li Jesukristo naq kixjultika li evangelio sa’ li ruchich’och’ reheb’ li musiq’ej.

Li Kristo kijultikan aatin sa’ li ruchich’och’ reheb’ li musiq’ej, xb’aan laj Robert T. Barrett

25 noviembre–1 diciembre

1 ut 2 Pedro

“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”

Chijultiko’q aawe naq laa k’anjel a’an xtzolb’aleb’ li kristiaan, ink’a’ yal xk’utb’al jun tzolom. Naq nakawileb’ ru lix hu laj Pedro, k’oxlaheb’ chixjunqaleb’ li komon sa’ li tzoleb’aal. K’a’ruheb’ li na’leb’ li te’tenq’anq reheb’ chixkawob’resinkil lix paab’aaleb’?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tz’iib’aheb’ li jolomil aatin sa’ 1 Pedro ut 2 Pedro chiru li pizarron. Kanab’eb’ li komon sa’ li tzoleb’aal chixnumsinkil chiru junpaat eb’ li ch’ol a’in, ut kanab’eb’ chixtz’iib’ankil rub’eleb’ li jolomil aatin eb’ li aatin malaj raqal sa’eb’ li ch’ol a’in li xwulak chiruheb’. Chirix a’an, oksiheb’ li tz’iib’ahom a’in re xb’oqb’aleb’ li komon chixwotzb’al lix na’leb’eb’ chirib’ileb’ rib’.

reetalil li k’utuk

Xk’utb’al li tzolʼlebʼ

1 Pedro 1:3–9; 2:19–24; 3:14–17; 4:12–19

Naru nintaw xsahil inch’ool sa’ xkutankil li yale’k wix ut li rahilal.

• Re xtenq’ankileb’ li ani nakatzoleb’ re te’xtaw ru chi us ut te’xyu’ami lix yehom laj Pedro chirix xtawb’al li sahil ch’oolejil sa’ xyi li ch’a’ajkilal, naru taak’ehatq kok’ hu reheb’ li komon sa’ li tzoleb’aal, ut taaye reheb’ naq te’xtz’iib’a junaq ch’ol aatin sa’ 1 Pedro 1:3–9; 2:19–24; 3:14–17; 4:12–19 li taaruuq chi tenq’ank reheb’ sa’ xk’utankil lix yalb’aleb’ rix malaj li ch’a’ajkilal. Chi junpak’al li ch’ina hu, naru te’xtz’iib’a resil jun sut naq xe’yale’ rix a’ut xe’reek’a li tuqtuukilal malaj li sahil ch’oolejil. Eb’ li ani te’raj naru te’xwotz lix ch’ol aatineb’ ut li k’a’ru xe’xk’ul, ut chirix a’an eb’ li komon sa’ li tzoleb’aal naru te’aatinaq chirix li k’a’ru xe’xtzol.

• Jun chik na’leb’ re xnumsinkil li raatin laj Pedro sa’ 1 Pedro 1:3–9; 2:19–24; 3:14–17; 4:12–19, a’an xpatz’b’al reheb’ li komon sa’ li tzoleb’aal naq te’xk’oxla anihaq li neke’xnaw ru, li yoo chixnumsinkil jun xyalb’al rix. Kanab’eb’ chiru junpaat chixtz’iib’ankil jun li ch’ina hu choq’ re li kristiaan a’an, b’ar wi’ te’xjultika li yaalil na’leb’ wankeb’ sa’eb’ li raqal a’in li taawaklesinq xch’ool li kristiaan a’an (chi’ilmanq ajwi’ Tz. ut S. 121:1–8; 123:17). Chirix a’an, eb’ li komon sa’ li tzoleb’aal te’ruuq chi aatinak chirix li yaalil na’leb’ xe’xsik’ ru.

1 Pedro 1:13–20; 2:1–12

Bʼoqbʼilo re toowanq jo’ “xtenamit li Dios.”

