Natalged iti Kuadra, ni Dan Burr

Disiembre 16–22

Paskua

“Naimbag a Damag ti Dakkel a Ragsak”

Dagiti panaglilinnawag iti ebanghelio ket nabileg iti kinaespirituan no naipamaysada ken ni Jesucristo. Bayat ti panagadalmo iti pannakayanak ken mision ni Jesucristo iti daytoy a lawas, agkalikagum a manggun-od iti pammaregta manipud iti Espiritu Santo tapno ammuen no kasano ti kasayaatan a panangipamaysam iti panaglilinnawag iti klasem maipapan iti Mangisalakan.

Isuratmo Dagiti Impresionmo

Yawis ti Panagbibinninglay

Mangawis kadagiti miembro ti klase a mangibinglay no ania ti ar-aramidenda wenno naaramiddan iti napalabas kas indibidual wenno pamilia a panangrambak iti pannakayanak ti Mangisalakan iti wagas a mangyasideg kadakuada nga ad-adda pay Kenkuana.

Isuro ti Doktrina

Mateo 1:18–25; Lucas 1:26–38; 2:1–20

Nagpakababa ni Jesucristo tapno mayanak iti daga.

• Ti agpakababa ket kayatna a sawen ti siboboluntario a bumaba manipud iti posision ti ranggo wenno dignidad (kitaen iti 1 Nephi 11:14–26). Ti Paskua ti maysa a nasayaat a panawena panagutob ken panangrambak iti panagpakababa ni Cristo—ti kinatallugodna a nangpanaw kadagiti “korte ti Amana iti ngato, nakipagbiag iti tao, tapno matay para iti tao.”   Tapno maparegta ti panaglilinnawag iti daytoy a topiko, mabalinmo a saludsoden dagiti miembro ti klase no ania ti nasursuroda iti bukod wenno sangapamiliaan a panagadalda iti daytoy a lawas maipapan ken ni Jesucristo sakbay ti pannakayanakna (kitaen iti Juan 17:5; Mosiah 7:27; DkK 76:12–14, 20–24; Moises 4:2). Kalpasanna mabalinmo nga i-display ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia bayat ti panangbasa dagiti miembro ti klase maipapan iti pannakayanak ti Mangisalakan (kitaen iti Mateo 1:18–25; Lucas 1:26–38; 2:1–20). Ania dagiti kapanunotan ken riknada bayat ti panangidiligda iti dayag ti Mangisalakan sakbay daytoy a biag iti nanumo a pannakayanakna?

• Maysa a saludsod kas iti maysa a dinamag ti anghel ken Nephi iti 1 Nephi 11:16 ket mabalin a nasayaat a wagas a pangirugi iti maysa a panaglilinnawag iti klase, nupay mabalin a sabaliam ti panangisaom iti daytoy. Mabalinmo nga isurat iti pisarra ti Ania ti panagpakababa ti Dios? ket pautobmo kadagiti miembro ti klase daytoy a saludsod bayat ti panangbasada iti 1 Nephi 11:17–33. Idawatmo kadakuada a mangibinglay kadagiti ania man a kapanunotan maipapan iti Mangisalakan a paregtaen dagitoy a bersikulo. Ania dagiti ladawan a maipakitam iti klase a mangiladawan kadagiti buya manipud iti biag ti Mangisalakan nga inladawan ni Nephi?

• Ti musika ket napintas a wagas a pangawis ti Espiritu iti klasem. Ibilang ti panagpatokar kadagiti himno ti Paskua a kinanta ti Tabernacle Choir (kitaen iti mormontabernaclechoir.org), nga aw-awisen ti maysa a tao a kumanta iti maysa a kansion ti Paskua, wenno aggigiddan iti panangbasa wenno panangkanta iti sumagmamano a himno kas maysa a klase (kitaen iti Hymns, dagiti num. 201–14). Mabalin a kitaen dagiti miembro ti klase dagiti ragup ti balikas kadagitoy a himno ken dagiti nasantuan a kasuratan a nakalista kadagiti himno a mangpadakkel iti panagyamanda iti Mangisalakan ken ti panagtallugodna nga umay iti daga.

Lucas 4:16–21; Juan 3:16

Impatungpal ni Jesucristo ti misionna, a namagbalin a posible nga agtawidtayo iti agnanayon a biag.

• Tapno matulongam dagiti miembro ti klase a mangilawlawag kadagiti gapu ti pannakayanak ni Jesucristo, mabalinmo nga awisen ida a mangsarak ken mangibinglay kadagiti nasantuan a kasuratan a manggupgop iti misionna (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia para iti sumagmamano a pagarigan). Nalabit a mabalin a sapulen ken basaen dagiti miembro ti klase dagiti bersikulo iti sagpaparis wenno babassit a grupo. Ania ti masursuroda maipapan iti mision ni Cristo manipud kadagiti bersikulo a nasarakanda? Ania ti masursurotayo maipapan iti misionna manipud iti sumagmamano a pangawag a naited Kenkuana kadagiti nasantuan a kasuratan? (kitaen iti Pangiwanwan iti Nasantuan a Kasuratan, “Jesucristo”).

