Septyembre 2–8

1 Mga Taga-Corinto 14–16

“Ang Dios Dili Tigpasiugda sa Kalibug, apan sa Kalinaw”

Sa dili pa magribyu niining outline, basaha ang 1 Mga Taga-Corinto 14–16. Irekord ang imong inisyal nga mga impresyon kon unsa nga mga kamatuoran ang makatabang sa mga sakop sa imong klase, ug padayong magtinguha og dugang nga giya gikan sa Espiritu atol sa semana.

Irekord ang Imong mga Impresyon

Dapita ang Pagpaambit

Hatagi og pipila ka minuto ang mga sakop sa klase aron makaribyu sa 1 Mga Taga-Corinto 14–16 ug sa pagpangita og bersikulo nga ilang gibati nga makahuluganon gayud. Dapita sila sa pagpangita og usa ka tawo diha sa klase kang kinsa ilang mapaambit ang ilang bersikulo ug ipasabut kon nganong kini ang ilang gipili.

Itudlo ang Doktrina

1 Mga Taga-Corinto 14

Kon ang mga Santos magkapundok, kinahanglan silang magtinguha sa paglig-on sa usag usa.

• Ikonsiderar ang paggamit sa mga pagtulun-an ni Pablo diha sa 1 Mga Taga-Corinto 14 sa pagpahinumdom sa mga sakop sa klase nga kitang tanan makahimo sa paglig-on—o pagsuporta ug pagdasig—sa usag usa diha sa simbahan. Usa ka yano nga paagi sa pagribyu niining kapitulo mahimong ang pagsulat og pangutana diha sa pisara, sama sa Unsa ang kinahanglan natong tumong kon magkapundok kita? Dapita ang mga sakop sa klase sa pagsiksik sa posible nga mga tubag diha sa 1 Mga Taga-Corinto 14. Ang ubang mga ideya mahimong makita diha sa Moroni 6:4–5 ug Doktrina ug mga Pakigsaad 50:17–23. Samtang mopaambit ang mga sakop sa klase sa unsay ilang makita, ikonsiderar ang pagpangutana kanila kon unsay ilang gibati sa gibuhat sa imong klase sa pagtuman niining mga tumong. Mahimo usab silang mopaambit og mga kasinatian diin ilang gibati nga nalig-on sila pinaagi sa butang nga gipaambit sa usa ka sakop sa klase.

• Aron matabangan ang mga sakop sa klase nga makasabut sa tambag ni Pablo nga ang mga miyembro kinahanglang magtinguha sa pagpanagna, ikonsiderar ang paghangyo kanila sa pagsugyot og mga kahulugan alang sa pulong nga pagpanagna. Ikaw o ang mga sakop sa klase mahimong mosulat sa matag kahulugan diha sa pisara ug dungan nga moribyu sa kahulugan sa pagpanagna diha sa Giya ngadto sa mga Kasulatan ug sa tambag ni Pablo diha sa 1 Mga Taga-Corinto 14:3, 31, 39–40. Unsa ang atong madugang sa atong mga kahulugan gikan niining mga kapanguhaan? (Tan-awa usab sa Pinadayag 19:10.) Unsa ang gidasig nga atong buhaton diha sa simbahan ug sa panimalay isip resulta sa mga pagtulun-an ni Pablo?

1 Mga Taga-Corinto 15

Tungod kay si Jesukristo nabanhaw, kitang tanan mabanhaw.

• Unsaon nimo paggamit sa pagpamatuod ni Pablo diha sa 1 Mga Taga-Corinto 15 sa pagpalig-on sa mga pagpamatuod sa mga sakop sa imong klase bahin sa Pagkabanhaw? Usa ka paagi mao ang pagbahin sa klase ngadto sa duha ka grupo ug hangyoa ang usa ka grupo sa pagpangita diha sa 1 Mga Taga-Corinto 15 sa mga sangputanan nga atong atubangon kon wala pa mabanhaw si Jesukristo. Ang laing grupo mahimong mangita sa mga panalangin nga atong madawat tungod sa Iyang Pagkabanhaw. Ang matag grupo mahimong mosulat dayon diha sa pisara kon unsa ang ilang nakat-unan. Unsay ilang madugang sa ilang mga lista human mabasa ang pamahayag ni Elder D. Todd Christofferson diha sa “Dugang nga mga Kapanguhaan”? Aron matabangan ang mga sakop sa klase nga mobati sa Espiritu atol niining panaghisgutan, ikonsiderar ang pag-display og hulagway sa nabanhaw nga Manluluwas (tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya).

