junkab’al yoo chirilb’aleb’ li jalam-uuch

30 septiembre–13 octubre

Efesios

“Re xtz’aqob’resinkileb’ ru laj santil paab’anel”

Li na’leb’ ut li eek’ahom chirix k’a’ru taak’ut ut chan ru taak’ut te’chalq aawik’in naq nakatzol rik’in tijok li hu Efesios, eb’ li aatin sa’eb’ li jolomil ch’utub’aj-ib’ li toja’ xe’nume’, li tusleb’ aatin a’in, ut Kim, Taaqehin—Choq’ reheb’ li komon ut li junkab’al.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Naru taapatz’ reheb’ li komon sa’ li tzoleb’aal naq te’xtz’iib’a chi k’osb’il ru jun na’leb’ xe’xtzol sa’ tzolok chiru li xamaan a’in, ut te’xletz li raatineb’ chiru li pizarron. Sik’ ru junjunq reheb’ li k’osb’il ru aatin a’in, ut b’oqeb’ li komon li xe’tz’iib’ank re naq te’xwotz li k’a’ru xe’xk’oxla.

reetalil li k’utuk

Xk’utb’al li tzolʼlebʼ

Efesios 2:19–22; 4:4–8, 11–16

Eb’ li profeet ut eb’ li apostol—jo’ ajwi’ chiqajunilo—naqak’e xkawil li Iglees ut naqatenq’a chi wank sa’ junajil.

• Ma texruuq laa’at ut laa tzoleb’aal chixkab’lankil k’a’ruhaq sa’ komonil re xk’utb’al chan ru naq li Iglees “kab’lanb’il sa’ xb’een rub’elahomeb’ li apostol ut eb’ li profeet,” ut chan ru naq li Kolonel “a’an li xnimal ru pek sa’ li kab’l”? (Efesios 2:20). Maare eb’ li komon te’ruuq chixletzb’al li aatin chiruheb’ li kok’ kaaxukuutil che’ malaj eb’ li sek’ re hu, ut te’xkab’la choq’ najt xteramil kab’l malaj po’lem, ut li Jesukristo ut eb’ li apostol ut profeet te’wanq chi rub’el. Chi jo’kan, taaruuq taak’ut k’a’ru taak’ulmanq wi taa’isimanq li Kristo, malaj eb’ li apostol ut profeet. K’a’ut naq li xnimal ru pek sa’ li kab’l a’an jun chaab’il jaljookil ruhil aatin chirix li Jesukristo ut lix k’anjel sa’ li Iglees? (Re rilb’al chik li na’leb’ chirix li xnimal ru pek sa’ li kab’l, chi’ilmanq “Xkomon chik li k’anjeleb’aal.”) Eb’ li komon sa’ li tzoleb’aal te’ruuq chixtz’ilb’al rix Efesios 2:19–22; 4:11–16, re rilb’aleb’ li osob’tesink naqak’ul sa’ xk’ab’a’eb’ li apostol, li profeet, ut xkomoneb’ chik aj b’eresinel re li Iglees. K’a’ru naru taqab’aanu re xkab’lankil li qayu’am sa’ xb’een li raatineb’?

  xb’eenil pek sa’ jun santil ochoch

  Li Jesukristo a’an li xnimal ru pek re li Iglees.

