li k’uula’al Jesus sa’ xwa’leb’aal li xul

Sa’ xwa’leb’aal li xul, xb’aan laj Dan Burr

16–22 diciembre

Li Ralankil

“Tinye eere jun chaab’il esilal, ut a’an jun xnimal sahil ch’oolej”

Li aatinak chirix li evangelio naxk’am xwankil li musiq’ej wi b’eresinb’il rik’in li Jesukristo. Naq nakattzolok chirix lix yo’lajik ut lix k’anjel li Jesukristo chiru li xamaan a’in, sik’ aamusiq’ankil xb’aan li Santil Musiq’ej re taanaw chan ru nakatru chixb’eresinkil li aatinak sa’ laa tzoleb’aal rik’in li Kolonel.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixwotzb’al k’a’ru yookeb’ chixb’aanunkil malaj k’a’ru xe’xb’aanu junxil, xjuneseb’ ut jo’ junkab’al, re xninq’ehinkil lix yo’lajik li Kolonel jo’ chanru te’reek’a rib’ chi nach’ rik’in a’an.

reetalil li k’utuk

Xk’utb’al li tzolʼlebʼ

Mateo 1:18–25; Lukas 1:26–38; 2:1–20

Li Jesukristo kixkub’si rib’ chi yo’laak sa’ li ruchich’och’.

• Xkub’sinkil rib’, naraj naxye naq chi ink’a’ minb’il ru kixkanab’ xnimal lix wankilal (chi’ilmanq 1 Nefi 11:14–26). Sa’ Ralankil, us xk’oxlankil ut xninq’ehinkil naq li Kristo kixkub’si rib’, naq chi ink’a’ minb’il ru “chalen choxa kichal; xb’aan qaraab’al, quuchil kikam re qakolb’al” (“At Dios li Yuwa’b’ej,” Eb’ li B’ich, 104). Re xtikib’ankil li aatinak chirix a’in, naru taapatz’ reheb’ li komon sa’ li tzoleb’aal k’a’ru xe’ril naq xe’tzolok chiru li xamaan a’in xjuneseb’ malaj sa’ junkab’al, chirix ani li Jesukristo rub’elaj naq kiyo’la (chi’ilmanq Jwan 17:5; Mosiah 7:27; Tz. ut S. 76:12–14, 20–24; Moises 4:2). Chirix a’an, taaruuq taak’ut li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naq eb’ li komon sa’ li tzoleb’aal yookeb’ chirilb’al ru resil lix yo’lajik li Kolonel (chi’ilmanq Mateo 1:18–25; Lukas 1:26–38; 2:1–20). K’a’ru neke’xk’oxla ut neke’reek’a naq yookeb’ chirilb’al chan ru naq lix nimal xloq’al rub’elaj lix yu’am mas jalan rik’in lix tuulanil yo’lajik?

• Jun patz’om jo’ kixpatz’ li anjel re laj Nefi sa’ 1 Nefi 11:16 maare us raj re xtikib’ankil li aatinak sa’ li tzoleb’aal, a’ut maare taawaj xyeeb’al rik’in tz’aqal aawaatin. Maare tatruuq chixtz’iib’ankil chiru li pizarron, K’a’ru li naxkub’si rib’ li Dios chixb’aanunkil? ut taaye reheb’ li komon sa’ li tzoleb’aal naq te’xk’oxla li patz’om a’in naq yookeb’ chirilb’al ru 1 Nefi 11:17–33. Ye reheb’ naq te’xwotz li k’a’ru neke’xk’oxla chirix li Kolonel sa’ rilb’aleb’ li raqal a’in. K’a’ru li jalam-uuch tatruuq chixk’utb’al chiru li tzoleb’aal, li naxk’ut li k’a’ru yeeb’il chirix lix yu’am li Kolonel xb’aan laj Nefi? Naru ajwi’ te’xk’oxla li kixkub’si rib’ li Kolonel chixb’aanunkil, rik’in rilb’al jun video chirix lix yo’lajik, jo’ “Un regalo para el mundo,” “El Nacimiento,” “Infant Holy, Infant Lowly (video re b’ichank—Coro Tabernáculo Mormón,” malaj “Él es la Dádiva” (chixjunileb’ a’in neke’tawman sa’ LDS.org).