• Mabalin a masursuro dagiti miembro ti klase maipapan iti mision ti Mangisalakan babaen ti panangbasa iti “Ti Sibibag a Cristo: Ti Pammankenek dagiti Apostol” (Ensign wenno Liahona, Mayo 2017, iti uneg ti akinsango nga akkub) ken panangibinglay kadagiti palawag a masarakanda a mangilawlawag no apay nga immay Isuna iti daga. Wenno mabalinda nga irebyu ti mensahe ni Presidente Gordon B. Hinckley iti “Dagiti Nainayon a Resources” ket paglilinnawagan no ania ti masursuroda maipapan iti Mangisalakan. Kasano a maaddaantayo iti oras iti daytoy a panawen ti Paskua para iti “naulimek a panagutob ken natalinaay a panangpanunot” iti Mangisalakan ken ti misionna?

• Ikkam dagiti miembro ti klase iti oras a mangpanunot kadagiti pammaneknekda maipapan ken ni Jesucristo ken ti misionna. Makaibinglayda kadi kadagiti bukod a padas wenno estoria manipud iti biag ti Mangisalakan a nangpatibker iti pammatida wenno ayatda para Kenkuana? Kasano a ti panagadal iti Baro a Tulag iti daytoy a tawen ket nakatulong iti maysa a napatpateg a panawen ti Paskua?

Yallukoy ti Panagsursuro iti Pagtaengan

Isingasingmo kadagiti miembro ti klasem a ti panagadal iti Apocalipsis 12–22 iti daytoy a lawas ket mangpauneg iti panagyamanda iti akem ti Mangisalakan iti plano ti pannakaisalakan ken mangnayon iti kaipapanan iti panangrambak iti Paskua.

Dagiti Nainayon a Resources

Paskua

Ti pudno a kaipapanan ti Paskua.

Insuro ni President Gordon B. Hinckley:

“Kalpasan a naisao ken naaramid ti amin, … awan ti nakaskasdaaw unay, nakangayngayed, naindaklan unay a kas iti daytoy nga aramid ti parabur idi ti Anak ti mannakabalin,… Isu a nagpakababa tapno umay iti daga kas maysa a maladaga iti Betlehem, nangted iti biagna iti pannakaibabain ken saem tapno amin nga annak a lallaki ken babbai ti Dios iti amin a henerasion ti panawen, tunggal maysa ket nasken a matay, mabalin a magna manen ket makapagbiag iti agnanayon. Inaramidna para kadatayo ti awan nakaaramid kadatayo para iti bagbagitayo. …

“Daytoy ti nakaskasdaaw ken pudno nga estoria ti Paskua. Ti pannakayanak ni Jesus iti Betlehem ti Judea ket pakauna. Ti tallo a tawen a panagserbi ti Maestro ket panangyam-ammo. Ti nangayed a kaipapanan ti estoria ket ti sakripisiona, ti kadagupan ti saan a managimbubukod a tignay ti panagrigrigatna gapu iti saem iti krus ti Kalbario tapno mangsubbot kadagiti basbasol ti amin kadatayo.

Getsemani, ni J. Kirk Richards

“Ti gibus ket ti milagro ti Panagungar, a mangisangbay iti namnama a ‘kas matayda amin ken Adan, kasta met mabiagdanto amin ken Cristo’ (1 Taga Corinto 15:22).

“Awan koma ti Paskua no awan ti Paskua ti Panagungar. No di ti maladaga a Jesus ti Betlehem sabali koma a maladaga nga awan ti mangsubbot a Cristo ti Getsemani ken Kalbario, ken ti naballigian a kinapudno ti Panagungar.

“Mamatiak ken ni Apo Jesucristo, ti Anak ti Agnanayon, Sibibiag a Dios. Awan ti tao a nain-indaklan pay a nakapagnan iti daga. Awan ti sabali pay a tao a nakaaramid iti maidasig a sakripisio wenno naipaayan iti maidasig a bendision. Isu ti Mangisalakan ken ti Mannubbot ti lubong; Mamatiak Kenkuana. Ipakdaarko ti kinadiosanna nga awan duadua wenno kompromiso. Ay-ayatek Isuna. Isarsaritak ti naganna iti panagraem ken panagsiddaaw. …

“Para iti tunggal maysa kadakayo agbalin koma daytoy a naragsak a Paskua. Ngem ti napatpateg, tarigagayak a mangbubos koma ti tunggal maysa kadakayo iti panawen, nalabit a maysa laeng nga oras, iti naulimek a panagutob ken natalinaay a panangpanunot iti kinadatdatlag ken kinangayed daytoy, ti Anak ti Dios. Ti rag-o tayo iti daytoy a panawen ket gapu ta immay Isunan iti lubong. Ti talna a sumangbay manipud Kenkuana, ti awan patinggana nga ayatna a marikna ti tunggal maysa kadatayo, ken ti napalaus a rikna ti panagyaman para iti dayta a siwawaya nga intedna kadatayo iti dakkel a gatad iti Bagina—dagitoy ti pudno a kaipapanan ti Paskua” (“The Wondrous and True Story of Christmas,” Ensign, Dis. 2000, 4–5).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. Mangilatang iti oras a pakaibinglayan ti estudiante iti tunggal adalen—iti sumagmamano a gundaway, matakuatam a dagitoy a pananglilinnawag ket ti adalen” (Panangisuro iti Wagas ti Mangisalakan, 30).