Si Jesus nakig-istorya sa gamayng bata

Septyembre 16–22

2 Mga Taga-Corinto 8–13

“Ang Dios Nagahigugma sa Malipayong Maghahatag”

Samtang magbasa ka sa 2 Mga Taga-Corinto 8–13, hunahunaa ang mga tawo nga imong gitudloan ug pagplano og mga kalihokan nga makatabang kanila nga madiskubrihan ang mga baruganan diha niining mga kapitulo. Dayon ribyuha kining outline alang sa dugang nga mga ideya.

Irekord ang Imong mga Impresyon

pagpaambit nga icon

Dapita ang Pagpaambit

Ania ang usa ka paagi sa pagdapit sa mga sakop sa klase sa pagpaambit kon unsay ilang nakat-unan gikan sa 2 Mga Taga-Corinto 8–13. Hangyoa ang pipila kanila nga isulat diha sa pisara ang paboritong mga pulong gikan sa ilang gibasa, ug dayon hangyoa ang tibuok klase sa pagpangita niini diha sa mga kasulatan. Dapita ang mga sakop sa klase nga ipagkigbahin kon nganong kini nga mga pulong makahuluganon ngadto kanila.

pagtudlo nga icon

Itudlo ang Doktrina

2 Mga Taga-Corinto 8:1–15; 9:6–15

Ang mga Santos malipayong mopaambit kon unsay anaa kanila aron mapanalanginan ang mga kabus ug timawa.

• Gisugo sa Dios ang Iyang mga Santos nga motabang sa pag-atiman niadtong nanginahanglan, ug ang mga tudling diha sa 2 Mga Taga-Corinto 8–9 makapadasig sa mga sakop sa imong klase sa ilang mga paningkamot. Aron matabangan sila nga makakita niining mga tudling, mahimo nimong isulat diha sa pisara ang mga pangutana sama sa Nganong mohatag man kita? ug Unsaon man nato sa paghatag? Katunga sa klase mahimong mosiksik sa mga tubag diha sa 2 Mga Taga-Corinto 8:1–15, ug ang laing katunga mahimong mosiksik diha sa 2 Mga Taga-Corinto 9:6–15. (Mahimo nimong ipasabut nga sa kapitulo 8, mga bersikulo 1–5, naghisgot si Pablo bahin sa mga Santos nga taga-Macedonia isip mga ehemplo sa paghatag og ubay-ubay.) Sa unsa kaha nga paagi nga ang mga baruganan nga gitudlo ni Pablo makatabang kanato nga mas makaatiman sa mga kabus ug timawa?

• Aron matabangan ang mga sakop sa klase nga mas makasabut sa paagi sa Ginoo sa pagtubag sa temporal nga mga panginahanglan sa Iyang mga Santos, adunay daghang kapanguhaan nga nalista diha sa “Dugang nga mga Kapanguhaan.” Tingali mahimo nimong i-assign ang pipila ka sakop sa klase sa pagribyu sa usa o dugang pa niining mga kapanguhaan ug mopaambit kon unsay ilang hunahuna bahin niini. Makakita ba ang mga sakop sa klase og mga ideya diha sa 2 Mga Taga-Corinto 8:1–15; 9:6–15 nga magpakita nga ang mga Santos sa panahon ni Pablo miatiman sa mga kabus sa samang mga paagi sa atong gibuhat karon?

2 Mga Taga-Corinto 11:13–33

Ang mini nga mga propeta nagtinguha sa pagpanglingla.

