“Disiembre 9–15. Apocalipsis 1–11: ‘Dayag, ken Pannakabalin ti Adda Koma … iti Kordero iti Awan Inggana’” Umaykayo, Sumurot Kaniak—Para iti Sunday School: Baro a Tulag 2019 (2019)
“Disiembre 9–15. Apocalipsis 1–11,” Umaykayo, Sumurot Kaniak—Para iti Sunday School: 2019
T Naimbag a Pastor, ni Del Parson
Disiembre 9–15
Apocalipsis 1–11
“Dayag, ken Pannakabalin ti Adda Koma … iti Kordero iti Awan Inggana”
Ti panangawat iti naespirituan nga impresion ket makatulong kenka a mangbigbig a kayat ti Espiritu Santo ti mangisuro kenka. Ti panangisurat ken panangsurot kadagiti impresion ket mangipakita nga ipategmo dagitoy ken agtarigagayka nga umawat iti ad-adu pay.
Isuratmo Dagiti Impresionmo
Yawis ti Panagbibinninglay
Bayat ti panangirugim iti panaglilinnawag maipapan iti Apocalipsis, mabalin a makatulong ti mangawis kadagiti miembro ti klase a mangibinglay iti uray ania nga impormasion ti nagtaudan a nasursuroda maipapan iti libro ti Apocalipsis kabayatan dagiti bukod wenno sangapamiliaan a panagadalda. Mabalin nga aggigiddankayo a mangrebyu iti sumagmamano nga impormasion a naited iti Umaykayo, Sumurot Kaniak—Para kadagiti Indibidual ken Pamilia wenno basaenyo nga aggigiddan dagiti entry manipud iti Pangiwanwan iti Nasantuan a Kasuratan “Juan, Lalaki nga Anak ni Zebedeo” ken “Paltiing ni Juan.”
Isuro ti Doktrina
Ni Jesucristo ti Sibibiag nga Anak ti Sibibiag a Dios.
-
Idinto a nagusar ni Juan iti panangiladawan ken simbolismo iti Apocalipsis 1 a pangiladawan iti nagungar a Mangisalakan ken dagiti aramidna, ti panagadal iti daytoy a kapitulo ket maysa a naindaklan a wagas a mangpapigsa iti pammati nga Isu ket sibibiag ken Isu ti mangiwanwan iti Simbaanna. Nalabit a mabalin nga isurat dagiti miembro ti klase iti pisarra ti sumagmamano a ragup ti balikas [phrases] manipud iti Apocalipsis 1 a mangiraman iti panangiladawan wenno simbolismo ken ibinglayda no ania ti isuro ti tunggal maysa kadakuada maipapan ken ni Jesucristo. Kas pagarigan, ania ti masursurotayo manipud kadagitoy a simbolo maipapan no kasano nga idauluan ni Cristo ti Simbaanna iti agdama? Kasano a maidasig ti panangiladawan ni Juan iti Mangisalakan iti maysa iti Doktrina ken Katulagan 110:1–4?
Mabalintayo a parmeken dagiti karit babaen ken ni Jesucristo.
-
Maipadatayo kadagiti Santo a sinuratan ni Juan iti uray maysa laeng a wagas: maipasangotayo iti rigat. Awisem dagiti miembro ti klase a mangsukisok iti Apocalipsis 2–3 ket mangilasin kadagiti pannubok a pakaipaspasanguan dagiti Santo iti panawen ni Juan, ket tulongam ida a makaawat nga ammo ni Jesucristo dagiti pannubok ken pagpigsaan ti tunggal branch. Nalabit a mabalinda nga ibinglay dagiti padas a nakariknaanda nga ammo ti Mangisalakan dagiti naidumduma a kasasaadda. Ania a balakad ti inted ti Apo kadagiti Santo a makatulong pay kadatayo a mangparmek kadagiti panagkarigatantayo?