• Tungod kay si Pablo mitubag sa mga tawo nga wala motuo sa pagkabanhaw, ang imong klase mahimong makabenepisyo sa pag-role-play sa susama nga sitwasyon. Pananglitan, unsaon kaha nila sa pagpalig-on ang pagtuo sa usa ka minahal bahin sa Pagkabanhaw? Unsay makita sa mga sakop sa klase diha sa 1 Mga Taga-Corinto 15 nga makatabang kanila sa pagpasabut sa panginahanglan ug sa ebidensya sa Pagkabanhaw ni Jesukristo? Unsa ang laing mga kasulatan nga ilang magamit? (Tan-awa, pananglit, sa Lucas 24:1–12, 36–46; Alma 11:42–45.)

• Gipasabut ni Pablo ang tulo ka ang-ang sa himaya sa mga nabanhaw pipila ka higayon diha sa iyang mga sulat (tan-awa sa 1 Mga Taga-Corinto 15:40–42 ug 2 Mga Taga-Corinto 12:1–2). Aron matabangan ang imong klase nga madiskubrihan kon giunsa pagpasabut og dugang sa modernong pagpadayag ang mga pagtulun-an ni Pablo, mahimo nimong bahinon ang klase ngadto sa tulo ka grupo ug hatagi ang matag grupo og piraso nga papel nga giporma og pareha sa adlaw (DP 76:50–70), sa bulan (DP 76:71–80), o sa bitoon (DP 76:81–89). Dapita sila sa pagbasa sa may kalabutan nga mga kasulatan gikan sa Doktrina ug mga Pakigsaad 76 ug ipaambit ang unsay kinahanglan natong buhaton aron madawat ang lain-laing mga himaya nga gihulagway ni Pablo. Tan-awa usab sa Doktrina ug mga Pakigsaad 131:1–4; 137:7–10.

  

  “Lain ang kasanag sa adlaw” (1 Mga Taga-Corinto 15:41).

• Ang 1 Mga Taga-Corinto 15 usa sa pipila ka dapit diha sa mga kasulatan diin ang mga bunyag alang sa mga patay nahisgutan (tan-awa sa bersikulo 29; tan-awa usab sa DP 128:18). Tingali ang mga sakop sa klase mahimong mopaambit sa ilang mga kasinatian sa pagpahigayon og mga bunyag o ubang mga ordinansa alang sa ilang mga katigulangan. Ikonsiderar ang pagpaambit sa kasinatian ni Wilford Woodruff diha sa “Dugang nga mga Kapanguhaan” isip kabahin sa panaghisgutan. Ngano kaha nga nagpasabut man si Pablo sa mga bunyag alang sa mga patay isip ebidensya sa Pagkabanhaw?

Awhaga ang Pagkat-on diha sa Panimalay

Hangyoa ang mga sakop sa klase sa paghunahuna mahitungod sa mga pagsulay nga ilang nasinati o sa ilang mga kahuyang. Sultihi sila nga samtang magbasa sila sa 2 Mga Taga-Corinto, makakat-on sila kon unsay nakatabang ni Pablo nga makalahutay sa mga pagsulay ug giunsa niya pagtan-aw ang iyang mga kahuyang.

Dugang nga mga Kapanguhaan

1 Mga Taga-Corinto 14–16

Kamahinungdanon sa Pagkabanhaw.

