“23–29 diciembre. Apokalipsis 12–22: “Ani taaq’axoq u, taareechani chixjunil a’ k’a’aq re ru a’in” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2019 (2019)
“23–29 diciembre. Apokalipsis 12–22,” Kim, Taaqehin—Choq’ re li Dominkil Tzoleb’aal: 2019
Li junelikil tenamit, xb’aan laj Keith Larson
23–29 diciembre
Apokalipsis 12–22
“Ani taaq’axoq u, taareechani chixjunil a’ k’a’aq re ru a’in”
Rik’in li resilal li pleet li kiwan sa’ xyanqeb’ li us rik’in li ink’a’ us li yeeb’il resil sa’ Apokalipsis, k’a’ru nakatzol chirix lix aajelil ru xtaaqenkil li Kristo arin sa’ li ruchich’och’? Chirix xk’oxlankil li na’leb’ a’in, k’oxla k’a’ru neke’raj ru li komon sa’ laa tzoleb’aal. K’a’ru li yaalil na’leb’ sa’ Apokalipsis li taatenq’anq reheb’ chixsik’b’al ru li tiik?
Xtz’iib’ankil li nakak’oxla
Xkanab’ankileb’ chi wotzok
Naq eb’ li komon sa’ laa tzoleb’aal neke’wulak sa’ xraqik lix tzolomeb’ chirix li Ak’ Chaq’rab’, waklesiheb’ xch’ool chixwotzb’al k’a’ru neke’xk’oxla chirix li Ak’ Chaq’rab’. Chan ru naq xkawob’resiik lix nawomeb’ xch’ool rik’in xtzolb’aleb’ li loq’laj hu?
Xk’utb’al li tzolʼlebʼ
Xoonumta sa’ xb’een laj Satanas “sa’ xk’ab’a’ lix kikʼel li Karneer, jo’ ajwi’ rik’in li aatin kiqaye chi yaal.”
-
Rik’in tzolok chirix li pleet sa’ choxa, mas wi’chik naru naqataw ru li yu’am sa’ li ruchich’och’. Eb’ li komon sa’ li tzoleb’aal te’ruuq chirilb’al ru Apokalipsis 12:7–11 re xk’eeb’al reetal chan ru naq xoonumta sa’ xb’een laj Satanas ut eb’ lix teep sa’ li pleet sa’ choxa. K’a’ chik ru li na’leb’ naqataw rik’in li k’a’ru tz’iib’anb’il chirix li pleet sa’ choxa sa’ li K’utul Raqal reheb’ li Loq’laj Hu ? K’a’ chik ru naqatzol li naru tooxtenq’a chi numtaak sa’ xb’een laj tza sa’ li qayu’am a’in?
-
K’a’ru xyaalalil li “Karneer kikamsiik”? (Apokalipsis 13:8; chi’ilmanq ajwi’ Apokalipsis 5:6). Re xtenq’ankileb’ li komon sa’ laa tzoleb’aal chixtawb’al xsumenkil li patz’om a’in, naru taaye reheb’ naq te’ril ru Mosiah 3:13 ut Moises 7:47 jo’ tzoleb’aal? K’a’ru xyaalalil xq’axb’al ru laj Satanas “sa’ xk’ab’a’ lix kik’el li Karneer”? (Apokalipsis 12:11).
Tento taqisi qib’ rik’in lix maa’usilal li ruchich’och’.
-
Ink’a’ mas sa rilb’al ru resilal lix maa’usilal Babilonia ut lix t’anik sa’ Apokalipsis 17–18, a’ut naqak’ul qana’leb’ rik’in a’an, xb’aan naq Babilonia naru nawan choq’ reetalil li maa’us aj ruchich’och’ li wanko wi’ anajwan. Maare naru taajacheb’ ru li jun ch’ol a’in sa’ xyanqeb’ li kok’ ch’uut chi komon sa’ li tzoleb’aal, ut taaye reheb’ naq te’xsik’ xsumenkileb’ li patz’om jo’ a’in: K’a’ut naq wankeb’ li neke’aaleek chixtaaqenkil Babilonia, malaj li ruchich’och’il na’leb’? K’a’ut naq xiwxiw Babilonia? K’a’ru tixk’ul Babilonia? K’a’ru li qatijb’al kixk’e laj Jwan re naq ink’a’ taqak’ul li k’a’ru kixk’ul Babilonia?
