“Disyembre 9–15. Pinadayag 1–11: ‘Ang Himaya, ug ang Gahum, ngadto … sa Kordero hangtud sa Kahangturan’” Dali, Sunod Kanako—Alang sa Sunday School: Bag-ong Tugon 2019 (2019)
“Disyembre 9–15. Pinadayag 1–11,” Dali, Sunod Kanako—Alang sa Sunday School: 2019
Ang Maayong Magbalantay, ni Del Parson
Disyembre 9–15
Pinadayag 1–11
“Ang Himaya, ug ang Gahum, ngadto … sa Kordero hangtud sa Kahangturan”
Ang pagdawat og espiritwal nga mga impresyon makatabang kanimo nga makaila nga ang Espiritu Santo gusto nga motudlo kanimo. Ang pagrekord ug pagsunod niadtong mga impresyon nagpakita nga imo kining gihatagan og bili ug nagtinguha nga makadawat pa og dugang.
Irekord ang Imong mga Impresyon
Dapita ang Pagpaambit
Samtang magsugod ka og panaghisgutan mahitungod sa Pinadayag, mahimong makatabang ang pagdapit sa mga sakop sa klase nga ipaambit ang bisan unsang background nga impormasyon nga ilang nakat-unan mahitungod sa basahon sa Pinadayag atol sa ilang personal o pamilya nga pagtuon. Mahimo ninyong maribyu og dungan ang pipila ka impormasyon nga gihatag diha sa Dali, Sunod Kanako—Alang sa mga Indibidwal ug mga Pamilya o basaha og dungan gikan sa Giya ngadto sa mga Kasulatan nga mga entry alang sa “Juan, Anak nga Lalaki ni Zebedeo” ug “Pinadayag ni Juan.”
Itudlo ang Doktrina
Si Jesukristo mao ang Buhi nga Anak sa Buhi nga Dios.
-
Sukad sa paggamit ni Juan og larawan ug simbolismo diha sa Pinadayag 1 sa paghulagway sa nabanhaw nga Manluluwas ug sa Iyang mga aksyon, ang pagtuon niining kapitulo usa ka mahinungdanong paagi sa pag-ugmad og hugot nga pagtuo nga Siya buhi ug nga Siya naggiya sa Iyang Simbahan. Tingali ang mga sakop sa klase mahimong mosulat diha sa pisara og pipila ka pulong gikan sa Pinadayag 1 nga naglakip sa larawan o simbolismo ug mopaambit kon unsay gitudlo sa matag usa niini mahitungod kang Jesukristo. Pananglitan, unsay atong makat-unan gikan niining mga simbolo kon giunsa paggiya ni Kristo ang Iyang Simbahan karon? Sa unsang paagi nga ang paghulagway ni Juan sa Manluluwas ikatandi ngadto sa usa nga anaa sa Doktrina ug mga Pakigsaad 110:1–4?
Atong mabuntog ang mga hagit pinaagi kang Jesukristo.
-
Sama kita sa mga Santos nga gisulatan ni Juan sa dili mominus sa usa ka paagi: mag-atubang kita og kalisdanan. Dapita ang mga sakop sa klase sa pagsiksik sa Pinadayag 2–3 ug sa pagtino sa mga pagsulay nga giatubang sa mga Santos sa panahon ni Juan, ug tabangi sila nga makasabut nga si Jesukristo nahibalo sa mga pagsulay ug mga kalig-on sa matag branch. Siguro mahimo usab silang mopaambit og mga kasinatian diin ilang gibati nga nahibalo ang Manluluwas sa ilang talagsaong mga kahimtang. Unsa nga tambag ang gihatag sa Ginoo ngadto sa mga Santos nga makatabang usab kanato nga mabuntog ang atong mga panglimbasug?
-
Niining sama nga mga kapitulo mihimo ang Ginoo og makapadasig nga mga saad ngadto niadtong kinsa makabuntog. Mahimo nimong dapiton ang mga sakop sa klase nga magtinabangay nga magpares sa pagsiksik sa Pinadayag 2–3; 7:13–17 aron makit-an ang mga saad sa Ginoo. Tingali mahimo usab silang magdrowing og mga hulagway nga magrepresentar sa pipila niining mga saad, dayon ipaambit sa klase kon unsay ilang makit-an. Sa unsang paagi nga kining mga saad nakapadasig kanila nga magpadayon sa pagpaningkamot nga mabuntog ang ilang kaugalingong mga pagsulay ug mga kahuyang?
