laj Pablo naxk’e chi tz’iib’aak jun li hu sa’ tz’alam

14–20 octubre

Filipenses; Kolosenses

“Chixjunil ninkuy xnumsinkil sa’ xk’ab’a’ li nak’ehok xkawub’ inch’ool”

Tiklan rik’in rilb’al ru Filipenses ut Kolosenses, ut k’oxla rik’in tijok k’a’ru li tzol’leb’ taaraj li Qaawa’ naq taak’ut. Li Musiq’ej chixk’am aab’e naq nakak’oxlaheb’ li patz’om ut li k’anjeleb’aal li tatruuq chiroksinkil re xk’utb’al li tzol’leb’ a’in.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixtz’iib’ankil chiru li pizarron junaq aatin malaj ch’ol aatin li naxk’ut xyaalal li k’a’ru xe’xtzol sa’ Filipenses ut Kolosenses, ut chirix a’an te’xch’olob’ k’a’ut naq xe’xsik’ ru li aatin a’an. Waklesi xch’ooleb’ chixwotzb’aleb’ li raqal sa’eb’ li loq’laj hu naq yookeb’ chixch’olob’ankil.

reetalil li k’utuk

Xk’utb’al li tzolʼlebʼ

Filipenses 2:1–5, 14–18; 4:1–9; Kolosenses 3:1–17

Eb’ lix tzolom li Jesukristo “neke’ak’ob’resiik” naq neke’xyu’ami lix evangelio.

• Maare taawaj xtenq’ankileb’ li komon sa’ li tzoleb’aal chixtawb’al ru k’a’ru xyaalalil “risinkil sa’ xch’ooleb’ lix najteril yu’ameb’,” ut “xtiqib’ankil rib’eb’ rik’in li ak’ yu’am” sa’ xk’ab’a’ li Jesukristo (Kolosenses 3:9–10). Re xb’aanunkil a’in, maare tatruuq chixk’utb’al k’a’ruhaq li q’el ut k’a’ruhaq li ak’ (maare jun ki’il q’een li q’anjenaq ut jun li toja’ xq’ano’, malaj jun li t’ikr li q’el ut jun li ak’). Eb’ li komon sa’ li tzoleb’aal te’ruuq chi aatinak chirix chan ru naq “noko’ak’ob’resiik” rik’in xpaab’ankil li Jesukristo, ut rik’in wank qach’ool chixyu’aminkil lix evangelio. Jo’ jun raqal re li seraq’ a’in, taaruuq taapatz’ re xyijach li tzoleb’aal naq te’xtzol Filipenses 2:1–5, 14–18; 4:1–9, ut lix yijach chik naq te’xtzol Kolosenses 3:1–17, ut te’xk’e reetal chan ru naq wan li “najteril winq” ut li “ak’ winq.” Naru ajwi’ taab’oq junjunq komon sa’ li tzoleb’aal chixwotzb’al chan ru naq xb’aan xpaab’ankil li Jesukristo ut xyu’aminkil lix evangelio neke’tenq’aak chi ak’ob’resiik. Wankeb’ chik li raqal sa’eb’ li loq’laj hu li texruuq chixtz’ilb’al rix sa’ komonil, jo’ Romanos 6:3–7; Mosiah 3:19; ut Alma 5:14, 26.

Filipenses 4:1–13

Naru naqataw xsahil qach’ool rik’in li Kristo, maak’a’ naxye chan ru naq wanko.

• Us ta li wanko wi’ jalan wi’ rik’in li kiwan wi’ laj Pablo, chiqajunil wan k’a’ru naru naqatzol rik’in naq a’an kiwan chi k’ojk’o xch’ool ut chi sa xch’ool sa’ chixjunil li ch’a’ajkilal kixnumsi sa’ xyu’am. Re xtikib’ankil aatinak chirix li na’leb’ a’in, naru teenumsi wi’chik junjunq li ch’a’ajkilal kixk’ul laj Pablo (chi’ilmanq, jo’ eetalil, 2 Korintios 11:23–28). Taaruuq taapatz’ reheb’ li komon sa’ li tzoleb’aal naq te’ril ru Filipenses 4:1–13 re xtawb’al li na’leb’ kixk’e laj Pablo li taatenq’anq qe chi saho’k sa’ qach’ool, us ta sa’ xkutankil li xyalb’al qix.

