15:11–32; Jwan 8:1–11; ut li raatin li Elder Kevin R. Duncan (chi’ilmanq “Xkomon chik li k’anjeleb’aal”) re xtawb’al chik li na’leb’ chirix k’a’ru xb’aanunkil reheb’ li xe’maakob’. Chan ru naq naqarahob’tesi qib’ laa’o ut li qas qiitz’in naq ink’a’ naqaj kuyuk maak?
Rik’in lix tojb’al rix li maak xb’aan li Jesukristo, naru nokok’ame’ wi’chik sa’ usilal rik’in li Dios.
-
Wankeb’ li neke’chal sa’ li iglees re te’reek’a rib’ chi nach’ rik’in li Dios, ut naru te’tenq’aaq rik’in aatinak chirix 2 Korintios 5:14–21. Re xtikib’ankil, eb’ li komon sa’ li tzoleb’aal maare te’ruuq chixsik’b’al xyaalal li ch’ol aatin k’amok wi’chik sa’ usilal, ut te’xk’oxla. K’a’ru naxk’e a’in chixnaweb’ chirix xk’amb’al wi’chik qib’ sa’ usilal rik’in li Dios? K’a’ chik ru li na’leb’ naqak’ul rik’in rilb’al ru li aatin “Xtojb’al rix li maak” sa’ li K’utul Raqal reheb’ li Loq’laj Hu? Chan ru naq li na’leb’ a’in nokoxtenq’a chixtawb’al ru 2 Korintios 5:14–21? Naru ajwi’ taapatz’ reheb’ li komon sa’ li tzoleb’aal naq te’xwotz k’a’ru neke’reek’a chirix li Kolonel, li kixtoj rix li maak re tooruuq chi k’ame’k wi’chik sa’ usilal rik’in li Dios.
Li rahil ch’oolej jo’ naraj li Dios naxk’am sa’ li jalb’a-k’a’uxlej.
-
Sa’ 2 Korintios 7:8–11, yeeb’il xyaalal li rahil ch’oolej jo’ naraj li Dios, ut lix k’anjel sa’ xjalb’al qak’a’uxl. K’a’ru naqatzol chirix li rahil ch’oolejil jo’ naraj li Dios sa’ 2 Korintios 7:8–11, ut sa’ li raatin li Awa’b’ej Dieter F. Uchtdorf sa’ “Xkomon chik li k’anjeleb’aal”? K’a’ut naq aajel ru li rahil ch’oolej jo’ naraj li Dios sa’ li jalb’a-k’a’uxlej?
-
Maare taaweek’a naq taa’ajmanq aatinak chi mas wi’chik chirix li jalb’a-k’a’uxlej. Naru taayal a’in: Tz’iib’a chiru pizarron li aatin, Li jalb’a-k’a’uxlej a’an . Ye reheb’ li komon naq te’xsik’ li aatin re xtz’aqob’resinkil ru li ch’ol aatin a’in, rik’in li na’leb’ xe’xtzol sa’ 2 Korintios 7:8–11, jo’ ajwi’ rik’ineb’ li raqal re li loq’laj hu ut xkomoneb’ chik li aatin neke’xtaw sa’ “Xkomon chik li k’anjeleb’aal.” Chan ru naq te’ruuq chiroksinkileb’ li na’leb’ a’in re xtenq’ankil anihaq chixjalb’al xk’a’uxl chi anchal xch’ool?
Xb’oqb’aleb’ chi tzolok sa’ kab’l
Patz’ reheb’ li komon sa’ li tzoleb’aal ma xe’tijok jun sutaq re taa’isimanq chaq junaq xch’a’ajkilal malaj junaq xyalb’aleb’ rix. Sa’ 2 Korintios 8–13, te’xtaw k’a’ru kixb’aanu laj Pablo naq kitijok re xk’ulb’al a’in, a’ut ink’a’ kisumeek lix tij jo’ chanru kiraj.
Xkomon chik li k’anjeleb’aal
Naq naqileb’ li qas qiitz’in jo’ chanru naq ilb’ileb’ xb’aan li Dios, nokoxtenq’a chixkuyb’aleb’ xmaak.
Li Elder Kevin R. Duncan kixye: “Jun na’leb’ li nokoxtenq’a chixkuyb’aleb’ xmaak li qas qiitz’in, a’an naq naqileb’ jo’ neke’ile’ xb’aan li Dios. Yalaq jo’q’e, li Dios tixk’e qe li maatan re rilb’al ut xtawb’al ru li raam, lix ch’ool, ut lix musiq’ li ani li kitoch’ok qe. Rik’in a’in naru naq taqeek’a jun xnimal rahom choq’ re li kristiaan a’an” (“Li yulb’il b’an aj k’irtesinel re li kuyuk maak,” Jolomil ch’utub’aj-ib’ re abril 2016).
