li Jesus yoo chi aatinak rik’in jun ch’ina al

16–22 septiembre

2 Korintios 8–13

“Li Dios naxra li nasihok chi sa sa’ xch’ool”

Naq nakawil ru 2 Korintios 8–13, k’oxlaheb’ li ani nakatzoleb’, ut k’uub’ li kok’ k’anjel li taatenq’anq reheb’ chixtawb’aleb’ li na’leb’ sa’eb’ li ch’ol a’in. Chirix a’an, tz’il rix li tusb’il aatin a’in re xtawb’al chik aana’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

A’in jun na’leb’ re xb’oqb’aleb’ li komon sa’ li tzoleb’aal chixwotzb’al li k’a’ru xe’xtzol sa’ 2 Korintios 8–13. Ye re junjunq reheb’ naq te’xtz’iib’a chiru li pizarron jun ch’ol aatin li xwulak chiruheb’ sa’ rilb’al ru li hu, ut chirix a’an ye re li jun siir chik naq te’xtaw a’an sa’eb’ li loq’laj hu. Ye reheb’ li komon naq te’xwotz k’a’ut naq nawulak chiruheb’ li ch’ol aatin a’in.

reetalil li k’utuk

Xk’utb’al li tzolʼlebʼ

2 Korintios 8:1–15; 9:6–15

Eb’ laj santil paab’anel chi sa sa’ xch’ooleb’ neke’xwotz li k’a’ru reheb’ re rosob’tesinkileb’ li neb’a’ ut li maak’a’eb’ re.

• Li Dios kixtaqla reheb’ lix santil paab’anel naq te’rileb’ li neke’raj xtenq’ankil, ut wankeb’ li aatin sa’ 2 Korintios 8–9 li te’tenq’anq re laa tzoleb’aal sa’ xyalb’aleb’ xq’e. Re xtenq’ankileb’ chixtawb’aleb’ li ch’ol aatin a’in, naru taatz’iib’a chiru li pizarron eb’ li patz’om jo’ K’a’ut naq nokok’ehok? ut Chan ru naq tento took’ehoq? Lix yijach li tzoleb’aal naru te’xsik’ xsumenkil sa’ 2 Korintios 8:1–15, ut lix yijach chik taaruuq te’xsik’ sa’ 2 Korintios 9:6–15. (Maare us raj xch’olob’ankil naq sa’ li ch’ol 8, raqal 1–5, laj Pablo ki’aatinak chirixeb’ laj santil paab’anel sa’ Macedonia jo’ chaab’il aj k’ehonel.) Chan ru naq eb’ li na’leb’ k’utb’il xb’aan laj Pablo naru toohe’xtenq’a chixtenq’ankileb’ li neb’a’ ut li ani maak’a’ k’a’ru reheb’?

• Re naq eb’ li komon sa’ li tzoleb’aal te’xtaw ru chan ru naq li Qaawa’ kixk’uub’ xtenq’ankileb’ lix santil paab’anel sa’ li k’a’ru re li yu’am a’in, wankeb’ naab’al li aatin tz’iib’anb’il sa’ “Xkomon chik li k’anjeleb’aal.” Maare taaruuq taapatz’ re wiib’ oxib’ li komon sa’ li tzoleb’aal naq te’ril jun malaj wiib’ oxib’ li hu a’in, ut te’xwotz li k’a’ru nawulak chiruheb’. Ma naru neke’xtaw li komon li na’leb’ sa’ 2 Korintios 8:1–15; 9:6–15 li naxk’ut naq eb’ laj santil paab’anel sa’ xkutankil laj Pablo ke’xtenq’aheb’ li neb’a’ jo’ chanru naq laa’o naqab’aanu anajwan?

2 Korintios 11:13–33

Eb’ li profeet aj b’alaq’ neke’xyal xq’e chi b’alaq’ik.

• Rik’in naq laa’o, jo’eb’ laj santil paab’anel sa’ Korinto, nokoru chi b’alaq’iik xb’aan li tik’ti’ aatin, us naq taqanumsi lix tijom laj Pablo reheb’ laj Korinto chirixeb’ li “neke’xk’e rib’ choq’ apostol.” Eb’ li komon maare te’xtaw xkomoneb’ chik li b’alaq’il na’leb’ li wankeb’ chiqu anajwan sa’ li raatin li Elder Quentin L. Cook, “Kawilal sa’ li ch’olob’anb’il yaal chirix li Jesus” (Jolomil ch’utub’aj-ib’ re octubre 2016). Maare naru taapatz’ re jun komon naq taaril chi rub’elaj li aatin a’in ut tixwotz rik’in li tzoleb’aal k’a’ru naxk’ut, ut chan ru naru naqakol qib’ chiruheb’ li “tichk’ob’aal” li toohe’xjalb’ehi rik’in li evangelio. K’a’ chik ru chi na’leb’ natzolman sa’ li ruchich’och’ anajwan li naru chiqajalb’ehinkil rik’in li yaalil na’leb’ re li evangelio? Naru taaye reheb’ li komon sa’ li tzoleb’aal naq te’xnumsi 2 Korintios 11:21–33 ut te’xwotz k’a’ru xe’xtzol sa’eb’ li raqal a’in chirix li wank choq’ tz’aqal “aj k’anjel chiru li Kristo.”

