Ni Jesucristo nga umis-isem bayat ti pannakitugawna iti umis-isem nga ubing

Naan-anay nga Ayat, ni Del Parson

Disiembre 2–8

1–3 Juan; Judas

“Ti Dios Isu ti Ayat”

Ania dagiti tema ken pagtuladan a kasla napateg kenka bayat ti panangbasam iti 1–3 Juan ken Judas? Kasano a mausarmo dagitoy a pangtulong kadagiti miembro ti klasem?

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem ti sumagmamano a miembro ti klase a mangibinglay kadagiti tema wenno masinunuo a kinapudno a napateg kadakuada bayat ti panagadalda kadagiti Surat da Juan ken Judas. Ania dagiti mensahe manipud kadagitoy a surat ti kangrunaan nga adda pakainaiganda kadakuada ken dagiti pamiliada?

icon iti panangisuro

Isuro ti Doktrina

1 Juan 1:5–10; 2:3–11; 3:1–3; 4:7–21; 5:1–3

Ti Nailangitan nga Ama ken ni Jesucristo ket naan-anay a pagwadan ti lawag ken ayat.

• Kasano a matulongam dagiti sursuruam a mangilasin iti lawag ken ayat ti Nailangitan nga Ama iti biagda? Mabalinmo a rugian babaen ti panangisurat kadagiti balikas a lawag ken ayat iti pisarra. Idawatmo kadagiti miembro ti klase nga ibinglayda dagiti umuna a balikas nga umay iti panunotda no panunotenda maipapan kadagitoy dua a balikas. Mabalinmo a bingayen ti klase kadagiti grupo ket dutokam ti tunggal grupo iti maysa kadagiti sumaganad a binatog iti nasantuan a kasuratan: 1 Juan 1:5–10; 2:3–11; 3:1–3; 4:7–12; 4:16–21; 5:1–3. Mabalin a sukisoken dagiti grupo dagitoy a bersikulo para kadagiti pakakitaan iti lawag ken ayat ti Dios ken para kadagiti banag a maaramidtayo tapno ipakita ti panagayattayo para iti Dios ken dagiti annakna. Kalpasanna mabalin nga ibinglay iti klase dagiti miembro manipud iti tunggal grupo no ania ti nasarakanda. Mabalinmo pay nga awisen dagiti miembro ti klase a mangibinglay kadagiti padas idi nariknada ti lawag ken ayat ti Nailangitan nga Ama.

• Kasano a matulongam dagiti miembro ti klase nga agutob maipanggep iti naespirituan a lawag iti biagda? Mabalinmo nga awisen dagiti miembro ti klase a kumitada iti silaw iti kisame wenno ti lawag a sumrek iti tawa ket ibinglayda no ania ti ammoda maipapan iti pisikal a lawag. Kasano a maipada ti pisikal a lawag iti naespirituan a lawag? Nalabit a mabalinmo a sukisoken ti Salmo 27:1; Juan 1:4–5; 1 Juan 1:5–7; 3 Nephi 11:11; Doktrina ken Katulagan 88:6–13 ket sapulem dagiti nayon a nauneg a pannakaammo ken pannakaawat [insights] iti no kasano nga ipaay ti Dios ken ti Anakna ti lawag iti biagtayo. Mabalin pay nga ibinglay dagiti miembro ti klase dagiti padasda idi sinapul ken inawatda ti naespirituan a lawag iti biagda.

• Mabalin a maay-ayo dagiti miembro ti klase nga aggigiddan nga agkanta wenno agdengngeg iti kanta maipapan iti lawag, kas iti “The Lord Is My Light” (Hymns,num.  89). Ania ti isuro ti kanta maipapan iti no kasano a mayarig ti Apo iti maysa a lawag? Ti palawag ni Elder Robert D. Hales iti “Dagiti Nainayon a Resources” ket makaited iti ad-adu pay a nauneg a pannakaammo ken pannakaawat [insights] maipapan iti no kasano ti pananggun-od iti dakdakkel a lawag iti biagtayo.

