“Oktubre 28–Nobiembre 3. 1 ken 2 Timoteo; Tito; Filemon: ‘Sika Koma ti Ulidan kadagiti Mamati’” Umaykayo, Sumurot Kaniak—Para iti Sunday School: New Testament 2019 (2019)
“Oktubre 28–Nobiembre 3. 1 ken 2 Timoteo; Tito; Filemon,” Umaykayo, Sumurot Kaniak—Para iti Sunday School: 2019
Oktubre 28–Nobiembre 3
1 ken 2 Timoteo; Tito; Filemon
“Sika Koma ti Ulidan kadagiti Mamati”
Basaen ti 1 ken 2 Timoteo; Tito; ken Filemon a pampanunotem dagiti miembro ti klasem. Dagiti kapanunotan ken impresion nga umay ket makatulongto a mangiturong kadagiti miembro ti klasem kadagiti napapateg a binatog iti nasantuan a kasuratan ken mangyeg iti Espiritu iti siled ti klasem.
Isuratmo Dagiti Impresionmo
Yawis ti Panagbibinninglay
Mabalin a makatulong kadagiti miembro ti klase a dumngeg iti tunggal sabali pay a mensahe maipapan kadagiti balligi ken karitda iti panagadal kadagiti nasantuan a kasuratan, agpada a kas indibidual ken kas pamilia. Ibilang ti panangirugi iti klase babaen ti panangawis kadagiti miembro ti klase a mangisarita no kumustan ti panagadalda iti nasantuan a kasuratan.
Isuro ti Doktrina
Ti panangawat kadagiti pudno a doktrina ket makatulongto kadatayo a mangliklik iti pannakaallilaw.
-
Agnanaed dagiti miembro ti klasem iti maysa a panawen idi maisursuro dagiti adu a palso a doktrina. Nagbiag da Timoteo ken Tito iti kasta a panawen, isu a nalabit a ti balakad ni Pablo kadakuada ket mangted pagimbagan dagiti miembro ti klasem. Sumagmamano a binatog a naglaon iti balakad ni Pablo ti masarakan iti “Dagiti Nainayon a Resources.” Mabalinmo a dutokan ti tunggal miembro ti klase a mangbasa iti maysa kadagitoy a binatog ket ibinglayna no ania ti masursurona maipapan iti kinapateg ti pudno a doktrina (kitaen met iti Alma 31:5).
No datayo “[dagiti] ulidan kadagiti mamati,” maiturongtayo dagiti dadduma iti Mangisalakan ken iti ebangheliona.
-
Posible a saan a maamiris dagiti miembro ti klase ti bileg ti nasayaat a pagwadan nga ipakpakitada. Ibilang ti panangawis kadakuada a mangisarita maipapan no kasano a nagbalin a pagwadan dagiti disipulo ni Cristo dagiti tao nga am-ammoda, agraman dagiti pada a miembro ti klase. Mabalin a makatulong iti panaglilinnawag no ilistam iti pisarra dagiti balikas iti bersikulo 12 a mangiladawan no kasano a nasken nga agbalintayo a pagwadan—balikas, pannakisasao (a mabalin a kaipapananna pay ti ugali wenno tignay), asi, espiritu, pammati, ken kinatarnaw. Mabalin nga ilawlawag dagiti miembro ti klase no kasano nga agbalintayo nga ulidan kadagiti mamati iti tunggal maysa kadagitoy a wagas.
“Saannatay nga inikkan ti Dios ti espiritu ti kinatakrot; no di ti kinatibker, ken ti ayat, ken ti naimbag a nakem.”
-
Iti balabala itoy a lawas iti Umaykayo Sumurot Kaniak—Para kadagiti Indibidual ken Pamilia, naawis dagiti miembro ti klasem a mangsapul iti 2 Timoteo iti balakad nga inted ni Pablo ken ni Timoteo a mangparegta kenkuana iti panagministrona. Idawatmo kadagiti miembro ti klase a mangibinglay kadagiti ania man a nauneg a pannakaammo ken pannakaawat a masarakanda, wenno mabalin nga ikkam ida iti sumagmamano a minuto tapno mangsapul ken mangibinglay iti sumagmamano a balakad ni Pablo (addaan ti kapitulo 1 iti sumagmamano a pagarigan). Mabalinmo pay nga isalaysay ti padas idi nakatulong kadakuada ti Dios a mangparmek iti butengda ken nangted kadakuada iti “espiritu ti … kinatibker, ken ti ayat, ken ti naimbag a nakem” (2 Timoteo 1:7).