• Jo’ komon sa’ lix Iglees li Kristo, b’oqb’ilo chixtaaqenkil li Jesukristo. A’in naraj naxye naq li k’a’ru naqasik’ ru, jalanq wi’ rik’in li sik’b’il ru xb’aan li jun siir chik. Chan ru naq li raatin laj Pedro sa’ 1 Pedro 1:13–20; 2:1–12 tixtenq’aheb’ li tzolb’ileb’ aab’aan re te’xtaw ru chi mas wi’chik lix k’anjel li Kolonel, ut re te’raj wank jo’ a’an? Maare taaruuq taab’oqeb’ li komon sa’ li tzoleb’aal chixtz’ilb’aleb’ rix li raqal a’in, re xtawb’al k’a’ru xyaalalil li wank choq’ “xtenamit li Dios” (1 Pedro 2:10), ut chirix a’an te’aatinaq chirix li k’a’ru xe’xtaw. Naru taach’olob’ naq li aatin “b’oqb’il chi ok sa’ li reechanihom li Dios” sa’ jalan chik aatinob’aal naraj naxye “sik’b’il ru” malaj “k’uulanb’il.” K’a’ru naxk’ut a’in chirix k’a’ru nareek’a li Dios chiqix, ut chirix chan ru naraj naq toowanq?

1 Pedro 3:18–20; 4:6

Li evangelio jultikanb’il chiruheb’ li kamenaq re naq taaruuq taaraqe’q aatin chirixeb’ chi tiik.

• Sa’ li xb’een xhu laj Pedro, natawman xka’ch’inal li aatin sa’ li Santil Hu li na’aatinak chirix lix xikik li Jesukristo sa’ li ruchich’och’ reheb’ li musiq’ej chirix xkamik—jun na’leb’ li natawman ru chi us wi’chik rik’in li k’a’ru k’utb’esinb’il sa’ roso’jikeb’ li kutan. Re xtenq’ankileb’ li komon sa’ li tzoleb’aal chixtawb’al chik xna’leb’eb’ chirix li ruchich’och’ reheb’ li musiq’ej, naru taapatz’ reheb’ naq te’rileb’ ru li raqal a’in ut te’xtz’iib’a chiru li pizarron li k’a’ru xe’xtzol: Jwan 5:25; 1 Pedro 3:18–20; 4:6; Alma 40:7–14, 21; Tzol’leb’ ut Sumwank 138:11–32.

  Eb’ li aatin li neke’tawman sa’ “Xkomon chik li k’anjeleb’aal” neke’xk’ut naq lix xikik li Kristo sa’ li ruchich’och’ reheb’ li musiq’ej kiwan chi tawb’il ru ut k’utb’il, ink’a’ ka’ajwi’ xb’aaneb’ lix apostol, xb’aaneb’ aj b’an wi’ laj tzolonel re li Kristiaanil najter. Rik’in xtawb’al ru naq kisache’ li na’leb’ a’in sa’ li nimla q’etok paab’ank ut kik’ojob’aman wi’chik sa’eb’ li kutan a’in, eb’ li komon sa’ li tzoleeb’al naru taakawob’resiiq xnawomeb’ xch’ool chirix laj Jose Smith ut lix k’ojob’ankil wi’chik li evangelio.