Si Jesukristo mao lamang ang makahimong posible sa plano sa Langitnong Amahan.
-
Ang usa ka object lesson makatabang ba sa imong klase nga makasabut sa simbolismo diha sa Pinadayag 5 mahitungod sa Manluluwas nga miabli sa gisilyuhan nga basahon? Mahimong magdala ka og makaon diha sa usa ka gikandaduhan nga sudlanan aron ipaambit sa klase. Sa dili pa magklase, sekreto nimong ihatag sa usa ka tawo ang yawe sa kandado. Ihulagway ngadto sa klase kon unsay anaa sa sulod sa sudlanan, ug tuguti ang pipila ka sakop sa klase sa pagsulay og abli sa kahon sa dili pa kini ablihan sa tawo nga adunay yawe. Dayon ang klase mahimong motandi niining object lesson ngadto sa Pinadayag 5. Ang mga pangutana nga sama niini mahimong makatabang: Sa unsang paagi nga ang kaluwasan sa mga anak sa Langitnong Amahan sama sa gikandaduhan nga sudlanan o sa gisilyuhan nga basahon? Nganong si Jesukristo lamang ang Usa nga makaabli sa mga timri [seal]? (tan-awa sa kinutlo diha sa “Dugang nga mga Kapanguhaan”). Unsa nga mga panalangin ang nagdepende sa katakus sa Manluluwas sa pag-abli sa mga timri? (tan-awa sa Pinadayag 7:14–17).
-
Sama sa nagsadya nga mga tawo nga nahisgutan diha sa Pinadayag 5, mahimo usab kita karon nga mopalanog sa atong mga tingog sa pagdayeg sa Manluluwas isip ang Usa nga takus nga motanyag kanato og kaluwasan. Tingali ang mga sakop sa klase mahimong manganta og dungan sa pipila ka paboritong mga himno sa pagdayeg mahitungod sa Manluluwas. Pananglitan, mahimong mokanta kamo og “Glory to God on High [Himaya sa Kahitas-an]” (Hymns, nu. 67) ug motino sa mga kamatuoran nga gitudlo niining himno mahitungod kang Jesukristo. Unsa nga mga kasinatian ang nakatabang kanato sa pagbaton og mga pagpamatuod bahin niining mga kamatuoran? Unsa nga mga pagkasusama ang atong makita tali sa mga mensahe sa atong mga himno ug sa mga pamahayag diha sa Pinadayag 5:9–14? Sa unsang paagi nga mas magamit nato ang mga himno diha sa panimalay ug sa simbahan sa pagsimba ug pagdayeg sa Ginoo?
Sa dili pa ang Ikaduhang Pag-anhi, ang Ginoo mopundok sa mga matarung ug moandam kanila sa pagpuyo uban Kaniya.
-
Ang Pinadayag 7 naghulagway sa mga panghitabo bahin sa “ikaunom nga timri,” ang uban niini nagrepresentar sa atong panahon. Motubag usab kini sa pangutana diha sa katapusan sa kapitulo 6: “Kay nahiabut na ang dakong adlaw sa iyang kapungot; ug kinsa bay arang makabang-bang niini?” (bersikulo 17). Tingali ang mga sakop sa klase mahimong mangita sa mga tubag niining pangutana diha sa kapitulo 7. Ania ang pipila sa ubang mga pangutana nga mahimo nilang hisgutan: Nganong gilangay man sa Ginoo ang paglaglag sa yuta sulod sa usa ka panahon? Sa unsang paagi nga ang mga ordinansa ug mga pakigsaad “[mo]bugkos [kanato] ngadto sa adlaw sa diha nga ang kasuko sa Dios mabu-bu”? (DP 1:9). Unsay atong mabuhat sa pag-andam sa kalibutan alang sa Ikaduhang Pag-anhi? Ang Doktrina ug mga Pakigsaad 1:4–23; 77:8–11 mahimong makahatag og dugang nga mga ideya.
