li Kristo naq yoo chixk’aak’alenkil jun teep chi karneer

Li chaab’il aj Ilol Karneer, xb’aan laj Del Parson

9–15 diciembre

Apokalipsis 1–11

“Li Karneer, chiwanq taxaq xnimal xloq’al ut xkawilal”

Wi nakak’ul li musiq’anb’il na’leb’, tatxtenq’a chixk’eeb’al reetal li k’a’ru naraj li Santil Musiq’ej chixk’utb’al chawu. Wi nakatz’iib’a ut naqataaqe li musiq’anb’il na’leb’ a’in, yookat chixk’utb’al naq naqak’e xloq’al ut naq nakawaj xk’ulb’al chik li na’leb’.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Naq neketikib’ aatinak chirix li hu Apokalipsis, maare us raj xkanab’ankileb’ li komon sa’ li tzoleb’aal chixwotzb’al k’a’ru xe’xtzol chirix li hu Apokalipsis naq yookeb’ chaq chi tzolok xjuneseb’ malaj sa’ junkab’al. Naru teeril ru sa’ komonil jun raqal li na’leb’ k’eeb’il sa’ Kim, Taaqehin—Choq’ reheb’ li komon ut li junkab’al, malaj teeril ru sa’ komonil sa’ li K’utul Raqal reheb’ li Loq’laj Hu, “Jwan, ralal laj Sebedeo” ut “Apokalipsis.”

reetalil li k’utuk

Xk’utb’al li tzolʼlebʼ

Apokalipsis 1

Li Jesukristo a’an li yo’yookil Ralal li yo’yookil Dios.

• Rik’in naq laj Jwan kiroksiheb’ li eetalil ut li jaljookil ru aatin sa’ Apokalipsis 1 re xch’olob’ankil xyaalal li Kolonel ut li kixb’aanu chirix lix waklijik chi yo’yo, us xtzolb’al li ch’ol a’in re xnimankil qapaab’aal naq yo’yo a’an, ut naq naxb’eresi lix Iglees. Maare eb’ li komon sa’ li tzoleb’aal te’ruuq chixtz’iib’ankil chiru li pizarron wiib’ oxib’ ch’ol aatin isinb’il chaq sa’ Apokalipsis 1, wan wi’ li eetalil malaj li jaljookil ru aatin, ut te’xwotz k’a’ru naxk’ut li junjunq chirix li Jesukristo. Qayehaq, k’a’ru naqatzol rik’ineb’ li eetalil a’in chirix chan ru naq li Kristo naxb’eresi lix Iglees sa’ li kutan a’in? Chan ru naq lix yehom laj Jwan chirix li Kolonel chanchan li yeeb’il sa’ Tzol’leb’ ut Sumwank 110:1–4?

Apokalipsis 2–3; 7:13–17

Naru nokonumta sa’ xb’eeneb’ li ch’a’ajkilal rik’in li Jesukristo.

• Laa’o wanko jo’eb’ laj santil paab’anel li ke’k’uluk re lix tz’iib’ahom laj Jwan, rik’in naq laa’o ajwi’ naqak’ul li ch’a’ajkilal. Ye reheb’ li komon sa’ li tzoleb’aal naq te’xtz’il rix Apokalipsis 2–3, ut te’xk’e reetal k’a’ruheb’ li ch’a’ajkilal yookeb’ chixk’ulb’al laj santil paab’anel sa’ xkutankil laj Jwan, ut tenq’aheb’ chixtawb’al ru naq li Jesukristo kixnaw k’a’ru xch’a’ajkilaleb’ ut k’a’ru xkawilaleb’ li junjunq teep. Maare te’ruuq chixwotzb’al li k’a’ru xe’xk’ul sa’ li xe’reek’a wi’ naq li Kolonel naxk’e reetal chan ru naq wankeb’. K’a’ru li na’leb’ kixk’e li Qaawa’ reheb’ laj santil paab’anel li taaruuq chi tenq’ank qe re toonumtaaq sa’ xb’een li qach’a’ajkilal?

• Sa’eb’ li ch’ol ajwi’ a’in, wan k’a’ru kixyeechi’i li Qaawa’ reheb’ li te’numtaaq. Naru taab’oqeb’ li komon sa’ li tzoleb’aal chi k’anjelak sa’ wiib’al re xtz’ilb’al rix Apokalipsis 2–3; 7:13–17 re xtawb’aleb’ lix yeechi’ihom li Qaawa’. Maare te’ruuq chixyiib’ankileb’ li jalam-uuch re xk’utb’al xyaalal junjunq li yeechi’ihom a’in, ut te’xwotz rik’in li tzoleb’aal li k’a’ru xe’xtaw. Chan ru naq eb’ li yeechi’ihom a’in neke’xtenq’aheb’ re te’xyal xq’e chi numtaak sa’ xb’eeneb’ lix yalb’aleb’ rix ut lix majelaleb’?

Apokalipsis 5

Ka’ajwi’ li Jesukristo kiru chixk’eeb’al chi uxmank lix k’uub’anb’il na’leb’ li qaChoxahil Yuwa’.

