Balsamo ni Galaad, ni Anne Henrie

Nobiembre 4–10

Hebreo 1–6

Ni Jesucristo, “ti Akin-aramid iti Agnanayon a Pannakaisalakan”

Ibilangmo ti panangibinglay kadagiti miembro ti klasem ti sumagmamano nga impresion nga awatem manipud iti Espiritu Santo maipapan iti Hebreo 1–6. Ti panangaramid iti daytoy ti mangparegta kadakuada nga agsapul iti bukodda nga impresion bayat ti panagadalda kadagiti nasantuan a kasuratan.

Isuratmo Dagiti Impresionmo

Yawis ti Panagbibinninglay

Sumagmamano a miembro ti klase a masansan a di mangibinglay iti klase ket agkasapulan iti masinunuo nga awis ken bassit a panawen nga agsagana. Mabalinmo a kasarita ti sumagmamano kadakuada iti maysa wenno dua nga aldaw a nasapsapa ket kiddawem kadakuada nga umay a nakasagana a mangibinglay iti maysa a bersikulo manipud iti Hebreo 1–6 a napateg kadakuada.

Isuro ti Doktrina

Hebreo 1–5

Ni Jesucristo, “ti akin-aramid iti agnanayon a pannakaisalakan.”

• Kasano a maallukoymo dagiti miembro ti klase nga ibinglayda dagiti napapateg a nasantuan a kasuratan maipapan ken ni Jesucristo a nasarakanda iti bukod ken sangapamiliaan a panagadalda itoy a lawas? Ibilang ti panangaramid iti lima a kolum iti pisarra a mangibagi iti umuna a lima a kapitulo iti Hebreo. Mangawis kadagiti miembro ti klase nga isuratda kadagiti maikanatad a kolum dagiti ragup ti balikas [phrases] manipud kadagitoy a kapitulo a nangisuro kadakuada ti maipapan ken ni Jesucristo ken ti numero ti bersikulo iti lugar a masarakanda. Kasano a ti pannakaammo kadagitoy a banag maipapan iti Mangisalakan ket mangapekto iti pammatitayo Kenkuana ken ti kinatallugodtayo a sumurot Kenkuana?

• Hebreo 1–5 agusar iti nadumaduma nga imahe a pangiladawan iti Mangisalakan. Nalabit a mausarmo dagitoy nga imahe a makatulong kadagiti miembro ti klase a mangpauneg iti pannakaawatda maipapan iti misionna. Kas pagarigan, mabalinmo a kasarita ti sumagmamano a miembro ti klase iti sumagmamano nga aldaw a nasapsapa ket kiddawem kadakuada a mangitugot iti klase iti maysa a banag a mangibagi iti maysa kadagitoy a pangiladawan ken ni Jesucristo wenno ti misionna manipud iti Hebreo 1–5 (kitaen nangnangruna iti Hebreo 1:3; 2:10; 3:1, 6; 5:9). Mailawlawagda iti klase no ania ti isuro dagiti banag nga intugotda maipapan ken Jesucristo ket basaen ti maitutop a bersikulo manipud iti Hebreo. Kasano a ti panangaramid kadagitoy a kinapudno maipapan iti Mangisalakan ket mangimpluensia iti biagtayo?

Hebreo 2:9–18; 4:12–16; 5:7–8

Sinagaba ni Jesucristo ti amin a banag tapno maawatan ken matulonganna dagiti agsagsagaba.

• Mabalin nga adda dagiti miembro ti klasem nga agsagsagaba kadagiti pannubok ken no dadduma mariknada a nabaybay-an ken naawananda iti namnama. Nalabit a ti panaglilinnawag maipapan iti Hebreo 2:9–18; 4:12–16; 5:7–8 ket mabalin a mangpapigsa iti pammatida tapno makaasidegda iti Nailangitan nga Ama ken ti Mangisalakan para iti tulong. Maysa a wagas a pangirugi iti panaglilinnawag ket ti panangawis kadagiti miembro ti klase a mangpanunot iti maysa a tao nga am-ammoda nga agsagsagaba wenno mabalin a mapukpukawan iti namnama. Ania dagiti kinapudno a nasarakanda kadagitoy a bersikulo a mabalinda nga ibinglay iti dayta a tao? Mabalin pay nga ibinglay dagiti miembro ti klase no kasano a liniwliwa ken tinulongan ida ti Mangisalakan. Ibilang ti panangibinglay iti adaw ni President John Taylor iti “Dagiti Nainayon a Resources” kas paset ti panaglilinnawag.