• Re xk’utb’al chan ru naq naru nasach qana’leb’ chirix li tzol’leb’ wi ink’a’ b’eresinb’ilo xb’aaneb’ li profeet ut li apostol, naru teeb’aanu jun b’atz’unk sa’ li nakaseraq’i wi’ jun esil re jun komon sa’ li tzoleb’aal chi ink’a’ neke’rab’i li jun siir chik. Chirix a’an, li komon a’an naru chixka’sutinkil li seraq’ re jalan chik komon sa’ li tzoleb’aal, ut jo’kan wi’chik toj reetal naq xnume’ li seraq’ chiru wiib’ oxib’ li komon. Chirix a’an, ye re li x’ab’ink re li seraq’ sa’ roso’jik naq tixye re li tzoleb’aal k’a’ru xrab’i. Ma xjalman b’ayaq li esilal? K’a’ raj ru taak’ulmanq wi ta laj k’utunel xru chixtuqub’ankil li sachk naq yoo chi yeemank? K’a’ru naxk’ut li ch’ina k’anjel a’in chirix k’a’ut naq lix Iglees li Jesukristo tento taawanq chi “kab’lanb’il sa’ xb’een rub’elahomeb’ li apostol ut eb’ li profeet”?

• Wi eb’ li komon sa’ laa tzoleb’aal xe’rab’i li jolomil ch’utub’aj-ib’ chirix li tzoleb’aal xnume’, b’oqeb’ chixwotzb’al chan ru naq tz’aqob’resinb’il ru li aatin sa’ Efesios 4:11–16 rik’in li k’a’ru k’utb’il sa’ li jolomil ch’utub’aj-ib’.

• Maare tatruuq chixkanab’ankileb’ li komon sa’ li tzoleb’aal chiru junpaat chixtz’iib’ankil k’a’ruheb’ “lix b’oqb’aleb’ ” li xe’xk’ul sa’ li Iglees (chi’ilmanq Efesios 4:1)—qayehaq, jo’ aj ilol komon, jo’ na’b’ej yuwa’b’ej, jo’ xtzolom li Kristo, ut xkomon chik. Chirix a’an te’ruuq chixk’utb’al lix tz’iib’ahom rik’in jun chik komon, te’ril ru Efesios 4:4–8, 11–16, ut te’xwotz chan ru naq lix b’oqb’aleb’ li xe’xtz’iib’a natenq’an chixkab’lankil lix tz’ejwal li Kristo. Chan ru nokoru chi k’anjelak sa’ komonil re naq toowanq sa’ junajil, rub’el “jun ajwi’ chi Qaawa’, jun chi paab’aal, jun chi kub’iha’ ”?

Efesios 5:22–6:4

Xtaaqenkil lix b’aanuhom li Kolonel naru chixkawob’resinkil li sahil wank sa’ li junkab’al.

• Us ta eb’ laj Efeso ke’wan sa’ jun tenamit b’ar wi’ eb’ li ixaqilb’ej ink’a’ juntaq’eeteb’ xwankil rik’ineb’ lix b’eelom, li hu a’in toj naxk’e chaab’il na’leb’ choq’ reheb’ li sumal li sumsuukeb’ sa’ li kutan a’in. Naru taatz’iib’aheb’ li patz’om jo’eb’ li we’ chiru li pizarron, ut taab’oqeb’ li komon sa’ li tzoleb’aal chi aatinak chirixeb’ naq yookeb’ chirilb’al ru Efesios 5:22–33 sa’eb’ li jar ch’uut: Chan ru naq li Kristo kixk’ut lix rahom choq’ re li Iglees? K’a’ru naru taqab’aanu re xtaaqenkil lix b’aanuhom rik’in li nakab’aanu re li sumsuuko wi’? Naru taab’oqeb’ li komon sa’ li tzoleb’aal chixwotzb’al chan ru naq xe’ril jun sumal chixb’aanunkil chirib’il rib’eb’ li kixb’aanu raj li Kristo. Chan ru nokoru chixk’anjelankil li na’leb’ a’in rik’in ani chik li wankeb’ sa’ li qajunkab’al?

