Ni Cristo nga agikaskasaba iti Lubong ti Espiritu, ni Robert T. Barrett

Nobiembre 25–Disiembre 1

1 ken 2 Pedro

“Agrag-okayo iti Di Mayebkas a Rag-o ken Napno iti Dayag”

Laglagipem a ti panggepmo ket mangisuro kadagiti tao, saan laeng a mangidatag iti maysa nga adalen . Bayat ti panangbasam kadagiti Surat ni Pedro, panunotem ti tunggal maysa a miembro ti klase. Ania dagiti pagbatayan a mangtulongto kadakuada a mangpapigsa iti pammatida?

Isuratmo Dagiti Impresionmo

Yawis ti Panagbibinninglay

Isurat dagiti paulo 1 Pedro ken 2 Pedro iti pisarra. Ikkam dagiti miembro ti klase iti gundaway a mangrebyu kadagitoy a kapitulo, ket awisem ida a mangisurat iti baba dagiti paulo kadagiti balikas wenno ragup ti balikas manipud kadagiti kapitulo a masarakanda a napnuan kaipapanan. Kalpasanna usarem dagiti listaan a mangawis kadagiti tao a mangibinglay kadagiti nauneg a pannakaammo ken pannakaawatda [insights].

Isuro ti Doktrina

1 Pedro 1:3–9; 2:19–24; 3:14–17; 4:12–19

Masarakak ti rag-o kadagiti panawen ti pannubok ken panagsagaba.

• Tapno matulongam dagiti sursuruam a nasaysayaat a maawatan ken mayaplikarda ti balakad ni Pedro maipapan iti panagsapul iti rag-o kadagiti narigat a kasasaad, mabalinmo nga ikkan dagiti miembro ti klase kadagiti panid ti papel ket paisuratmo kadakuada ti maysa a ragup ti balikas [phrase] manipud iti 1 Pedro 1:3–9; 2:19–24; 3:14–17; 4:12–19 a makatulong kadakuada kadagiti panawen ti pannubok wenno rigat. Iti sabali a bangir ti papel, mabalinda nga isurat maipapan iti maysa a panawen ti pannubok idi mariknada ti talna wenno rag-o. Mabalin dagiti sumagmamano a boluntario nga ibinglay ti ragup ti balikasda ken ti padasda, ket kalpasanna mabalin a paglilinnawagan dagiti miembro ti klase no ania ti nasursuroda.

• Sabali pay a wagas a mangrebyu iti balakad ni Pedro iti 1 Pedro 1:3–9; 2:19–24; 3:14–17; 4:12–19 ket ti panangawis kadagiti miembro ti klase a mangpanunot maipapan iti maysa a tao nga am-ammoda nga agpaspasar iti maysa a pannubok. Mangted kadakuada iti oras iti klase nga agsurat iti dayta a tao, nga iraman dagiti kinapudno manipud kadagitoy a bersikulo a mangallukoy iti dayta a tao (kitaen met iti DkK 121:1–8; 123:17). Kalpasanna mabalin nga isarita dagiti miembro ti klase maipapan kadagiti kinapudno a pinilida.

1 Pedro 1:13–20; 2:1–12

Naawagantayo nga agbalin a “tattao ti Dios.”

• Kas miembro ti Simbaan ni Cristo, naawagantayo a sumurot ken ni Jesucristo. Kaipapanan daytoy a masansan a maigidiatto dagiti pilitayo kadagiti pili ti dadduma a tattao. Kasano a makatulong dagiti pannursuro ni Pedro iti 1 Pedro 1:13–20; 2:1–12 kadagiti sursuruam a makaawatda a nasaysayaat iti mision ken tarigagay ti Mangisalakan nga agbalin nga ad-adda a kas Kenkuana? Nalabit a mabalinmo nga awisen dagiti miembro ti klase a mangsukisok kadagitoy a bersikulo a mangsapsapul kadagiti panangiladawan ti kaipapanan ti agbalin a “tatttao ti Dios” (1 Peter 2:10) ket paglilinnawagandan no ania ti nabirukanda. Mabalin a kayatmo nga ilawlawag a ti balikas a “napili” iti 1 Pedro 2:9 kayatna a sawen ti “nagatang” wenno “nataginayon” (kitaen iti footnote f). Ania ti isuro daytoy kadatayo maipapan iti wagas a marikna ti Dios maipapan kadatayo ken no kasano ti kayatna a panagbiagtayo?

