“Septyembre 9–15. 2 Mga Taga-Corinto 1–7: ‘Magpasig-uli Kamo ngadto sa Dios’” Dali, Sunod Kanako—Alang sa Sunday School: Bag-ong Tugon 2019 (2019)
“Septyembre 9–15. 2 Mga Taga-Corinto 1–7,” Dali, Sunod Kanako—Alang sa Sunday School: 2019
Septyembre 9–15
2 Mga Taga-Corinto 1–7
“Magpasig-uli Kamo ngadto sa Dios”
Samtang magbasa ka sa 2 Mga Taga-Corinto 1–7 karong semanaha, hunahunaa ang piho nga mga sakop sa klase—kadtong motungha sa klase ug kadtong wala. Sa unsang paagi nga ang mga baruganan niining mga kapitulo makapanalangin kanila?
Irekord ang Imong mga Impresyon
Dapita ang Pagpaambit
Hatagi og panahon ang mga sakop sa klase nga mopaambit og mga ideya nga nakapahimo sa ilang pagtuon sa kasulatan nga mas epektibo.
Itudlo ang Doktrina
2 Mga Taga-Corinto 1:3–7; 4:6–10, 17–18; 7:4–7
Ang atong mga pagsulay mahimong usa ka panalangin.
-
Tingali adunay usa ka tawo sa imong klase nga nakasinati og lisud nga pagsulay. Ang mga kasinatian nga gihulagway ni Pablo ug ang tambag nga iyang gihatag diha sa 2 Mga Taga-Corinto makatabang sa mga sakop sa klase nga maghunahuna sa mga panalangin nga mahimong moabut isip resulta sa ilang mga pagsulay. Sa pagsugod og panaghisgutan, mahimo nimong hangyuon ang usa ka sakop sa klase nga motungha nga andam nga maghisgot kon sa unsang paagi nga ang usa ka pasgulay nakapanalangin sa iyang kinabuhi o unsay iyang nakat-unan gikan sa usa ka tawo nga nakalahutay og usa ka pagsulay. Dayon mahimo nimong hatagan og pipila ka minuto ang mga sakop sa klase sa pagribyu sa 2 Mga Taga-Corinto 1:3–7; 4:6–10, 17–18; ug 7:4–7, mangita kon unsay gitudlo ni Pablo mahitungod sa mga katuyoan ug mga panalangin nga may kalabutan sa mga pagsulay. (Alang sa mga ehemplo sa iyang mga pagtulun-an, tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya.) Hangyoa ang mga sakop sa klase sa pagpaambit kon unsay ilang nakit-an. Mahimo nimong isugyot nga ilang basahon og kusog ang bersikulo diin ilang nakit-an ang usa ka partikular nga pagtulun-an ug dayon mopambit og kasinatian o pagpamatuod nga may kalabutan niana nga pagtulun-an.
-
Ikonsiderar ang paghatag og panahon sa mga sakop sa klase sa pagpamalandong kon sa unsang paagi nga ang pagsulay makapanalangin sa atong kinabuhi, lakip na sa pagribyu sa mga pagtulun-an ni Pablo nga makita diha sa 2 Mga Taga-Corinto 1:3–7; 4:6–10, 17–18; ug 7:4–7. Atol niining panahona mahimo nilang isulat ang mga pagtulun-an ni Pablo nga mahimong magamit ngadto sa kalisdanan nga ilang masinati sa ilang kaugalingong kinabuhi.
-
Sa pagdugang sa inyong panaghisgutan, ikonsiderar ang pagkanta og dungan sa paboritong mga himno sa mga sakop sa klase nga nagpamatuod sa kahupayan ug mga panalangin nga gitanyag sa Langitnong Amahan ug sa Manluluwas ngari kanato panahon sa pagsulay—sama sa “Unsa Kalig-on ang Tukuranan” (Mga Himno ug mga Awit sa mga Bata, nu. 6). Human sa dungan nga pagpanganta, mahimo nimong dapiton ang mga sakop sa klase sa pagpangita og mga pulong diha sa 2 Mga Taga-Corinto 1 ug 4 nga ilang gibati nga mohaum sa mensahe sa himno.
Makadawat kita og mga panalangin ug makapanalangin sa uban kon kita mopasaylo.