• Li b’ich k’a’jo’ naq naru chixk’eeb’al xb’oqb’al li Musiq’ej sa’ lee tzoleb’aal. Naru taak’e chi ab’imank eb’ li b’ich chirix li Ralankil, b’ichanb’il xb’aan li Coro Tabernaculo (chi’ilmanq mormontabernaclechoir.org), malaj naru taapatz’ re anihaq naq tixb’icha malaj tixwajb’a jun b’ich re Ralankil, malaj ut naru teeril ru malaj teeb’icha sa’ komonil junjunq li b’ich (chi’ilmanq Eb’ li B’ich, 123–134). Eb’ li komon sa’ li tzoleb’aal te’ruuq chixsik’b’aleb’ li ch’ol aatin sa’eb’ li b’ich a’in ut sa’eb’ li raqal reheb’ li loq’laj hu li wankeb’ rub’eleb’ li b’ich, li taanimob’resinq re lix b’antioxihomeb’ chirix li Kolonel, ut chirix naq a’an kiwan xch’ool chi chalk sa’ li ruchich’och’.

Lukas 4:16–21; Jwan 3:16

Li Jesukristo kixtz’aqob’resi ru lix k’anjel, ut rik’in a’an nokoru chireechaninkil li junelik yu’am.

• Re xtenq’ankileb’ li komon chi aatinak chirix k’a’ut naq kiyo’la li Jesukristo, naru taaye reheb’ naq te’xsik’ ut te’xwotz junaq raqal sa’eb’ li loq’laj hu li naxye k’a’ru lix k’anjel (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re xtawb’al junjunq). Maare eb’ li komon sa’ li tzoleb’aal te’ruuq chixsikb’al ut chirilb’aleb’ ru li raqal sa’ wiib’al malaj sa’eb’ li kok’ ch’uut. K’a’ru neke’xtzol chirix lix k’anjel li Kristo sa’eb’ li raqal xe’xtaw? K’a’ru naqatzol chirix lix k’anjel rik’ineb’ li k’iila k’ab’a’ej li k’ab’a’inb’il wi’ sa’eb’ li loq’laj hu? (ch’ilmanq li K’utul Raqal reheb’ li Loq’laj Hu, “Jesukristo”).

• Eb’ li komon sa’ li tzoleb’aal te’ruuq chi tzolok chirix lix k’anjel li Kolonel rik’in rilb’al ru “Li Yo’yookil Kristo: Lix Ch’olob’ahomeb’ li Apostol,” ut rik’in xwotzb’aleb’ li ch’ol aatin neke’xtaw li neke’xch’olob’ xyaalal k’a’ut naq kichal sa’ li ruchich’och’. Malaj ut te’ruuq chirilb’al li raatin li Awa’b’ej Gordon B. Hinckley sa’ “Xkomon chik li k’anjeleb’aal” ut te’aatinaq chirix k’a’ru neke’xtzol chirix li Kolonel. Chan ru naq chiru li Ralankil a’in nokoru chixnumsinkil li kutan “chi ch’anch’o, rik’in xk’oxlankil sa’ tuqtuukilal” li Kolonel ut lix k’anjel?

• Kanab’eb’ li komon sa’ li tzoleb’aal chiru junpaat chixk’oxlankil lix nawomeb’ xch’ool chirix li Jesukristo ut lix k’anjel. Ma naru te’xwotz li k’a’ru xe’xk’ul, malaj eb’ li esil chirix lix yu’am li Kolonel, li xnimob’resink re lix paab’aaleb’ chirix a’an malaj lix rahomeb’ choq’ re? Chan ru naq xextenq’aak sa’ li Ralankil a’in rik’in xtzolb’al li Ak’ Chaq’rab’ chiru li chihab’ a’in? Re xnumsinkil wi’chik junjunq esil sa’ li Ak’ Chaq’rab’ li xetzol chiru li chihab’ a’in, naru taak’ut li video “De tal manera amó Dios al mundo” malaj “Yo para esto he nacido” (LDS.org).

reetalil li tzolok

Xb’oqb’aleb’ chi tzolok sa’ kab’l

Ye reheb’ li komon sa’ laa tzoleb’aal naq rik’in xtzolb’al Apokalipsis 12–22 chiru li xamaan a’in, naru taachamo’q lix tawomeb’ ru chirix lix k’anjel li Kolonel sa’ li k’uub’anb’il na’leb’ re li kolb’a-ib’, ut naru tixtenq’aheb’ chixninq’ehinkil chi us li Ralankil.

reetalil li k’anjeleb’aal

Xkomon chik li k’anjeleb’aal

Ralankil

K’a’ru xyaalalil li Ralankil.

