Bendisionan ni Melchizedek ni Abram, ni Walter Rane

Nobiembre 11–17

Hebreo 7–13

“Nangato a Saserdote dagiti Naimbag a Bambanag nga Umayto”

Bayat ti panangbasam iti Hebreo 7–13, utobem no ania ti mensahe ti Apo para kadagiti Santo a Hebreo. Kasta met a sapulem dagiti mensahe ken dagiti tao a sursuruam.

Isuratmo Dagiti Impresionmo

Yawis ti Panagbibinninglay

Sakbay ti klase, awisem ti sumagmamano a miembro ti klase nga umay a nakasagana a mangibinglay kadagti bersikulo manipud iti Hebreo 7–13 a makatulong kadakuada nga “umadani [iti Dios] a buyogan ti puso a napudno iti naan-anay a kinatalged ti pammati” (Hebreo 10:22).

Isuro ti Doktrina

Hebreo 7:1–22

Ti panagbiag a maikari kadagiti katulagan ken bendision ti Melchizedek Priesthood ket mangiturong iti pannakaitan-ok.

• Maysa a wagas a pakapagsukisokan iti daytoy a kapitulo ket ti panangawis kadagiti miembro ti klase a mangisurat iti pisarra ti sumagmamano a pudno a palawag maipapan iti Melchizedek Priesthood (para kadagiti kapanunotan, mabalinda a basaen ti “Melchizedek Priesthood” iti Napudno iti Pammati, 101–2). Mabalinda kalpasanna ti mangsukisok iti Hebreo 7:1–22 para kadagiti ragup ti balikas a pangsuporta kadagiti palawag iti pisarra. Mabalinda pay nga usaren ti Pangiwanwan iti Nasantuan a Kasuratan a mangsarak kadagiti dadduma pay a pangsuporta a nasantuan a kasuratan.

• Iti Hebreo 7:11 sinaludsod ni Pablo, “Ania pay ti pakasapulan ti kaadda ti sabali a saserdote a kas iti kinasaserdote ni Melquisidec, ket saan a naibilang kas iti kinasaserdote ni Aaron?” Iti sabali a balikas, apay a kasapulantayo ti Melchizedek Priesthood a mainayon iti Aaronic Priesthood? Nalabit a mabalin a saraken dagiti miembro ti klase dagiti mabalin a sungbat iti Napudno iti Pammati, ”Aaronic Priesthood” ken “Melchizedek Priesthood.” Mabalinmo pay nga awisen ida a mangibilang kadagiti bendision nga adda kadatayo gapu kadagitoy dua a priesthood (kitaen met iti adaw ni Sister Sheri L. Dew iti “Dagiti Nainayon a Resources). Kasano a napadasanen dagiti miembro ti klase dagitoy a bendision?

Hebreo 8–10

Itudo dagiti nagkauna ken kabaruanan nga ordinansa ni Jescristo.

• Nupay saantayo a mangidaton kadagiti ayup nga isakripisio, makiramantayo kadagiti ordinansa ita nga, iti isu met la a wagas, mangitudo kadagiti kararuatayo ken ni Cristo ken mangted kadagiti “awtorisado a wagas a mabalin a pagayusan dagiti bendision ken bileg ti langit nga agturong iti biag ti tunggal maysa kadatayo” (David A. Bednar, “Always Retain a Remission of Your Sins,” Ensign wenno Liahona, Mayo 2016, 60). Nalabit a makapagsukisokkayo a sangkamaysa iti sumagmamano a detalye maipapan kadagiti nagkauna nga ordinansa a nailadawan iti Hebreo 8–10 ken dagiti simboliko a kaipapananda. Kas pagarigan, ania ti ibagi ti dara dagiti toro a baka ken dagiti toro a kalding? (kitaen iti Hebreo 9:13–14). Ania ti ibagi ti nangato a saserdote? (kitaen iti Hebreo 9:24–26). Kasano a binendisionandatayo dagiti kabaruanan nga ordinansa ken tinulongandatayo a mangitudo ken ni Jesucristo? Ania ti maaramidtayo tapno mapagbalintayo a napatpateg dagitoy nga ordinansa ken ad-adda a makapagpokustayo iti Mangisalakan?

Hebreo 10:34–38; 11

Agkasapulan ti pammati iti panagtalek kadagiti kari ti Dios.

