Maria ao Eritabeta

Tianuare 2–8

Mataio 1; Ruka 1

“E Na Karaoaki Nako Iu n Ai Aron Am Taeka”

Imwaain ae ko warekii beeba ni kamatebwai ibukin te reirei aei, wareware ao karaua iangoa raoi Mataio 1 ao Ruka 1, ao korei mwiin am namakin n tamnei. Butia te Tamnei bwa e na kaira aron am katauraoi. Ao imwiina karaua kamatebwai iango ake a irekereke ma te kabwarabwara aei inanon Nakomai, Iriirai—Ibukiia n Tatabemaniia ao Utu.

te aikaon ibukin te tibwatibwa

Kaunga te Tibwatibwa

Oin tabeia Mataio, Ruka, ao tabeman riki taan koroboki n te Euangkerio bwa a na kaotia bwa Iesu Kristo bon natin te Atua. Anganiia kaain te kiraati tabeua te miniti bwa a na rinanoa Mataio 1 ke Ruka 1 ao tibwaua te kibu are e kakorakora aia onimaki iroun Iesu Kristo. Tuangiia kaain am kiraati bwa ngkana a kamatebwaia te Nu Tetemanti inanon te ririki aei, ao kataia n tauii mwiin kanoan karaki ake a kaotia iai bwa Iesu Kristo bon natin te Atua. Ko konaa ni kawakinii rinanin karaki aikai ma kaain am kiraati.

te aikaon ibukin te anga reirei

Reirei te Reirei

Mataio 1:18–25; Ruka 1:5–80

E mwamwakuri Tamara are i Karawa rinanoia Natina aika kakaonimaki ni kakoroi bukin Ana kantaninga.

• A konaa riki kaain te kiraati ni karekei taneiai aika uaana inanon aia tai ni kamatebwaia te Nu Tetemanti ibukin te ririki aei ngkana a kona n anai reirei man aia taneiai aomata ake a warekii rongorongoia. Ibukin buokaia ni karaoa aei, ko kona ni korei araia aomata ake a maneweaki n Mataio 1 ao Ruka 1 iaon te burakibooti, n ikotaki ma taekan te kibu are mwaneweaki iai araia, n aron aei:

  • Maria (Ruka 1:26–56)

  • Iotebwa (Mataio 1:18–25)

  • Eritabeta (Ruka 1:5–7, 24–25, 40–45, 57–60)

  • Tekaria (Ruka 1:5–23, 59–64)

  Tera ae ti kona n reiakinna man rongorongo aikai a na kona ni buokiira n te bong aei?

• Ni buokiia kaain te kiraati bwa a na kabanea riki aia iango iaon Maria ao tibwangana inanon ana babaire te Tama ko kona ni kaotii witeo aika atunaki n An Angel Foretells Christ Birth to Mary ao Mary and Elisabeth Rejoice Together (ChurchofJesusChrist.org). Ke kam kona ni kaai ni wareka Ruka 1:26–38, 46–56, ni kakaei bwaai ake e taekin Maria are e kaota iai rongorongon anuana. Tera riki ae ti reiakinna mai iroun Maria?

Ruka 1:5–25

Ana roko Ana kakabwa te Atua bon inanon Ana tai.

• A kona n iai aomata inanon am kiraati, aika n aroia Eritabeta ma Takaria, are a maiuakina te raoiroi ao e tuai man reke te kakabwaia are a kaman kakantaningaia. Iangoia ni kaoia kaain am kiraati bwa a na rinanon Ruka 1:5–25, ni kakaei reirei ake a kona n reiakin mai iroun Eritabeta ao Tekaria ngke a tataningaa te Uea. Tera riki katooto ake a reke man ara tataninga inanon ana tai te Uea ae a kona kain te kiraati n reitii man bwaai ake a tia ni kaitibo mangaai inanon maiuia ke man rongorongo ake a reke man booki aika tabu? Tera ae ti reiakinna man katooto aikai? A kona naba kaain te kiraati ni maroroakina te rongorongo are taekinaki inanon “Bwaai n Ibuobuoki Riki Tabeua.”

Ruka 1:26–38

“Ao iroun te Atua bon akea te bwai ae e aki kona ni karaoaki.”

• A kona kaain te kiraati n taai tabetai n iango—n aron ae karaoia Maria—aron kakoroan nanon ana babaire ke ana berita te Atua ibukiia. Ni buokiia kaain te kiraati ni kaotaia bwa rinanon mwakan te Atua ao a bane ni kona ni karaoaki bwaai ni kabane, ko kona ni kaota te tamnei The Annunciation: The Angel Gabriel Appears to Mary (Gospel Art Book, nambwa. 28) ao kaoia bwa a na bootaki ni wareka Ruka 1:26–38. Tera ae ti kona n reiakinna man ana taeka ao ana mwakuri Maria ae ti na kona iai n tokanikai iaon bwaai aika a kangaanga karaoakiia? Tuangiia kaain te kiraati bwa a na tibwauai aia taneiai are e buokiia te Atua ni kakoroa nanon te bwai ae a taraia n aia iango bwa e kangaanga.

te aikaon ibukin bwaai n ibuobuoki

Bwaai n Ibuobuoki Riki Tabeua

Tataninga are iroun te Uea.

Ti ataia bwa angina mai iroura a titiraki bwa tera bukina ngkai tina tataningaa ana kakabwaia te Atua, E taku Unimwane Jeffrey R. Holland:

Te kaeka nakon te titiraki anne bon ‘Eng, te Atua e kona ni karaoi kakai n te tai ae tawe, ma n te tai ae waekoa ke rimwi tina ataia bwa taai ma bongin mwanangara n te maiu n rabwata bon Ana bwai ao bon ti Ngaia ae e na kairia.’ … Te onimaki nanona onimakinan te Atua n tai aika raraoi ao aika a bubuaka, riki ngkana e raonaki ma teutana te korakai ni karokoa ti noora Baina ni kaoti ibukira.’ …

“… Naake a ‘kantaninga te Uea a na mwemwe rake [ni] baia ni kiba n ai aroia ikare; a na biribiri ao a na aki kuaa; … a na nakonako, ao a ba aki nimamate’ [Itaia 40:31; e kairaki ma katuruturuana]. I tataro bwa “inanon te tai”—ngkai ke rimwi—kakabwaia ake a roko nakoia n tatabemaniia naake a ukoukora te kabebeteaki man rawawatami ao te inaomata man nanokawakimi. I kakoaua n ana tangira te Atua ao ni Kaokan bwai n Ana euangkerio ae mimitong, are n te aro teuana ke teuana, bon te kaeka nakon kangaanga ake ti kaitarai inanon te maiu” (“Waiting on the Lord,” Liahona, Nob. 2020, 116–17).

Kanakoraoan Ara Anga reirei

Kaungaia kaain te kiraati bwa a na kamatebwaia koroboki aika a tabu ni mweengaia. Teuana te kawai are ko kona iai ni kaunga kamatebwaian koroboki aika a tabu bon karekean te tai ibukiia kaain te kiraati bwa a na tibwai kanoan bwaai ake a reiakin ao otaia man te kamatebwai bon i rouia ao n aia utu (taraa Anga Reirei n Ana Kawai te Tia Kamaiu, 29).