« ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា ។ អេភេសូរ ៖ ‹ ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា ។ អេភេសូរ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០១៩
ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា
អេភេសូរ
« ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង »
គំនិត និងចំណាប់អារម្មណ៍ថាត្រូវបង្រៀនអ្វី ហើយបង្រៀនតាមរបៀបណានឹងកើតមាន នៅពេលអ្នកសិក្សាអេភេសូរ សុន្ទរកថាសន្និសីទថ្មីៗ គម្រោងមេរៀននេះ និង ចូរមកតាមខ្ញុំ—សម្រាប់បុគ្គល និងក្រុមគ្រួសារ ប្រកបដោយការអធិស្ឋាន ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមពិចារណាអញ្ជើញសិស្សឲ្យសរសេរសេចក្ដីសង្ខេបមួយប្រយោគអំពីអ្វីមួយដែលពួកគេបានរៀននៅក្នុងការសិក្សារបស់ពួកគេនៅសប្ដាហ៍នេះ រួចហើយដាក់សេចក្ដីសង្ខេបរបស់ពួកគេទៅលើក្ដារខៀន ។ សូមជ្រើសយកសេចក្ដីសង្ខេបមួយចំនួនដោយចៃដន្យ ហើយអញ្ជើញសិស្សដែលសរសេរវាឲ្យចែកចាយគំនិតរបស់ពួកគេ ។
បង្រៀនគោលលទ្ធិ
ពួកព្យាការី និងពួកសាវក—ព្រមទាំងយើងទាំងអស់គ្នាផងដែរ—ផ្ដល់កម្លាំង និងសាមគ្គីភាពដល់សាសនាចក្រ ។
-
តើអ្នក និងសិស្សរបស់អ្នកអាចស្ថាបនាអ្វីមួយរួមគ្នាដើម្បីឆ្លុះបញ្ចាំងអំពីរបៀបដែលសាសនាចក្រត្រូវបាន « ស្អាងឡើងលើជើងជញ្ជាំងនៃពួកសាវ័ក និងពួកហោរា » និងរបៀបដែលព្រះអង្គសង្គ្រោះគឺជា « ថ្មជ្រុងយ៉ាងឯក » បានដែរឬទេ ? ( អេភេសូរ ២:២០ ) ។ ប្រហែលជាសិស្សអាចបិទស្លាកលើដុំឈើ ឬពែងក្រដាស ហើយតម្រៀបវាជាប៉ម ឬរាងជាពីរ៉ាមីត ដោយមានព្រះយេស៊ូវគ្រីស្ទ ព្រមទាំងពួកសាវក និងពួកព្យាការីធ្វើជាគ្រឹះ ។ បន្ទាប់មកអ្នកអាចបង្ហាញអ្វីដែលអាចកើតឡើង ប្រសិនបើព្រះគ្រីស្ទ ឬពួកសាវក និងពួកព្យាការីត្រូវបានដកចេញ ។ ហេតុអ្វីថ្មជ្រុងយ៉ាងឯកនោះគឺជាពាក្យប្រៀបធៀបដ៏ល្អមួយសម្រាប់ព្រះយេស៊ូវគ្រីស្ទ និងតួនាទីរបស់ទ្រង់នៅក្នុងសាសនាចក្រ ? ( សម្រាប់ការពិពណ៌នាមួយអំពីថ្មជ្រុងយ៉ាងឯកមួយ សូមមើល « ធនធានបន្ថែមទាំងឡាយ » ) ។ សិស្សអាចស្រាវជ្រាវ អេភេសូរ ២:១៩–២២,៤:១១–១៦ សម្រាប់ពរជ័យដែលយើងទទួលបាន ដោយសារតែពួកសាវក ពួកព្យាការី និងថ្នាក់ដឹកនាំផ្សេងទៀតក្នុងសាសនាចក្រ ។ តើយើងអាចធ្វើអ្វីខ្លះដើម្បីស្ថាបនាជីវិតរបស់យើងនៅលើការបង្រៀនរបស់ពួកលោក ?