• Tapno matulongan a maawatan dagiti miembro ti klase dagiti pannursuro ni Pablo maipapan iti pammati, mabalinmo nga irugi babaen ti panangidawat kadakuada a mangpanunot maipapan iti no kasano nga iladawanda ti pammati iti maysa a binatog. Kalpasanna, basaen ken paglilinnawagan kas maysa a klase ti panangilawlawag nga inted ni Pablo iti Hebreo 11:1. Kalpasanna, mabalinmo a bingayen ti klase iti babassit a grupo ket dutokam ti tunggal grupo a mangadal iti maysa kadagiti tao a nadakamat iti Hebreo 11. Mabalin nga usaren dagiti miembro ti klase ti Pangiwanwan iti Nasantuan a Kasuratan a mangrebyu kadagiti padas ti tao iti Daan a Tulag, ket kalpasanna mabalin ti maysa a mangibagi manipud iti tunggal grupo a mangibinglay iti klase no ania ti nasarakan ti grupo. Kasano nga impakita dagitoy a tao a nariknanda ti “pammatalged dagiti banag a ninamnama”? (Patarus ni Joseph Smith, Hebreo 11:1 [iti Hebreo 11:1, footnote b]). Ania dagiti dadduma pay a pagarigan dagiti napudno a tao a maibinglay dagiti miembro ti klase? Kaano a naaramattayo ti pammatitayo kadagiti kari a saan pay a naipatungpal?

• Mabalin a naragsak a mangaramid iti maysa nga ay-ayam a mangtulong kadagiti miembro ti klase a masursuruan maipapan iti pammati manipud iti Hebreo 11. Kas pagarigan, mabalinmo a bingayen ti klase iti dua a ragup ket agdamag kadagiti saludsod maipapan iti pammati a masungbatan iti Hebreo 11 (kitaen iti “Dagiti Nainayon a Resources” para kadagiti pagarigan). Ti umuna a team a mangsapul iti sungbat a suportaran dagiti nasantuan a kasuratan ket umawat iti punto. Idawat kadagiti miembro ti klase a panglilinnawagan no ania ti nasursuroda manipud kadagitoy a bersikulo a makatulong iti nasaysayaat a pannakaawatda iti pammati.

• Kalpasan ti panagadal kadagiti pannursuro ni Pablo maipapan iti pammati iti Hebreo 10:34–38; 11, mangted kadi iti pagimbagan kadagiti miembro ti klase babaen ti panagsursuroda maipapan iti pammati manipud iti dadduma pay a resources? Mabalinmo a dutokan ti sumagmamano a miembro ti klase a nasapsapa tapno adalenda ti maysa a saludsod maipapan iti pammati kas iti sumaganad: Ania ti pammati? Kasano a mapaaddatayo ti pammati? Iti ania a wagwagas a pannakabendisiontayo no aramatentayo ti pammatitayo? Ania ti mapasamak no pilientayo a saan nga aramaten ti pammatitayo? Kalpasanna, iti klase, mabalinda nga ibinglay no ania ti nasursuroda. Wenno mabalinmo nga awisen dagiti miembro ti klase nga agtitinnulong nga agtrabaho iti tunggal grupo a mangsapul kadagiti sungbat. Sumagmamano a resources a mabalinda nga usaren ket mangiraman iti Alma 32:21–43; Ether 12 ; Pangiwanwan iti Nasantuan a Kasuratan, “Pammati.” Kalpasan a naibinglay dagiti miembro ti klase no ania ti nasursuroda, idawat kadakuada a mangibilang no ania ti mabalinda nga aramiden tapno mapapigsa ti pammatida. Awisem ti sumagmamano a miembro ti klase a mangibinglay kadagiti kapanunotanda.

• Ti balakad kadagiti Santo a Hebreo a nasulisog nga “agsanud” manipud iti pammatida ket mabalin a napateg kadagiti miembro ti klase a mabalin a mangikarkarigatan kadagiti pammaneknekda. Tapno maammuan daytoy a balakad, mabalin a basaen dagiti miembro ti klase ti Hebreo 10:34–38 ken ti palawag ni Elder Jeffrey R. Holland iti “Dagiti Nainayon a Resources.” Apay a dagiti tao iti lubong ita ket pukawenda ti pananginanamada wenno panagtalekda (kitaen iti Hebreo 10:35) iti Apo ken ti ebangheliona? Ania ti maaramidtayo a mangpaadda ken mangpatalinaed iti pammati ken panagtalektayo nga “umawat iti kari [ti Dios]”? (Hebreo 10:36).

