Ni Abraham kadagiti Tanap ti Mamre, ni Grant Romney Clawson

Nobiembre 18–24

Santiago

“Managtungpalkay Koma iti Sao, ket Saan Laeng a Managdengngeg”

Sakbay ti panangbasam iti daytoy a balabala, basaem ti Surat ni Santiago ket ikasom dagiti parikna a maawatmo. Ania dagiti prinsipio a masarakam a mangbendision ken mangpadur-as kadagiti miembro ti klasem? Ibasar iti daytoy a balabala dagiti nainayon a kapanunotan iti panangisuro.

Isuratmo Dagiti Impresionmo

Yawis ti Panagbibinninglay

Awisem dagiti miembro ti klase a mangibinglay kadagiti bersikulo manipud iti Santiago a nangparegta kadakuada nga agbalin a “managtungpal iti sao” (James 1:22). No saan a personal unay daytoy, mabalinda nga ibinglay no ania ti mariknada a kasapulan nga aramidenda, kas indibidual wenno kas pamilia.

Isuro ti Doktrina

Santiago 1:5–6

No agdawattayo a sipapammati, ited ti Dios a siwawaya.

• Dagiti pagbatayan a naisuro iti Santiago 1:5–6 ti nangiturong ken ni Joseph Smith iti naespirituan a padas a namagbalbaliw iti biagna, ken dagitoy ti mabalin a mangparabur iti tunggal maysa kadatayo iti sabali a wagas. Nalabit a mabalinmo nga isurat dagiti saludsod kas iti sumaganad iti pisarra ket idawat kadagiti miembro ti klase a mangutob kadagitoy a siuulimek iti: Ania nga impluensia ti Santiago 1:5–6 nga adda iti biagmo? Ania ti padas ni Joseph Smith kadagitoy a bersikulo ti nangisuro kenka maipapan iti panagkalikagum a manggun-od iti pagsiriban maipapan kadagiti bukodmo a saludsod? (kitaen iti Joseph Smith—Pakasaritaan 1:10–17). Ania dagiti padas a nakaisuro kenka a “pudno ti pammaneknek ni Santiago”? (Joseph Smith—Pakasaritaan 1:26). Awisem dagiti miembro ti klase a mangibinglay kadagiti kapanunotanda kalpasan ti panangutobda kadagitoy a saludsod:

• Nalabit a mabalin nga usaren dagiti miembro ti klase ti Santiago 1:5–6 kadagiti bukodda a balikas. Kasano a makatulong daytoy iti pannakaawatda a nasaysayaat kadagitoy a bersikulo?

• Tapno malagip dagiti miembro ti klase nga inkari ti Dios a mangted a siwayawaya kadagiti annakna no umasidegda Kenkuana iti kararag, idawat kadagiti miembro ti klase a mangibinglay kadagiti padas a nakaipatungpalan ti kari iti Santiago 1:5–6 iti biagda. Ania ti nasursuroda bayat ti panagkiddawda iti Nailangitan nga Ama a mangpatalged kadagiti bukodda a saludsod maipapan kadagiti kinapudno ti ebanghelio?

Santiago 1:2–4; 5:7–11

Ti naanus a panagibtur ket in-inut a mangiturong iti kinaan-anay.

• Tapno mairugi ti panaglilinnawag maipapan kadagiti pannursuro ni Santiago maipapan iti panagibtur kadagitoy a bersikulo, mabalinmo nga awisen dagiti miembro ti klase a mangibinglay kadagiti padas idi nasken nga aganusda ken no ania ti nasursuroda manipud iti dayta a padas. Kalpasanna mabalinda a sukisoken iti Santiago 1:2–4; 5:7–11 dagiti pagbatayan a mabalinda a yaplikar kadagiti padasda. Apay a kasapulan ti panaganus no ikarigatantayo ti mangitrabaho iti kinaan-anay? Ania ti nakatulong kadagiti miembro ti klase a mangpadur-as iti panaganus iti biagda?

Santiago 1:3–8, 21–25; 2:14–26

“Ti pammati a di mapakuyogan kadagiti ar-aramid isu ti eppes.”

• Maysa a wagas a pangilawlawag kadagiti pannursuro ni Santiago maipapan iti pammati ken aramid ket panangbingay iti klasem iti dua a grupo—maysa ti mangsukisok no apay nga agkasapulan ti pammati iti aramid ken sabali pay a grupo ti mangsukisok no apay nga agkasapulan dagiti aramidtayo iti pammati. Tapno maaramid daytoy, mabalinda a basaen ti Mateo 7:21–23; Santiago 1:6–8, 21–25; 2:14–26; ken Joseph Smith—Pakasaritaan 1:19. Kalpasanna mabalin nga ibinglay ti tunggal grupo no ania ti nasarakanda ket paglilinnawagan no apay a kasapulan ti agpada a pammati ken dagiti aramid.

• Tapno matulongan dagiti miembro ti klase a mangutob a naun-uneg iti nakallalagip a ragup ti balikas a “Ti pammati a di mapakuyogan kadagiti ar-aramid isu ti eppes” (Santiago 2:26), mabalinmo nga isurat iti pisarra ti sumaganad a binatog: Ti pammati a di mapakuyogan kadagiti ar-aramid ket maipada iti awan . Awisem dagiti miembro ti klase a mangpanunot kadagiti managpartuat a wagas a mangkumpleto iti binatog, ket ipasurat kadakuada dagiti kapanunotanda iti pisarra. Mabalin a mangted pagimbaganda pay manipud iti panangaramidda iti daytoy nga aktibidad iti sagpaparis wenno iti babassit a grupo. Ti estoria nga insarita ni President Dieter F. Uchtdorf iti “Dagiti Nainayon a Resources” ket mabalin a mangnayon iti pannakaawatda iti daytoy a pagbatayan. Ania ti maaramidtayo tapno agtultuloytayo nga agtignay iti pammatitayo ken ni Jesucristo?

