“Tianuare 23–29. Mataio 3; Mareko 1; Ruka 3: “Katauraoa Kawain te Uea,’” Nakomai, Iriirai—Ibukin te Reirei n Tabati: Te Nu Tetemanti 2023 (2022)
“Tianuare 23–29. Mataio 3; Mareko 1; Ruka 3,” Nakomai, Iriirai—Ibukin te Reirei n Tabati: 2023
Winto kiraati aika korotamneiaki i Nauvoo Illinois Tembora, iroun Tom Holdman
Tianuare 23–29
Mataio 3; Mareko 1; Ruka 3
“Katauraoa Kawain te Uea.”
Ngkai ko warekia ao n iangoia Mataio 3; Mareko 1; ao Ruka 3, korei am namakin ake ko karekei. Aio e na kaoa te Tamnei ngkai ko katauraoi n angareirei. N reitan iango n angareirei ake a kaotaki n bwaai aika kaotaki, iango ni kamatebwai n Nakomai, Iriirai—Ibukiia Aomata n Tatabemaniia ao Utu a kona ni kairaki ni kabonganaaki n am kiraati.
Kaunga te Tibwatibwa
Ni buokiia kain te kiraati n tibwaia bwa e kanga te kamatebwai man te Nu Tetamenti n riki bwa te kakabwaia inanon maiuia, ko kona ni korei titiraki aikai iaon te burakibooti: Tera ae ko karaoia ibukin te bwai are ko warekia n te Nu Tetamenti n te wiiki aei? Kaoia kaain te kiraati bwa a na tibwa aia kaeka.
Reirei te Reirei
Ana reirei a katauraoia ngaia ma tabeman bwa a na butimwaea Iesu Kristo.
-
Tina kanga ni katauraoi ibukin rokon te iruwa ae kakannato? Te titiraki n aron aei e kona ni buokiko ni kaotako n te maroro bwa e kanga Ioane te Tia Bwabetito ni katauraoia aomata ni butimwaea Iesu Kristo. Ko kona ngkanne n tibwaia kain te kiraati inanon teniua te kurubu. Kurubu akanne a kona ni wareka Mataio 3:1–6; Mataio 3:7–12; ke Ruka 3:10–15, n taratarai bwa e kanga Ioane te Tia Bwabetito ni katauraoia aomata bwa a na butimwaea Iesu Kristo inanon maiuia. Karekea aia tai kurubu nako bwa a na tibwai bwaai ake a kunei.
Ioane te Tia Bwabetito ngke e Kabwarabwara n te Rereua, iroun Robert T. Barrett
Ti riai ni uoti rake “ua aika bo raoi ma rairan nanomi.”
-
N Ruka 3:8, Ioane te Tia Bwabetito e reireiniia aomata imwain ae a kona ni bwabetitoaki, a riai ni kaoti “ua,” ke kakoaua, n rairan nanoia. Kona kanga ni buokiia kain te kiraati bwa a na kinai kakoauan oin aia rairannano? Kona bae n tuangiia bwa a na kakaea Ruka 3:8–14 ao n taratarai bwaai ake e kananonai bwa “ua” n te rairannano. A kona naba n rinanon Moronaai 6:1–3 ao Reirei ao Berita aika Tabu 20:37. Kona bae ni korea tamnein te aroka iaon te burakibooti ao anganiia kain te kiraati bwa a na korei ua iaon te aroka ma “ua” n rairannano ake a kunei. Aio e kona naba n reke bwa te tai ae tamaroa ni maroroakinna bwa tera ae nanonaki n te rairannano ni koaua.
Ti iriira Iesu Kristo ngkai ti bwabetitoaki ao ti karekea te Tamnei ae Raoiroi.
-
N rinanon karakinan ana bwabetito Iesu Kristo, kata te iango aei: Tuangiia kain te kiraati bwa a kanga ni kona ni kabongana Mataio 3:13–17 n reireina temanna, n aron te ataei ke temanna man te aro teuana, ibukin te bwabetito. (A kona naba ni kabongana man bwaai aika kakaawaki n te wiiki aei n Nakomai, Iriirai—Ibukiia Aomata n Tatabemaniia ao Utu.) Tera bwaai aika a kakaawaki n te bwabetito ae a na katuruturua? A kona ni kataneia aia iango man te angareirei imarenaia.
-
Ni buokakiia kain te kiraati ni kauringa kakakawakin maiuakinan aia berita n te bwabetito, ko kona ni kaoa temanna bwa e na wareka ana rongorongon Unimwaane Bednar n “Bwaai ni Ibuobuoki riki Tabeua.” Kain te kiraati a kona ni kukurei n tibwai aia namakin ibukin aia berita n aia bwabetito. A kona naba n anenea te kuna n taromauai iaon iriirakin te Tia Kamaiu, n aron “Come, Follow Me” (Hymns, no. 116).
-
Ioane te Tia Bwabetito e reirei bwa te Tia Kamaiu e na bwabetito “ma te Tamnei ae Raoiroi, ao te ai” (Mataio 3:11). Te bwabetito n te ai e reke ngkana ti kamatoaki ao ti karekea ana bwaintangira te Tamnei ae Raoiroi. Bukin tera ti na karekea ana bwaintangira te Tamnei ae Raoiroi n rikirake n abanuean te Atua? Tera mwiin te bwabetito n te ai ao te Tamnei ae raoiroi ae karekea iaora? (taraa Aramwa 5:14). Te witeo “Baptism of the Holy Ghost” (ChurchofJesusChrist.org) e kona n ibuobuoki n te maroro aei.
Bwaai n Ibuobuoki Riki Tabeua
Ara berita n te bwabetito.
Unimwaane David A. Bednar e reirei: “Te berita ae tabu n te bwabetito iai inanona teniua aan te motinnano: (1) n tauraoi ni katoka iaora aran Iesu Kristo, (2) n aki toki n ururingnga n taainako ao (3) ni kaawakin Ana tua. Te berita are ti anganaki n te kakabwaia ibukin karineakin te berita aei ‘bwa [ti] na kona n tainako ni karekea Tamneina bwa e na memena [iroura]’ [Reirei ao Berita aika Tabu 20:77]. N reitia, te bwabetito bon te katauraoi ae kakaawaki ni karekean te tibwanga ae kariaiakaki ibukin raonakira iroun te kateniman n atunAtua” (“Kateimatoa n Tainako Kaitiakan Am Bure,” Liahona, May 2016, 60).
Te katoto iroun te ataeinimwane are kawakin ana berita n ana bwabetito, tara te karaki ni moan waakin ana rongorongo Titita Carole M. Stephens “We Have Great Reason to Rejoice” (Liahona, Nov. 2013, 115–17).
Kanakoraoan Ara Anga reirei
Reireia te tua ae beebete. Hyrum Smith e reirei, “Tataekina te moan tua n te Euangkerio—taetaekini n tainako n tainako, kona kunea bwa imwin te bong teuana imwiin teuana, iango aika boou ao te ota ae raka ni kaineti ma ngaiia a na kaotaki nakoim. Kam kona ni kabwarabwarai bwa kam na kamataatai raoi. Imwiina ngkanne kam na kona ni kamatatai raoi nakoia ake kam reireiniia” (in History, 1838–1856 [Manuscript History of the Church], volume E-1, 1994, josephsmithpapers.org).