  Wi teeraj aatinak chik chirix li na’leb’ a’in, naru taapatz’ re junaq komon sa’ li tzoleb’aal naq tixwotz junjunq li musiq’anb’il esil malaj aatin sa’ li raatin li Awa’b’ej Russell M. Nelson, “Li sahil ch’oolejil ut kole’k sa’ musiq’ejil” (Jolomil ch’utub’aj-ib’ re octubre 2016), malaj taaruuq te’ril li tzoleb’aal li video “Prueba de adversidad” (LDS.org). Chan ru naq eb’ li kristiaan sa’ li raatin li Awa’b’ej Nelson, malaj li ixq sa’ li video, xe’xtaw li sahil ch’oolejil, us ta ch’a’aj xe’wan wi’?

• Maare eb’ li komon sa’ li tzoleb’aal taaruuq te’xtaw junaq na’leb’ sa’ Filipenses 4 li taatenq’anq reheb’ naq neke’xk’ul li ch’a’ajkilal. Naru taak’e jun ch’ina hu re li junjunq komon sa’ li tzoleb’aal re te’xtz’iib’a li k’a’ru xe’xtaw. Ye reheb’ naq te’xk’e li hu a’an sa’ rochoch b’ar wi’ te’ril naq neke’raj ru.

• Wan naq jun li b’ich naru chixnimankil li qana’leb’ chirixeb’ li loq’laj hu. Qayehaq, chirix rilb’al ru Filipenses 4:7, 13, naru teeb’icha sa’ komonil “B’ar wan xhiilal li waam?” malaj li xb’een raqal re li b’ich “Qaawa’, chatintaaqe” (Eb’ li B’ich, 67, 141). Jo’ neke’ril li komon sa’ li tzoleb’aal, chan ru naq li raatinuleb’ li b’ich a’in neke’xk’am rib’ rik’in Filipenses 4:7, 13? Maare taaruuq te’xwotz junaq xk’ulumeb’ naq xe’reek’a “li tuqtuukil usilal li nachalk rik’in li Dios, ut naxq’ax ru chixjunil li na’leb’,” malaj naq xe’reek’a naq kawresinb’ileb’ sa’ xk’ab’a’ li Kristo chixb’aanunkil k’a’ruhaq li ink’a’ raj xe’ru chixb’aanunkil. Lix k’ulum li Elder Jay E. Jensen, li natawman sa’ “Xkomon chik li k’anjeleb’aal” maare texxtenq’a chi aatinak chirixeb’ li raqal a’in.

• Rik’in naq yoo chi nimank li maa’usilal sa’ li ruchich’och’ anajwan, eb’ li komon sa’ laa tzoleb’aal maare te’usaaq rik’in li raatin laj Pablo naq “chiwanq sa’ xch’ooleb’ ” li k’a’ru tiik, li maak’a’ reek’, li ka’loq’ oxloq’, li chaab’il, ut li xk’ulub’ nimaak ru (Filipenses 4:8). Maare tatruuq chixk’eeb’al re li junjunq komon sa’ li tzoleb’aal (malaj reheb’ li kok’ ch’uut chi komon) jun reheb’ li aatin yeeb’il sa’ Filipenses 4:8 malaj sa’ Eb’ lix Raqalil li Paab’aal 1:13. Naru te’roksi li K’utul Raqal reheb’ li Loq’laj Hu re xtawb’aleb’ li raqal chirix li aatin xe’xk’ul, ut te’xwotz chiru li tzoleb’aal li k’a’ru xe’xtaw. Naru ajwi’ te’xwotz chan ru naq xe’ril reetalil li aatin a’an sa’ xyu’ameb’ li ras riitz’ineb’. Chan ru naq “naqasik’ li k’a’aq re ru a’in”?