រូបភាពថ្មជ្រុងយ៉ាងឯកនៃព្រះវិហារបរិសុទ្ធព្រះយេស៊ូវគ្រីស្ទគឺជាថ្មជ្រុងយ៉ាងឯកនៃសាសនាចក្រ ។
-
ដើម្បីបង្ហាញអំពីរបៀបដែលគោលលទ្ធិអាចយល់ខុសដោយគ្មានការដឹកនាំជាបន្តបន្ទាប់មកពីពួកព្យាការី និងពួកសាវក អ្នកអាចលេងល្បែងមួយដោយអ្នកប្រាប់អំពីរឿងខ្លីមួយទៅកាន់សិស្សម្នាក់ ដោយមិនឲ្យសិស្សផ្សេងទៀតស្ដាប់ឮ ។ បន្ទាប់មក សូមអញ្ជើញសិស្សនោះឲ្យប្រាប់រឿងនោះដល់សិស្សម្នាក់ទៀត ហើយធ្វើដូច្នេះរហូតដល់រឿងនោះត្រូវបានប្រាប់ដល់សិស្សបីបួននាក់ ។ បន្ទាប់មក សូមឲ្យសិស្សចុងក្រោយគេដែលស្ដាប់ឮរឿងនោះប្រាប់ដល់សិស្សផ្សេងទៀតនូវអ្វីដែលគាត់បានស្ដាប់ឮ ។ តើព័ត៌មានលម្អិតណាមួយក្នុងរឿងនេះបានផ្លាស់ប្ដូរដែរឬទេ ? តើនឹងមានអ្វីកើតឡើង បើគ្រូបង្រៀនអាចកែតម្រូវកំហុសភ្លាមៗនោះ ? តើសកម្មភាពនេះបង្រៀនយើងអ្វីខ្លះអំពីហេតុផលដែលសាសនាចក្ររបស់ព្រះគ្រីស្ទត្រូវតែស្ថាបនានៅលើគ្រឹះនៃពួកសាវក និងពួកព្យាការី » ?
-
ប្រសិនបើសិស្សរបស់អ្នកបានស្ដាប់សន្និសីទទូទៅ ចាប់តាំងពីពេលចុងក្រោយដែលអ្នកបានជួបគ្នា សូមអញ្ជើញពួកគេឲ្យចែកចាយអំពីរបៀបដែលរឿងនានាត្រូវបានបង្រៀនអំឡុងសន្និសីទបានជួយបំពេញគោលបំណងដែលបានចែងនៅក្នុង អេភេសូរ ៤:១១–១៦ ។
-
ប្រហែលជាអ្នកអាចទុកពេលឲ្យសិស្សសរសេរ « ការងារ » ឬការទទួលខុសត្រូវមួយចំនួនដែលពួកគេត្រូវបានហៅឲ្យបំពេញនៅឯព្រះវិហារ ( សូមមើល អេភេសូរ ៤:១ )—ឧទាហរណ៍ ជាគ្រូបង្រៀនតាមផ្ទះ ឬគ្រូបង្រៀនសួរសុខទុក្ខម្នាក់ ឪពុក ឬម្ដាយ សិស្សម្នាក់របស់ព្រះគ្រីស្ទ ។ ល ។ បន្ទាប់មក ពួកគេអាចប្ដូរបញ្ជីជាមួយនឹងសិស្សម្នាក់ទៀត សូមអាន អេភេសូរ ៤:៤–៨, ១១–១៦ ហើយចែកចាយរបៀបដែលការហៅ និងការចាត់តាំងនៅលើបញ្ជីរបស់ពួកគេជួយស្អាងដល់សាសនាចក្ររបស់ព្រះគ្រីស្ទ ។ តើយើងអាចធ្វើការរួមគ្នាដើម្បីមានសាមគ្គីភាពនៅក្រោម « ព្រះអម្ចាស់តែមួយ សេចក្តីជំនឿតែមួយ បុណ្យជ្រមុជទឹកតែមួយ » តាមរបៀបណា ?
