“Disyembre 2–8. 1–3 Juan; Judas: ‘Ang Dios Gugma’” Dali, Sunod Kanako—Alang sa Sunday School: Bag-ong Tugon 2019 (2019)
“Disyembre 2–8. 1–3 Juan; Judas,” Dali, Sunod Kanako—Alang sa Sunday School: 2019
Hingpit nga Gugma, ni Del Parson
Disyembre 2–8
1–3 Juan; Judas
“Ang Dios Gugma”
Unsa nga mga tema ug mga sumbanan ang mahinungdanon alang kanimo samtang nagbasa ka sa 1–3 Juan ug Judas? Unsaon nimo sa paggamit niini aron matabangan ang mga sakop sa imong klase?
Irekord ang Imong mga Impresyon
Dapita ang Pagpaambit
Dapita ang pipila ka sakop sa klase sa pagpaambit sa mga tema o piho nga mga kamatuoran nga mahinungdanon ngadto kanila samtang nagtuon sila sa mga Epistola [Sulat] nila ni Juan ug Judas. Unsa ang mga mensahe gikan niining mga sulat ang labing mahinungdanon ngadto kanila ug sa ilang mga pamilya?
Itudlo ang Doktrina
1 Juan 1:5–10; 2:3–11; 3:1–3; 4:7–21; 5:1–3
Ang Langitnong Amahan ug si Jesukristo hingpit nga mga ehemplo sa kahayag ug gugma.
-
Sa unsang paagi ka makatabang niadtong imong gitudloan nga makaila sa kahayag ug gugma sa Langitnong Amahan diha sa ilang kinabuhi? Mahimo nimong sugdan pinaagi sa pagsulat sa mga pulong nga kahayag ug gugma diha sa pisara. Hangyoa ang mga sakop sa klase nga ipaambit ang unang mga pulong nga mosantup sa hunahuna kon maghunahuna sila niining duha ka pulong. Mahimo nimong bahinon ang klase ngadto sa mga grupo ug i-assign ang matag grupo sa usa sa mosunod nga mga tudling sa kasulatan: 1 Juan 1:5–10; 2:3–11; 3:1–3; 4:7–12; 4:16–21; 5:1–3. Ang mga grupo mahimong mosiksik niining mga bersikulo para sa mga ebidensya sa kahayag ug gugma sa Dios alang sa mga butang nga atong mabuhat sa pagpakita sa atong gugma alang sa Dios ug sa Iyang mga anak. Ang mga sakop gikan sa matag grupo mahimo dayon nga mopaambit ngadto sa klase kon unsa ang ilang nakit-an. Mahimo usab nimong dapiton ang mga sakop sa klase sa pagpaambit og mga kasinatian sa dihang mibati sila sa kahayag ug gugma sa Langitnong Amahan.
-
Unsaon nimo sa pagtabang ang mga sakop sa klase nga mamalandong sa espiritwal nga kahayag diha sa ilang kinabuhi? Mahimo nimong dapiton ang mga sakop sa klase nga motan-aw sa suga diha sa kisame o sa kahayag nga nag-agi sa bintana ug ipaambit kon unsay ilang nahibaloan mahitungod sa pisikal nga kahayag. Sa unsang paagi nga ang pisikal nga kahayag sama sa espiritwal nga kahayag? Tingali mahimo nimong masiksik ang Salmo 27:1; Juan 1:4–5; 1 Juan 1:5–7; 3 Nephi 11:11; Doktrina ug mga Pakigsaad 88:6–13 ug mangita alang sa dugang nga mga ideya kon giunsa paghatag sa Dios ug sa Iyang Anak og kahayag sa atong kinabuhi. Ang mga sakop sa klase mahimo usab nga mopaambit og mga kasinatian sa dihang sila nagtinguha ug nakadawat og espiritwal nga kahayag diha sa ilang kinabuhi.
-
Ang mga sakop sa klase mahimong malingaw nga dungan nga manganta o maminaw sa usa ka awit mahitungod sa kahayag, sama sa “The Lord Is My Light [Ang Dios Kahayag Ko]” (Hymns, nu. 89). Unsa ang gitudlo sa awit kon sa unsang paagi nga ang Ginoo sama sa usa ka kahayag? Ang pamahayag ni Elder Robert D. Hales diha sa “Dugang nga mga Kapanguhaan” makatanyag og dugang nga mga ideya kon unsaon pagbaton og dugang nga kahayag sa atong kinabuhi.