Li Awaʼbʼej Gordon B. Hinckley kixye:

“Naq ak yeeb’il ut b’aanunb’il chixjunil, … maak’a’ chik wan xchaq’al ru, wan xnimal ru, wan x’aajelil ru, jo’ li usilal a’in, naq li Ralal li Nimajwal Dios, … li kixkub’si rib’ chi chalk sa’ ruchich’och’ jo’ jun k’uula’al li kiyo’la sa’ Belen, kixq’axtesi lix yu’am sa’ xyi li xutaan ut li rahilal, re naq chixjunileb’ li ralal ut lix rab’in li Dios chalen chaq xtiklajikeb’ li kutan, chixjunileb’ li tento te’kamq, te’b’eeq wi’chik ut te’wanq wi’chik xyu’am chi junelik. Kixb’aanu choq’ qe li k’a’ru maajun qe kiru chixb’aanunkil xjunes. …

“A’in li chaq’al ru esilal re li Ralankil. Lix yo’lajik li Jesus sa’ Belen a’an yal tiklajik. Lix k’anjel li Qaawa’ chiru oxib’ chihab’ a’an ajwi’ yal jun tiklaak. Lix ch’oolil li esilal a’an lix mayej, naq kixq’axtesi rib’ ut kikam sa’ rahilal chiru krus sa’ Kalvario re xtojb’al rix qamaak chiqajunilo.

li Jesus chi wiq’wo sa’ li awimq Getsemani.

Getsemani, xb’aan laj J. Kirk Richards

“Lix raqik li esil, a’an li sachb’a-ch’oolejil wakliik chi yo’yo, li naxk’e chi uxmank naq “Jo’ naq chixjunileb’ neke’kamk sa’ xk’ab’a’ laj Adan, jo’kan ajwi’ naq chixjunileb’ te’wanq wi’chik xyu’am sa’ xk’ab’a’ li Kristo” (1 Korintios 15:22).

“Maak’a’aq raj li Ralankil wi ta maak’a’ li Paswa. Li k’uula’al Jesus sa’ Belen, a’anaq raj yal jun chik li k’uula’al wi ta ink’a’ kiwan li Kristo aj Kolonel sa’ Getsemani ut sa’ Kalvario, ut li nimla q’axok-u sa’ li wakliik chi yo’yo.

“Laa’in ninpaab’ li Qaawa’ jesukristo, Ralal li Junelikil Yo’yookil Dios. Maajun li kib’eek sa’ ruchich’och’ wanjenaq xnimal ru jo’ a’an. Maajun chik xq’axtesi jun mayej jo’ a’an, ut xk’e jun li osob’tesink jo’ a’an. Aʼan laj Kolol re ut laj Tojol rix li ruchich’och’. Ninpaab’ a’an. Ninch’olob’ lix diosilal, chi maak’a’ xkab’il rix inch’ool. Ninra a’an. Ninye lix k’ab’a’ rik’in oxloq’ink ut rik’in xsachik inch’ool. …

“Choq’ re li junjunq eere, nawaj naq sahaq li Ralankil. A’ut k’a’jo’ wi’chik nawaj naq li junjunq eere tixnumsi junaq hoonal tana’ chi ch’anch’o, rik’in xk’oxlankil sa’ tuqtuukilal li sachb’a-ch’oolej, lix nimal xwankilal a’in, li Ralal li Dios. Nasaho’ qach’ool sa’ li hoonal a’in xb’aan naq a’an kichal sa’ li ruchich’och’. Li tuqtuukilal li nachal chaq rik’in a’an, lix rahom maak’a’ roso’jik li naru naqeek’a chiqajunil, ut li nimla b’antioxink chirix li k’a’ru kixk’e chi anchal xch’ool, us ta q’axal ra choq’ re a’an—a’an a’in tz’aqal xyaalalil li Ralankil” (“El maravilloso y verdadero relato de la Navidad,” Liahona, diciembre 2000, 4–6).

Xchaab’ilob’resinkil li qak’utum

Kanab’ xhoonalil re te’wotzoq li ani yookeb’ chi tzolok. “Naq eb’ li komon sa’ li tzoleb’aal neke’xwotz li k’a’ru yookeb’ chixtzolb’al, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi aj b’an wi’ xch’ooleb’ li jun ch’ol chik li komon sa’ li tzoleb’aal chixtawb’aleb’ li yaalil na’leb’ xjuneseb’ rib’. … K’e xhoonaleb’ li komon sa’ li tzoleb’aal chi wotzok sa’ li junjunq chi tzolok—wan naq taak’e reetal naq eb’ li hoonal chi wotzok a’in, a’aneb’ ajwi’ li tz’aqal tzolok” (Li k’utuk jo’ li Kolonel, 30).