1 Pedro 3:18–20; 4:6

Maikasaba ti ebanghelio kadagiti natay tapno maukomda a nainkalintegan.

• Naglaon ti Umuna a Surat ni Pedro iti maysa kadagiti sumagmamano a reperensia iti Biblia iti isasarungkar ni Jesucristo iti lubong dagiti espiritu kalpasan ti ipapatayna—maysa a pasamak a pakatulongan ti kabaruanan a paltiing iti naan-anay a pannakaawattayo. Tapno matulongan dagiti miembro ti klase a mangpauneg iti pannakaawatda maipapan iti lubong dagiti espiritu, mabalinmo nga awisen ida a mangbasa kadagiti sumaganad a nasantuan a kasuratan ken mangisurat no ania ti nasursuroda iti pisarra: Juan 5:25; 1 Pedro 3:18–20; 4:6; Alma 40:7– 14, 21; Doktrina ken Katulagan 138:11–32.

  Dagiti palawag a naited iti “Dagiti Nainayon a Resources” ket mangipakita a ti isasarungkar ni Cristo iti lubong dagiti espiritu ket naawatan ken insuro saan laeng dagiti Apostolna no di dagiti pay nagkauna a mannursuro a Kristiano. Ti pannakaawat a napukaw daytoy a pannakaammo kabayatan ti Dakkel nga ikakalilis iti Kinapudno ken naisubli iti aldawtayo ket makatulong kadagiti miembro ti klase a mangpatibker kadagiti pammaneknekda maipapan ken ni Joseph Smith ken ti Pannakaisubli ti ebanghelio.

• Ti panangilawlawag iti 1 Pedro 3:18–20; 4:6 ket makatulong a mangparegta kadagiti miembro ti klase nga ad-adda a makiraman iti aramid iti family history ken iti templo. Tapno aramiden daytoy, mabalinmo a bingayen ti klase iti tallo a grupo ket mangted iti tunggal grupo iti maysa kadagiti sumaganad a saludsod maipapan iti pannakasubbot dagiti natay: Ania ti akem ti Mangisalakan iti pannakasubbot dagiti natay? Ania ti akem dagiti pimmusayen—agpada a dagiti napudno ken dagiti natay nga awanan iti pannakaammo iti ebanghelio? Ania ti akemtayo? Idawat iti tunggal grupo a mangrebyu iti 1 Pedro 3:18–20; 4:6; Docktrina ken Katulagan 128:17–18; 138:11–32, 57–59, nga agsapsapul kadagiti sungbat iti saludsodda. Kiddawem iti tunggal grupo a mangibinglay no ania ti nasursuroda, ket ibilangmo nga ibinglay ti adaw ni Elder D. Todd Christofferson wenno ti maysa iti video a masarakan iti “Dagiti Nainayon a Resources.” Ania dagiti bendision a nasaksiantayo bayat ti pannakiramantayo iti panangyeg iti pannakaisalakan kadagiti kapuonantayo a pimmusayen?

1 Pedro 1:1–11

Babaen ti bileg ni Jesucristo, mapadur-astayo dagiti nadiosan a kababalintayo.

• Tapno maparegta dagiti sursuruam kadagiti panagkagumaanda nga agbalin nga ad-adda pay a kas ken ni Jesucristo, mabalinmo nga awisen ida a mangilasin kadagiti kababalin a kas ken ni Cristo a nailadawan iti 2 Pedro 1:1–11. Ibilang ti panangisurat kadagitoy a kababalin iti pisarra ken panangkiddaw kadagiti miembro ti klase a mangilawlawag iti maipapan kadakuada. Kalpasanna mabalin a paglilinnawagan dagiti miembro ti klase no kasano a ti panangpadur-as iti maysa a kababalin a mangiturong iti panangpadur-as iti dadduma pay a kababalin. Mangted iti oras kadakuada a mangutob no ania a kababalin ti kayatda a padur-asen a naan-anay (kitaen met iti Preach my Gospel, 126).

Ti tunggal kababalin a kas ken ni Cristo a padur-asentayo ket makatulong kadatayo a mangyabel iti naespirituan a tapiseria ti kinadisipulo.