• Hebreo 2:9–18; 4:12–16 makatulong pay kadagiti tao a makaimatang iti panagsagaba iti lubong ken pampanunotenda no madlaw wenno mangisakit met laeng ti Dios. Nalabit a mabalin a sukisoken dagiti miembro ti klase dagitoy a bersikulo a mangsapul kadagiti kinapudno a makatulong iti kakasta a saludsod. Ania ti isuro dagitoy maipapan no kasano nga agresponde ti Mangisalakan iti panagsagaba ti sangkataw-an? Mabalin pay a makatulong ti mangawis kadagiti miembro ti klase a mangibinglay kadagiti pagwadan manipud kadagiti nasantuan a kasuratan a nangtulongan ni Jesucristo kadagiti tao iti panagsagabada (kitaen iti “Dagiti Nainayon a Resources”). Paglilinnawagan a sangkamaysa no ania ti masursurotayo maipapan iti no kasano a matulongannatayo ti Mangisalakan no maipasangotayo kadagiti narigat a pannubok.

Hebreo 3:7–4:2

Sidadaan a magun-od dagiti bendision ti Dios kadagiti “saan a “mangpatangken iti puspuso[da].”

• Hebreo 3 ken 4 naglaon iti pakaasi kadagiti Santo a saanda a patengkenen ti puspusoda ket gapu iti dayta dida maawat dagiti bendision a kayat ti Dios nga ited kadakuada. Bayat ti panangbasam ken ti klasem iti Hebreo 3:7–4:2, paglilinnawagan dagiti wagas a pakayaplikaran kadatayo ita dagiti padas dagiti nagkauna nga Israelita, kas iti pannakayaplikarda kadagiti Hebreo iti nagkauna a Simbaan (ibilang ti panangibasar iti material nga adalen maipapan kadagitoy a bersikulo iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Ania ti makaigapu kadagiti tao tapno mangpatangken iti puspusoda iti panawentayo? Ania ti maaramidtayo a mangpatalinaed iti puspusotayo a nalukneng ken managtulnog iti pagayatan ti Apo? (kitaen iti Ether 4:15; Alma 5:14–15).

Hebreo 5:1–5

Nasken nga awagan ti Dios dagiti agserbi iti pagarian ti Dios.

• Saan a priesthood holder ti amin a miembro ti klasem, ngem ti mensahe manipud iti Hebreo 5 maipapan kadagiti priesthood holder nga inawagan ti Dios ket mayaplikar iti amin nga umawat kadagiti takem [calling] iti Simbaan. Tapno matulongan ti klasem a makasursuro no ania ti kaipapanan ti “awagan ti Dios kas ken ni Aaron,” ibilangmo ti panangawis kadakuada a mangrebyu iti pakaammuan ni Aaron nga umaw-awat iti takemna[calling] iti Exodo 4:10–16, 27–31; 28:1. Ania dagiti nauneg a pannakaammo ken pannakaawat manipud iti daytoy a pakaammuan a makatulong kadatayo a makaawat iti Hebreo 5:1–5? Kaano nga immawat dagiti miembro ti klase, agraman dagiti lider ti ward, iti pammatalged nga inawagan ti Dios ti maysa a tao tapno mangipatungpal iti maysa a masinunuo a takem [calling]? Kasano a nakatulong kadakuada ti pammatalged a nasaysayaat a mangkanunong iti maysa a tao kadagiti akemda [calling]? (Mabalin a kayatmo nga idawat kadagiti miembro ti klase a saanda nga isarita dagiti sensitibo a detalye.) Mabalin nga adda pay dagiti miembro ti klase a makapagpaneknek a pinaregta ti Dios ida idi impatungpalda dagiti bukodda a takem wenno calling.