• Us ta li raatin laj Pablo naq “chawoxloq’i laa na’ laa yuwa’ ” (Efesios 6:2) kiyehe’ reheb’ li kok’al, wan xk’anjel choq’ qe chiqajunqal, maak’a’ naxye jarub’ qachihab’ malaj chan ru li qajunkab’al. B’oqeb’ li komon sa’ li tzoleb’aal chixk’oxlankil chan ru naq te’ruuq chixyu’aminkil li raatin laj Pablo sa’ (Efesios 6:1–3 sa’ li wankeb’ wi’ anajwan. Qayehaq, chan ru naru naqa’oxloq’i li qana’ qayuwa’, us ta maare ink’a’ neke’xsik’ ru xb’aanunkil li k’a’ru naxk’am rib’ rik’in li k’utb’il xb’aan li Jesukristo? Naru nakak’e xhoonaleb’ li komon sa’ li tzoleb’aal re te’xtz’iib’a k’a’ru naru te’xb’aanu re roxloq’inkil chi us wi’chik lix na’ xyuwa’eb’.

• Wi wankeb’ sa’ laa tzoleb’aal lix na’ xyuwa’eb’ li kok’al toj ka’ch’ineb’ xyu’am, maare usaq choq’ reheb’ aatinak chirix Efesios 6:4. K’a’ru xyaalalil xk’iresinkileb’ li kok’al “rik’in xtzolb’aleb’ ut xtijb’aleb’ jo’ naraj li Qaawa’ ”? Maare eb’ li komon sa’ li tzoleb’aal li wankeb’ xkok’al li xe’niman b’ayaq te’ruuq chixyeeb’al k’a’ru xyaalalil li aatin a’in choq’ reheb’, ut chan ru naq te’ruuq chixyu’aminkil sa’ lix junkab’aleb’.

Efesios 6:10–18

Li kolb’a-ib’ aq’ej re li Dios naru tixkol qix chiru li maa’usilal.

• K’a’ru taaruuq chixk’eeb’al xkawileb’ xch’ool li komon sa’ li tzoleb’aal re te’xyal xq’e chixtiqib’ankil rib’ rik’in li kolb’a-ib’ aq’ej re li Dios wulaj wulaj? Naru taakawresi jun ch’ina k’anjel sa’ li te’xye wi’ li komon k’a’ru li na’leb’ malaj chaab’ilal yeeb’il choq’ re li junjunq raqal re li kolb’a-ib’ aq’ej jo’ yeeb’il sa’ Efesios 6:14–17. Chan ru naq li junjunq cha’al re li kolb’a-ib’ aq’ej natenq’an chixkolb’al qix chiru li maa’usilal? (Re aatenq’ankil, chi’ilmanq “Xkomon chik li k’anjeleb’aal.”) Chan ru naq eb’ li komon sa’ li tzoleb’aal te’ruuq chixk’eeb’al chirixeb’ li kolb’a-ib’ aq’ej a’in? Sa’ aatinak chirix a’in, maare tatruuq chixwotzb’al li raatin li Awa’b’ej N. Eldon Tanner sa’ “Xkomon chik li k’anjeleb’aal.” K’a’ru naru naqab’aanu re xk’eeb’al reetal ut xtuq’ub’ankil ru li majelal sa’ li kolb’a-ib’ aq’ej li wan chiqix?

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru Filipenses ut Kolosenses, naru taaye reheb’ naq jun reheb’ lix Raqalil li Paab’aal wan chi k’ojk’o sa’ xb’een jun raqal li natawman sa’ jun reheb’ li hu a’in. Ma naru neke’xtaw naq yookeb’ chi tzolok chiru li xamaan a’in?

reetalil li k’anjeleb’aal

Xkomon chik li k’anjeleb’aal

Efesios

K’a’ru jun xnimal ru pek sa’ xxuk?

Li xnimal ru pek sa’ xxuk a’an li xb’een pek li nak’eeman sa’ xk’ojleb’aal jun kab’l. Nak’anjelak re xb’isb’al b’ar tz’aqal te’k’ojob’aaq li jun ch’ol chik chi pek, li tento te’wanq chi tzoltzo rik’in li xb’eenil pek sa’ xxuk. Rik’in naq wan raalil chixjunil li kab’l sa’ xb’een, li xb’eenil pek sa’ xxuk li kab’l tento taawanq chi kaw, chi k’ojk’o, ut chi ink’a’ na’eek’an (chi’ilmanq “The Cornerstone,” Ensign, enero 2016, 74–75).