Kolosenses 1:12–23; 2:3–8

Naq li qapaab’aal “xe’enb’il” rik’in li Jesukristo, nokokawob’resiik chiru lix na’leb’ li ruchich’och’.

• Lix ch’olob’ahom laj Pablo chirix li Kolonel li natawman sa’ Kolosenses 1:12–23; 2:3–8 naru chixtenq’ankileb’ li komon sa’ li tzoleb’aal chixk’oxlankil ut chixkawob’resinkil tz’aqal lix paab’aaleb’. Eb’ li komon sa’ li tzoleb’aal te’ruuq chixtz’ilb’aleb’ rix li raqal a’in re xtawb’al li k’a’aq re ru naxkawob’resi lix paab’aaleb’ chirix li Jesukristo. K’a’ru xyaalalil naq “xe’enb’ilaqex ut kab’lanb’ilaqex sa’ xb’een” li Jesukristo? (Kolosenses 2:7). Lix jalam-uuch li toon che’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut junkab’al, ut li video “Torbellinos espirituales” (LDS.org) naru naxtenq’aheb’ li komon sa’ li tzoleb’aal chi aatinak chirix li raqal a’in. (Chi’ilmanq ajwi’ Neil L. Andersen, “Eb’ li musiq’ejil sut-iq’,” Jolomil ch’utub’aj-ib’ re abril 2014.) Ani naru chixkawob’resinkil malaj chixq’unob’resinkil lix xe’ jun toon che’? Chan ru naq li wank chi “xe’eninb’il ut kab’lanb’il sa’ xb’een li Jesukristo” naxk’e qakawilal chiru lix wankil li ruchich’och’? (chi’ilmanq Kolosenses 2:7–8; chi’ilmanq ajwi’ Helaman 5:12; Eter 12:4).

• Eb’ li komon sa’ laa tzoleb’aal maare neke’xnaw chirixeb’ li na’leb’ re li ruchich’och’ ut reheb’ li winq li naru “chixra’lenkil” lix paab’aal junaq kristiaan rik’in naq ink’a’ naxk’am rib’ rik’in li yaalil na’leb’ re li evangelio, ut rik’in naq naxk’e ch’a’ajkil xyu’aminkil li evangelio (Kolosenses 2:8). Maare eb’ li komon sa’ li tzoleb’aal te’ruuq chixyeeb’al junjunq reheb’ li na’leb’ a’in (maare tenq’anb’ilaqeb’ xb’aaneb’ li na’leb’ yeeb’ileb’ xb’aan li Elder Dallin H. Oaks, li natawman sa’ “Xkomon chik li k’anjeleb’aal”). Chirix a’an, texruuq chi aatinak chirix chan ru naq li wank chi xe’eninb’il ut kab’lanb’il sa’ xb’een lix yehom li Jesukristo nokoxtenq’a chixpaab’ankil li raatin laj Pablo: “Kama’ naq xek’ul chaq li Kristo Jesus, li Qaawa’, chexwanq ajwi’ anajwan rik’in a’an” (Kolosenses 2:6). Chan ru naru naqatenq’a qib’ chiqib’il qib’ sa’ xtaaqenkil li Jesukristo, ut ink’a’ xtaaqenkil li b’alaq’il na’leb’ re li ruchich’och’?

reetalil li tzolok

Xb’oqb’aleb’ chi tzolok sa’ kab’l

Ma wan naq eb’ li komon sa’ laa tzoleb’aal xe’reek’a naq rahob’tesinb’ileb’ rik’in naq neke’xpaab’ li evangelio? Ye reheb’ naq sa’ 1 ut 2 Tesalonicenses wan li na’leb’ kixk’e laj Pablo reheb’ laj santil paab’anel li ke’wan sa’ xyanq li nimla rahob’tesink ut ke’kana chi tiikeb’ chi paab’ank.

reetalil li k’anjeleb’aal

Xkomon chik li k’anjeleb’aal

Filipenses; Kolosenses

Li tuqtuukil usilal li naxq’ax ru chixjunil li na’leb’.