2 Korintios 11:3; 13:5–8

Tento raj “taqak’e reetal” li qatiikilal chi paab’ank sa’ lix evangelio li Jesukristo.

• Wan naq eb’ li komon sa’ li Iglees neke’reek’a naq luktajenaqeb’ xb’aan li k’a’ru ajb’il rik’ineb’ sa’ li yu’am a’in—ut jo’kan ajwi’ xb’aan li k’a’ru ajb’il ru re wank choq’ aj Santil Paab’anel sa’ Roso’jikeb’ li Kutan. Li na’leb’ kixk’e laj Pablo, “k’ehomaq reetal lee yu’am ma tz’aqal yookex sa’ li paab’aal,” naru chatenq’ankil laa’at ut eb’ li komon sa’ laa tzoleb’aal chixk’eeb’al reetal li “yaal ut santilal” li wan rik’in li Kristo (2 Korintios 13:5; 11:3). Maare taaruuq teeril ru sa’ komonil 2 Korintios 11:3 ut tex’aatinaq chirix k’a’ru xyaalalil li ch’ol aatin, “li yaal ut santilal wankex wi’ choq’ re li Kristo.” Naru ajwi’ taapatz’ reheb’ li komon sa’ li tzoleb’aal naq te’xb’aanu rib’ jo’ patz’b’il reheb’ naq te’xtz’iib’a resil lix evangelio li Jesukristo choq’ re jun periodico, ut yal 100 aatin naru te’roksi. Kanab’eb’ xhoonal re xtz’iib’ankil li esil, ut kanab’eb’ chixwotzb’al chirib’ileb’ rib’ k’a’ru xe’xtz’iib’a. Wi te’raj xtenq’ankil, naru te’iloq sa’ Jwan 3:16–17; 3 Nefi 27:13–21; ut Leales a la Fe, 80–81. Kanab’eb’ li komon sa’ li tzoleb’aal chixk’oxlankil ma tiikeb’ chixpaab’ankileb’ li k’ojleb’aal na’leb’ re li evangelio.

• Re xtenq’ankileb’ li komon sa’ li tzoleb’aal “chixk’eeb’al reetal” chan ru naq te’ruuq chi usaak jo’ tzolom, naru taawotz rik’ineb’ li raatin li Awa’b’ej Dieter F. Uchtdorf sa’ “Xkomon chik li k’anjeleb’aal.” Eb’ li komon sa’ li tzoleb’aal naru neke’aatinak chirix chan ru xyu’aminkil lix yehom li Awa’b’ej Uchtdorf naq “taqak’oxla ka’ajwi’ li xb’eenileb’ xtzol’leb’ ut xna’leb’ li evangelio.” K’a’ chik ru neke’xk’oxla li komon sa’ li tzoleb’aal chirix chan ru naq taqak’e reetal li qayu’am re naq tookanaaq chi tiik sa’ li paab’aal?

2 Korintios 12:5–10

Li rusilal li Kolonel tz’aqal re qatenq’ankil chixtawb’al li kawilal sa’ xmajelal qametz’ew.

• K’a’ raj ru taaye re jun aawamiiw li xtijok re taak’iraaq chiru junaq yajel, a’ut nareek’a naq ink’a’ sumenb’il lix tij? Naru taaye reheb’ li komon sa’ li tzoleb’aal naq te’xk’oxla li patz’om a’in naq neke’ril ru sa’ xch’ool 2 Korintios 2:5–10. Taaruuq te’xwotz li na’leb’ neke’xk’ul sa’eb’ li raqal a’in li taaruuq raj chi tenq’ank reheb’ sa’ li na’leb’ a’in. Taaruuq ajwi’ te’xwotz li k’a’ru xe’xk’ul naq rik’in li rusilal li Jesukristo, xe’xtaw li kawilal sa’ xmajelal lix metz’eweb’. Chan ru naq li na’leb’ a’an xjaleb’ xyu’am?

