Si Kristo nagpakita kang Pablo diha sa bilanggoan

Septyembre 23–29

Mga Taga-Galacia

“Panaggawi Kamo diha sa Espiritu”

Samtang mainampuon kang magbasa ug mamalandong sa Mga Taga-Galacia, ang Ginoo motudlo nimo kon unsay kinahanglan nimong ipaambit sa imong klase. Ang pagrekord sa imong mga impresyon nagpakita og pasalamat ngadto sa Dios alang sa Iyang tabang (tan-awa sa Paul B. Pieper, “Huptan nga Sagrado,” Liahona, Mayo 2012, 109).

Irekord ang Imong mga Impresyon

pagpaambit nga icon

Dapita ang Pagpaambit

Ang pagtuon sa kasulatan kasagaran moresulta sa makahuluganong mga panaghisgutan sa ebanghelyo uban sa pamilya o mga higala. Nahitabo ba kini sa mga sakop sa imong klase karong semanaha? Dapita sila sa pagpaambit sa ilang mga kasinatian.

pagtudlo nga icon

Itudlo ang Doktrina

Mga Taga-Galacia 1:6–7; 3:1–5; 4:8–21; 5:1, 13–14

Ang ebanghelyo ni Jesukristo nagtanyag og kalingkawasan.

• Ang pagtuon sa bisan unsang basahon sa kasulatan mas sayon kon nasayud kita nganong gisulat kini. Alang niini nga rason, maayong sugdan ang inyong panaghisgutan mahitungod sa Mga Taga-Galacia pinaagi sa pangutana sama sa “Unsa kaha ang katuyoan ni Pablo sa pagsulat niini nga epistola?” o “Unsa nga problema ang gisulayan sa pagsulbad ni Pablo?” Dapita ang mga sakop sa klase sa pagpangita og mga clue diha sa Mga Taga-Galacia 1:6–7; 3:1–5; 4:8–21. Sa unsang paagi nga ang mensahe ni Pablo importante kanato karon?

• Ang ubang mga Santos nga taga-Galacia nagtuo nga kinahanglan nilang ipadayon ang pagsunod sa balaod ni Moises. Ngadto kang Pablo, sama kini sa pagpuyo nga adunay “yugo sa pagkaulipon” kon itandi sa kalingkawasan nga gitanyag sa balaod ni Kristo (Mga Taga-Galacia 5:1). Samtang dili nato kasagarang masagubang kining problemaha karon, masagubang natong tanan ang susama nga pagpili tali sa espiritwal nga pagkaulipon ug kalingkawasan pinaagi ni Jesukristo. Aron matabangan ang mga sakop sa imong klase nga masusi ang mga pagtulun-an ni Pablo mahitungod sa kagawasan ug pagkaulipon, mahimo nimo silang hangyuon sa paghingalan og mga kinaiya ug mga lihok nga mahimong moresulta sa espiritwal nga pagkaulipon (sama sa kultural nga mga gipangbuhat, dili maayo nga mga gawi, sayop nga mga gituohan, o pag-focus sa mga lihok sa gawas kay sa pagkakabig sa kahiladman). Sumala sa Mga Taga-Galacia 5:1, 13–14, unsaon man nato pagkakita sa kagawasan gikan sa espiritwal nga pagkaulipon? Giunsa pagkasinati sa mga sakop sa klase ang kalingkawasan nga gisaad sa ebanghelyo ni Kristo? Mahimo usab nimong dapiton ang mga sakop sa klase sa pagpaambit kon unsaon kaha nila pagtubag ang usa ka tawo kinsa mibati nga ang pagsunod sa ebanghelyo naglimitar sa personal nga kagawasan.

Mga Taga-Galacia 5:16–26

Kon kita “managgawi diha sa Espiritu,” makadawat kita sa “bunga sa Espiritu.”