1 Juan 2:18–23, 26–28; 4:3; 2 Juan 1:7–11; 3 Juan 1:9–11; Judas

Nasken a patibkerentayo dagiti bagbagitayo a maibusor kadagiti palso a pannursuro.

• Sumagmamano kadagiti miembro ti klasem wenno dagiti ipatpategmo ti mangikarkarigatan a mangsaranget kadagiti palso a pannursuro a mangpakapuy iti pammatida. Mabalin a makatulong kadakuada a mangsursuro no ania ti insuro da Juan ken Judas maipapan iti ikakalilis iti kinapudno. Ibilangmo ti panangawis iti kagudua ti klase nga agsukisok kadagiti panangiladawan maipapan kadagiti palso a pannursuro wenno ikakalilis iti kinapudno iti 1 Juan 2:18–23, 26–28; 4:3; 2 Juan 1:7–11; 3 Juan 1:9–11 ken ti sabali pay a kagudua ti klase nga agsukisok kadagiti kasta a panangiladawan iti Judas. Wenno mabalin a sapulem dagiti sungbat kadagiti saludsod kas kadagitoy: Kasano nga ilawlawag da Juan ken Judas maipapan iti anticristo? (kitaen met iti Pangiwanwan iti Nasantuan a Kasuratan, “Anticristo,” scriptures.lds.org). Adda kadi ania man kadagitoy a bersikulo a kasla mayaplikar kadagiti pannubok a sanguentayo iti agdama? Kasano a mapapigstayo dagiti bagbagitayo a maibusor kadagiti palso a pannursuro?

• Aramaten ni Judas ti makaay-ayo nga imahe a pangiladawan kadagiti palso a pannursuro, wenno dagiti “agsao iti dakes maipapan kadagiti banag a dida ammo” (Judas 1:10). Mabalin nga awisem ti sumagmamano a miembro ti klase nga agdrowing iti pisarra iti sumagmamano kadagiti imahe a nailadawan iti Judas 1:12–13 idinto a pugtuan dagiti dadduma pay a miembro ti klase no ania a ragup ti balikas ti idrowdrowing ti tao. Kasano nga ibagi dagitoy nga imahe dagiti palso a mannursuro ken anticristo? Kas pagarigan, kasano nga agparnuay dagiti makadadael a kannawidan iti “batbato a nailemmeng iti pagdadayaan[tayo] iti ayat”? Ania ti maaramidtayo tapno mapatibkertayo ti bagbagitayo a maibusor kadagiti “manguy-uyaw”? (kitaen iti Judas 1:18–21). Apay a mabalin nga insingasing ni Judas a “kaasian[tayo]” (Judas 1:22) dagiti manguyaw iti ebanghelio?

1 Juan 5

No aramatentayo ti pammati ken ni Cristo ket mayanak iti Dios, maparmektayo ti lubong.

• Maysa kadagiti aktibidad iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panagsukisok iti 1 Juan 5 a mangtakuat no kasano a maparmektayo ti lubong. Nalabit a mabalinmo nga awisen dagiti miembro ti klase a mangibinglay no ania ti nasarakanda ket isuratda daytoy iti pisarra. (Mabalin a kayatmo ti mangted kadakuada iti sumagmamano a kanito iti klase a mangrebyu biit iti kapitulo.) Nalabit a mabalin nga ibinglay dagiti miembro ti bukodda a pagarigan dagiti tao a mariknada a nakaaramid kadagiti panagkagumaan a mangparmek iti lubong.

  maysa a pamilia a nakaparintumeng nga aggigiddan nga agkarkararag

  Matulongannatayo ti ebanghelio ni Jesucristo a mangsarak iti talna iti nariribuk a lubong.

3 Juan 1:1–4

Umay ti rag-o no tulongantayo dagiti dadduma a “magna iti kinapudno.”