-
Kadagitoy isu met laeng a kapitulo inaramid ti Apo dagiti makaparegta a kari kadagiti mangparmek. Mabalinmo nga awisen dagiti miembro ti klase nga agtrabaho iti sagpaparis a mangsukisok iti Apocalipsis 2–3; 7:13–17 a mangsapul kadagiti kari ti Apo. Nalabit a mabalinda ti agdrowing kadagiti ladawan a mangibagi iti sumagmamano kadagitoy a kari, kalpasanna ibinglayda iti klase no ania ti nasarakanda. Kasano a mangparegta dagitoy a kari kadakuada a mangituloy a mangikarigatan a mangparmek kadagiti bukodda a pannubok ken pagkapsutan?
Ni Jesucristo laeng ti makaaramid a posible ti plano ti Nailangitan nga Ama.
-
Makatulong kadi ti banag nga adalen [object lesson] tapno maawatan ti klasem ti simbolismo iti Apocalipsis 5 maipapan iti Mangisalakan a mangluklukat iti naseluan a libro? Mabalinmo ti mangitugot iti taraon a naikabil iti naikandado a pagikkan tapno ibinglay iti klase. Sakbay ti klase, sililimed nga itedmo iti maysa a tao ti tulbek iti kandado. Iladawam iti klase no ania ti naguneg ti pagikkan, ken bay-am ti sumagmamano a miembro ti klase a mangpadas a manglukat iti kahon sakbay a lukatan daytoy ti tao nga addaan iti tulbek. Kalpasanna mabalin nga idilig ti klase daytoy a banag nga adalen iti Apocalipsis 5. Mabalin a makatulong dagiti saludsod a kas kadagitoy: Kasano a maipada ti pannakaisalakan dagiti annak ti Nailangitan nga Ama iti naikandado a pagikkan wenno naseluan a libro? Apay a ni Jesucristo laeng ti Maysa a makalukat kadagiti selio? (kitaen ti adaw iti “Dagiti Nainayon a Resources”). Ania dagiti bendision nga agpannuray iti pannakaikari ti Mangisalakan a manglukat kadagiti selio? (kitaen iti Apocalipsis 7:14–17).
-
Kas kadagiti naragsak a tattao a nadakamat iti Apocalipsis 5, ita mabalintayo met nga itag-ay dagiti timektayo a mangdaydayaw iti Mangisalakan kas Maysa a maikari a mangidiaya kadatayo iti pannakaisalakan. Nalabit a mabalin nga aggigiddan nga agkanta dagiti miembro ti klase iti sumagmamano a paggugusto a himno a pagdaydayaw maipapan iti Mangisalakan. Kas pagarigan, mabalinmo a kantaen ti “Glory to God on High” (Hymns, no. 67; wenno kitaen ti video “Worthy Is the Lamb” iti LDS.org) ket ilasinmo dagiti kinapudno nga isuro daytoy a himno maipapan ken ni Jesucristo. Ania dagiti padas a nakatulong kadatayo a manggun-od iti pammaneknek maipapan kadagitoy a kinapudno? Ania dagiti pagpapadaan a makitatayo iti nagbaetan dagiti mensahe ken dagiti himno a pagdaydayaw ken dagiti palawag iti Apocalipsis 5:9–14? Kasano a nasaysayaat a mausartayo dagiti himno iti pagtaengan ken iti simbaan nga agrukbab ken agdaydayaw iti Apo?
Sakbay ti Maikadua a Yaay, ummongento ti Apo dagiti nalinteg ken isaganana ida a makipagtaeng Kenkuana.
-
Apocalipsis 7 ti mangiladawan kadagiti pasamak ti “maikanem a selio,” sumagmamano kadagitoy ti mangibagi iti aldawtayo. Daytoy pay ti mangsungbat iti saludsod iti gibus ti kapitulo 6: “Ta dimtengen ti dakkel nga aldaw ti pungtotna; ken saisinonto ti makabalin nga agtakder?” (bersikulo 17). Nalabit a mabalin a saraken dagiti miembro ti klase dagiti sungbat daytoy a saludsod iti kapitulo 7. Dagitoy ti sumagmamano a sabali pay a saludsod a mabalinda a paglilinnawagan: Apay nga intantan ti Apo ti pannakadadael ti daga iti maysa a panawen? Kasano a dagiti ordinansa ken katulagan ket “mangisagana [kadatayo] agingga iti aldaw a pannakaibukbok ti pungtot ti Dios”? (DkK 1:9). Ania ti aramidtayo a panangisagana iti lubong para iti Maikadua a Yaay? Doktrina ken Katulagan 1:4–23; 77:8–11 ket mabalin a mangted iti nayon a nauneg a pannakaammo ken pannakaawat [insights].