Ang panan-awon ni Juan nagtudlo kon giunsa sa pagluwas sa Langitnong Amahan ang Iyang mga anak.
-
Ang ubang mga sakop sa klase mahimong makabantay nga ang basahon sa Pinadayag lisud sabton. Mahimong makatabang kon ilang ikonsiderar ang mga sinulat ni Juan diha sa konteksto sa plano sa Langitnong Amahan sa paghimaya sa Iyang mga anak. Samtang magbasa ang mga sakop sa klase sa Pinadayag 1–11 diha sa panimalay, mahimong nakit-an nila ang mga kamatuoran nga nakatabang kanila nga masabtan ang plano sa Langitnong Amahan alang sa Iyang mga anak (tan-awa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya). Dapita sila sa pagpaambit kon unsa ang ilang nakit-an. Mahimo usab nga mabantayan nila nga makatabang ang pagribyu sa seksyon diha sa “Dugang nga mga Kapanguhaan” nga giulohan og “Mga Kasulatan mahitungod sa plano sa kaluwasan.” Awhaga ang mga sakop sa klase nga magpadayon sa pagpangita alang sa mga kasulatan nga nagtudlo sa mga kamatuoran mahitungod sa plano sa kaluwasan samtang magbasa sila sa nahabilin sa Pinadayag, ug hatagi sila og oportunidad atol sa umaabut nga mga leksyon nga mapaambit kon unsay ilang makit-an.
Awhaga ang Pagkat-on diha sa Panimalay
Hangyoa ang mga sakop sa klase sa paghunahuna sa ilang paborito nga tradisyon sa Pasko. Dapita sila sa pagribyu sa outline karong semanaha alang sa mga ideya kon sa unsang paagi nga ilang masentro ang ilang pagsaulog diha ni Jesukristo.
Dugang nga mga Kapanguhaan
Mga kasulatan mahitungod sa plano sa kaluwasan.
Pag-ula ni Jesukristo
Kinabuhi sa Wala pa Dinhi sa Yuta
Mortal nga kinabuhi
Kinabuhi human dinhi sa yuta
Si Jesukristo lamang ang makaula alang kanato.
Naghulagway sa mga panghitabo sa kinabuhi sa wala pa dinhi sa yuta, si Elder Jeffrey R. Holland nagtudlo:
“Si Kristo miboluntaryo sa pagtahud sa moral nga kabubut-on sa tanang mga tawo bisan og Siya miula alang sa ilang mga sala. Sa maong paagiha, Iyang ibalik ngadto sa Amahan ang tanang himaya alang sa maong matubsanong gugma.
“Kining walay kinutuban nga Pag-ula ni Kristo nahimong posible tungod kay (1) Siya lamang ang walay sala nga tawo sukad nga nagpuyo niini nga yuta ug busa dili ubos sa espirituhanon nga kamatayon nga resulta gikan sa sala, (2) Siya lamang ang Bugtong Anak sa Amahan ug busa nakabaton og mga hiyas sa pagkadios nga nakahatag Kaniya og gahum sa pisikal nga kamatayon, ug (3) Siya lamang ang bugtong mapainubsanon kaayo ug andam didto sa konseho sa kinabuhi nga wala pa dinhi sa yuta nga i-orden nang daan ngadto niana nga pag-alagad” (“Ang Pag-ula ni Jesukristo,” Liahona, Mar. 2008, 35).
Pagpalambo sa Atong Pagtudlo
Gamita ang mga kasulatan ug ang mga pulong sa mga propeta sa ulahing mga adlaw. “Ang Ginoo misugo kanato nga ‘motudlo sa usag usa sa doktrina sa gingharian’ (DP 88:77) ug sa paggamit sa mga kasulatan aron ‘magtudlo sa mga baruganan sa [Iyang] ebanghelyo’ (DP 42:12). Ang mga kasulatan ug mga pulong sa mga propeta ug mga apostoles sa ulahing mga adlaw mao ang tinubdan sa mga kamatuoran nga atong gitudlo” (Pagtudlo sumala sa Pamaagi sa Manluluwas, 21).