“Disyembre 23–29. Pinadayag 12–22: ‘Ang Magamadaugon Makapanag-iya Niining Maong Panulundon’” Dali, Sunod Kanako—Alang sa Sunday School: Bag-ong Tugon 2019 (2019)
“Disyembre 23–29. Pinadayag 12–22,” Dali, Sunod Kanako—Alang sa Sunday School: 2019
Ang Mahangturong Siyudad, ni Keith Larson
Disyembre 23–29
Pinadayag 12–22
“Ang Magamadaugon Makapanag-iya Niining Maong Panulundon”
Unsa may gitudlo sa gubat tali sa maayo ug dautan nga gihulagway diha sa Pinadayag mahitungod sa kaimportante sa pagsunod kang Kristo dinhi sa yuta? Human mamalandong niining baruganan, ikonsiderar ang mga panginahanglan sa mga sakop sa imong klase. Unsa nga mga kamatuoran gikan sa Pinadayag ang makatabang kanila sa paghimo og matarung nga mga pagpili?
Irekord ang Imong mga Impresyon
Dapita ang Pagpaambit
Samtang ang mga sakop sa imong klase moabut sa katapusan sa ilang pagtuon sa Bag-ong Tugon, awhaga sila nga ipaambit ang ilang mga hunahuna mahitungod sa Bag-ong Tugon. Sa unsang paagi nga ang ilang pagtuon sa kasulatan nakapalig-on sa ilang mga pagpamatuod?
Itudlo ang Doktrina
Nabuntog nato si Satanas “pinaagi sa dugo sa Kordero, ug pinaagi sa pulong sa [atong] pagpamatuod.”
-
Ang pagkahibalo mahitungod sa Gubat sa Langit makatabang kanato nga mas masabtan ang kinabuhi dinhi sa yuta. Ang mga sakop sa klase mahimong mobasa sa Hubad ni Joseph Smith, Pinadayag 12:7–11 (diha sa Giya ngadto sa mga Kasulatan) ug motino kon giunsa nato pagbuntog si Satanas ug ang iyang mga panon didto sa Gubat sa Langit. Unsa ang ubang mga ideya nga atong maangkon gikan sa mga entry bahin sa Gubat sa Langit diha sa Giya ngadto sa mga Kasulatan? Unsa ang atong makat-unan nga makatabang kanato sa pagbuntog sa kaaway atol sa atong mortal nga kinabuhi?
-
Unsay gipasabut nga ang Kordero “gipatay sa wala pa ang pagkatukod sa kalibutan”? (Pinadayag 13:8; tan-awa usab sa Pinadayag 5:6). Ikonsiderar ang pagtabang sa mga sakop sa inyong klase nga makakita og mga tubag niini nga pangutana pinaagi sa pagbasa sa Mosiah 3:13 ug Moises 7:47 isip usa ka klase. Unsay gipasabut sa pagbuntog ni Satanas “pinaagi sa dugo sa Kordero”? (Pinadayag 12:11).
Kinahanglan gayud nga ipalayo nato ang atong kaugalingon gikan sa pagkadautan sa kalibutan.
-
Dili gayud nindot ang pagbasa mahitungod sa pagkadautan sa Babelon ug sa pagkapukan niini diha sa Pinadayag 17–18, apan makatabang kini tungod kay ang Babelon mahimong usa ka simbolo sa dautan nga kalibutan nga atong gipuy-an karon. Siguro mahimo nimong bahinon kining mga kapitulo diha sa ginagmay nga mga grupo sa mga sakop sa klase ug hangyoa sila nga mangita og mga tubag sa mga pangutana nga sama niini: Nganong ang mga tawo madani man sa Babelon, o sa pagka-kalibutanon? Nganong makuyaw ang Babelon? Unsay mahitabo sa Babelon? Unsa nga mga pasidaan ang gihatag ni Juan nga makatabang kanato nga malikayan ang kapalaran sa Babelon?
