kub’sib’aal ha’ sa’ jun santil ochoch

2–8 septiembre

1 Korintios 14–16

“Li Dios moko Dios ta re po’ok ch’oolej, xDios b’an li tuqtuukilal”

Naq maji’ nakanumsi li tusleb’ aatin a’in, il ru 1 Korintios 14–16. Tz’iib’a li na’leb’ li nachal aawik’in chirix k’a’ruheb’ li yaalil na’leb’ li te’tenq’anq reheb’ li komon sa’ laa tzoleb’aal, ut sik’ chik aana’leb’ rik’in li Musiq’ej chiru li xamaan.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixnumsinkil wi’chik chiru junpaat 1 Korintios 14–16, ut te’xsik’ junaq raqal li nawulak chiruheb’. Ye reheb’ naq te’xsik’ sa’ li tzoleb’aal anihaq li taaruuq te’xwotz wi’ li raqal xe’xtaw, ut te’xch’olob’ k’a’ut naq xe’xsik’ ru.

reetalil li k’utuk

Xk’utb’al li tzolʼlebʼ

1 Korintios 14

Naq neke’ch’utla eb’ laj santil paab’anel, us naq te’xsik’ xwaklesinkil li raameb’ chirib’ileb’ rib’.

• Naru taawoksi li raatin laj Pablo sa’ 1 Korintios 14 re xjultikankil reheb’ li komon sa’ li tzoleb’aal naq naru naqawaklesi qach’ool chiqib’il qib’ sa’ li iglees. Jun na’leb’ re xnumsinkil li jun ch’ol a’in, a’an naq taatz’iib’a junaq patz’om chiru li pizarron, jo’ K’a’ raj ru li qajayalihom naq nokoch’utla? B’oqeb’ li komon sa’ li tzoleb’aal chixsik’b’al xsumenkil sa’ 1 Korintios 14. Naru natawman chik li na’leb’ sa’ Moroni 6:4–5 ut sa’ Tzol’leb’ ut Sumwank 50:17–23. Naq eb’ li komon sa’ li tzoleb’aal yookeb’ chixwotzb’al li k’a’ru xe’xtaw, naru taapatz’ reheb’ chan ru neke’xk’oxla naq lee tzoleb’aal yoo chixb’aanunkil li jayalihom a’in. Taaruuq ajwi’ te’xwotz junaq sut naq xe’reek’a naq waklesinb’il li raameb’ xb’aan li k’a’ru xye junaq komon sa’ li tzoleb’aal.

• Re xtenq’ankileb’ li komon chixtawb’al ru li na’leb’ k’eeb’il xb’aan laj Pablo naq eb’ li komon tento raj te’xsik’ aatinak jo’ profeet, naru te’xsik’ xyaalalil li aatin profeetil aatin. Laa’at malaj eb’ li komon sa’ li tzoleb’aal te’ruuq chixtz’iib’ankil k’a’ru xyaalalil chiru li pizarron, toja’ naq teenumsi sa’ komonil li raqal Profeetil aatin, aatinak jo’ profeet sa’ li K’utul Raqal reheb’ li Loq’laj Hu, ut li raatin laj Pablo sa’ 1 Korintios 14:3, 31, 39–40. K’a’ru chik xyaalalil naqataw sa’eb’ li hu a’in? (Chi’ilmanq ajwi’ Apokalipsis 19:20.) K’a’ru li musiq’anb’ilo chixb’aanunkil sa’ li iglees ut sa’ kab’l, sa’ xk’ab’a’ li yeeb’il xb’aan laj Pablo?

1 Korintios 15

Rik’in naq li Jesukristo kiwakli chi yo’yo, chiqajunilo toowakliiq chi yo’yo.

• Chan ru naru nakawoksi lix ch’olob’ahom laj Pablo sa’ 1 Korintios 15 re xkawob’resinkil lix nawomeb’ xch’ool li komon sa’ laa tzoleb’aal chirix li wakliik chi yo’yo? Jun na’leb’ a’an xjachb’al ru li tzoleb’aal sa’ wiib’ jachal, ut xyeeb’al re jun jachal naq te’xsik’ sa’ 1 Korintios 15 k’a’ raj ru taak’ulmanq wi ta li Jesukristo ink’a’ kiwakli chi yo’yo. Li jun jachal chik naru tixsik’eb’ li osob’tesink naqak’ul xb’aan lix waklijik chi yo’yo. Toja’ naq xkab’ichaleb’ li jachal te’ruuq chixtz’iib’ankil chiru li pizarron li k’a’ru xe’xtzol. K’a’ chik ru te’xtz’iib’a chirix rilb’al ru li raatin li Elder D. Todd Christofferson sa’ “Xkomon chik li k’anjeleb’aal”? Re xtenq’ankileb’ li komon sa’ li tzoleb’aal chireek’ankil li Musiq’ej naq yookex chi aatinak, naru taak’oxla xk’utb’al jun jalam-uuch re li Kolonel chi waklijenaq chi yo’yo (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al).