• Tungod kay kita, sama sa mga Santos nga taga-Corinto, kitang tanan may kalagmitan nga madani sa pagsunod sa sayop nga mga pagtulun-an, makabenepisyo kita sa pagribyu sa mga pasidaan ni Pablo ngadto sa mga taga-Corinto mahitungod sa “mga apostoles nga mini.” Ang mga sakop sa klase mahimong makakita og mga ehemplo sa sayop nga mga pagtulun-an nga makaimpluwensya kanato karon diha sa mensahe ni Elder Quentin L. Cook nga “Maisug diha sa Pagpamatuod ni Jesus” (Liahona, Nob. 2016, 40–43). Tingali mahimo nimong i-assign ang usa ka tawo sa pagbasa daan niining mensahe ug ipaambit ngadto sa klase kon unsay gitudlo niini kon unsaon nga atong malikayan ang “mga babag” nga makapahilayo kanato sa ebanghelyo. Unsa ang ubang mga pagtulun-an nga komon sa kalibutan karon nga makapahilayo kanato gikan sa mga kamatuoran sa ebanghelyo? Mahimo nimong hangyuon ang mga sakop sa klase sa pagribyu sa 2 Mga Taga-Corinto 11:21–33 ug ipaambit kon unsay ilang makat-unan gikan niining mga bersikulo mahitungod sa tinuod nga “mga ministro ni Kristo.”

2 Mga Taga-Corinto 11:3; 13:5–8

Kinahanglan natong “susihon” ang atong pagkamatinud-anon diha sa ebanghelyo ni Jesukristo.

• Usahay ang mga miyembro sa Simbahan mobati nga nabug-atan sa mga gikinahanglan sa kinabuhi—lakip na sa unsay ilang makita isip mga gikinahanglan sa pagkahimong usa ka Santos sa Ulahing mga Adlaw. Ang tambag ni Pablo nga “susiha ang inyong kaugalingon sa pagsuta kon kamo nagapadayon ba sa inyong pagtuo” makatabang kanimo ug sa mga sakop sa imong klase nga mag-focus sa “putli nga pagkamahinalaron kang Kristo” (2 Mga Taga-Corinto 13:5; 11:3). Tingali mahimo ninyong basahon og dungan ang 2 Mga Taga-Corinto 11:3 ug hisgutan kon unsa kaha ang gipasabut sa mga pulong nga “putli nga pagkamahinalaron kang Kristo.” Mahimo usab nimong hangyuon ang mga sakop sa klase sa paghunahuna nga gidapit sila sa pagsulat og usa ka paghulagway sa ebanghelyo ni Jesukristo alang sa usa ka pamantalaan, nga dunay limit nga 100 ka pulong. Hatagi sila og panahon sa pagsulat sa ilang mga paghulagway, ug tuguti sila sa pagpaambit sa usag usa kon unsay ilang nasulat. Kon nagkinahanglan sila og tabang, mahimo silang mo-refer sa Juan 3:16–17; 3 Nephi 27:13–21; ug sa Matinud-anon sa Tinuhoan 28. Dapita ang mga sakop sa klase sa pagpamalandong kon nagpabilin ba silang matinud-anon sa sukaranang mga baruganan sa ebanghelyo.

• Aron matabangan ang mga sakop sa klase nga “masusi” kon unsaon nila sa pagpayano ang ilang kinabuhi aron mahimong mas maayong mga disipulo, mahimo nimong ipaambit kanila ang pamahayag ni Presidente Dieter F. Uchtdorf diha sa “Dugang nga mga Kapanguhaan.” Mahimong hisgutan sa mga sakop sa klase kon unsaon nila paggamit ang pagdapit ni Presidente Uchtdorf sa “pag-focus sa sukaranang mga doktrina, mga baruganan, ug sa paggamit sa ebanghelyo.” Unsa ang laing mga ideya nga aduna ang mga sakop sa klase kon unsaon nato pagsusi ang atong kaugalingon sa pagsiguro nga nagpabilin kitang matinud-anon sa tinuohan?

2 Mga Taga-Corinto 12:5–10

Ang grasya sa Manluluwas igo nga makatabang kanato nga makakita og kalig-on diha sa atong mga kahuyang.

• Unsa may inyong isulti ngadto sa usa ka higala kinsa nag-ampo alang sa kahupayan gikan sa pisikal nga kahuyang apan mibati nga kining pag-ampo wala matubag? Ikonsiderar ang pagdapit sa mga sakop sa klase sa pagpamalandong niining pangutana samtang hilum silang magbasa sa 2 Mga Taga-Corinto 12:5–10. Dayon mahimo nilang ipaambit ang mga ideya gikan niining mga bersikulo nga mahimong makatabang niini nga sitwasyon. Mahimo usab silang mopaambit og mga kasinatian sa dihang, pinaagi sa grasya ni Jesukristo, ilang nakita ang kalig-on diha sa kahuyang. Sa unsang paagi nga kana nga kasinatian nakaimpluwensya sa ilang kinabuhi?