-
Human mabasa ang Pinadayag 18:4, ang mga sakop sa klase mahimong maghisgot kon unsaon nila “paggawas sa” Babelon ug “aron dili makaapil sa iyang kasal-anan.” Pananglitan, unsa nga mga kasulatan o mga mensahe gikan sa mga lider sa Simbahan ang nakatabang kanato nga makabatok sa mga tintasyon sa Babelon, o sa kalibutan? Ikonsiderar ang pagbasa sa pamahayag ni Elder Quentin L. Cook diha sa “Dugang nga mga Kapanguhaan.” Unsa nga mga ideya ang mapaambit sa mga sakop sa klase kon unsaon paggamit sa duha ka baruganan nga gihisgutan ni Elder Cook? Sa unsang paagi nga kita “mogawas” sa Babelon? (tan-awa, pananglit, DP 133:12–14). Unsay atong mahimo aron sa pag-awhag sa uban sa pagbuhat sa ingon?
Makapangandam kita alang sa Ikaduhang Pag-anhi sa Ginoo ug sa Adlaw sa Paghukom.
-
Ang Ikaduhang Pag-anhi ni Jesukristo kasagarang gitawag og “dako ug makalilisang nga adlaw sa Ginoo” (Joel 2:31), ug base sa Pinadayag 19–20, morag maayo kana nga paghulagway. Ikonsiderar ang pagsulat diha sa pisara sa mga panghitabo nga gihulagway diha sa Pinadayag 19:5–20:15. Dapita ang mga sakop sa klase sa pagpangita sa mga bersikulo nga naghulagway niining mga panghitabo. Nganong kini nga mga panghitabo gitawag man og dako ug makalilisang? Unsa ang atong makat-unan gikan niining mga bersikulo mahitungod sa Manluluwas ug niadtong kinsa mosunod Kaniya? Unsay atong mabuhat karon aron malakip niadtong kinsa magmaya atol sa Iyang pag-anhi?
-
Aron maawhag ang usa ka panaghisgutan mahitungod sa basahon sa kinabuhi, mahimo nimong dapiton ang mga sakop sa klase sa paghimo og yano nga basahon pinaagi sa pagpilo og piraso nga papel ngadto sa ikaupat ka bahin. Mahimo dayon silang mobasa sa Pinadayag 20:12–15, mamalandong kon unsay gusto nilang isulat bahin kanila diha sa basahon sa kinabuhi, ug isulat kadtong mga butang diha sa ilang mga basahon. (Ang mga depinisyon alang sa “basahon sa kinabuhi” makita diha sa “Dugang nga mga Kapanguhaan.”) Unsay atong bation kon tawagon kita sa atubangan sa trono sa Dios karon? Ikonsiderar ang paggamit sa mensahe ni Elder Jörg Klebingat nga “Masaligon nga Moduol sa Trono sa Dios” (Liahona, Nob. 2014, 34–37) isip kabahin sa panaghisgutanay. Mahimo usab ninyong ribyuhon ang mensahe ni Elder Jeffrey R. Holland nga “Busa, Kamo Kinahanglan Magmahingpit—sa Katapusan” (Liahona, Nob. 2017, 40–42). Unsay matampo niining mga mensahe ngadto sa panaghisgutan mahitungod sa pagpangandam alang sa Adlaw sa Paghukom?
Kon matinud-anon kita, mapanalanginan kita og celestial nga himaya.
-
Bisan kon ang ulahing mga adlaw gipanagna nga mapuno sa pagkadautan ug kakuyaw, ang ganti nga nakita ni Juan alang sa mga matinud-anon mas molabaw pa gayud sa kalisdanan nga nag-una niini. Aron matabangan ang mga sakop sa klase nga masusi kining nindot nga konklusyon sa Pinadayag, mahimo nimo silang dapiton sa pagribyu sa Pinadayag 21:1–22:5, nga mangita sa mga pulong nga nakapadasig kanila nga maningkamot alang sa celestial nga himaya. Unsa nga mga saad ang gihatag ngadto sa mga matinud-anon? Sa unsang paagi nga kining paghulagway makatabang kanato kon mag-atubang kita sa atong kasamtangang mga hagit ug mga pagsulay?