• Rik’in naq laj Pablo yoo chixsumenkileb’ ru li ani ink’a’ neke’xpaab’ naq taawanq jun wakliik chi yo’yo, eb’ li wankeb’ sa’ laa tzoleb’aal maare te’raj xb’aanunkil jun k’utb’esink chirix li na’leb’ a’an. Jo’ eetalil, chan raj ru naq te’xkawob’resi xpaab’aal junaq xkomon chirix li wakliik chi yo’yo? K’a’ru neke’xtaw li komon sa’ 1 Korintios 15 li taatenq’anq reheb’ chixch’olob’ankil k’a’ut naq aajel ru lix waklijik li Jesukristo chi yo’yo, ut k’a’ru nak’utuk xyaalal? K’a’ chik ru chi raqal reheb’ li loq’laj hu te’ruuq chiroksinkil? (Chi’ilmanq, jo’ eetalil, Lukas 24:1–12, 36–46; Alma 11:42–45.)

• Laj Pablo junjunq sut ki’aatinak chirix oxib’ tasal chi loq’alil sa’ li wakliik chi yo’yo sa’eb’ li hu kixtaqla (chi’ilmanq 1 Korintios 15:40–42 ut 2 Korintios 12:1–2). Re xtenq’ankileb’ li wankeb’ sa’ laa tzoleb’aal chixtawb’al chan ru naq li k’utb’esinb’il sa’ roso’jikeb’ li kutan naxnimob’resi ru li k’utb’il xb’aan laj Pablo, naru taajach ru li tzoleb’aal sa’ oxib’ jachal, ut taak’e re li junjunq jachal jun ch’ina hu li setb’il jo’ jun saq’e (Tz. ut S. 76:50–70), jo’ jun li po (Tz. ut S. 76:71–80), malaj jo’ jun chahim (Tz. ut S. 81–89). Ye reheb’ naq te’rileb’ ru li raqal sa’ Tzol’leb’ ut Sumwank 76 ut te’xwotz k’a’ru tento taqab’aanu re xk’ulb’al li jar tasal chi loq’alil li yeeb’ileb’ resil xb’aan laj Pablo. Chi’ilmanq ajwi’ Tzol’leb’ ut Sumwank 131:1–4; 137:7–10.

  relik li saq’e

  “Jun wi’ lix lemtz’unkil li saq’e” (1 Korintios 15:41).

• Moko k’iheb’ ta li na’ajej sa’eb’ li loq’laj hu b’ar wi’ yeeb’il resil li kub’iha’ choq’ reheb’ li kamenaq; 1 Korintios 15 a’an jun reheb’ (chi’ilmanq li raqal 29; chi’ilmanq ajwi’ Tz. ut S. 128:18). Maare eb’ li komon sa’ li tzoleb’aal te’ruuq chixwotzb’al k’a’ru xe’xk’ul sa’ xb’aanunkil li kub’iha’ malaj xkomoneb’ chik li k’ojob’anb’il k’anjel choq’ reheb’ lix xe’toonaleb’. Naru taak’oxla xwotzb’al li k’a’ru kixk’ul laj Wilford Woodruff sa’ “Xkomon chik li k’anjeleb’aal” naq yookex chi aatinak chirix. K’a’ut naq laj Pablo kixye resil li kub’iha’ choq’ reheb’ li kamenaq jo’ jun xk’utb’al xyaalal li wakliik chi yo’yo? Wi na’ajman ru aatinak chirix k’a’ut naq na’ajman ru li kub’iha’ choq’ reheb’ li kamenaq, chi’ilmanq “Bautismos por los muertos,” Temas del Evangelio, topics.lds.org. Li video “Buenas nuevas: La historia de los bautismos por los muertos” (LDS.org) naxch’olob’ chan ru naq kik’ojob’aman wi’chik li na’leb’ a’in sa’ li kutan li wanko wi’.

reetalil li tzolok

Xb’oqb’aleb’ chi tzolok sa’ kab’l

Ye reheb’ li komon sa’ li tzoleb’aal naq te’xk’oxlaheb’ lix yalb’al rix yookeb’ chixk’ulb’al, malaj li majelal li wan rik’ineb’. Ye reheb’ naq sa’ rilb’al 2 Korintios, te’xtzol k’a’ru kitenq’ank re laj Pablo chixkuyb’al lix yalb’al rix, ut chan ru naq kixk’oxlaheb’ lix majelal.

reetalil li k’anjeleb’aal

Xkomon chik li k’anjeleb’aal

1 Korintios 14–16

Xyaalalil li wakliik chi yo’yo.