ការធ្វើតាមគំរូរបស់ព្រះអង្គសង្គ្រោះអាចពង្រឹងដល់ទំនាក់ទំនងគ្រួសារ ។
-
ទោះជាពួកសាសន៍អេភេសូរបានរស់នៅក្នុងវប្បធម៌មួយដែលភរិយាគ្មានសិទ្ធិស្មើនឹងស្វាមីក្ដី ក៏សំបុត្រនេះនៅតែមាននូវការប្រឹក្សាដ៏មានតម្លៃមួយចំនួនសម្រាប់ស្វាមីភរិយាដែលបានរៀបការនៅសព្វថ្ងៃនេះដែរ ។ អ្នកអាចសរសេរសំណួរដូចតទៅនេះនៅលើក្ដារខៀន ហើយអញ្ជើញសិស្សឲ្យពិភាក្សាវា នៅពេលពួកគេអាន អេភេសូរ ៥:២២–២៣ ជាក្រុម ៖ តើព្រះគ្រីស្ទបានបង្ហាញសេចក្ដីស្រឡាញ់របស់ទ្រង់ចំពោះសាសនាចក្រយ៉ាងដូចម្ដេច ? តើយើងអាចធ្វើអ្វីខ្លះដើម្បីធ្វើតាមគំរូរបស់ទ្រង់ក្នុងការដែលយើងប្រព្រឹត្តចំពោះភរិយា ឬស្វាមីរបស់យើង ? អ្នកអាចអញ្ជើញសិស្សឲ្យចែកចាយគំរូដែលពួកគេបានឃើញអំពីស្វាមី ឬភរិយាដែលបានប្រព្រឹត្តចំពោះគ្នាតាមរបៀបដូចជាព្រះគ្រីស្ទ ។ តើយើងអាចអនុវត្តគោលការណ៍ទាំងនេះចំពោះទំនាក់ទំនងគ្រួសារផ្សេងទៀតតាមរបៀបណា ?
-
កាលការប្រឹក្សារបស់ប៉ុលឲ្យ « ចូរគោរពប្រតិបត្តិដល់មាតាបិតាខ្លួន » ( អេភេសូរ ៦:២ ) ត្រូវបានលើកឡើងចំពោះកូនៗក្ដី វាក៏អាចអនុវត្តចំពោះយើងម្នាក់ៗផងដែរ មិនថាមានវ័យ ឬស្ថានភាពគ្រួសារយ៉ាងណានោះទេ ។ សូមអញ្ជើញសិស្សឲ្យគិតអំពីរបៀបដែលពួកគេអាចអនុវត្តការប្រឹក្សារបស់ប៉ុលនៅក្នុង អេភេសូរ ៦:១–៣ ចំពោះស្ថានភាពរបស់ពួកគេផ្ទាល់ ។ ឧទាហរណ៍ តើយើងអាចគោរពឪពុកម្ដាយរបស់យើងតាមរបៀបណា ទោះជាការជ្រើសរើសរបស់ពួកគាត់មិនស្របតាមការបង្រៀនរបស់ព្រះយេស៊ូវគ្រីស្ទក្ដី ? អ្នកអាចទុកពេលពីរបីនាទីឲ្យសិស្សសរសេរអ្វីដែលពួកគេអាចធ្វើដើម្បីមានការគោរពកាន់តែច្រើនចំពោះឪពុកម្ដាយរបស់ពួកគេ ។
-
ប្រសិនបើមានឪពុកម្ដាយ—ឬឪពុកម្ដាយនាពេលអនាគត—នៃកូនតូចៗនៅក្នុងថ្នាក់របស់អ្នក ពួកគេអាចនឹងទទួលបានប្រយោជន៍មកពីការពិភាក្សានេះ អេភេសូរ ៦:៤ ។ តើការបង្រៀនកូនចៅ « ទៅតាមដំបូន្មាន និងសេចក្តីដាស់តឿនរបស់ព្រះអម្ចាស់ » មានន័យដូចម្ដេច ? ប្រហែលជាសិស្សដែលមានកូនធំៗអាចចែកចាយអំពីការយល់ដឹងរបស់ពួកគេអំពីឃ្លានោះ និងរបៀបដែលពួកគេបានព្យាយាមអនុវត្តតាមការប្រឹក្សានេះនៅក្នុងក្រុមគ្រួសាររបស់ពួកគេ ។
