li Jesukristo chi sa rilob’aal naq chunchu rik’in jun ch’ina al

Tz’aqal rahok, xb’aan laj Del Parson

2–8 diciembre

1–3 Jwan; Judas

“Li Dios a’an rahok”

K’a’ruheb’ li na’leb’ li nakak’eheb’ reetal naq nakawil ru 1–3 Jwan ut Judas? Chan ru naru taawoksiheb’ re xtenq’ankileb’ li komon sa’ laa tzoleb’aal?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ junjunq li komon sa’ li tzoleb’aal chixwotzb’aleb’ li aatin malaj li yaalil na’leb’ li xwulak chiruheb’ naq xe’xtzoleb’ li hu re laj Jwan ut laj Judas. K’a’ru li esil wankeb’ sa’eb’ li hu a’in li mas xk’anjelak choq’ reheb’ a’an ut reheb’ lix junkab’aleb’?

reetalil li k’utuk

Xk’utb’al li tzolʼlebʼ

1 Jwan 1:5–10; 2:3–11; 3:1–3; 4:7–21; 5:1–3

Li qaChoxahil Yuwa’ ut li Jesukristo neke’xk’ut rik’in xb’aanuhomeb’ chi tz’aqal re ru li saqen ut li rahok.

• Chan ru naru nakatenq’aheb’ li ani nakatzoleb’ re te’xk’e reetal lix saqenkil ut lix rahom li qaChoxahil Yuwa’ sa’ xyu’ameb’? Naru taatikib’ rik’in xtz’iib’ankil li aatin saqen ut rahok chiru li pizarron. Ye reheb’ li komon sa’ li tzoleb’aal naq te’xwotz li xb’een aatin li nachal sa’ xk’a’uxleb’ naq neke’rileb’ li wiib’ chi aatin a’in. Taaruuq taajach ru li tzoleb’aal sa’ kok’ ch’uut, ut re li junjunq ch’uut taak’e jun reheb’ li raqal a’in sa’ li Santil Hu: 1 Jwan 1:5–10; 2:3–11; 3:1–3; 4:7–12; 4:16–21; 5:1–3. Sa’eb’ li ch’uut te’ruuq chixtz’ilb’aleb’ rix li raqal a’in re xtawb’al reetalil lix saqenkil ut lix rahom li Dios, ut li k’a’ru naru taqab’aanu re xk’utb’al qarahom choq’ re li Dios ut choq’ reheb’ li ralal xk’ajol. Chirix a’an, eb’ li komon sa’ li junjunq ch’uut te’ruuq chixwotzb’al rik’in li tzoleb’aal li k’a’ru xe’xtaw. Naru ajwi’ taab’oqeb’ li komon sa’ li tzoleb’aal chixwotzb’al li k’a’ru xe’xk’ul li xe’reek’a wi’ lix saqen ut lix rahom li qaChoxahil Yuwa’.

• Chan ru naru nakatenq’aheb’ li komon sa’ li tzoleb’aal chixk’oxlankil li musiq’ejil saqen sa’ lix yu’ameb’? Naru taaye reheb’ li komon sa’ li tzoleb’aal naq te’ril jun li saqen sa’ li tzoleb’aal, malaj li saqen yoo chi ok sa’ rilob’aal li kab’l, ut te’xwotz k’a’ru neke’xnaw chirix li saqen a’an. Chan ru naq li musiq’ejil saqen chanchan li saqen a’an? Maare naru teetz’il rix Salmos 27:1; Jwan 1:4–5; 1 Jwan 1:5–7; 3 Nefi 11:11; Tzol’leb’ ut Sumwank 88:6–13, ut teesik’ chik eena’leb’ chirix chan ru naq li Dios ut li Ralal neke’xk’e li saqen sa’ li qayu’am. Eb’ li komon te’ruuq ajwi’ chixwotzb’al li k’a’ru xe’xk’ul naq xe’xsik’ ut xe’xk’ul li musiq’ejil saqen sa’ lix yu’ameb’.

• Maare eb’ li komon taawulaq chiruheb’ xb’ichankil sa’ komonil malaj rab’inkil jun li b’ich chirix li saqen, jo’ “Laa’at lin saqen,” (Eb’ li B’ich, 47). K’a’ru naxk’ut chiqu li b’ich a’in chirix chan ru naq li Qaawa’ chanchan jun saqen? Li video “Elegir la luz” (LDS.org) ut li raatin li Elder Robert D. Hales sa’ “Xkomon chik li k’anjeleb’aal” naru chixk’eeb’al chik li na’leb’ chirix chan ru xk’ulb’al chik li saqen sa’ li qayu’am.

1 Jwan 2:18–23, 26–28; 4:3; 2 Jwan 1:7–11; 3 Jwan 1:9–11; Judas

Tento taqakawob’resi qib’ chiru li b’alaq’il tzol’leb’.