1 Juan 2:18–23, 26–28; 4:3; 2 Juan 1:7–11; 3 Juan 1:9–11; Judas
Kinahanglan gayud natong palig-unon ang atong kaugalingon batok sa sayop nga mga pagtulun-an.
-
Ang pipila sa mga sakop sa imong klase o ang ilang mga minahal mahimong nanglimbasug sa pagsagubang sa sayop nga mga pagtulun-an nga naghulga sa ilang pagtuo. Mahimong makatabang kanila ang makat-on kon unsay gitudlo nila ni Juan ug Judas mahitungod sa apostasiya. Ikonsiderar ang pagdapit sa katunga sa klase sa pagsiksik alang sa mga paghulagway sa sayop nga mga pagtulun-an o apostasiya diha sa 1 Juan 2:18–23, 26–28; 4:3; 2 Juan 1:7–11; 3 Juan 1:9–11 ug ang laing katunga sa pagsiksik alang sa mga paghulagway diha sa Judas. O mahimo silang mangita sa mga tubag sa mga pangutana sama niini: Giunsa man pag-define nila ni Juan ug Judas ang usa ka anti-kristo? (tan-awa usab sa Giya ngadto sa mga Kasulatan, “Anti-kristo,” scriptures.lds.org). Aduna bay bisan unsa nga butang niining mga bersikulo nga daw magamit sa mga hagit nga atong giatubang karon? Unsaon man nato sa paglig-on ang atong kaugalingon batok sa sayop nga mga pagtulun-an?
-
Migamit si Judas og makapainteresado nga larawan sa paghulagway sa mini nga mga magtutudlo, o kadtong kinsa “nagapasipala sa bisan unsang butang nga dili nila masabut” (Judas 1:10). Mahimo nimong dapiton ang pipila ka sakop sa klase nga magdrowing sa pisara og pipila ka imahe nga gihulagway diha sa Judas 1:12–13 samtang ang ubang mga sakop sa klase motag-an kon unsa nga mga pulong ang gidrowing sa tawo. Sa unsang paagi nga kining mga imahe nagrepresentar sa mini nga mga magtutudlo ug mga anti-kristo? Pananglitan, sa unsang paagi nga ang dautang mga gipangbuhat nakamugna og “mga buling diha sa [atong] mga kombira sa gugma”? Unsa may atong mahimo aron mapalig-on ang atong kaugalingon batok sa “mga mayubiton [mockers]”? (tan-awa sa Judas 1:18–21). Ngano kaha nga misugyot man si Judas nga kita “adunay kapuangod” (Judas 1:22) niadtong moyubit sa ebanghelyo?
Samtang mopakita kita og hugot nga pagtuo kang Kristo ug matawo sa Dios, makabuntog kita sa kalibutan.
-
Usa sa outline karong semanaha diha sa Dali, Sunod Kanako—Alang sa mga Indibidwal ug mga Pamilya nagsugyot sa pagsiksik sa 1 Juan 5 aron madiskubrihan kon unsaon nato pagbuntog ang kalibutan. Tingali mahimo nimong dapiton ang mga sakop sa klase nga ipaambit ang unsay ilang nakit-an ug isulat kini diha sa pisara. (Mahimo nimo silang hatagan og panahon diha sa klase nga maribyu sa daklit ang kapitulo.) O mahimo nimong dapiton ang klase sa pagbasa sa mga porsyon sa mensahe ni Elder Neil L. Andersen nga “Pagbuntog sa Kalibutan” (Liahona, Mayo 2017, 58–62) ug ipaambit ang unsay ilang nakat-unan. Pananglitan, unsa nga mga ideya ang ilang naangkon gikan sa mga istorya nga gipaambit ni Elder Andersen mahitungod nila ni Presidente David O. McKay ug Elder Bruce D. Porter? Tingali ang mga sakop sa klase mahimong mopaambit sa kaugalingon nilang mga ehemplo bahin sa mga tawo kinsa ilang gibati nga nakahimo og mga paningkamot sa pagbuntog sa kalibutan.
Ang ebanghelyo ni Jesukristo makatabang kanato aron makakita og kalinaw sa gubot nga kalibutan.