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa imong klase nga magbasa sa Mga Taga-Galacia, mahimo nimo silang pangutan-on kon aduna ba silay nailhan nga usa ka tawo nga mipahilayo sa ebanghelyo. Kon mao, ganahan nilang basahon kon giunsa pagdapit ni Pablo ang mga taga-Galacia nga mipahilayo sa ebanghelyo nga mobalik.

mga kapanguhaan nga icon

Dugang nga mga Kapanguhaan

2 Mga Taga-Corinto 8–13

Ang pamaagi sa Ginoo sa pagsangkap alang sa mga kabus ug timawa.

• Mosiah 4:16–27; Alma 34:27–29; Doktrina ug mga Pakigsaad 104:14–18.

• Handbook 2: Administering the Church (2010), 6.1.

• “Mga Ikapulo ug Mga Halad,” Alang sa Kalig-on sa mga Kabatan-onan (2011), 38–39.

• Mga himno: “Because I Have Been Given Much [Kay Gihatagan Ko'g Daghan],” “Lord, I Would Follow Thee [Ginoo Sundon Ko Ikaw],” “Have I Done Any Good? [Nakabuhat Ba Ako og Maayo Karon?]” (Hymns, mga nu. 219, 220, 223).

Atong mapayano ang atong pamaagi sa pagsunod sa ebanghelyo.

Si Presidente Dieter F. Uchtdorf nagtudlo:

“Mga kaigsoonan, ang pagsunod sa ebanghelyo dili kinahanglang komplikado.

“Yano ra kaayo kini. Kini mahulagway nga sama niini:

• “Ang pagpaminaw sa pulong sa Dios uban sa kinasingkasing nga tinguha mogiya kanato sa pagtuo sa Dios ug mosalig sa Iyang mga saad.

• “Kon mas mosalig kita sa Dios, mas mapuno sa gugma ang atong mga kasingkasing alang Kaniya ug sa usag usa.

• “Tungod sa atong gugma sa Dios, kita magtinguha sa pagsunod Kaniya ug molihok nga pinasubay sa Iyang pulong.

• “Tungod kay kita nahigugma sa Dios, gusto natong moserbisyo Kaniya; gusto natong mopanalangin sa kinabuhi sa uban ug motabang sa kabus ug timawa.

• “Kon mas maglakaw kita niining dalan sa pagkadisipulo, mas gusto natong makat-on sa pulong sa Dios.

“Ug kini magpadayon, matag lakang padulong sa sunod ug mopuno kanato sa nagtubo nga pagtuo, paglaum ug gugmang putli.

“Matahum ang kasayon niini, ug makabenepisyo gayud kini.

“Mga kaigsoonan, kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Pag-focus sa sukaranang mga doktrina, mga baruganan, ug sa paggamit sa ebanghelyo. Mosaad ko nga ang Dios mogiya ug mopanalangin kaninyo sa inyong dalan padulong sa makatagbaw nga kinabuhi, ug ang ebanghelyo siguradong mas makahatag og benepisyo kaninyo” (“Nakabenepisyo Kaayo Kini” Liahona, Nob. 2015, 22).

Pagpalambo sa Atong Pagtudlo

Pakigtambayayong uban sa mga sakop sa pamilya. “Ang mga tawo nga adunay labing gamhanan nga impluwensya sa usa ka indibidwal—alang sa maayo o dautan—sa kasagaran mao kadtong anaa sa iyang panimalay. Tungod kay ang panimalay mao ang sentro sa pagpuyo ug pagkat-on sa ebanghelyo, ang imong mga paningkamot sa paglig-on sa usa ka sakop sa klase mahimong labing epektibo kon makigtambayayong ka sa … mga sakop sa pamilya” (Pagtudlo sumala sa Pamaagi sa Manluluwas, 8).