-
Kitang tanan adunay mga kasinatian sa dihang ang usa ka tawo “nakapahimog kasakit” ngari kanato o sa atong pamilya (bersikulo 5). Tingali ang mga sakop sa klase mahimong mosiksik sa 2 Mga Taga-Corinto 2:5–11, nga mangita sa tambag gikan ni Pablo kon unsaon pagtratar sa usa ka tawo nga nakapasilo kanato. Ikonsiderar ang pagdapit sa mga sakop sa klase sa pagribyu sa Lucas 15:11–32; Juan 8:1–11; ug sa kinutlo ni Elder Kevin R. Duncan (tan-awa sa “Dugang nga mga Kapanguhaan”) aron mahibalo og dugang kon unsaon nato pagtratar kadtong kinsa nakasala. Sa unsang paagi nga mapasakitan nato ang atong kaugalingon ug ang uban kon dili kita andam nga mopasaylo?
Pinaagi sa Pag-ula ni Jesukristo, mahimo kitang magpasig-uli ngadto sa Dios.
-
Daghang tawo ang moadto sa simbahan nga adunay tinguha nga mobati nga mas mahiduol sa Dios, ug ang panaghisgot bahin sa 2 Mga Taga-Corinto 5:14–21 makatabang kanila. Sa pagsugod, ang mga sakop sa klase mahimong mosiksik sa kahulugan sa pulong nga magpasig-uli [reconcile], tingali magsugod pinaagi sa pagtan-aw sa pulong diha sa diksyonaryo. Unsa ang mga ideya nga nahatag niini mahitungod sa pagpasig-uli ngadto sa Dios? Unsa ang dugang nga mga ideya nga atong maangkon gikan sa nabutang nga “Pag-ula, Pag-ula sa Dugo” diha sa Giya ngadto sa mga Kasulatan? Sa unsang paagi nga kining mga ideya makatabang kanato nga makasabut sa 2 Mga Taga-Corinto 5:14–21? Mahimo nimong dapiton ang mga sakop sa klase nga ipaambit ang ilang mga gibati mahitungod sa Manluluwas, kansang Pag-ula makapahimo niining posible nga mahiusa kita pag-usab ngadto sa Dios.
Ang diosnong kasubo moresulta ngadto sa paghinulsol.
-
Ang 2 Mga Taga-Corinto 7:8–11 naghatag og makatabang nga pagpasabut bahin sa diosnong kasubo ug sa tahas niini diha sa paghinulsol. Unsa may atong makat-unan bahin sa diosnong kasubo gikan sa 2 Mga Taga-Corinto 7:8–11 ug sa mga pulong ni Presidente Dieter F. Uchtdorf diha sa “Dugang nga mga Kapanguhaan”? Nganong ang diosnong kasubo gikinahanglan man sa paghinulsol?
-
Mahimong maaghat ka sa pag-awhag og mas dako nga panaghisgutan mahitungod sa paghinulsol. Kon mao, mahimo nimong sulayan ang susama niini: Isulat diha sa pisara Ang paghinulsol mao ang . Hangyoa ang mga sakop sa klase sa pagpangita og mga paagi sa pagkompleto niining mga pulong, gamit ang ilang nakat-unan gikan sa 2 Mga Taga-Corinto 7:8–11, ingon man usab ang gikan sa mga kasulatan ug ubang mga kapanguhaan nga makita diha sa “Dugang nga mga Kapanguhaan.” Unsaon kaha nila paggamit niining mga pagtulun-an aron tabangan ang usa ka tawo nga makasabut kon unsaon sa paghinulsol nga kinasingkasing?
Awhaga ang Pagkat-on diha sa Panimalay
Pangutan-a ang mga sakop sa klase kon nakasulay na ba sila sa pag-ampo nga tangtangon ang usa ka pagsulay o kalisdanan. Diha sa 2 Mga Taga-Corinto 8–13, ilang mahibaloan kon unsay reaksyon ni Pablo sa dihang nag-ampo siya niini apan ang iyang pag-ampo wala tubaga sa paagi nga iyang gilauman.
Dugang nga mga Kapanguhaan
Ang pagtan-aw sa uban sama sa pagtan-aw sa Dios kanila makatabang kanato nga makapasaylo.