Yallukoy ti Panagsursuro iti Pagtaengan

Mabalin a kayatmo nga ilawlawag nga adalento dagiti miembro ti klase dagiti Surat ni Juan kabayatan ti sumaruno a lawas. Makatulong dagitoy a surat a mangatur kadagiti palso a pannursuro maipapan ken ni Jesucristo ken makapapigsa kadagiti pammaneknektayo maipapan iti sibibiag a kinapudno ti Mangisalakan.

Dagiti Nainayon a Resources

1 ken 2 Pedro

Ti aramid iti panangsubbot kadagiti natay ket mangipaneknek iti mision ni Cristo.

Insuro ni Elder D. Todd Christofferson:

Inkarigatan dagiti teologo a Kristiano iti nabayag a pannakisarangetda nga addaan iti saludsod, Ania ti pagtungpalan ti saan a mabilang a binilion a nagbiag ken natay nga awanan iti pannakaammo maipapan ken ni Jesus? Iti Pannakaisubli ti ebanghelio ni Jesucristo dimtengen ti pannakaawat iti no kasano a masubbot ti saan pay a nabuniagan a natay, ken no kasano nga agbalin ti Dios a “naan-anay, nalinteg a Dios, ken naasi pay a Dios’ [Alma 42:15].

“Idinto nga iti biag, impadto ni Jesus a mangasabanto pay kadagiti natay [kitaen iti Juan 5:25]. Insarita kadatayo ni Pedro daytoy a napasamak iti nagbaetan ti Pannakailansana iti Krus ken Panagungar ti Mangisalakan [kitaen iti 1 Pedro 3:18–19]. Nasaksian ni PresidenteJoseph F. Smith iti parmata a sinarungkaran ti Mangisalakan ti lubong dagiti espiritu [kitaen iti DkK 138:30, 33]. …

“Ti pakaseknantayo a mangsubbot kadagiti natay, ken ti panawen ken dagiti pamataudan nga ipaaytayo iti dayta a panagkumit, ket, kangrunaan ti amin, maysa a panangipeksa iti panagsaksitayo maipanggep ken ni Jesucristo. Mangparnuay daytoy iti kas kabileg a palawag a mayebkastayo maipanggep iti nadiosan a kababalin ken misionna. Daytoy ti mangipaneknek, umuna, maipapan iti Panagungar ni Cristo; maikadua, maipapan iti awan patinggana a pannakagun-od iti Pannubbotna; maikatlo, nga Isu ti kakaisuna a paggapuan ti pannakaisalakan; maikapat, nga Isu ti nangipasdek kadagiti kondision para iti pannakaisalakan; ken, maikalima, nga umayto manen Isuna” ((“The Redemption of the Dead and the Testimony of Jesus,” Ensign wenno Liahona, Nob. 2000, 9–10).

Dagiti sinurat dagiti nagkauna a mannursuro a Kristiano (umuna agingga iti maikatlo a siglo) maipanggep iti panangikasaba kadagiti natay.

Origen: “Idi nagbalin ni [Jesus] a kararua [maysa nga espiritu], nga awanan iti abbong iti bagi, Isu ket nagnaed kadagiti kararua nga awanan abbong iti bagi, a namagbalbaliw iti kakasta kadakuada a nagtallugod Kenkuana” (iti The Ante-Nicene Fathers, ed. Alexander Roberts and James Donaldson [1907], 4:448).

Hermas: “Dagiti apostol ken mannursuro a nangikasaba iti nagan ti Anak ti Dios, kalpasan a nakaturogda iti bileg ken pammati ti Anak ti Dios, nangikasabada pay kadakuada a nakaturog iti sanguananda” (iti The Apostolic Fathers, trans. J. B. Lightfoot [1898], 472).

Panangpadur-as iti Panangisurotayo

Isuro ti “apay.” No dadduma masdaaw dagiti agad-adal—nangruna dagiti agtutubo—no kasano nga adda pakainaigan kadakuada dagiti pagbatayan ti ebanghelio wenno no apay a nasken nga agtungpalda kadagiti masinunuo a bilin. Nupay kasta, no maawatanda ti agnanayon a plano ti Nailangitan nga Ama para iti pagragsakan dagiti annakna, dagiti gapu para kadagiti pagbatayan ti ebanghelio ken bilin ket agbalin a nalawlawag ken ad-adda a maguyugoyda nga agtulnog” (Panangisuro iti Wagas ti Mangisalakan, 20).