គ្រឿងសឹកនៃព្រះនឹងជួយការពារយើងពីអំពើអាក្រក់ ។
-
តើអ្វីទៅដែលនឹងជួយបំផុសគំនិតសិស្សឲ្យខិតខំពាក់គ្រឿងសឹកទាំងមូលនៃព្រះរៀងរាល់ថ្ងៃ ? អ្នកអាចរៀបចំសកម្មភាពមួយដែលសិស្សផ្គូផ្គងផ្នែកមួយនៃគ្រឿងសឹកជាមួយនឹងគោលការណ៍ ឬគុណធម៌ដែលវាតំណាងឲ្យនៅក្នុង អេភេសូរ ៦:១៤–១៧ ។ តើផ្នែកនីមួយៗនៃគ្រឿងសឹកអាចជួយការពារយើងពីអំពើទុច្ចរិតតាមរបៀបណា ? ( សម្រាប់ជំនួយមួយចំនួន សូមមើល « ធនធានបន្ថែមទាំងឡាយ » ) ។ តើសិស្សធ្លាប់ពាក់គ្រឿងសឹកនេះដែរឬទេ ? ជាផ្នែកមួយនៃការពិភាក្សានេះ អ្នកអាចចែកចាយការពន្យល់របស់ប្រធាន អិន អេលឌិន ថែនណឺ នៅក្នុង « ធនធានបន្ថែមទាំងឡាយ » ។ តើយើងអាចធ្វើអ្វីខ្លះ ដើម្បីស្គាល់ ហើយពង្រឹងភាពទន់ខ្សោយនានានៅក្នុងគ្រឿងសឹករបស់យើង ?
លើកទឹកចិត្តឲ្យមានការរៀនសូត្រនៅឯគេហដ្ឋាន
ដើម្បីបំផុសគំនិតសិស្សឲ្យអានភីលីព និងកូល៉ុស អ្នកអាចប្រាប់ពួកគេថា នៅក្នុងមាត្រាមួយនៃមាត្រានៃសេចក្ដីជំនឿគឺបានផ្អែកទៅលើខគម្ពីរមួយដែលមាននៅក្នុងសំបុត្រមួយក្នុងចំណោមសំបុត្រទាំងនេះ ។ តើពួកគេអាចស្វែងរកវានៅក្នុងការសិក្សារបស់ពួកគេសប្ដាហ៍នេះបានដែរឬទេ ?
ធនធានបន្ថែមទាំងឡាយ
តើថ្មជ្រុងយ៉ាងឯកគឺជាអ្វី ?
ថ្មជ្រុងយ៉ាងឯកគឺជាថ្មដំបូងគេដែលបានដាក់នៅក្នុងគ្រឹះមួយ ។ វាដើរតួជាចំណុចយោងមួយសម្រាប់ការវាស់វែង និងការដាក់ថ្មផ្សេងទៀត ដែលត្រូវតែស្របជាមួយនឹងថ្មជ្រុងយ៉ាងឯកនោះ ។ ដោយសារវាទ្រនូវទម្ងន់អគារទាំងមូល ថ្មជ្រុងយ៉ាងឯកត្រូវតែរឹងមាំ មានលំនឹង ហើយអាចទុកចិត្តបាន( សូមមើល « The Cornerstone » Ensign ខែ មករា ឆ្នាំ ២០១៦ ទំព័រ ៧៤–៧៥ ) ។
គ្រឿងសឹកនៃព្រះ ។
-
ក្រវាត់ចង្កេះដោយសេចក្ដីពិត ៖ផ្នែកនេះនៃគ្រឿងសឹកប្រៀបបាននឹងខ្សែក្រវាត់មួយដែលបានចងព័ទ្ធជុំវិញចង្កេះដែរ ។ ពាក្យថា ក្រវាត់ ក៏អាចមានន័យថា រឹងមាំ មានកម្លាំង ឬពង្រឹងផងដែរ ។
-
ប្រដាប់បាំងទ្រូង ៖ប្រដាប់បាំងទ្រូងមួយការពារបេះដូង និងសរីរាង្គសំខាន់ផ្សេងទៀត ។
-
ពាក់ជាស្បែកជើង ៖ពាក្យនេះសំដៅទៅលើការគ្របការពារជើងរបស់កងទ័ពម្នាក់ ។
-