Li Elder D. Todd Christofferson kixye:

“K’oxlahomaq chiru junpaat chan ru nak’anjelak li wakliik chi yo’yo sa’ xch’olob’ankil chi junajwa ani tz’aqal li Jesus aj Nazaret, ut sa’ xtuqub’ankil li xninqal ru patz’om chirix li yu’am a’in. Wi li Jesus kiwakli chi yo’yo chi yaal, tento naq a’an wan xchoxahilal. Maajun li yal winq wan xwankil chi wakliik wi’chik chirix li kamk. Rik’in naq kiwakli chi yo’yo, li Jesus maawa’ ka’ajwi’ aj peech’, aj tzolonel, aj k’amol b’e, malaj profeet. Rik’in naq kiwakli chi yo’yo, tento naq a’an jun Dios, tz’aqal li Ralal li Yuwa’b’ej li junaj chirib’il.

“Chi jo’kan, li k’a’ru kixk’ut a’an yaal; li Dios ink’a’ naru chi tik’ti’ik.

“Chi jo’kan, a’an aj yo’ob’tesihom re li ruchich’och’, jo’ kixye.

“Chi jo’kan, yaal naq wan li choxa ut li xb’alb’a, jo’ kixk’ut.

“Chi jo’kan, wan jun ruchich’och’ reheb’ li musiq’ej, li kirula’ani chirix xkamik.

“Chi jo’kan, a’an taachalq wi’chik, jo’ ke’xye li anjel, ut a’an ajwi’ “taa’awa’b’ejinq sa’ xb’een li ruchich’och’.”

“Chi jo’kan, taawanq jun wakliik chi yo’yo ut jun raqok aatin sa’ roso’jik, choq’ re chixjunileb’ ” (“Lix waklijik li Jesukristo chi yo’yo,” Jolomil ch’utub’aj-ib’ re abril 2014).

Eb’ li k’ojob’anb’il k’anjel choq’ reheb’ li kamenaq: “Jun numleb’ re saqen chalen chaq xk’ojarib’aal li Dios.”

Li Elder Wilford Woodruff kixye naq sa’ xtzolb’al a’an naq eb’ li komon sa’ li Iglees li yo’yookeb’ te’ruuq chixk’ulb’al li k’ojob’anb’il k’anjel re li kolb’a-ib’ choq’ reheb’ lix xe’toonaleb’ li ak xe’kam, “Chanchan jun numleb’ saqen chalen chaq xk’ojarib’aal li Dios toj sa’ qach’ool. Kixte chiru li qak’a’uxl jun ilom li nim ru jo’ li junelik q’e kutan.” Kixye ajwi’: “Xink’e reetal naq li Dios li kik’utb’esink re li na’leb’ a’in chiruheb’ li winq, a’an jun Dios chaab’il xna’leb’, tiik ut yaal, ut a’an aj eechanihom re li chaab’il eechej ut li nawom q’axal chaab’il. Laa’in xweek’a naq a’an naxk’am rib’ rik’in li rahok, li uxtaan, li tiik ruhil na’leb’ ut li raqb’a-aatin, ut kiweek’a naq k’a’jo’ wi’chik ninra li Qaawa’ chiru li week’ahom chaq chiru lin yu’am. … Xwaj xyeeb’al Aleluyah naq xk’utun chiqu li na’leb’ k’utb’esinb’il chirix li kub’iha’ choq’ reheb’ li kamenaq. …”

“Li xb’een na’leb’ li ki’ok sa’ lin k’a’uxl,” chan, “a’an naq wan jun inna’ sa’ li ruchich’och’ reheb’ li musiq’ej. A’an kikam naq laa’in 14 po inyu’am. …” Moqon, kixye resil li hoonal naq kiru chixtz’apb’al sa’ junajil lix na’ rik’in lix yuwa’: “A’an taawanq xna’aj sa’ li xb’een wakliik chi yo’yo, ut a’in natz’aqlok choq’ inq’ajkamunkil xb’aan chixjunil lix k’anjel inyu’am” (Enseñanzas de los Presidentes de la Iglesia: Wilford Woodruff, [2011], 191-193).

Xchaab’ilob’resinkil li qak’utum

Naweb’ ru li tzolb’ileb’ aab’aan. Maajun juntaq’eet rik’in xkomon; li junjunq li tzolb’il aab’aan junaj ru li chalenaq wi’ chaq, li k’a’ru naxk’oxla, ut lix seeb’al. Chattijoq re xnawb’al chan ru naru taawoksi a’in re te’raj tzolok li ani tzolb’ileb’ aab’aan. Naq q’axal wi’chik nakataweb’ ru li tzolb’ileb’ aab’aan, q’axal wi’chik naq tatruuq chixk’uub’ankil aatzolom re tixtoch’eb’ xch’ool ut taajultiko’q reheb’ (chi’ilmanq Li k’utuk jo’ li Kolonel, 7).