Naq yoo chi k’anjelak jo’ xkomoneb’ li Setenta, li Elder Jay E. Jensen kixwotz jun lix k’ulum:

“Li qimam, aj Quinton xk’ab’a’, kiyo’la rik’in k’iila majelal sa’ xtib’el, ut yal jun chihab’ kiwan xyu’am, ut chiru li chihab’ a’an k’iila sut kiwan sa’ hospital. Sa’ li kutan a’an, li Hermana Jensen ut laa’in xoowan sa’ Argentina. Kiqaj raj wank rik’ineb’ li qalal qak’ajol re xk’ojob’ankileb’ xch’ool ut re naq k’ojob’anb’ilaq qach’ool xb’aaneb’. A’in jun li qimam li naqara, ut kiqaj raj wank chi nach’. Ka’ajwi’ li tijok kiru chiqu, ut a’an xqab’aanu chi anchal qach’ool.

“Li Hermana Jensen ut laa’in yooko chaq chirula’aninkileb’ li misioneer naq kichal resil naq xkam laj Quinton. Xaqxooko chaq sa’ xneb’aal jun chutleb’aal, ut xqaq’alu qib’ ut xqak’ojob’ qach’ool chiqib’il qib’. Ninch’olob’ cheru naq kichal xk’ojob’ankil qach’ool xb’aan li Santil Musiq’ej, jun li tuqtuukil usilal li naxq’ax ru chixjunil li na’leb’, ut li wan qik’in toj sa’ li kutan a’in (chi’ilmanq Filipenses 4:7). Kiqil ajwi’ li maatan re li Santil Musiq’ej li ink’a’ naru chi yeemank, sa’ xyu’am li qalal, li rixaqil, ut eb’ lix kok’al, li toj sa’ li kutan a’in neke’aatinak chirix li kutan a’an rik’in paab’aal, tuqtuukilal, ut xk’ojob’ankileb’ xch’ool (“El Espíritu Santo y la revelación,” Liahona, noviembre 2010, 78).

Eb’ li na’leb’ re li evangelio ut lix na’leb’eb’ li winq.

Li Elder Dallin H. Oaks kixye resil junjunq li ruchich’och’il na’leb’ li ink’a’ neke’xk’am rib’ rik’in li yaalil na’leb’ re li evangelio (chi’ilmanq “Arrepentimiento y cambio,” Liahona, noviembre 2003, 37–40):

• Xq’etb’al li chaqʼrabʼ re saq ru chʼoolej

• Ink’a’ wulak sa’ li iglees, malaj wulak chi moko anchal ta qach’ool

• Xq’etb’al li Aatin re Chaab’il Na’leb’

• Li tik’ti’ik

• Xsik’b’al “taqsiik qawankil” sa’eb’ li b’oqb’al re li iglees

• Xk’eeb’al qak’anjel re jalan ruuchil xk’ulb’al sa’ qab’een

Xchaab’ilob’resinkil li qak’utum

Oksiheb’ li b’ich. Li loq’laj b’ich naxk’e xb’oqb’al lix wankil li Santil Musiq’ej. Naru ajwi’ nokoxkanab’ chireek’ankil li oxloq’ink, ut chixk’eeb’al qach’ool chi k’anjelak. K’oxla chan ru naq naru taawanq sa’ li tzoleb’aal li “xtzolb’al eerib’ ut xk’eeb’al eena’leb’ cherib’il eerib’ ” rik’ineb’ li b’ich (Kolosenses 3:16; chi’ilmanq ajwi’ Li k’utuk jo’ li Kolonel, 22).