• Ma taak’anjelaq jun ch’ina k’anjel re xtenq’ankileb’ li wankeb’ sa’ laa tzoleb’aal chixtawb’aleb’ ru li eetalil sa’ Apokalipsis 5 chirix chan ru naq li Kolonel kixte li hu li wankeb’ tz’apleb’ chirix? Maare naru taak’am chaq sa’ li tzoleb’aal jun li k’uuleb’aal li tz’aptz’o rik’in laaw. Rub’elaj li tzoleb’aal, k’e xlaawil li k’uuleb’aal re jun komon. Ye reheb’ li wankeb’ sa’ li tzoleb’aal k’a’ru wan sa’ li k’uuleb’aal, ut kanab’eb’ wiib’ oxib’ li komon chixyalb’al xteeb’al li k’uuleb’aal, ut chirix a’an li ani xk’uluk re li laaw taaruuq chixteeb’al. Chirix a’an, eb’ li wankeb’ sa’ li tzoleb’aal te’ruuq chixjuntaq’eetankil li ch’ina k’anjel a’in rik’in Apokalipsis 5. Maare usaq li patz’om jo’ a’in: Chan ru naq lix kolb’aleb’ li ralal xk’ajol li qaChoxahil Yuwa’ chanchan li k’uuleb’aal li tz’aptz’o, malaj li hu li wankeb’ tz’apleb’ chirix? Kʼaʼut naq kaʼajwiʼ li Jesukristo kiru chixteeb’aleb’ li tz’apleb’? (chi’ilmanq li aatin sa’ “Xkomon chik li k’anjeleb’aal”). K’a’ruheb’ li osob’tesink li ka’ajwi’ ke’ru chi k’ehe’k wi li Kolonel wan xk’ulub’il chixteeb’aleb’ li tz’apleb’? (chi’ilmanq Apokalpisis 7:14–17).

• Jo’eb’ li ke’xjap re sa’ Apokalipsis 5, anajwan laa’o ajwi’ nokoru chixtaqsinkil xyaab’ qakux re xnimankil ru li Kolonel jo’ li jun ajwi’ li xk’ulub’ chixk’eeb’al qe li kolb’a-ib’. Maare eb’ li komon sa’ li tzoleb’aal te’ruuq chixb’ichankil sa’ komonil junjunq reheb’ li b’ich re xnimankil ru li Kolonel. Qayehaq, naru teeb’icha “Nim li Qaawa’ tz’aqal” (Eb’ li B’ich,  67), ut teek’e reetal li yaalil na’leb’ k’utb’il xb’aan li b’ich a’in chirix li Jesukristo. K’a’ru xqak’ul li nokoxtenq’a chixk’ulb’al xnawom qach’ool chirixeb’ li yaalil na’leb’ a’in? Chan ru naq li k’a’ru yeeb’il sa’eb’ li qab’ich re nimank-u chanchan li yeeb’il sa’ Apokalipsis 5:9–14? Chan ru naru taqoksi chi mas wi’chik eb’ li b’ich sa’ kab’l ut sa’ li iglees re xloq’oninkil ut xnimankil ru li Qaawa’?

Apokalipsis 7

Rub’elaj li xkab’ xk’ulunik li Qaawa’, a’an tixch’utub’eb’ li tiikeb’ xch’ool, ut tixkawresiheb’ chi wank rik’in.

• Sa’ Apokalipsis 7 na’aatinak chirix li k’a’ru taak’ulmanq chirix li “xwaq tz’apleb’,” ut sa’ a’an wan ajwi’ li kutan wanko wi’ anajwan. Naxsume ajwi’ li patz’om li natawman sa’ xraqik li ch’ol 6: “Xtaw xq’ehil li xnimal xkutankil li tojb’a-maak, ut ani taaruhanq chixkuyb’al a’an?” (raqal 17). Maare eb’ li komon sa’ li tzoleb’aal te’ruuq chixsik’b’al xsumenkil li patz’om a’in sa’ li ch’ol 7. A’ineb’ junjunq chik li patz’om taaruuq te’aatinaq wi’: K’a’ut naq li Qaawa’ kixb’ay xsachik li ruchich’och’ chiru jarub’aq kutan? Chan ru naq eb’ li k’ojob’anb’il k’anjel ut eb’ li sumwank “nokohe’xtz’ap chaq choq’ re li kutan naq taahoymanq chaq lix josq’il li Dios”? (Tz. ut S. 1:9). K’a’ru li qak’anjel sa’ xkawresinkil li ruchich’och’ choq’ re li xkab’ xk’ulunik li Qaawa’? Sa’ Tzol’leb’ ut Sumwank 1:4–23; 77:8–11, maare taataw chik li na’leb’.

Apokalipsis 1–11

Lix k’utb’esinb’il matk’ laj Jwan naxk’ut chan ru naq li qaChoxahil Yuwa’ naxkoleb’ li ralal xk’ajol.