-
Chirix rilb’al ru Apokalipsis 18:4, eb’ li komon sa’ li tzoleb’aal maare te’raj aatinak chirix chan ru naru “neke’el chaq” sa’ Babilonia ut ink’a’ “te’okenq sa’ lix maakeb’.” Qayehaq, k’a’ruheb’ li loq’laj hu ut raatineb’ laj jolominel sa’ li Iglees li xoohe’xtenq’a chixq’axb’al ru li aaleek li nachal chaq sa’ Babilonia, malaj li ruchich’och’? Naru teeril li video “Atrévete a lo correcto aunque solo estés” malaj “Apartémonos del mundo” (LDS.org), malaj teeril ru li raatin li Elder Quentin L. Cook sa’ “Xkomon chik li k’anjeleb’aal.” K’a’ru li na’leb’ neke’ru chixwotzb’al li komon sa’ li tzoleb’aal chirix chan ru xb’aanunkil xkab’ichal li na’leb’ yeeb’il xb’aan li Elder Cook? Chan ru naq “noko’el chaq” sa’ Babilonia? (chi’lmanq, jo’ eetalil, Tz. ut S. 133:12–14). K’a’ru naru taqab’aanu re xtenq’ankileb’ li qas qiitz’in chib’aanunkil ajwi’ chi jo’kan?
K’a’ru naru taqab’aanu re xkawresinkil qib’ choq’ re li xkab’ xk’ulunik li Qaawa’, ut li raqb’a-aatin sa’ roso’jik?
-
Li xkab’ xk’ulunik li Qaawa’ wan naq li “xnimal ru kutan ut q’axal xuwajel” yeeb’il re (Joel 2:31), ut rik’in li tz’iib’anb’il sa’ Apokalipsis 19–20, yaal ajwi’ a’an. Naru taatz’iib’a chiru li pizarron junjunq li k’a’ru taak’ulmanq jo’ yeeb’il resil sa’ Apokalipsis 19:5–20:15. B’oqeb’ li komon sa’ li tzoleb’aal chixtawb’aleb’ li raqal li neke’xye resil li taak’ulmanq. K’a’ut naq xnimal ru ut xuwajel nayeeman re li kutan a’an? K’a’ru naqatzol sa’eb’ li raqal a’in chirix li Kolonel ut eb’ li neke’taaqenk re? K’a’ru naru taqab’aanu anajwan re toowanq sa’ xyanqeb’ li te’saho’q sa’ xch’ool sa’ xkutankil lix k’ulunik?
-
Re xtikib’ankil li aatinak chirix lix huhil li yu’am, naru taaye reheb’ li komon sa’ li tzoleb’aal naq te’xyiib’ jun li hu rik’in xb’asb’al jun perel li hu sa’ kaahib’ b’asal. Chirix a’an te’ruuq chirilb’al ru Apokalipsis 20:12–15, te’xk’oxla li k’a’ru te’raj naq taatz’iib’amanq chirixeb’ sa’ xhuhil li yu’am, ut te’xtz’iib’a a’an sa’ lix huheb’. (Natawman xkomon chik na’leb’ chirix “xhuhil li yu’am” sa’ “Xkomon chik li k’anjeleb’aal.”) K’a’ raj ru taqeek’a wi ta toob’oqe’q chiru lix k’ojarib’aal li Dios sa’ li kutan a’in? Naru taak’oxla roksinkil li raatin li Elder Jörg Klebingat, “Li nach’ok-ib’ rik’in xk’ojarib’aal li Dios rik’in kawil ch’oolej” (Jolomil ch’utub’aj-ib’ re octubre 2014) jo’ jun raqal li seraq’. Naru ajwi’ taanumsi li raatin li Elder Jeffrey R. Holland, “Tz’aqalaq eere eeru—junaq kutan” (Jolomil ch’utub’aj-ib’ re octubre 2017). Chan ru naq eb’ li aatin a’in nokohe’xtenq’a chi aatinak chirix xkawresinkil qib’ choq’ re xkutankil li raqb’a-aatin?
Wi tiiko chi paab’aank, too’osob’tesiiq rik’in li choxahil loq’alil.
-
Us ta yeeb’il xb’aaneb’ li profeet naq li roso’jikeb’ li kutan te’wanq chi nujenaq rik’in maa’usilal ut xiw, lix q’ajkamunkileb’ li tiikeb’ chi paab’ank li kiril laj Jwan nim wi’chik chiru li rahilal li taawanq rub’elaj a’an. Re xtenq’ankileb’ li komon chixtz’ilb’al rix li chaq’al ru esilal sa’ roso’jik li hu Apokolipsis, kanab’eb’ chixnumsinkil Apokalipsis 21:1–22:5, ut chixsik’b’aleb’ li ch’ol aatin li neke’xwaklesi xch’ooleb’ chixsik’b’al li choxahil loq’alil. K’a’ru li yeechi’inb’il reheb’ li tiikeb’ chi paab’ank? Chan ru naq li resil a’in nokoxtenq’a naq naqileb’ li ch’a’ajkilal ut lix yalb’al qix sa’eb’ li kutan a’in?