Santiago 2:1–9

Kas disipulo ni Jesucristo, nasken nga ayatentayo ti amin a tao, ania man dagiti kasasaadda.

• Tapno matulongan a maparegta dagiti miembro ti klase a mangipakita iti ayat a kas ken ni Cristo ti tunggal maysa ania man ti situasion wenno akinruar a langa dagiti dadduma, mabalinmo a pagsisinnublaten dagiti miembro ti klase iti panagbasa kadagiti bersikulo manipud iti Santiago 1:9–11; 2:1–10; 5:1–6. Ilawlawag dagiti saludsod kas iti sumaganad: Ania ti kayat a sawen ti “maaddaan iti respeto kadagiti tao”? (Santiago 2:9). Apay a no dadduma tratuentayo dagiti adda kuartana, nalatak, wenno naiduma ti bilegna kadagiti awanan iti bileg? Kasano a maliklikantayo ti panangtrato kadagiti sabali a maiduma gapu iti kasasaadda? Iti ania a wagas a dagiti napudno a pasurot ti Mangisalakan ti pudno a kabaknangan ti amin? (kitaen iti Santiago 2:5).

Santiago 3

Adda bileg dagiti balikas nga usarentayo tapno mangpasakit wenno mangbendision kadagiti dadduma.

• Dagiti inusar ni Santiago nga imahe ket makaited kadagiti makatulong a palagip ken motibasion nga agusar kadagiti balikas—agpada a maisao ken maisurat—tapno mangitag-ay kadagiti dadduma. Ibilang ti panangawis kadagiti miembro ti klase a mangbasa iti Santiago 3 a mangsapsapul kadagiti imahe a mangiladawan no kasano a mausar ti pagsasao a mangdangran wenno mangbendision kadagiti dadduma; mabalin a maay-ayo dagiti miembro ti klase nga agdrowing kadagiti ladawan dagitoy nga imahe. Kasano nga ipakita dagitoy nga imahe dagiti panangiturong ni Santiago iti daytoy a kapitulo? Kas pagarigan, kasano a mayarig dagiti balikastayo iti maysa nga apuy? Ania nga imahe a mabalin a panunoten dagiti miembro ti klase tapno mangipakita iti positibo a bileg a mabalin nga adda iti dayta a pagsasao? Mabalinmo nga awisen dagiti miembro ti klase a mangutob no kasano a mayaplikarda ti balakad ni Santiago?

Yallukoy ti Panagsursuro iti Pagtaengan

Tapno maallukoy dagiti miembro ti klase a mangbasa iti 1 ken 2 Pedro, awisem ida a mangsapul kadagiti pannursuro a mainaig iti doktrina kadagitoy a surat tapno maawatan a nasaysayaat gapu iti Pannakaisubli ti ebanghelio. Kasano a paneknekan dagitoy a pannursuro maipapan iti naimpadtuan a mision ni Joseph Smith?

Dagiti Nainayon a Resources

Santiago

Pammati ken aramid.

Insuro ni Presidente Dieter F. Uchtdorf:

“Adda maysa a daan nga estoria maipapan ti agar-aramid iti sabon a saan a mamati iti Dios. Maysa nga aldaw bayat ti pannagnana a kaduana ti maysa a rabbi, kinunana, ‘Adda maysa a banag a diak maawatan. Adda relihiontayo iti uneg ti rinibu a tawen. Ngem iti amin a lugar a kitaenyo ket adda dakes, panagbasol, kinaulbod, kinaawan hustisia, saem, panagbisin, ken kinaranggas. Makita a ti relihion ket saan a talaga nangpadur-as iti lubong. Isu a saludsodek kenka, ania ti nasayaat iti daytoy?’

“Saan a simmungbat a dagus ti rabbi ngem intuloyna ti pannakipannagna iti agar-aramid iti sabon. Idi agangay nadanonda ti maysa a playground nga adda dagiti tapok-tapok nga ub-ubbing, nga agay-ayam iti karugitan.

“‘Adda maysa a banag a diak maawatan,’ kinuna ti rabbi. ‘Kitaem dagita nga ubbing. Adda sabontayo iti uneg ti rinibribu a tawen, ngem narugit latta dagita nga ubbing. Ania ti nasayaat nga ited ti sabon?’

Insungbat ti agar-aramid iti sabon, ‘Ngem rabbi, saan a nainkalintegan nga ipabasol iti sabon dagitoy nadungrit nga ubbing. Nasken a mausar ti sabon sakbay a maipatungpalna ti panggepna.’

“Immisem ti rabbi ket kinunana, ‘Eksakto’ (“The Just Shall Live by Faith,” Ensign wenno Liahona, Abr. 2017, 4).

Panangpadur-as iti Panangisurotayo

Yalluloy ti naraem ken makaay-ayo nga aglawlaw. Tulongam a maawatan dagiti miembro ti klasem a ti tunggal maysa kadakuada ket mangaring iti espiritu ti klase. Allukoyem ida a tulongandaka a mangipasdek iti silulukat, naayat, ken nadayaw nga aglawlaw tapno marikna ti tunggal maysa a natalgedda a mangibinglay kadagiti padas, saludsod, ken pammaneknekda” (Panangisuro iti Wagas ti Mangisalakan, 15).