• Maare wankeb’ li komon sa’ laa tzoleb’aal, malaj li ani raaro xb’aaneb’, li yoo chi yale’k rix xb’aan li b’alaq’il na’leb’ li naru chixsachb’al lix paab’aaleb’. Maare us raj choq’ reheb’ xtzolb’al li k’a’ru ke’xye laj Jwan ut laj Judas chirix li q’etok paab’ank. Naru taaye re lix yijach li tzoleb’aal naq te’xsik’ resil li b’alaq’il na’leb’ ut li q’etok paab’ank jo’ yeeb’il sa’ 1 Jwan 2:18–23, 26–28; 4:3; 2 Jwan 1:7–11; 3 Jwan 1:9–11, ut lix yijach chik naq te’xsik’ li na’leb’ a’an sa’ lix hu laj Judas. Malaj ut te’ruuq chixsik’b’al xsumenkil li patz’om jo’ a’in: Chan ru naq laj Jwan ut laj Judas neke’xye resileb’ laj tz’eqtaanahom re li Kristo ? Ma wan k’a’ruhaq sa’eb’ li raqal a’in li taak’anjelaq rik’ineb’ li ch’a’ajkilal li yooko chixk’ulb’al anajwan? Chan ru naru taqakawob’resi qib’ chiruheb’ li b’alaq’il tzol’leb’?

• Laj Judas naroksi jun jaljookil ru aatin re xyeeb’al resileb’ laj tzolonel aj b’alaq’, malaj eb’ li “neke’xmajewa li k’a’aq re ru li ink’a’ neke’xnaw.” (Judas 1:10). Naru taapatz’ re junjunq komon sa’ li tzoleb’aal naq te’xyiib’ chiru li pizarron xjalam-uucheb’ li jaljookil ru aatin sa’ Judas 1:12–13, ut eb’ li jun siir chik chi komon te’ruuq chixq’ehinkil k’a’ru li jalam-uuch. Chan ru naq eb’ li jaljookil ru aatin a’in chanchaneb’ li b’alaq’il aj tzolonel, ut eb’ laj tz’eqtaanahom re li Kristo? Qayehaq, chan ru naq li b’alaq’il na’leb’ “xuutanal rilb’al naq wan sa’ qayanq sa’eb’ li qaloq’laj ninq’e”? K’a’ru naru taqab’aanu re xkawob’resinkil qib’ chiruheb’ li “te’xse’e chixjunil”? (chi’ilmanq Judas 1:18–21). K’a’ut naq kixye laj Judas naq “taqach’olob’ xna’leb’eb’ ” (Judas 1:22) li ani neke’wiib’ank xch’ool sa’ li evangelio?

1 Jwan 5

Naq naqak’anjela qapaab’aal chirix li Kristo ut nokoyo’la rik’in li Dios, naru toonumtaaq sa’ xb’een li ruchich’och’.

• Jun reheb’ li kok’ k’anjel choq’ re li xamaan a’in sa’ Kim, Taaqehin—Choq’ reheb’ li komon ut li junkab’al, a’an naq taqatz’il rix 1 Jwan 5 re xk’eeb’al reetal chan ru nokoru chi numtaak sa’ xb’een li ruchich’och’. Maare naru taaye reheb’ li komon sa’ li tzoleb’aal naq te’xwotz li k’a’ru xe’xtaw ut te’xtz’iib’a chiru li pizarron. (Maare taawaj xkanab’ankileb’ chiru junpaat chixnumsinkil wi’chik li ch’ol a’in.) Malaj ut taaruuq taaye reheb’ li wankeb’ sa’ li tzoleb’aal naq te’ril ru jun raqal li raatin li Elder Neil L. Andersen, “Numtaak sa’ xb’een li ruchich’och’ ” (Jolomil ch’utub’aj-ib’ re abril 2017) ut te’xwotz li k’a’ru xe’xtzol. Qayehaq, k’a’ru li na’leb’ neke’xk’ul rik’in li esil yeeb’il xb’aan li Elder Andersen chirix li Awa’b’ej David O. McKay ut li Elder Bruce D. Porter? Maare eb’ li komon sa’ li tzoleb’aal te’ruuq chixwotzb’al ani neke’xnaw ru li xe’xyal xq’e chi numtaak sa’ xb’een li ruchich’och’.

  jun li junkab’al yookeb’ chi tijok

  Lix evangelio li Jesukristo naru nokoxtenq’a chixtawb’al li tuqtuukilal sa’ jun li ruchich’och’ re ch’a’ajkilal.

3 Jwan 1:1–4

Nachal xsahil li qach’ool naq naqatenq’aheb’ li qas qiitz’in chi “b’eek sa’ li yaal.”