Isuro ti parmata ni Juan no kasano nga isalakan ti Nailangitan nga Ama dagiti annakna.
-
Mabalin a matakuatan ti sumagmamano a miembro ti klase a narigat a maawatan ti libro ti Apocalipsis. Mabalin a makatulong no ibilangda dagiti sinurat ni Juan iti konteksto ti plano ti Nailangitan nga Ama a mangitan-ok kadagiti annakna. Bayat ti panangbasa dagiti miembro ti klase iti Apocalipsis 1–11 iti pagtaengan, mabalin a nasarakanda dagiti kinapudno a nakatulong kadakuada iti plano ti Nailangitan nga Ama para kadagiti annakna (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Awisen ida a mangibinglay no ania ti nasarakanda. Mabalin pay a matakuatanda daytoy a makatulong nga irebyu ti benneg iti “Dagiti Nainayon a Resources” a napauluan iti “Dagiti nasantuan a kasuratan maipapan iti plano ti pannakaisalakan.” Allukoyem dagiti miembro ti klase a mangituloy iti panagsapul kadagiti nasantuan a kasuratan a mangisuro kadagiti kinapudno maipapan iti plano ti pannakaisalakan bayat ti panagbasada iti dadduma pay iti Apocalipsis, ken mangted kadakuada iti gundaway bayat dagiti masakbayan nga adalen nga ibinglay no ania ti masarakanda.
Yallukoy ti Panagsursuro iti Pagtaengan
Idawat kadagiti miembro ti klase a mangpanunot iti paggugustoda a tradision iti Paskua. Awisem ida a mangrebyu iti balabala iti umay a lawas para kadagiti kapanunotan maipapan no kasano a maipamaysada ti parambakda maipapan ken ni Jesucristo.
Dagiti Nainayon a Resources
Dagiti nasantuan a kasuratan maipapan iti plano ti pannakaisalakan.
Pannubbot ni Jesucristo
Biag Sakbay Daytoy a Biag
Biag iti Daga
Biag Kalpasan Daytoy a Biag
Ni laeng Jesucristo ti makasubbot kadatayo.
Iti panagiladawan kadagiti pasamak iti biag sakbay daytoy a biag, insuro ni Elder Jeffrey R. Holland:
“Nagboluntario ni Cristo a mangdayaw iti nawaya a panagpili a mainaig iti nasayaat a kababalin ti amin a sangkataw-an uray pay sinubbotnan dagiti basolda. Iti dayta a wagas, agsublinto Isuna iti Ama iti amin a gloria para iti kasta a manangsubbot nga ayat.
“Daytoy awan patinggana a Pannubbot ni Cristo ket posible gapu ta (1) Isu laeng ti awan basolna a tao a nagbiag ditoy daga ket ngarud saan a naipasango iti naespirituan nga ipapatay a bunga manipud iti basol, (2) Isu ti Bugbugtong ti Ama ket ngarud adda Kenkuana dagiti kababalin ti kinadiosan a nangted Kenkuana iti bileg a mangparmek iti pisikal nga ipapatay, ken (3) Isu laeng ti agmaymaysa a napakumbaba ken nagtallugod iti konseho iti biag sakbay daytoy a biag tapno maipasakbay a maordenan iti dayta a serbisio” (“The Atonement of Jesus Christ,” Ensign wenno Liahona, Mar. 2008, 35).
Panangpadur-as iti Panangisurotayo
Usarem dagiti nasantuan a kasuratan ken balikas dagiti propeta iti ud-udina nga aldaw. Binilinnatayo ti Apo tapno “isuro iti tunggal maysa ti doktrina ti pagarian” (DkK 88:77) ken tapno usaren dagiti nasantuan a kasuratan nga ‘isuro dagiti pagbatayan ti ebanghelio[na]’ (DkK 42:12). Dagiti nasantuan a kasuratan ken balikas dagiti propeta ken apostol iti ud-udina nga aldaw ket pagtaudan dagiti kinapudno nga isurotayo” (Panangisuro iti Wagas ti Mangisalakan, 21).