Ti panagadal kadagiti nasantuan a kasuratan ket makatulong kadatayo a mangparmek kadagiti peggad dagiti maudi nga aldaw.
-
Kalpasan ti panangballaag ken ni Timoteo maipapan kadagiti “napeggad a panawen” nga umay, impaneknek ni Pablo maipapan iti bileg ken kinapateg dagiti nasantuan a kasuratan (kitaen iti 2 Timoteo 3:1, 14–17). Iti panangrugi ti panaglilinnawag maipapan iti kinapateg dagiti nasantuan a kasuratan kadagiti narigat a panawen, mabalinmo nga awisen dagiti miembro ti klase a mangrebyu iti panangiladawan ni Pablo iti baet ti panagrigat kadagiti maudi nga aldaw a masarakan iti 2 Timoteo 3:1–7. Kalpasanna mabalinda a sukisoken ken ibinglay dagiti nasantuan a kasuratan a nakatulong kadakuada a maibusor kadagiti peggad a kas kadagitoy (sumagmamano a pagarigan dagiti nakalista iti “Dagiti Nainayon a Resources). Kasano a nasalaknibannatayo ti panagadaltayo kadagiti nasantuan a kasuratan manipud kadagiti riribuk iti agdama a lubong?
-
Ti panagadal iti balakad ni Pablo maipapan ti bileg dagiti nasantuan a kasuratan ket mabalin a gundaway nga agpipinnaregta dagiti miembro ti klase iti tunggal maysa kadagiti panagkagumaanda nga agadal iti balikas ti Dios. Nalabit a mabalin a basaen dagiti miembro ti klase ti 2 Timoteo 3:14–17 ket ilasinda dagiti bendision ken proteksion a sumangbay manipud iti panagadal kadagiti nasantuan a kasuratan. Kalpasanna mabalinda nga ibinglay dagiti padas idi natungpal dagitoy a bendision iti biagda gapu iti panagadalda iti nasantuan a kasuratan. Mabalin met a mangtedka kadagiti miembro ti klase iti sumagmamano a kanito nga agutob maipanggep iti no ania ti maaramidda tapno maaddaanda kadagiti napatpateg a padas kadagiti nasantuan a kasuratan, agpada a kas indibidual ken kas pamilia.
Agpipinnakawan dagiti pasurot ni Cristo iti tunggal maysa.
-
Sakbay nga irugim ti panaglilinnawag maipapan iti Surat ken ni Filemon, mabalinmo a saludsoden iti maysa a miembro ti klase a mangibinglay iti sumagmamano nga impormasion maipapan ken ni Filemon ken ti katulonganna a ni Onesimo (adda ababa a panangiladawan iti daytbalabala itoy a lawas iti Umaykayo, Sumurot Kaniak—Para kadagiti Indibidual ken Pamilia). Kalpasanna mabalinmo a bingayen ti klase iti dua a grupo ket mangted iti tunggal grupo ti maysa kadagiti sumaganad a saludsod: Ania dagiti pagpapadaan a makitayo iti nagbaetan no ania idi ti naayat nga aramiden ni Pablo para ken ni Onesimo ken ania ti siaayat nga inaramid ti Mangisalakan para kadatayo? Idinto a kasla narigat para ken ni Filemon a pakawanen ti tagabona a naglibas, kasano nga inaramid ti ebanghelio ni Jesucristo a nalaklaka ti panagpakawan? Kalpasan nga imbinglay dagiti grupo no ania ti nasursuroda, ibilang ti panangawis kadagiti miembro ti klase a mangibinglay kadagiti binatog iti nasantuan a kasuratan wenno padas a nakatulong kadakuada a makaawat a nasaysayaat iti panagpakawan. Mabalin a makatulong ti mensahe ni Elder Kevin R. Duncan iti “Dagiti Nainayon a Resources” iti daytoy a panaglilinnawag.
Yallukoy ti Panagsursuro iti Pagtaengan
Tapno maparegta dagiti miembro ti klase a mangbasa iti Surat kadagiti Hebreo, saludsodem kadakuada no adda am-ammoda a maysa a tao a makarikna a ti Dios ket adayo, saan a personal, wenno saan a maasitgan. Ibagam kadakuada a masarakandanto dagiti bersikulo iti Hebreo 1–6 a maiburayda iti maysa a tao tapno ipakita a ti Dios Ama ken ni Jesucristo ket manangngaasi a Nabiag nga agtarigagay a mangtulong kadatayo no agsagabatayo.