Li kolb’a-ib’ aq’ej re li Dios

Jit’jooq lee sa’ rik’in li yaal:Li cha’al a’in re li kolb’a-ib’ aq’ej, chanchan jun k’aamal sa’. Li k’aamal sa’ a’in nak’anjelak ajwi’ re k’ehok kawilal.

Ramok ch’oolej:Jun ramok ch’oolej naxkol rix li aamej ut xkomon chik xch’a’al li junxaqalil.

Xaab’ cheroq:A’in li k’a’ru naxkol rix li roq laj pleet.

Ramleb’:Jun ramleb’ naru naxkol rix chixjunil li junxaqalil chiru li rahilal.

Xtz’apb’al jolomej:Lix tz’apb’al jolomej naxkol rix xjolom.

Yok’leb’ ch’iich’:Li yok’leb’ ch’iich’ nak’anjelak re xkolb’al qib’ chiru li yoo chi pleetink qe.

“Tz’il rix li kolb’a-ib’ aq’ej li wan chawix.”

Li Awa’b’ej N. Eldon Tanner, li kiwan choq’ xb’een aj tenq’ aj k’ehol na’leb’ sa’ li Xb’eenil Awa’b’ejil, kixb’oqeb’ li komon sa’ li Iglees chixtz’ilb’al rix chan ru xkawilal li kolb’a-ib’ aq’ej wan chirixeb’, rik’in xk’oxlankil chan ru naq yookeb’ chixyu’aminkil li evangelio. A’an kixch’olob’:

“Wi q’un ru li kolb’a-ib’ aq’ej li wan chiqix, wan junaq xcha’al li qatib’el li ink’a’ tz’apb’il ru, junaq na’ajej naru na’ok li napleetik qe, ut naru nokotoch’e’ ut nokosache’ xb’aan laj Satanas, li taasik’oq toj reetal naq tixtaw li qamajelal, wi wan.

“Tz’il rix li kolb’a-ib’ aq’ej li wan chawix. Ma wan junaq na’ajej li ink’a’ tz’apb’il, malaj ink’a’ kolb’il rix? K’e aach’ool chixtuqub’ankil li k’a’ru maji’ tz’apb’il ru. Us ta maare q’el ru ut wan xmajelal li kolb’a-ib’ aq’ej li wan chawix, chijultiko’q aawe naq a’ yaal aawe laa’at xjalb’al re naq tz’aqalaq re ru li tiqtooqat wi’.

“Rik’in li xnimal ru na’leb’ re li jalb’a-k’a’uxl, naru nakasutq’isi laa yu’am sa’ li b’e, ut nakat-ok chixtiqib’ankil aawib’ rik’in li kolb’a-ib’ aq’ej re li Dios rik’in li tzolok, li tijok, ut rik’in xk’eeb’al aach’ool chi k’anjelak chiru li Dios ut chixpaab’ankileb’ lix taqlahom” (“Investíos con la armadura de Dios,” Liahona, agosto 1979, 64).

Xchaab’ilob’resinkil li qak’utum

Yal aaq’e chi rahok jo’ kirahok li Kristo. Tento naq li k’a’ru nakab’aanu choq’ reheb’ li tzolb’ileb’ aab’aan taawanq chi b’aanunb’il rik’in rahok. Laa’at ut eb’ li nakatzoleb’ tex’osob’tesiiq naq nekextijok re xk’ulb’al li rahok jo’ li kirahok wi’ li Kristo, ut nekesik’ chan ru naq teek’ut li rahom a’an (chi’ilmanq Li k’utuk jo’ li Kolonel, 6; Moroni 7:48).