• Nalabit nga adda dagiti tao iti klasem a mabalin a mangisarita no ania ti panagrikna ni Juan idi kinunana nga “awan ti dakdakkel a panagrag-o[na]” no di ti pannakangngegna a ni Gayo (maysa kadagiti “annakna”) ket magmagna iti kinapudno. Mabalin a mangted pagimbagan kadagiti miembro ti klase manipud iti pannakangngegda iti padas ti tunggal maysa. Mabalinmo nga irugi babaen ti aggigiddan a panangbasayo iti 3 Juan 1:1–4 ken dagiti nasantuan a kasuratan iti “Dagiti Nainayon a Resources.” Ania ti isuro kadatayo dagitoy nasantuan a kasuratan maipapan iti pagtaudan ti pudno a rag-o? Mabalin nga isarita dagiti miembro ti klase maipapan no kasano ti nariknada kas nagannak, kas misionario, kas lider ti Simbaan, wenno mannursuro idi ammoda a dagiti tao a sinuruanda ket magmagna iti kinapudno. Mabalinmo a kasarita ti sumagmamano a miembro ti klase sakbay ti klase ket kiddawem kadakuada a mangitugot iti ladawan dagiti tao a tinulonganda a mayasideg ken ni Cristo ket isaritada maipapan kadagiti padasda.

icon iti panagsursuro

Yallukoy ti Panagsursuro iti Pagtaengan

Kasano a makaisuro kadatayo dagiti simbolo kas kadagiti dragon, nagpayak nga ayup, ken napapatay a kordero maipapan iti plano ti Dios para kadagiti annakna? Mangawis kadagiti miembro ti klase a mangpanunot maipapan iti daytoy a saludsod bayat ti panagadalda iti Apocalipsis iti sumaruno a sumagmamano a lawas.

resources icon

Dagiti Nainayon a Resources

1–3 Juan; Judas

Ti lawag ti mangpapanaw iti kinasipnget.

Insuro ni Elder Robert D. Hales no kasano a mapapanawtayo ti kinasipnget manipud iti biagtayo ket magnatayo iti lawag:

“Idi ubingak, agluganak no kua iti bisikletak nga agawid manipud iti panagsanayko iti basketbol iti sardam. Isingdanko no kua ti bassit a nagsukog a kasla peras a generator iti ligay ti bisikletak. Kalpasanna no agpedalak, agbalin ti ligay a maysa a bassit a rotor, a mangparnuay iti elektrisidad ket mangted iti maysa a silnag ti lawag. Simple daytoy ngem epektibo a mekanismo. Ngem nasken nga agpedalak tapno gumana daytoy! Naadalko a dagus a no isardengko ti agpedal iti bisikletak, agsardeng no kua nga agsilaw daytoy. Nasursurok pay a no ‘siaanepak a makiraman’ [DkK 58:27] iti panagpedal, agbalin a naranraniag ti lawag ket mapukaw ti kinasipnget iti sanguanak.

“Ti panangpaadda iti naespirituan a lawag ket aggapu iti inaldaw a naespirituan a panagpedal. Aggapu daytoy iti panagkararag, panagadal iti nasantuan a kasuratan, panagayuno, ken panagserbi—manipud iti panagbiag iti ebanghelio ken panagtungpal kadagiti bilin” (“Out of Darkness into His Marvelous Light,” Ensign, Mayo 2002, 71).

Ti nasantuan a kasuratan maipapan iti panangtulong kadagiti dadduma a magna iti kinapudno.

• Deuteronomio 6:6–7

• Dagiti Proverbio 22:6

• Juan 4:36

• 1 Taga Tesalonica 3:9

• Mosiah 4:14–15

• Alma 17:1–2; 26:11–37

• Doktrina ken Katulagan 18:10–16; 50:22

Panangpadur-as iti Panangisurotayo

Ikararagam dagiti miembro ti klasem. Kas iti panangikararagan ti Mangisalakan ken ni Pedro (kitaen iti Lucas 22:32), nasken nga ikararagam babaen iti nagan dagiti sursuruam, nga agkalkalikagum a makaawat kadagiti masinunuo a kasapulanda. No aramiden daytoy, ti Nailangitan nga Ama ket “mangisagana iti puspusoda” (Alma 16:16) ken makatulong kenka a mangammo no ania ti isuro tapno maipaay dagiti kasapulanda (kitaen iti Panangisuro iti Wagas ti Mangisalakan, 6).