• Maare wankeb’ li komon sa’ li tzoleb’aal li te’xk’oxla naq ch’a’aj xtawb’al ru li hu Apokalipsis. Maare us raj wi te’ril lix tz’iib’ahom laj Jwan jo’ jun raqal lix k’uub’anb’il na’leb’ li qaChoxahil Yuwa’ re xk’eeb’al li taqenaqil loq’al reheb’ li ralal xk’ajol. Naq eb’ li komon sa’ li tzoleb’aal xe’ril ru Apokalipsis 1–11 sa’ kab’l, maare ak xe’xtaw li yaalil na’leb’ li naxtenq’aheb’ chixtawb’al ru lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ chixwotzb’al li k’a’ru xe’xtaw. Maare te’xtaw ajwi’ naq us xnumsinkil li jun raqal sa’ “Xkomon chik li k’anjeleb’aal” li k’ab’a’inb’il, “Eb’ li raqal sa’eb’ li loq’laj hu chirix li k’uub’anb’il na’leb’ re li kolb’a-ib’.” Waklesiheb’ xch’ool li komon sa’ li tzoleb’aal re toj te’xsik’eb’ li raqal sa’eb’ li loq’laj hu li neke’xk’ut li yaalil na’leb’ sa’ li k’uub’anb’il na’leb’ re li kolb’a-ib’ naq yookeb’ chirilb’al ru li hu Apokalipsis, ut kanab’eb’ sa’eb’ li tzoleb’aal chalel chixwotzb’al li k’a’ru neke’xtaw.

reetalil li tzolok

Xb’oqb’aleb’ chi tzolok sa’ kab’l

Ye reheb’ li komon naq te’xk’oxla k’a’ru neke’xb’aanu li nawulak chiruheb’ sa’ Ralankil. K’e xb’oqb’aleb’ re te’ril li tusleb’ aatin re li xamaan jun chik, re xk’oxlankil chan ru naq te’ruuq chixk’oxlankil li Jesukristo naq yookeb’ chi ninq’ehik.

reetalil li k’anjeleb’aal

Xkomon chik li k’anjeleb’aal

Apokalipsis 1–11

Eb’ li raqal sa’eb’ li loq’laj hu chirix li k’uub’anb’il na’leb’ re li kolb’a-ib’

Li xtojb’al rix li maak xb’aan li Jesukristo

• Apokalipsis 1:5, 17–18; 5:9; 7:14

Li yu’am naq maji’ nokoyo’la

• Apokalipsis 5:9; 12:7–11

Li yu’am sa’ ruchich’och’

• Apokalipsis 3:10; 7:14

Li yu’am chirix li kamk

• Apokalipsis 3:21; 20:12

Ka’ajwi’ li Jesukristo kiru chixtojb’al rix li qamaak.

Naq yoo chi aatinak chirix li k’a’ru kik’ulman sa’ li yu’am naq maji’ nokoyo’la, li Elder Jeffrey R. Holland kixk’ut:

“Li Kristo kixyeechi’i rib’ re xnimankil lix taql xch’ooleb’ chixjunileb’ li winq naq yoo chixtojb’al rix lix maakeb’. Sa’ xb’aanunkil a’an, kixk’e re li Yuwa’b’ej chixjunil li loq’alil li taachalq xb’aan xnimal li rahok a’in.

“Kiru chi uxmank lix tojb’al rix li maak xb’aan li Kristo, xb’aan naq (1) ka’ajwi’ a’an kiwan chi maak’a’ xmaak sa’ li ruchich’och’ a’in, ut chi jo’kan moko wan ta sa’ xb’een a’an li musiq’ejil kamk li nachal xb’aan li maak, (2) a’an li Junaj Chirib’il chiru li Yuwa’b’ej, ut rik’in a’an wan rik’in a’an li diosilal li kixk’e xwankil sa’ xb’een lix kamik li tz’ejwalej, ut (3) maare ka’ajwi’ a’an kiwan chi tz’aqal tuulan ut chi tz’aqal k’eek’o xch’ool sa’ li ch’utub’aj-ib’ rub’elaj li yu’am a’in re taak’ojob’amanq re xb’aannunkil li k’anjel a’an” (“La expiación de Jesucristo,” Liahona, marzo 2008, 35).

Xchaab’ilob’resinkil li qak’utum

Oksiheb’ li loq’laj hu ut li raatineb’ li profeet sa’ roso’jikeb’ li kutan. “Li Qaawa’ nokoxtaqla “chixk’utb’al li tzol’leb’ re li awa’b’ejihom chiqib’il qib’ (Tz. ut S. 88:77) ut chiroksinkileb’ li loq’laj hu re “xk’utb’al li jar raqal chi na’leb’ re lix evangelio” (Tz. ut S. 42:12). Eb’ li loq’laj hu ut li raatineb’ li profeet ut apostol sa’ roso’jikeb’ li kutan a’aneb’ xyo’leb’aal li yaal naqak’ut” (Li k’utuk jo’ li Kolonel, 21).