• Li aatinak chirix 1 Pedro 3:18–20; 4:6 naru tixk’eheb’ xch’ool li komon chixb’aanunkil chi anchal wi’chik xch’ooleb’ li k’anjel re resilal li junkab’al ut re li santil ochoch. Re xb’aanunkil a’in, naru taajach ru li tzoleb’aal sa’ oxib’ jachal, ut taak’e re li junjunq jachal jun reheb’ li patz’om a’in chirix xkolb’aleb’ li kamenaq: K’a’ru lix k’anjel li Kolonel sa’ xkolb’aleb’ li kamenaq? K’a’ru xk’anjeleb’ li ani xe’kam—eb’ li tiikeb’ chi paab’ank ut eb’ li ke’kam chi maak’a’ xnawomeb’ chirix li evangelio? K’a’ru li qak’anjel laa’o? Ye re li junjunq jachal naq te’xtz’il rix 1 Pedro 3:18–20; 4:6; Tzol’leb’ ut Sumwank 128:17–18; 138:11–32, 57–59, re xtawb’al xsumenkil lix patz’om. Ye re li junjunq jachal naq te’xwotz li k’a’ru xe’xtzol, ut k’oxla xwotzb’al li raatin li Elder D. Todd Christofferson, malaj jun reheb’ li video li neke’tawman sa’ “Xkomon chik li k’anjeleb’aal.” K’a’ru li osob’tesink xqak’ul naq xootz’aqon sa’ xk’amb’al li kolb’a-ib’ rik’ineb li qaxe’ qatoon li kamenaqeb’?

2 Pedro 1:1–11

Rik’in lix wankil li Jesukristo, naru taqak’ul li qadiosilal.

• Re xwaklesinkileb’ xch’ool li nakatzoleb’ chi wank jo’ li Jesukristo, naru taaye reheb’ naq te’xk’e reetal k’a’ruheb’ li chaab’ilal re li Kristo li yeeb’ileb’ resil sa’ 2 Pedro 1:1–11. Naru taatz’iib’aheb’ li chaab’ilal a’in chiru li pizarron ut taapatz’ reheb’ li komon sa’ li tzoleb’aal naq te’xye k’a’ru xyaalalileb’. Chirix a’an, eb’ li komon sa’ li tzoleb’aal te’ruuq chi aatinak chirix chan ru naq xk’ulb’al jun reheb’ li chaab’ilal a’in nokoxtenq’a chixk’ulb’al li jun ch’ol chik chaab’ilal. Kanab’eb’ chiru junpaat chixk’oxlankil b’arwan reheb’ li chaab’ilal a’in te’raj xk’ulb’al chi q’axal wi’chik (chi’ilmanq ajwi’ Predicad mi Evangelio, 133).

jun chaq’al ru kemb’il t’ikr

Li junjunq chi chaab’ilal re li Kristo li naqak’ul nokoxtenq’a chixkemb’al jun musiq’ejil t’ikr re wank choq’ tzolom.

reetalil li tzolok

Xb’oqb’aleb’ chi tzolok sa’ kab’l

Maare taawaj xch’olob’ankil naq eb’ li komon sa’ li tzoleb’aal te’xtzoleb’ li hu tz’iib’anb’ileb’ xb’aan laj Jwan chiru li xamaan taachalq. Eb’ li hu a’in neke’ru chixtuqub’ankil ru li b’alaq’il na’leb’ chirix li Jesukristo, ut neke’ru chixkawob’resinkil lix nawom qach’ool chirix naq yo’yo chi yaal li Kolonel.

reetalil li k’anjeleb’aal

Xkomon chik li k’anjeleb’aal

1 ut 2 Pedro

Li k’anjel re xkolb’aleb’ li kamenaq naxk’ut xyaalal lix k’anjel li Jesukristo.

Li Elder D.  Todd Christofferson kixk’ut:

“Chalen najter, eb’ li neke’tzolok chirix li Kristiaanil xch’a’ajko’ chiruheb’ xsumenkil li patz’om a’in: K’a’ru te’xk’ul li q’axal k’iheb’ li ke’wan xyu’am ut ke’kam chi maak’a’ xnawomeb’ chirix li Jesus? Rik’in lix k’ojob’ankil lix evangelio li Jesukristo, k’utb’il wi’chik chiqu chan ru naq neke’kole’ li kamenaq, ut chan ru naq li Dios a’an “jun li Dios tz’aqal re ru ut tiik xna’leb’, ut jo’kan ajwi’ jun li Dios aj uxtaan” [Alma 42:15].