Dagiti Nainayon a Resources
Balakad ni Pablo maipapan iti doktrina.
Dagiti nasantuan a kasuratan a mangsalaknib kadatayo a maibusor kadagiti peggad dagiti maudi nga aldaw a nailadawan iti 2 Timoteo 3:2.
|
Peggad dagiti Maudi nga Aldaw |
Dagiti Nasantuan a Kasuratan a Mangsalaknib Kadatayo |
|---|---|
Peggad dagiti Maudi nga Aldaw Dagiti agayat iti bukodda a bagi | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Kinaagum | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Managpannakkel | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Napalangguad | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Dagiti managtabbaaw | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Nasukir kadagiti nagannak | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Saan a managyaman | Dagiti Nasantuan a Kasuratan a Mangsalaknib Kadatayo |
Peggad dagiti Maudi nga Aldaw Saan a nasantuan | Dagiti Nasantuan a Kasuratan a Mangsalaknib Kadatayo |
Ti pangagas a lana ti Pannubbot ti Mangisalakan ket mangtulong kadatayo a mamakawan kadagiti dadduma.
Insuro ni Elder Kevin R. Duncan:
“Awan ti uray maysa a kararua a sibibiag a saanto, iti maysa a panawen wenno sabali, nga agbalin a biktima iti saan a naannad a tignay, makapasakit nga ugali, wenno uray pay ti managbasol nga ugali ti maysa a tao. Adda maysa a banag a pagpapadaantayo.
“Agyamantayo, iti ayat ken asina para kadagiti annakna, insagana ti Dios ti maysa a wagas a makatulong kadatayo a mangdaliasat kadagitoy no dadduma a naririgat a padas ti biag. Nangipaay Isuna iti panangliklik iti amin a matnag a biktima kadagiti dakes nga aramid dagiti dadduma. Sinuruannatayo a mabalintayo ti mamakawan! …
“Adu a tawen ti napalabas, bayat ti panangtarimaanko iti maysa nga alad, nasalugsogan ti maysa a ramayko. Inkarigatak bassit ti mangikkat iti salugsog ket impagarupko a maaramidko, ngem nalawag a diak naikkat. Iti panaglabas ti panawen, adda nagtubo a kudil iti salugsog, a nangpaadda iti maysa a bukol iti ramayko. Makasinga ken no dadduma naut-ot daytoy.
“Kalpasan dagiti tawen inkeddengko ti agtignay iti kamaudianan. Sinapsapuak iti ointment ti bukol ket binedbedak daytoy. Masansan nga inulitko daytoy a proseso. Diyo maipagarup ti pannakasdaawko idi maysa nga aldaw, nga inikkatko ti bedbed, limtaw ti salugsog manipud iti ramayko.
Ti ointment ti nangpalukneng iti kudil ken nangparnuay iti pagruaran ti mismo a banag a nakaigapu ti ut-ot iti uneg ti nakaad-adu a tawen. Apaman a naikkat ti salugsog, alisto a nagimbag ti imak, ken agingga itoy nga aldaw, adda nagtalinaed a pakakitaan ti ania man a sugat.
“Iti isu met la a wagas, agtalinaed iti saan a mamakawan a puso ti nakaad-adu nga awan kaes-eskanna nga ut-ot. No isapsapotayo ti pangpaimbag nga ointment ti Pannubbot ti Mangisalakan, paluknengnennanto ti pusotayo ken tulongannatayo nga agbalbaliw. Mabalinna nga agasan ti nasugat a kararua (kitaen iti Jacob 2:8)” (“The Healing Ointment of Forgiveness,” Ensign wenno Liahona, Mayo 2016, 33).
Panangpadur-as iti Panangisurotayo
Mapasamak iti pagtaengan ti naespirituan a panagdur-as. Kaduam dagiti miembro ti klasem iti ababa laeng nga oras iti tunggal Domingo. Kabayatan dagiti dadduma pay nga oras ti lawas, adu kadakuada ti addaan iti napapateg a naespirituan a padpadas. Agdamag kadagiti saludsod a mangyallukoy kadakuada a mangibingaly iti nasursuroda iti ruar ti klase. (Kitaen iti Panangisuro iti Wagas ti Mangisalakan, 18.)