Li rahil ch’oolej jo’ naraj li Dios naxk’am chaq li jalaak ut li yo’onink.
Li Awa’b’ej Dieter F. Uchtdorf kixch’olob’:
“Li rahil ch’oolej jo’ naraj li Dios naxk’am chaq li jalaak ut li yo’onink xb’aan lix tojb’al rix li maak xb’aan li Jesukristo. Li rahil ch’oolej re li ruchich’och’ nokoxkub’si, naxchup li yo’onink, ut naxq’unb’esi qach’ool chixk’eeb’al qib’ chiru li aaleek.
“Li rahil ch’oolej jo’ naraj li Dios naxk’am sa’ xjalajik li qaam ut li qach’ool. Nokoxtenq’a re xik’ taqil li maak ut taqara li chaab’ilal. Nokoxtenq’a chi xaqliik ut chi b’eek sa’ xsaqenkil lix rahom li Kristo. Li tz’aqal jalb’a-k’a’uxlej a’an jun jalok, maawa’ jun rahilal malaj rahob’tesiik” (“¡Pueden hacerlo ahora¡” Liahona, noviembre 2013, 56).
Kʼaʼru li jalbʼa-kʼaʼuxlej?
-
K’utul Raqal reheb’ li Loq’laj Hu, “Jalb’a-k’a’uxlej”
-
“Arrepentimiento,” Temas del Evangelio, topics.lds.org
-
Dale G. Renlund, “Li jalb’a-k’a’uxlej: jun sahil ch’oolejil,” Jolomil ch’utub’aj-ib’ re octubre 2016.
Li Elder Neil L. Andersen kixk’ut:
“Naq nokomaakob’, noko’el chaq rik’in li Dios. Naq naqajal qak’a’uxl, nokosutq’i rik’in li Dios.
“Li b’oqok re taqajal qak’a’uxl maawa’ xyaab’ li ch’iilank, a’an b’an xyaab’ li tz’aamank naq taqasutq’isi qib’ ut toosutq’iiq rik’in li Dios [chi’ilmanq Helaman 7:17]. A’an lix b’oqom jun Yuwa’b’ej aj rahonel ut li Ralal jun chirib’il, naq nim wi’chik toowanq chiru li wanjenaqo chaq, naq taqasik’ jun yu’am li taqenaq wi’chik, naq taqajal qib’, ut naq taqeek’a li sahil ch’oolejil li nachal rik’in xpaab’ankileb’ li taqlahom. Rik’in li wank choq’ xtzolom li Kristo, nasaho qach’ool rik’in li osob’tesink re xjalb’al qak’a’uxl, ut li sahil ch’oolej li nachal naq nakuye’ qamaak. A’in na’ok choq’ jun xcha’al qach’ool, naxjal li k’a’ru naqak’oxla ut k’a’ru naqeek’a. …
“Choq’ re lix k’ihaleb’, li jalb’a-k’a’uxlej nab’aanuman rajlal, ink’a’ jun sut ajwi’. Ink’a’ na’ux chi maak’a’ xch’a’ajkil. Ch’a’aj li jalok. Na’ajman b’eek chi apusinb’il xb’aan li iq’, chi tiikisinb’il xb’aan roq li ha’. Li Jesus kixye, “Wi ani naraj intaaqenkil, mixra rib’, chixchapaq lix krus ut chixtaaqehaq” [Mateo 16:24]. Li jalb’ak-k’a’uxlej naraj naxye xkanab’ankil junjunq na’leb’, jo’ li b’alaq’il, li q’etq’etil, li josq’il, li ink’a’ us aj k’oxlahom, ut nach’ok rik’in chik li na’leb’, jo’ li chaab’ilal, xk’oxlankileb’ qas qiitz’in, li kuyum, ut lix na’leb’ li Musiq’ej. A’an li sutq’iik rik’in li Dios. (“Arrepentíos … para que yo os sane,” Liahona, noviembre 2009, 40–41).
Xchaab’ilob’resinkil li qak’utum
Tenq’aheb’ li neke’ch’a’ajko’ chiruheb’. Wan naq eb’ li komon li nach’a’ajko’ chiruheb’ tzolok yal neke’raj ru naq k’ulb’ilaqeb’ ut raab’ilaqeb’. Naru taak’e jun k’anjel te’xb’aanu sa’ li tzolok jun chik. Maakanab’ xyalb’al aaq’e wi sa’ xtiklajik ink’a’ nakate’xk’ul. (Chi’ilmanq Li k’utuk jo’ li Kolonel, 8–9.)