Yallukoy ti Panagsursuro iti Pagtaengan

Mabalin a pamiliar dagiti miembro ti klase iti padas ni Joseph Smith iti panangbasana iti Santiago 1:5, a nangiturong iti Umuna a Parmata. Awisem ida a mangsapul kadagiti baro a nauneg a pannakaammo ken pannakaawat [insights] maipapan iti Santiago 1:5 bayat ti panangbasada iti daytoy itoy a lawas iti konteksto ti nasaksaknap a mensahe ni Santiago.

Dagiti Nainayon a Resources

Hebreo 7–13

Dagiti saludsod maipapan iti pammati manipud iti Hebreo 11.

• Kasano ti panangilawlawag ti Hebreo 11 maipapan iti pammati? (kitaen iti bersikulo 1).

• Ania ti kinabaelan ni Abel nga aramiden gapu iti pammati? (kitaen iti bersikulo 4).

• Segun iti Hebreo 11, ania ti saan a mabalin nga aramiden no awan pammati? (kitaen iti bersikulo 6).

• Ania ti nangparegta ken ni Abraham nga agsapul gapu iti pammati? (kitaen iti bersikulo 10).

• Ania ti inaramid ni Isaac gapu iti pammatina? (kitaen iti bersikulo 20).

• Ania ti nangparegta ken ni Moises nga isuko gapu iti pammatina? (kitaen kadagiti bersikulo 24–27).

Sidadaan a magun-od ti amin dagiti bendision ti Melchizedek Priesthood.

Kinuna ni Sister Sheri L. Dew, sigud a mammagbaga iti Relief Society General Presidency: “Sidadaan a magun-od dagiti bendision ti priesthood ti tunggal nalinteg a lalaki ken babai. Mabalin nga awatentayo amin ti Espiritu Santo, gun-odentayo ti personal a paltiing, ket agpa-endowtayo iti templo, a panamagtaudantayo a ‘naarmasan’ iti bileg. Ti bileg ti priesthood ket mangpaimbag, mangsaluad, ken mangbakuna iti amin a nalinteg a maibusor kadagiti bileg ti kinasipnget” (“It Is Not Good for Man or Woman to Be Alone,” Ensign, Nob. 2001, 13).

“Dikay ngarud pukawen ti pananginanamayo.”

Insuroni Elder Jeffrey R. Holland:

“Awan duadua a narigat daytoy—sakbay a kumappengka iti Simbaan, bayat ti panangpadasmo a kumappeng, ken kalpasan a kimmappengkan. Dayta ti wagas a kanayon a kasta, kuna ni Pablo, ngem saanka nga agsanud. Saanka nga agbuteng ken agbabawi. Saanka a mapukawan iti namnama. Saanmo a lipaten no kasano ti naminsan a panagriknam. Saanka nga agduadua iti padas nga adda kenka. …

“Addaan iti ania man a dakkel a pangngeddeng adda dagiti pammallaag ken konsiderasion nga aramiden, ngem no adda sungbat dagiti kararag, agannad iti sulisog nga agsanud manipud iti dayta nasayaat a banag. Umisu daytoy no inkararagam maipapan iti daytoy ken nagtalekka iti daytoy ket nagbiagka para iti daytoy, umisu daytoy ita. Saanka a sumuko no umadu ti pammilit. … Sanguem dagiti panagduaduam. Parmekem dagiti butengmo. “Dikay ngarud pukawen ti pananginanamayo.” Agtalinaedkayo iti dalan ket kitaenyo ti kinapintas ti biag a naipalgak kadakayo” (“Cast Not Away Therefore Your Confidence,” Ensign, Mar. 2000, 6–11).

Panangpadur-as iti Panangisurotayo

Umuna a mapanka kadagiti nasantuan a kasuratan. Dagiti nasantuan a kasuratan koma ti kangrunaan a pagadawan para iti panagadalmo ken panagsaganam. Dagiti balikas dagiti kabaruanan a propeta ti mangan-anay kadagiti pagrukodan a libro dagiti nasantuan a kasuratan iti simbaan (kitaen iti Panangisuro iti Wagas ti Mangisalakan, 17).