Xb’oqb’aleb’ chi tzolok sa’ kab’l
Re xwaklesinkil xch’ooleb’ li komon sa’ li tzoleb’aal re te’xtzol lix Hu laj Mormon sa’ li chihab’ taachalq—rik’in tijok ut sa’ junkab’al—naru taawotz junjunq reheb’ li profeetil yeechi’ihom a’in.
Li Awa’b’ej Gordon B. Hinckley kixye: “Chi maak’a’ li wiib’ank ch’oolej ninyeechi’i eere naq wi chejunjunqalex teril ru lix Hu laj Mormon, maak’a’ naxye jarub’aq sut ak xeril, te’chalq sa’ lee yu’am ut sa’ lee rochoch xkomon chik lix Musiq’ li Qaawa’, ut k’eek’oqeb’ chi kaw lee ch’ool chixpaab’ankil lix chaq’rab’, ut jun xnawom eech’ool kawaq chik chirix lix yaalalil li Ralal li Dios” (“Un testimonio vibrante y verdadero,” Liahona, agosto 2005, 6).
Li Awa’b’ej Thomas S. Monson kixye: “Nintz’aama re li junjunq qe naq rajlal kutan taqatzol ut taqatz’il rix lix Hu Laj Mormon rik’in jun tij sa’ qach’ool. Rik’in xb’aanunkil a’an, tooruuq chirab’inkil lix yaab’ xkux li Musiq’ej, chixkuyb’al li aaleek, chi numtaak sa’ xb’een li wiib’ank ch’oolej ut li xuwak, ut chixk’ulb’al xtenq’ li choxa sa’ li qayu’am” (“Lix wankil lix Hu laj Mormon,” Jolomil ch’utub’aj-ib’ re abril 2017).
Xkomon chik li k’anjeleb’aal
Xsik’b’al ru li tiikilal chiru lix maa’usilal Babilonia.
Li Elder Quentin L. Cook kixk’ut:
“Ink’a’ nokoru chi elk chaq sa’ li ruchich’och’. Ink’a’ nak’anjelak xtz’apb’al qib’ sa’ kab’l. Xb’een wa, jun k’anjel k’eeb’il qe a’an xchaab’ilob’resinkil li ruchich’och’, ut aajel ru a’an re taqanimob’resi li qaseeb’al. … Eb’ li komon sa’ li Iglees tento te’tz’aqonq sa’ li ruchich’och’ choq’ re li chaab’ilal. Chi jo’kan, chan ru naru nokok’anjelak re xchaab’ilob’resinkil li ruchich’och’, ut ink’a’ taqakanab’ qib’ chi q’unb’esiik xb’aaneb’ lix maak li ruchich’och’? (Chi’ilmanq Tz. ut S. 25:10; Tz. ut S. 59:9.) Wankeb’ wiib’ chi na’leb’ li toohe’xtenq’a sa’ a’in.
“1. K’e chi nawmank naq xaqxookat chi paab’ank jo’ aj Santil Paab’anel sa’ Roso’jikeb’ li Kutan. …
“2. Kawaq aach’ool, ut chayu’ami li k’a’ru nakapaab’ ” (“Lecciones del Antiguo Testamento: Estar en el mundo sin ser del mundo,” Liahona, febrero 2006, 40–41).
Lix huhil li yu’am.
Filipenses 4:3; Apokalipsis 3:5; 17:8; 2 Nefi 29:11; Alma 5:58; Tzol’leb’ ut Sumwank 127:6–7, 9; 128:6–7.
“Naru nayeeman naq lix Huhil li Yu’amej a’an chixjunil lix k’oxlahom ut xb’aanuhom junaq winq malaj ixq—resilal lix yu’am. A’ut sa’eb’ li loq’laj hu, yeeb’il naq wan jun li esil tz’iib’anb’il sa’ choxa chirix li tiikeb’ chi paab’ank, wan wi’ lix k’ab’a’eb’ ut resil lix chaab’il b’aanuhomeb’ ” (K’utul Raqal reheb’ li Loq’laj Hu, “Xhuhil li yu’amej”).
Xchaab’ilob’resinkil li qak’utum
Us ajwi’ xyeeb’al “ink’a’ ninnaw.” “Us ta naqaj xnawb’al lix sumenkil chixjunileb’ li patz’om, wan naq us ka’ajwi’ xyeeb’al, “Ink’a’ ninnaw. Chiqak’oxla li patz’om qajunes chiru li xamaan a’in, ut naru too’aatinaq chirix sa’ li tzolok chal re” ” (Li k’utuk jo’ li Kolonel, 24). Chirix a’an, ye reheb’ li komon naq te’sik’oq sa’eb’ li loq’laj hu ut xkomoneb’ chik k’anjeleb’aal re li Iglees re xtawb’al xsumenkil.