• Daghang tawo ang nanglimbasug sa pag-ila sa impluwensya sa Espiritu. Ang Mga Taga-Galacia 5 makatabang sa mga sakop sa imong klase sa pag-ila sa bunga sa Espiritu. Siguro mahimo nimong sugdan sa paghangyo kanila sa pagsiksik sa Mga Taga-Galacia 5:22–25 aron makakita sa mga pulong nga gigamit ni Pablo sa paghulagway sa bunga sa Espiritu. Nganong ang bunga usa man ka maayong simbolo alang sa paagi nga ang Espiritu nag-impluwensya kanato? Tingali ang mga sakop sa klase mahimong mopaambit kon sa unsang paagi nga kining bunga nakita diha sa ilang kinabuhi o sa kinabuhi sa mga tawo nga ilang nailhan. Ang ubang mga kapanguhaan nga masusi naglakip sa Mateo 7:16–18; Juan 14:26–27; Moroni 7:13–17; Doktrina ug mga Pakigsaad 11:12–13; ug ang mga pamahayag ni Presidente Gordon B. Hinckley diha sa “Dugang nga mga Kapanguhaan.”

  mga mansanas diha sa kahoy

  Makadawat kita sa “bunga sa Espiritu” kon tinguhaon nato kini.

• Usahay makakat-on kita mahitungod sa usa ka baruganan pinaagi sa pagkat-on mahitungod sa katugbang niini. Pananglit, diha sa Mga Taga-Galacia 5:16–26, gitandi ni Pablo “ang mga buhat sa unod” ngadto sa “bunga sa Espiritu.” Aron matabangan ang mga sakop sa klase nga mamalandong kon sa unsa nga matang sila “managgawi diha sa Espiritu,” mahimo nimong isugyot nga basahon nila ang Mga Taga-Galacia 5:16–26 ug dayon maghimo og personal nga pagtimbang-timbang nga susama sa Kalihokan Kabahin sa Hiyas diha sa pahina 152 sa Isangyaw ang Akong Ebanghelyo. Pananglitan, alang sa matag item nga nalista diha sa mga bersikulo 19–23, mahimo silang mosulat og pangutana sama sa “Nasuya ba ko sa akong mga kaedad?” o “Mibati ba ko nga gihigugma matag adlaw?” Ang mga tubag sa mga sakop sa klase sa ilang mga self-assessment kinahanglang dili ipaambit, apan mahimo nimo silang dapiton sa pagpaambit og mga ideya o mga hunahuna aron matabangan ang usag usa nga “managgawi diha sa Espiritu.” Kon kamo walay panahon sa pagtiwas niining kalihokan diha sa klase, mahimo nimong isugyot nga ang mga sakop sa klase mokompleto niini sa ilang panimalay.

Mga Taga-Galacia 6:7–10

Kon kita magpugas “alang sa Espiritu,” moani kita og mga panalangin sa tukmang panahon.

• Ang pagtuon sa Mga Taga-Galacia 6:7–10 mahimong makatabang sa mga sakop sa klase nga makahunahuna og maayo mahitungod sa mga sangputanan sa ilang mga pagpili nga molungtad og dugay nga panahon. Aron matabangan sila, mahimo kang magdala og mga liso sa lain-laing matang, uban sa mga tanom, mga prutas, o mga utanon nga nanubo gikan sa matag usa niining mga liso (o mahimo kang magdala og mga litrato bahin niining mga butanga). Ang mga sakop sa klase mahimong magtambayayong sa pagpares sa matag liso ngadto sa butang nga namugna niini. Dayon mahimo silang magbasa sa mga bersikulo 7–10 ug maghisgot kon unsay gipasabut sa magpugas “alang [sa] unod” ug “alang sa Espiritu.” (Ang mensahe ni Elder Ulisses Soares diha sa “Dugang nga mga Kapanguhaan” mahimong makatabang.) Unsa ang atong maani kon magpugas kita alang sa unod? Unsa ang atong maani kon magpugas kita alang sa Espiritu? (tan-awa sa Mga Taga-Galacia 5:22–23). Ikonsiderar ang pagdapit sa mga sakop sa klase sa pagpamalandong sa espiritwal nga mga panalangin nga ilang gilauman nga madawat. Unsa nga “pagpugas” ang ilang mabuhat karon aron maandam nga makadawat niadtong mga panalangin? Mahimo gani nimo silang dapiton sa pagsulat sa ilang mga hunahuna ug ipaambit kini, kon mobati sila nga komportable.