Si Elder D. Todd Christofferson nagtudlo:

“Hunahunaa sa makadiyot ang kamahinungdanon sa Pagkabanhaw sa pagsulbad gayud sa tinuod nga pagkatawo ni Jesus sa Nazaret ug sa dagkong pilosopikanhong panagbangi ug mga pangutana sa kinabuhi. Kon si Jesus tinuod gayud nga nabanhaw, mosunod dayon niini nga Siya usa ka balaanong binuhat. Walay mortal nga tawo nga dunay gahum sa iyang kaugalingon nga mabuhi og balik human mamatay. Tungod kay Siya nabanhaw, si Jesus dili mahimong usa lang ka panday, magtutudlo, rabbi, o propeta. Tungod kay Siya nabanhaw, si Jesus usa gayud ka Dios, gani ang Bugtong Anak sa Amahan.

“Busa, unsay Iyang gitudlo tinuod; ang Dios dili magbakak.

“Busa, Siya ang Tiglalang sa yuta, sama sa Iyang gisulti.

“Busa, ang langit ug ang impyerno tinuod, sama sa Iyang gitudlo.

“Busa, dunay usa ka kalibutan sa mga espiritu, nga Iyang gibisita human sa Iyang kamatayon.

“Busa, moanhi Siya pag-usab, sama sa giingon sa mga anghel, ug ‘mohari dinhi sa yuta.’

“Busa, dunay pagkabanhaw ug katapusang paghukom alang sa tanan” (“Ang Pagkabanhaw ni Jesukristo,” Liahona, Mayo 2014, 113).

Mga ordinansa alang sa mga patay: “Haligi sa kahayag gikan sa trono sa Dios.”

Si Elder Wilford Woodruff miingon nga sa dihang iyang nahibaloan nga ang buhi nga mga miyembro sa Simbahan mahimong makadawat og makaluwas nga mga ordinansa alang sa ilang mga katigulangan nga namatay na, “Daw kadto sama sa haligi sa kahayag gikan sa trono sa Dios ngadto sa atong mga kasingkasing. Nag-abli kini og lapad nga hawan nga daw mahangturon sa among mga hunahuna.” Mikomentaryo usab siya: “Kini nagpakita kanako nga ang Dios kinsa mipadayag niana nga baruganan ngadto sa tawo maalamon, makiangayon ug tinuod, adunay pinakamaayo nga mga hiyas ug maayong panabut ug kahibalo. Gibati nako nga makanunayon siya sa gugma, kalooy, hustisya ug paghukom, ug gibati nako nga nahigugma ko sa Ginoo og labaw pa kay sa sukad sa wala pa ang akong kinabuhi. … Gibati nako sa pag-ingon og hallelujah sa dihang ang pagpadayag miabut nga nagpahayag ngari kanato sa bunyag alang sa mga patay. …”

“Ang unang butang nga miabut sa akong hunahuna,” miingon siya, “mao nga aduna koy inahan sa kalibutan sa espiritu. Namatay siya mga 14 pa ko ka bulan. …” Wala madugay misulti siya sa panahon nga sa katapusan aduna na siyay oportunidad sa pagpa-seal sa iyang mama ngadto sa iyang papa: “Aduna na siyay bahin sa unang pagkabanhaw; ug kini lang gani mobayad na nako sa tanang paghago sa akong kinabuhi” (Mga Pagtulun-an sa mga Presidente sa Simbahan: Wilford Woodruff, [2011], 205–206).

Pagpalambo sa Atong Pagtudlo

Tinguhaa ang pagsabut sa imong mga gitudloan. Walay duha ka tawo nga susama gayud; ang matag tawo nga imong gitudloan adunay talagsaong background, panglantaw, ug mga talento. Pag-ampo nga makahibalo kon unsaon nimo paggamit niini aron mapaapil ang imong mga tigkat-on. Kon mas masabtan nimo kadtong imong gitudloan, makamugna ka og makahuluganon ug halandumon nga mga gutlo sa pagtudlo alang kanila (tan-awa sa Pagtudlo sumala sa Pamaagi sa Manluluwas, 7).