Yallukoy ti Panagsursuro iti Pagtaengan

Narikna kadin dagiti miembro ti klasem a “ganggannaet ken agpagpagnada iti rabaw ti daga” (Hebreo 11:13) gapu ta maigiddiat ti pammatida kadagiti adda iti aglawlawda? Ibagam kadakuada a bayat ti panagbasada iti Hebreo 7–13, masarakandanto dagiti pagarigan dagiti indibidual a sipupudno nga immawat ket nangarakup kadagiti kari ti Dios uray no adu ti awan panamatina iti aglawlawda.

Dagiti Nainayon a Resources

Hebreo 1–6

Ammo ni Jesucristo no ania ti kayarigan ti padas iti panagsagaba.

Insuro ni Presidente John Taylor: “Kasapulan idi adda ti Mangisalakan iti rabaw ti daga, nga isu ket ‘nasken a masulisog iti amin a banag kas kadatayo,’ ken, ‘masagid iti rikna dagiti pagkurangantayo,’ [kitaen iti Hebreo 4:15] tapno maawatan dagiti pagkapsutan ken pigsa; dagiti kinaan-anay ken pagkurangan ti natnag a kasasaad ti tao; ken ti pannakaipatungpal ti banag nga immayanna iti lubong nga aramidenna, nasken a panangikarigatan iti panaginsisingpet, panagdadael, kinakapuy, ken kinamaag ti tao—pannakaipasango iti pannulisog ken pannubok iti amin a nadumaduma a kitana, ket mangparmek, nagbalin isuna a ‘napudno a nangato a saserdote’ [kitaen iti Hebreo 2:17] tapno mangibabaet kadatayo iti agnanayon a pagarian ti Amana. Ammona no kasano ti mangpattapatta, ken mangikabil iti umno a pateg iti kababalin ti tao, gapu ta isu, iti pannakaikabilna iti isu met la a saad kas kadatayo, ammona no kasano ti mangibaklay kadagiti pagkapsutan ken saksakittayo, ken naan-anay a maawatan ti kauneg, bileg, ken pigsa dagiti rigat ken pannubok a nasken a sarangten dagiti tao iti daytoy a lubong, ket iti kasta addaan iti pannakaawat ken babaen iti padas, makipagbaklay kadakuada kas maysa nga ama ken inauna a kabsat a lalaki” (Teachings of Presidents of the Church: John Taylor [2001], 204–5).

Dagiti pagarigan iti nasantuan a kasuratan dagiti tao a liniwliwa ni Jesucristo.

• Juan 8:1–11: Liniwliwa ti Apo ti babai a nakabasol iti pannakiabig.

• Juan 11:1–46: Liniwliwa ti Apo da Maria ken Marta kalpasan ti ipapatay ti kabsatda, ni Lazaro.

• Enos 1:4–6: Pinakawan ti Apo dagiti basol ni Enos ket inikkatna ti basolna.

• Mosiah 21:5–15: Pinalukneng ti Apo ti puspuso dagiti Lamanite tapno palag-anenda ti dagensen dagiti tao ni Limhi.

• Mosiah 24:14–15: Pinalag-an ti Apo ti dagensen dagiti tao ni Alma.

• Ether 12:23–29: Liniwliwa dagiti balikas ti Apo ni Moroni.

• 3 Nephi 17:6–7: Inagasan ti Mangisalakan dagiti Nephite kadagiti saksakitda.

• Doktrina ken Katulagan 121:7–10: Liniwliwa ti Apo ni Joseph Smith (kitaen met iti DkK 123:17).

Panangpadur-as iti Panangisurotayo

Mangparnuay iti naespirituan nga aglawlaw. No mayallukoymo ti natalna, naayat nga aglawlaw iti siled ti klasem, ad-adda a nalaka a masagid ti Espiritu ti puspuso dagiti sursuruam. Ania ti maaramidmo tapno maawis ti impluensia ti Espiritu iti siled ti klasem? Mabalinmo kadi nga uliten nga urnosen dagiti tugaw wenno agusar kadagiti ladawan wenno musika a mangawis iti Espiritu? (Kitaen iti Panangisuro iti Wagas ti Mangisalakan, 15.)