• Ang ubang mga sakop sa klase mahimong mobati nga “managkataka sa pagbuhat og maayo” (Mga Taga-Galacia 6:9)—tingali tungod kay dili sila sigurado nga namunga ang ilang mga paningkamot. Ang panaghisgutan bahin sa Mga Taga-Galacia 6:7–10 mahimong makatabang. Sa pagpaila niining mga bersikulo, mahimo nimong dapiton ang usa ka tawo diha sa klase nga maghisgot sa daklit mahitungod sa usa ka higayon sa dihang nagkinahanglan siya og pailub sa dihang misulay sa pagpatubo og usa ka butang. Unsa may matudlo kanato sa kasinatian niining tawhana, kauban sa Mga Taga-Galacia 6:7–10, mahitungod sa atong mga paningkamot nga “managgawi diha sa Espiritu”? (Mga Taga-Galacia 5:25).

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa imong klase nga magbasa sa Epistola ngadto sa Mga Taga-Efeso, mahimo nimo silang sultihan nga niining epistola makakat-on sila kon unsaon nila aron “makabarug batok sa mga malipat-lipatong kaugdahan sa yawa” (Mga Taga-Efeso 6:11).

mga kapanguhaan nga icon

Dugang nga mga Kapanguhaan

Mga Taga-Galacia

Ang mga bunga sa pagsunod sa ebanghelyo.

Si Presidente Gordon B. Hinckley nagtudlo: “Unsaon nato pagkahibalo sa mga butang sa Espiritu? Unsaon nato pagkahibalo nga gikan kini sa Dios? Pinaagi sa mga resulta niini. Kon moresulta kini sa pagtubo ug paglambo, kon moresulta kini sa pagtuo ug pagpamatuod, kon moresulta kini sa mas maayong paagi sa pagbuhat sa mga butang, kon moresulta kini sa pagkadiosnon, nan iya kini sa Dios. Kon makapahuyang kini kanato, kon modala kini kanato sa kangitngit, kon makapalibog kini kanato ug makapabalaka kanato, kon moresulta kini sa kawalay pagtuo, nan iya kini sa yawa.”

Sa laing okasyon, si Presidente Hinckley miingon: “Mailhan ninyo ang mga pag-aghat sa Espiritu pinaagi sa mga bunga sa Espiritu—kanang molamdag, kanang molig-on, kanang positibo ug apirmatibo ug makapadasig ug modala kanato sa mas maayong panghunahuna ug mas maayong mga pulong ug mas maayong mga binuhatan iya sa Espiritu sa Dios. Kanang makapahuyang, nga modala kanato ngadto sa gidili nga mga dalan—iya kana sa kaaway. Sa akong hunahuna ingon lang kana ka yano, ingon lang kana ka simple” (Mga Pagtulun-an sa mga Presidente sa Simbahan: Gordon B. Hinckley [2016], 142).

Pagpugas alang sa Espiritu.

Si Elder Ulisses Soares mipasabut: “Ang pagpugas alang sa Espiritu nagpasabut nga tanan natong hunahuna, pulong, ug buhat kinahanglang mobayaw kanato sa balaanon nga kahimtang sa atong langitnong mga ginikanan. Bisan pa, ang mga kasulatan, nagpasabut sa unod isip pisikal o kalibutanong kinaiya sa kinaiyanhon nga tawo, nga nagtugot sa mga tawo nga maimpluwensyahan sa kahinam, tinguha, gana, ug lawasnong tinguha kay sa mag-agad sa inspirasyon sa Espiritu Santo. Kon dili kita magmatngon, kana nga mga impluwensya uban sa pag-aghat sa dautan niining kalibutan maghimo sa atong kinaiya nga bastos ug bagis nga mamahimong bahin sa atong kinaiya” (“Magpabilin diha sa Teritoryo sa Ginoo!” Liahona, Mayo 2012, 39).

Pagpalambo sa Atong Pagtudlo

Tabangi ang mga tigkat-on sa pagbayaw sa usag usa. “Ang matag indibidwal sa imong klase usa ka abunda nga tinubdan sa pagpamatuod, mga panabut, ug mga kasinatian sa pagsunod sa ebanghelyo. Dapita sila sa pagpaambit ug pagbayaw sa usag usa” (Pagtudlo sumala sa Pamaagi sa Manluluwas, 5).