• Maare wankeb’ sa’ laa tzoleb’aal li ani neke’xtaw ru li k’a’ru kireek’a laj Jwan naq kixye naq “k’a’jo’ naq xsaho’ lix chool” sa’ rab’inkil naq laj Gayo (jun reheb’ li “ralal xk’ajol”) yoo chi b’eek sa’ li yaal. Eb’ li komon sa’ li tzoleb’aal maare te’tenq’aaq rik’in rab’inkil k’a’ru xe’xk’ul lix komoneb’. Maare naru textiklaaq rik’in rilb’al ru sa’ komonil 3 Jwan1:1–4, ut eb’ li raqal sa’eb’ li loq’laj hu li wankeb’ sa’ “Xkomon chik li k’anjeleb’aal.” K’a’ru neke’xk’ut li raqal a’in chirix b’ar tz’aqal nachal li sahil ch’oolejil? Eb’ li komon sa’ li tzoleb’aal naru neke’aatinak chirix k’a’ru xe’reek’a jo’ na’b’ej yuwa’b’ej, jo’ aj b’eresinel sa’ li Iglees, malaj jo’ aj k’utunel naq xe’xnaw naq li ani tzolb’il xb’aaneb’ yookeb’ chi b’eek sa’ li yaal. Maare naru taab’oq wiib’ oxib’ li komon rub’elaj li tzoleb’aal, ut taaye reheb’ naq te’xk’am chaq xjalam-uucheb’ li ani xe’xtenq’a chi chalk rik’in li Kristo, ut te’xye resil li k’a’ru xe’xk’ul.

reetalil li tzolok

Xb’oqb’aleb’ chi tzolok sa’ kab’l

Chan ru naq eb’ li eetalil jo’ li josq’ aj xul, eb’ li xul wankeb’ xxik’, ut eb’ li karneer li kamsinb’ileb’ neke’ru chiqatzolb’al chirix lix k’uub’anb’il na’leb’ li Dios choq’ reheb’ li ralal xk’ajol? Ye reheb’ li komon sa’ li tzoleb’aal naq te’xk’oxla li patz’om a’in naq yookeb’ chixtzolb’al li hu Apokalipsis sa’eb’ li xamaan te’chalq.

reetalil li k’anjeleb’aal

Xkomon chik li k’anjeleb’aal

1–3 Jwan; Judas

Li saqen narisi li q’ojyin.

Li Elder Robert D. Hales kixk’ut chan ru nokoru chirisinkil li q’ojyin sa’ li qayu’am ut chi b’eek sa’ saqen:

“Naq toj saajin chaq, chirix xb’atz’unkil li basketbol chi q’eq, ninsutq’i sa’ kab’l sa’ jun b’aqlaq ch’iich’. Nink’e jun ch’ina planta chiru li llanta sa’ lin b’aqlaq ch’iich’. Chi jo’kan naq yookin chi xik, lix numik li llanta naxb’eeni jun li ch’ina ch’iich’, li naxtaqla xxamlel jun ch’ina saqen. Ink’a’ nim li k’anjeleb’aal, a’ut nak’anjelak chi us. A’ut ki’ajman ru naq tintiikisi li b’aqlaq ch’iich’ re taak’anjelaq! Sa’ junpaat xintzol naq wi ninkanab’ xtiikisinkil li b’aqlaq ch’iich’, nachup li saqen. Xintzol ajwi’ naq wi “k’eeb’ilin wib’ chi anchal inch’ool” [Tz. ut S. 58:27] sa’ xtiikisinkil li b’aqlaq ch’iich’, naniman xsaqenkil li saqen, ut na’oso’ li q’ojyin li wan chiwu.

“Re xyiib’ankil li musiq’ejil saqen, na’ajman ru li musiq’ejil tiikisink wulaj wulaj. Nachal a’an rik’in li tijok, xtzolb’aleb’ li loq’laj hu, li kuyuk sa’, ut k’anjelak chiru qas qiitz’in—rik’in xyu’aminkil li evangelio ut xpaab’ankileb’ li taqlahom” (“De la oscuridad a Su luz maravillosa,” Liahona, julio 2002, 78).

Eb’ li raqal reheb’ li loq’laj hu chirix xtenq’ankileb’ li qas qiitz’in chi b’eek sa’ li yaal.

• Deuteronomio 6:6–7

• Proverbios 22:6

• Jwan 4:36

• 1 Tesalonicenses 3:9

• Mosiah 4:14–15

• Alma 17:1–2; 26:11–37

• Tzol’leb’ ut Sumwank 18:10–16; 50:22

Xchaab’ilob’resinkil li qak’utum

Tijon chirixeb’ li komon sa’ laa tzoleb’aal. Jo’ chanru naq li Kolonel kitijok chirix laj Pedro (chi’ilmanq Lukas 22:32), laa’at tento tattijoq chirixeb’ li tzolb’ileb’ aab’aan rik’in lix k’ab’a’eb’, ut taasik’ xnawb’al k’a’ru neke’raj ru. Naq nakab’aanu chi jo’kan, laa Choxahil Yuwa’ “tixkawresi xch’ooleb’ “ (Alma 16:16) ut tatxtenq’a chixnawb’al k’a’ru taak’ut re xk’eeb’al li ajb’il ru xb’aaneb’ (chi’ilmanq Li k’utuk jo’ li Kolonel, 6).