Ang hingpit nga kalipay moabut samtang motabang kita sa uban nga “[m]anagsubay sa kamatuoran.”
-
Tingali adunay mga tawo sa imong klase kinsa makasaysay kon unsay gibati ni Juan sa dihang miingon siya nga siya “wala [nay] kalipay nga molabaw pa niini” kay sa makadungog nga si Gayo (usa sa iyang “mga anak”) nagsubay sa kamatuoran. Ang mga sakop sa klase mahimong makabenepisyo gikan sa pagkadungog sa mga kasinatian sa usag usa. Tingali mahimo nimong sugdan pinaagi sa pagbasa og dungan sa 3 Juan 1:1–4 ug sa mga kasulatan diha sa “Dugang nga mga Kapanguhaan.” Unsay gitudlo niining mga kasulatan kanato mahitungod sa tinubdan sa tinuod nga kalipay? Ang mga sakop sa klase mahimong maghisgot kon unsay ilang gibati isip mga ginikanan, mga misyonaryo, mga lider sa Simbahan, o mga magtutudlo sa dihang nahibalo sila nga ang mga tawo nga ilang gitudloan nanagsubay sa kamatuoran. Mahimo nimong kontakon daan ang pipila ka sakop sa klase sa dili pa magklase ug hangyuon sila nga magdala og mga litrato sa mga tawo nga ilang natabangan nga madala ngadto kang Kristo ug isulti ang ilang mga kasinatian.
Awhaga ang Pagkat-on diha sa Panimalay
Sa unsang paagi nga ang mga simbolo sama sa mga dragon, dunay pako nga mga hayop, ug gipatay nga nating mga karnero makatudlo kanato mahitungod sa plano sa Dios alang sa Iyang mga anak? Dapita ang mga sakop sa klase sa paghunahuna mahitungod niining mga pangutana samtang magtuon sila sa Pinadayag sulod sa sunod nga mga semana.
Dugang nga mga Kapanguhaan
Ang kahayag mobugaw sa kangitngit.
Si Elder Robert D. Hales nagtudlo kon unsaon nato pagbugaw ang kangitngit gikan sa atong kinabuhi ug maglakaw diha sa kahayag:
“Sa dihang bata pa ko, mosakay ko sa akong bisikleta paingon sa balay gikan sa praktis sa basketball atol sa gabii. Akong tauran og gamayng generator ang ligid sa akong bisikleta. Dayon samtang magsikad ko, ang ligid mopatuyok sa gamayng rotor, nga makahatag og elektrisidad ug mopagawas og usa ra, ka dan-ag sa kahayag. Usa kadto ka yano apan epektibong mekanismo. Apan kinahanglan kong mosikad aron mosalir kini! Dali nakong nakat-unan nga kon mohunong ko sa pagsikad sa akong bisikleta, mapalong ang kahayag. Akong nakat-unan usab nga kon ako ‘matinguhaon nga moapil’ [DP 58:27] sa pagsikad, ang suga mas mohayag pa ug ang kangitngit diha sa akong atubangan mahanaw.
“Ang paghimo og espiritwal nga kahayag moabut tungod sa inadlaw nga espiritwal nga pagsikad. Moabut kini tungod sa pag-ampo, pagtuon sa mga kasulatan, pagpuasa, ug pagserbisyo—tungod sa pagsunod sa ebanghelyo ug pagtuman sa mga sugo” (“Out of Darkness into His Marvelous Light,” Ensign, Mayo 2002, 71).
Mga kasulatan mahitungod sa pagtabang sa uban nga magsubay sa kamatuoran.
Pagpalambo sa Atong Pagtudlo
Pag-ampo alang sa mga sakop sa imong klase. Ingon nga ang Manluluwas nag-ampo alang kang Pedro (tan-awa sa Lucas 22:32), kinahanglan nimong i-ampo ang matag pangalan niadtong imong gitudloan, nga magtinguha nga makasabut sa ilang piho nga mga panginahanglan. Sa pagbuhat nimo sa ingon, ang Langitnong Amahan mo-“andam sa ilang mga kasingkasing” (Alma 16:16) ug motabang kanimo nga mahibalo kon unsay itudlo aron matubag ang ilang mga panginahanglan (tan-awa sa Pagtudlo sumala sa Pamaagi sa Manluluwas, 6).