Awhaga ang Pagkat-on diha sa Panimalay
Aron madasig ang mga sakop sa klase nga magtuon sa Basahon ni Mormon sunod tuig—sa indibidwal nga paagi ug uban sa ilang mga pamilya—ipaambit ang pipila niining propetikanhong mga saad.
Presidente Gordon B. Hinckley: “Sa walay pagduha-duha ako mosaad ninyo nga kon ang matag usa ninyo [mobasa sa Basahon ni Mormon], bisan kapila pa kamo nakabasa [niini] kaniadto, dunay moabut sa inyong kinabuhi ug sa inyong mga panimalay nga dugang nga Espiritu sa Ginoo, usa ka nalig-on nga desisyon nga molakaw nga masulundon sa Iyang mga sugo, ug mas lig-ong pagpamatuod sa buhing kamatuoran sa Anak sa Dios” (“A Testimony Vibrant and True,” Ensign, Ago. 2005, 6).
Presidente Thomas S. Monson: “Mohangyo ko natong tanan nga mainampoong magtuon ug mamalandong sa Basahon ni Mormon kada adlaw. Kon buhaton nato, anaa kita sa posisyon nga makadungog sa tingog sa Espiritu, sa pagbatok sa tintasyon, sa pagbuntog sa pagduha-duha ug kahadlok, ug sa pagdawat sa tabang sa langit sa atong mga kinabuhi” (“Ang Gahum sa Basahon ni Mormon,” Liahona, Mayo 2017, 87).
Dugang nga mga Kapanguhaan
Pagpili sa pagkamatarung kay sa pagkadautan sa Babelon.
Si Elder Quentin L. Cook nagtudlo:
“Dili kita makalikay sa kalibutan. Ang pagpuyo nga mag-inusara dili mao ang tubag. Sa usa ka positibong bahin, ang atong kontribusyon ngadto sa kalibutan kabahin sa atong hagit ug gikinahanglan kon atong palambuon ang atong mga talento. … Ang mga miyembro sa Simbahan kinahanglan nga maapil sa kalibutan sa positibo nga paagi. Nan unsaon man nato sa pagbalanse sa panginahanglan nga positibong motampo sa kalibutan ug dili monunot ngadto sa mga sala sa kalibutan? (Tan-awa sa DP 25:10; DP 59:9.) Duha ka baruganan ang makahimo og talagsaong kalainan.
“1. Ipahibalo sa mga tawo nga usa ikaw ka mapasaligong Santos sa Ulahing mga Adlaw. …
“2. Magmasaligon ug magsunod sa imong mga gituohan” (“Lessons from the Old Testament: In the World but Not of the World,” Ensign, Peb. 2006, 54–55).
Ang basahon sa kinabuhi.
Mga Taga-Filipos 4:3; Pinadayag 3:5; 17:8; 2 Nephi 29:11; Alma 5:58; Doktrina ug mga Pakigsaad 127:6–7, 9; 128:6–7.
“Sa usa ka pagsabut ang basahon sa kinabuhi mao ang kinatibuk-an nga mga hunahuna ug mga lihok sa tawo—ang talaan sa iyang kinabuhi. Bisan pa niana, ang mga kasulatan usab nagpasabut nga usa ka langitnon nga talaan gitipigan sa matinud-anon, lakip sa ilang mga ngalan ug mga kasaysayan sa ilang matarung nga mga binuhatan” (Giya ngadto sa mga Kasulatan, “Basahon sa kinabuhi”).
Pagpalambo sa Atong Pagtudlo
OK ra nga moingon og “Wala ko kahibalo.” “Samtang natural lang nga gustong motubag sa matag pangutana, sa pipila ka mga sitwasyon angay nga moingon lang og, ‘Wala ko kahibalo. Atong tun-an kana nga pangutana sa atong kaugalingon niini nga semana, ug ato kanang hisgutan sa sunod higayon’” (Pagtudlo sumala sa Pamaagi sa Manluluwas, 24). Dayon hangyoa ang mga sakop sa klase sa pagsiksik sa mga kasulatan ug sa ubang mga kapanguhaan sa Simbahan alang sa mga tubag.