2–8 Janar

Mateu 1; Lluka 1

“Le të më Ndodhë sipas Fjalës Sate”

Përpara se të lexoni ndonjë material shtesë studimi, lexoni dhe përsiatni kapitujt te Mateu 1 dhe Lluka 1 dhe mbajini shënim mbresat tuaja shpirtërore. Lejojeni Shpirtin që ta udhërrëfejë përgatitjen tuaj. Më pas, shqyrtojini idetë në këtë përvijim të mësimit dhe tek Eja, Më Ndiq – Për Individët dhe Familjet.

Ftojini të Tregojnë

Një qëllim kryesor i Mateut, Llukës dhe shkruesve të tjerë të Ungjillit, ishte që të dëshmonin se Jezu Krishti është Biri i Perëndisë. Jepuni anëtarëve të klasës disa minuta për të shqyrtuar kapitujt Mateu 1 ose Lluka 1 dhe tregoni një varg që e ndërton besimin e tyre te Jezu Krishti. Sugjerojuni pjesëtarëve të klasës që, ndërsa e studiojnë Dhiatën e Re këtë vit, ata mund të mbajnë një listë me fragmente që dëshmojnë se Jezu Krishti është Biri i Perëndisë. Ju madje mund ta mbani këtë listë si klasë.

Jepeni Mësim Doktrinën

Mateu 1:18–25; Lluka 1:5–80

Ati Qiellor vepron përmes fëmijëve të Tij besnikë për t’i përmbushur qëllimet e Tij.

• Anëtarët e klasës ka më shumë gjasa që të kenë përvoja domethënëse, kur ta studiojnë Dhiatën e Re këtë vit, nëse mund të nxjerrin mësime nga përvojat e njerëzve për të cilët lexojnë. Për t’i ndihmuar ta bëjnë këtë, ju mund t’i shkruani në tabelë emrat e njerëzve te Mateu 1 dhe Lluka 1 së bashku me referencat e shkrimit të shenjtë rreth këtyre individëve, si vijon:

  • Maria (Lluka 1:26–56)

  • Jozefi (Mateu 1:18–25)

  • Elizabeta (Lluka 1:5–7, 24–25, 40–45, 57–60)

  • Zakaria (Lluka 1:5–23, 59–64)

  Çfarë mund të mësojmë nga këto rrëfime që do të na ndihmojë sot?

• Për t’i ndihmuar anëtarët e klasës që të mendojnë më thellësisht rreth Marisë dhe rolit të saj në planin e Atit, ju mund të shfaqni materialet filmike “An Angel Foretells Christ’s Birth to Mary” [“Një Engjëll i Profetizon Maries për Lindjen e Krishtit”] dhe “Mary and Elisabeth Rejoice Together” [“Maria dhe Elizabeta Gëzohen së Bashku”] (ChurchofJesusChrist.org). Ose mund të lexoni së bashku te Lluka 1:26–38, 46–56, duke kërkuar gjërat që tha Maria, të cilat zbulojnë diçka rreth karakterit të saj. Çfarë tjetër mësojmë nga Maria?

Lluka 1:5–25

Bekimet e Perëndisë vijnë në vetë kohën e Tij.

• Mund të ketë njerëz në klasën tuaj të cilët, ashtu si Elizabeta dhe Zakaria, po jetojnë me drejtësi dhe prapëseprapë nuk e kanë marrë një bekim të shpresuar. Merrni parasysh ta ftoni klasën të shqyrtojë vargjet Lluka 1:5–25, duke kërkuar mësime që mund të marrin prej Elizabetës dhe Zakarias rreth pritjes për [kohën e caktuar nga] Zoti. Çfarë shembujsh të tjerë të pritjes së kohës së caktuar nga Zoti mund të tregojnë anëtarët e klasës nga vetë jeta e tyre ose nga rrëfimet në shkrimet e shenjta? Çfarë mësojmë nga këta shembuj? Anëtarët e klasës mund të diskutojnë edhe thënien te pjesa “Burime Shtesë”.

Lluka 1:26–38

“Me Perëndinë asgjë s’është e pamundshme.”

• Me raste, anëtarët e klasës – ashtu si Maria – mund ta pyesin veten se si mund të përmbushen planet e Perëndisë për ta ose premtimet e Tij ndaj tyre. Për t’i ndihmuar anëtarët e klasës të kuptojnë që me anë të fuqisë së Perëndisë të gjitha gjërat janë të mundshme, ju mund të paraqitni figurën Lajmërimi i Lindjes së Jezusit: Engjëlli Gabriel i Shfaqet Maries (Libri i Figurave Artistike të Ungjillit, nr. 28) dhe t’i ftoni ata të lexojnë së bashku te Lluka 1:26–38. Çfarë mund të mësojmë rreth kapërcimit të asaj që duket e pamundshme nga studimi i fjalëve dhe veprimeve të Maries? Kërkojuni anëtarëve të klasës të tregojnë përvoja në të cilat Perëndia i ndihmoi ata të përmbushnin diçka, që ata menduan se ishte e pamundshme.

Burime Shtesë

Të presësh [kohën e caktuar nga] Zoti.

Duke konsideruar faktin se shumë prej nesh pyesin pse na duhet të presim për bekimet e Perëndisë, Plaku Xhefri R. Holland tha:

“Përgjigjja për pyetje të tilla është: ‘Po, Perëndia mund t’i bëjë mrekullitë menjëherë, por herët a vonë, ne mësojmë se kohët dhe periudhat e udhëtimit tonë në vdekshmëri janë të Tijat dhe vetëm të Tijat për t’i drejtuar’. … Besim do të thotë t’i mirëbesojmë Perëndisë në kohë të mira e të këqija, edhe nëse kjo përfshin disa vuajtje derisa ta shohim krahun e Tij të zbulohet në emrin tonë. …

… Ata që ‘shpresojnë te Zoti fitojnë forca të reja [dhe] ngrihen me krahë si shqiponja, vrapojnë pa u lodhur … ecin pa u lodhur’ [Isaia 40:31; theksimi i shtuar]. Lutem që ‘ca nga ca’ – herët a vonë – ato bekime do t’i vijnë secilit prej jush që kërkon lehtësim nga pikëllimet e veta dhe çlirim nga hidhërimet e veta. Dëshmoj për dashurinë e Perëndisë dhe për Rivendosjen e ungjillit të Tij të lavdishëm, i cili, në një mënyrë apo tjetër, është përgjigjja për çdo problem që ndeshim në jetë” (“Duke Pritur për Zotin”, Liahona, nëntor 2020, f. 116–117).

Përmirësimi i Mësimdhënies Sonë

Nxitini anëtarët e klasës t’i studiojnë shkrimet e shenjta në shtëpi. Një mënyrë se si mund ta nxitni studimin e shkrimeve të shenjta në shtëpi, është që t’u jepni kohë anëtarëve të klasës të tregojnë gjërat e zbuluara dhe idetë nga studimi i tyre vetjak dhe familjar (shih Mësimdhënia sipas Mënyrës së Shpëtimtarit, f. 29).