ខែល ៖ខែលមួយអាចការពារស្ទើរតែគ្រប់ផ្នែកនានានៃរូបកាយពីការវាយប្រហារផ្សេងៗ ។
-
មួកសឹក ៖មួកសឹកការពារក្បាល ។
-
ដាវ ៖ដាវមួយអនុញ្ញាតឲ្យយើងធ្វើសកម្មភាពប្រឆាំងនឹងសត្រូវ ។
« សូមត្រួតពិនិត្យគ្រឿងសឹករបស់បងប្អូន » ។
ប្រធាន អិន អេលឌិន ថែនណឺ ដែលបានបម្រើជាទីប្រឹក្សាមួយរូបក្នុងគណៈប្រធានទីមួយ បានអញ្ជើញសមាជិកសាសនាចក្រឲ្យវាយតម្លៃអំពីកម្លាំងនៃគ្រឿងសឹកផ្ទាល់ខ្លួនរបស់ពួកគេ ដោយពិចារណាអំពីការប្រឹងប្រែងរបស់ពួកគេដើម្បីរស់នៅតាមដំណឹងល្អ ។ បន្ទាប់មកលោកបានពន្យល់ថា
« ប្រសិនបើ … គ្រឿងសឹករបស់យើងទន់ខ្សោយ មាននូវកន្លែងមួយដែលមិនបានការពារ ជាតំបន់ដែលងាយរងគ្រោះដោយការវាយប្រហារ ហើយយើងនឹងរងរបួស ឬការបំផ្លិចបំផ្លាញពីសំណាក់សាតាំង ដែលនឹងស្វែងរករហូតវារកឃើញភាពទន់ខ្សោយរបស់យើង ប្រសិនបើយើងមានចំណុចខ្សោយ ។
« សូមត្រួតពិនិត្យគ្រឿងសឹករបស់បងប្អូន ។ តើមានកន្លែងណាមួយ ដែលខ្វះការការពារ ឬការគ្រប់គ្រងដែរឬទេ ? សូមតាំងចិត្តនៅពេលនេះ ដើម្បីបន្ថែមផ្នែកដែលខ្វះខាតទាំងឡាយនោះ ។ មិនថាគ្រឿងសឹករបស់បងប្អូនមានភាពហួសសម័យ ឬខ្វះខាតផ្នែកណាមួយនោះទេ សូមចងចាំជានិច្ចថា បងប្អូនត្រូវតែខិតខំធ្វើការកែតម្រូវដ៏ចាំបាច់ដើម្បីបំពេញគ្រឿងសឹករបស់បងប្អូន ។
« តាមរយៈគោលការណ៍ដ៏អស្ចារ្យនៃការប្រែចិត្តនេះអ្នកអាចកែប្រែជីវិតរបស់បងប្អូន ហើយចាប់ផ្ដើមបំពាក់ខ្លួនអ្នកនូវគ្រឿងសឹករបស់ព្រះក្នុងពេលនេះ តាមរយៈការសិក្សា ការអធិស្ឋាន និងការតាំងចិត្តដើម្បីបម្រើព្រះ ហើយគោរពតាមបទបញ្ញត្តិរបស់ទ្រង់ » ( « Put on the Whole Armor of God » Ensign ខែ ឧសភា ឆ្នាំ ១៩៧៩ ទំព័រ ៤៦ ) ។
ការកែលម្អការបង្រៀនរបស់យើង
ចូរខិតខំស្វែងរកសេចក្ដីស្រឡាញ់ដូចជាព្រះគ្រីស្ទ ។ ការប្រាស្រ័យទាក់ទងរបស់អ្នកជាមួយនឹងសិស្សរបស់អ្នកគួរមានការលើកទឹកចិត្តដោយសេចក្ដីស្រឡាញ់ ។ អ្នក និងសិស្សរបស់អ្នកនឹងមានពរ នៅពេលអ្នកអធិស្ឋានដើម្បី អភិវឌ្ឍសេចក្ដីស្រឡាញ់ដូចជាព្រះគ្រីស្ទ ហើយស្វែងរកវិធីដើម្បី បង្ហាញវា ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ៦, មរ៉ូណៃ ៧:៤៨ ) ។