Si Elder Kevin R. Duncan nagtudlo: “Usa ka yawe sa pagpasaylo sa uban mao ang pagsulay sa pagtan-aw kanila sama sa pagtan-aw sa Dios kanila. Usahay, ang Dios motugot natong makakita o makasabut ug mopanalangin kanato sa gasa sa pagtan-aw ngadto sa kasingkasing, kalag, ug espiritu sa laing tawo nga nakapasakit kanato. Kini nga panabut tingali gani mosangput sa usa ka dakong gugma alang niana nga tawo” (“Ang Makaalim nga Haplas sa Pagpasaylo,” Liahona, Mayo 2016, 34).
Ang diosnong kasubo modasig og kausaban ug paglaum.
Si Presidente Dieter F. Uchtdorf mipasabut:
“Ang diosnong kasubo modasig og kausaban ug paglaum pinaagi sa Pag-ula ni Jesukristo. Ang kasubo nga kalibutanon mobira kanato, mowagtang sa paglaum, ug moagni kanato sa pagtugyan ngadto sa tintasyon.
“Ang diosnong kasubo mosangpot sa pagkakabig ug kausaban sa kasingkasing. Tungod niini masilag kita sa sala ug mahigugma sa kamaayo. Kini modasig kanato sa pagbarug ug paglakaw diha sa kahayag sa gugma ni Kristo. Ang tinuod nga paghinulsol nagpasabut nga pag-usab, dili pagpanakit o pagpaantus” (“Makahimo Kamo Niini Karon!” Liahona, Nob. 2013, 56).
Unsa ang paghinulsol?
-
Giya ngadto sa mga Kasulatan, “Paghinulsol”
-
Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24
Si Elder Neil L. Andersen nagtudlo:
“Kon kita makasala, kita mopalayo gikan sa Dios. Kon kita maghinulsol, kita mobalik ngadto sa Dios.
“Ang pagdapit sa paghinulsol dili kanunay nga usa ka tingog sa pagkastigo apan hinoon usa ka mahigugmaon nga hangyo sa pagbalik ug sa “pagduol og usab” ngadto sa Dios [tan-awa sa Helaman 7:17]. Kini mao ang tawag sa usa ka mahigugmaon nga Amahan ug sa Iyang Bugtong Anak nga kita mahimong mas maayo pa kay sa karon, nga mokab-ut sa mas taas nga matang sa kinabuhi, nga mag-usab, ug nga mobati og kalipay sa pagsunod sa mga sugo. Isip mga disipulo ni Kristo, kita nagmaya sa panalangin sa paghinulsol ug sa hingpit nga kalipay nga mapasaylo. Kini mahimong kabahin kanato, nag-umol sa mga paagi sa atong paghunahuna ug pagbati. …
“Alang sa kadaghanan, ang paghinulsol mas labaw pa sa usa ka pagbiyahe kay sa usa lamang ka panghitabo. Kini dili sayon. Ang pag-usab lisud. Kini nagkinahanglan nga magdagan diha sa makusog nga hangin, maglangoy nga mosungasong sa sulog sa suba. Si Jesus miingon, ‘Kon adunay buot mosunod kanako, kinahanglan magdumili sa iyang kaugalingon, ug magpas-an sa iyang krus, ug magsunod kanako’ [Mateo 16:24]. Ang paghinulsol mao ang pagpalayo gikan sa pipila ka mga butang, sama sa pagkadili matinuoron, garbo, kasuko, ug dautang mga hunahuna, ug mopaingon ngadto sa uban nga mga butang, sama sa pagkamaayo, pagkadili hakog, pagpailub, ug pagka-espirituhanon. Kini ang ‘pagduol og usab’ ngadto sa Dios” (“Paghinulsol … Aron Ako Moayo Kaninyo,” Liahona, Nob. 2009, 40–41).
Pagpalambo sa Atong Pagtudlo
Apila kadtong nanglimbasug. Usahay ang nanglimbasug nga mga sakop sa klase nagkinahanglan lamang nga maapil aron mobati nga gihigugma. Ikonsiderar ang paghatag kanila og assignment nga moapil sa umaabut nga leksyon. Ayaw paghunong kon primero sila walay buhaton sa imong mga paningkamot. (Tan-awa sa Pagtudlo sumala sa Pamaagi sa Manluluwas, 8–9.)