“Naq toj kiwan sa’ li yu’am a’in, li Jesus kixye chi junxilaj naq taajultikanq aatin chiruheb’ li kamenaq [chi’ilmanq Jwan 5:25]. Laj Pedro kixye qe naq a’in kik’ulman chirix lix kamik li Kolonel chiru krus, naq toj maji’ kiwakli chi yo’yo [chi’ilmanq 1 Pedro 3:18–19]. Li Awa’b’ej Joseph F. Smith kiril chi k’utb’esinb’il naq li Kolonel kirula’ani li ruchich’och’ reheb’ li kamenaq [chi’ilmanq Tz. ut S. 138:30, 33]. …

“Lix anchalil qach’ool re xkolb’aleb’ li kamenaq, ut li kutan ut tumin naqatoj re xb’aanunkil a’an, neke’k’anjelak re xk’utb’al xyaalal qapaab’aal chirix li Jesukristo. Naxk’ut xyaalal rik’in nimla wankilal lix diosilal ut lix k’anjel a’an. Naxch’olob’ xyaalal, xb’een, lix waklijik li Kristo chi yo’yo; xkab’, naq q’axal wan xwankil lix tojb’al rix li maak xb’aan; rox, naq ka’ajwi’ rik’in a’an nachal li kolb’a-ib’; xkaa, naq a’an kixk’ut k’a’ru na’ajman ru choq’ re li kolb’a-ib’; ut ro’, naq a’an taak’ulunq wi’chik” (“La redención de los muertos y el tesimonio de Jesús,” Liahona, noviembre 2000, 10).

Xtz’iib’ahomeb’ li najteril aj tzolonel re li Kristiaanil (jun malaj wiib’ cient chihab’ chirix li Kristo) chirix li jultikank aatin chiruheb’ li kamenaq.

Laj Origen: “Naq ki’ok [li Jesus] choq’ aamej [musiq’ej] chi ink’a’ tz’apb’il ru xb’aan li tz’ejwalej, kiwan sa’ xyanqeb’ li aamej a’an li maak’a’eb’ xtib’eleb’ re xtz’apb’aleb’ ru, ut kixjaleb’ xch’ool jo’ k’ihal li ke’ajok re xpaab’ankil” (sa’ li hu The Ante-Nicene Fathers, k’uub’anb’il xb’aan laj Alexander Roberts ut laj James Donaldson [1907], 4:448).

Laj Hermas: “Eb’ li apostol ut eb’ laj tzolonel li ke’jultikank re lix k’ab’a’ li Ralal li Dios, chirix naq ke’war sa’ xwankil ut xpaab’aal li Ralal li Dios, ke’jultikan ajwi’ aatin reheb’ li ke’war xb’een wa chiruheb’ ” (sa’ li hu The Apostolic Fathers, jaltesinb’il ru xb’aan laj J. B. Lightfoot [1898], 472).

Eb’ li video chirix li k’anjel re resilal li junkab’al (chi’ilmanq LDS.org).

• “El corazón de ellos está ligado a ustedes”

• “Todas las familias de la tierra”

• “¿Haré mi parte?”

Xchaab’ilob’resinkil li qak’utum

Taakʼut li “k’a’ut.” “Wan naq eb’ li komon sa’ li tzoleb’aal—jo’eb’ li saaj—neke’raj xnawb’al chan ru naq eb’ li xb’eenil na’leb’ re li evangelio neke’k’anjelak sa’ xyu’ameb’ malaj k’a’ut naq tento te’xpaab’ jun li taqlahom. A’b’anan, wi neke’xtaw ru lix junelikil k’uub’anb’il na’leb’ li qaChoxahil Yuwa’ choq’ re xsahileb’ xch’ool li ralal xk’ajol a’an, saqen chik sa’ xk’a’uxleb’ li rajb’aleb’ li xb’eenil na’leb’ ut li taqlahom, ut naniman li rajomeb’ chi paab’ank” (Li k’utuk jo’ li Kolonel, 20).