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ laa tzoleb’aal re te’ril ru li hu Galatas, naru taapatz’ reheb’ ma neke’xnaw ru anihaq li xjalb’ehi rib’ rik’in li evangelio. Wi wan, te’raj rilb’al ru chan ru naq laj Pablo kixb’oqeb’ chi sutq’iik li ani reheb’ laj Galata li ke’xjalb’ehi rib’.

reetalil li k’anjeleb’aal

Xkomon chik li k’anjeleb’aal

2 Korintios 8–13

Lix na’leb’ li Qaawa’ re xtenq’ankileb’ li neb’a’ ut li neke’raj xtenq’ankil.

• Mosiah 4:16–27; Alma 34:27–29; Tzol’leb’ ut Sumwank 104:14–18.

• Manual 2: Administración de la Iglesia (2010), 6.1.

• “Los diezmos y las ofrendas,” Para la Fortaleza de la Juventud (2011), 38–39.

• Eb’ li b’ich: “Rik’in naq k’iila usilal xink’ul,” “Qaawa’, chatintaaqe,” “Ma chaab’il anajwan xinb’aanu arin? (Eb’ li B’ich, 140, 141, 143).

• Eb’ li video sa’ LDS.org: “Centro de bienestar: Almacén del obispo,” “El trabajo de sus manos,” “Demos gracias a Dios,” ut “Ofrendas de ayuno: ¿No somos todos mendigos?”

• Temas del Evangelio, “Bienestar,” topics.lds.org.

Naru naqisi xch’a’ajkil xyu’aminkil li evangelio.

Li Awa’b’ej Dieter F. Uchtdorf kixk’ut:

“Ex was wiitz’in, ink’a’ na’ajman naq ch’a’ajaq li evangelio.

“Relik chi yaal, saqen li ru. Naru xch’olob’ankil chi jo’ka’in:

• “Rab’inkil raatin li Dios chi anchal qach’ool nokoxb’eresi chixpaab’ankil li Dios ut lix yeechi’ihom.

• “Naq naqakanab’ qib’ sa’ ruq’ li Dios, nanujak li qach’ool rik’in rahok choq’ re a’an ut choq’ re jalan.

• “Sa’ xk’ab’a’ li qarahom choq’ re li Dios, naqaj xtaaqenkil a’an ut naqajunaji li qab’aanuhom rik’in li raatin.

• “Xb’aan naq naqara li Dios, naqaj k’anjelak chiru, ut naqaj rosob’tesinkileb’ li qas qiitz’in ut xtenq’ankileb’ li neb’a’.

• “Naq nokob’eek sa’ li b’e a’in re wank choq’ tzolom, naniman li qajom re xtzolb’al li raatin li Dios.

“Ut toj naxik chi jo’kan, jun li yokb’ nak’amok sa’ li jun chik, ut naniman qapaab’aal, qoyb’enihom, ut qarahom.

“Chaq’al ru, moko ch’a’aj ta, ut chaab’il nak’anjelak.

“Ex was wiitz’in, wi nekek’oxla naq li evangelio ink’a’ yoo chi k’anjelak choq’ eere, nekexinb’oq chixxaqab’ankil eerib’, chixtz’ilb’al rix lee yu’am, ut chixk’osb’al ru li nekeb’aanu. K’oxlahomaq ka’a’jwi’ li xb’eenileb’ xtzol’leb’ ut xna’leb’ li evangelio. Ninyeechi’i naq li Dios texrosob’tesi re texwulaq jo’ tzolom li sa xch’ool, ut li evangelio taak’anjelaq chi jwal us wi’chik choq’ eere” (“Chaab’il nak’anjelak!” Jolomil ch’utub’aj-ib’ re octubre 2015).

Xchaab’ilob’resinkil li qak’utum

K’anjelak sa’ komonil rik’ineb’ li komon sa’ li junkab’al. “Eb’ li ani q’axal wankeb’ xwankil sa’ xyu’am junaq—choq’ re li us malaj li ink’a’ us—chi kok’ aj xsa’ a’aneb’ li ani wankeb’ sa’ rochoch. Rik’in naq li ochoch a’an li na’ajej q’axal nim xwankil re xyu’aminkil ut xtzolb’al li evangelio, k’a’jo’ wi’chik naq tatruuq chixk’eeb’al xkawilal jun komon sa’ li tzoleb’aal naq nakatk’anjelak sa’ komonil rik’in … li wankeb’ sa’ li junkab’al” (Li k’utuk jo’ li Kolonel, 8).