Ti Na Neboia, iroun Dana Mario Wood

Tianuare 9–15

Mataio 2; Ruka 2

Ti Roko Bwa Ti Na Taromauriia

Imwain ae ko wareki iango inanon te kamataata aei, kamatebwaia Mataio 2 ao Ruka 2, ao korei am namakin n tamnei. E na buokiko aio ni karekea te kaotitoti iaon bwaai ake a rangi ni kainnanoi kaain am kiraati.

Kaunga te Tibwatibwa

Ko na kanga ni kaungaia kaain te kiraati bwa a na tibwai aia iango ao aia namakin n te bwai are e riki nakoia ngke a kamatebwai booki aika tabu bon irouia ao n aia utu? E ngae ngke a rangi n ataa karakinan moan bungiakin te Tia Kamaiu are koreaki ni Mataio 2 ao Ruka 2, ma a konaa ni karekei nonoori aika boou mai iroun te tamnei. Kataia ni karekeia tabeman kaain te kiraati bwa a na tibwauaa te rongorongo are a tia ni karekea are a rangi n rootaki iai n te aro ae boou.

Reirei te Reirei

Mataio 2:1–12; Ruka 2:1–38

A bon mwaiti taan kakoaua iaon bungiakin Iesu Kristo.

• Rongorongoia taan nebonebo ni Mataio 2:1–12 ao Ruka 2:1–38 e kona ni kaira aron aia iango kaain te kiraati ibukin kaotan aia tangira ibukin te Tia Kamaiu. Rinanoi tenaan tiaata iaon taekaia taan kakoauaa bungiakin Kristo n te kamataata n te wiiki aei n Nakomai, Iriirai—Ibukiia n Tatabemaniia ao Utu. Tabeman mai ibuakoia kaain am kiraati a kona ni karekei aia nonoori man te waaki ni kakukurei aei, ke ko bon kona ni karaoa aei ma kaain am kiraati. E aera ngkai ti riai n taraa aroia ana taan kakoaua Kristo aikai ao teia man taabo aika kakaokoro? Ti na kangaa n irii aia katooto?

  

  A riki taan kawakin tiibu bwa taan ni moan kakoauaa bungiakin te Tia Kamaiu.

• Imwaain ae a neboa te Tia Kamaiu te ataei, a ukoria moa. Ibukin buokaia kaain te kiraati bwa a na karekea te reirei iaon te banna ni katooto aei, ao ko kona ni korei moan ami maroro aikai iaon te burakitbooti: Taan Kawakin Tiibu, Anna, Simeon, ao Taan Rabakau. A kona ngkanne kaain te kiraati ni kakae ni Mataio 2 ao Ruka 2 ao ni koroia iaon te burakibooti aroia te koraki aikai ni ukora te Tia Kamaiu. Tera ae ti karekei man rongorongo aikai n itera tabeua bwa tiaonga ni ukora te Kristo?

Mataio 2:13–23

Kaaro a kona ni karekei kaotioti bwa aonga ni kona ni kamanoia aia utu.

• Ngkana ko nang moana am maroro iaon ana mwakuri Tamara are I Karawa ngke e tuanga Iotebwa ao Maria aroia bwa a na riki bwa ana karo te Tia Kamaiu, tuangiia kaain am kiraati bwa a na korei kaanganga ake ti kaitibo mangaai ni boong aikai. Tera ae ti reiakinna man Mataio 2:13–23 n arora ni kakaea kamanoara man kangaanga aikai? E kanga te kaotioti ae onoti ni buokiira ni kamanoia ara utu ake ti tangiriia man te kangaanga? Tera taian reirei aika ti a tia n anganaki irouia burabeti ma abotoro bwa buokara ni kakaea kamaiuan tamneira?

Ruka 2:40–52

E ngae ngke te kairake ngaia, ao Iesu e a kaman baraakina karaoan nanon Ana babaire Tamana.

• Karakinan Iesu ngke 12 ana ririki ao E anga reirei inanon te tembora are e na kona n buokiia kairake ake aki koaua bwa tera te ibuobuoki ae a kona ni karaoia nakon Ana mwakuri te Atua. Ko kona ni katoatoaia kaain am kiraati bwa a na kaai ni wareka Ruka 2:40–52 (tarai nonori man ana Rairairi Iotebwa Timiti ae kuneaki n Ruka 2:46, footnote c). A kona ni kabanei tabeua te miniti ma toaia n tibwauaia imarenaia tebwai ae a namakinna man te rongorongo aei. Tera itera ake ti kona n tibwauai iai rongorongon te ekaretia? Tera bwaai aika ti a tia n rinanona inanon maiura ae ti na kona iai n tibwauai?

• Tera bwaai n Ruka 2:40–52 ae reireiniira n rongorongon Iesu ngke te kairake ngaia? Tamnein tein te rikirake ae onoti are nanonaki n Ruka 2:52 e na kona ni kaira te marooro iaon arora n riki bwa te Kristo. Kataia kairiia kaain am kiraati bwa a na karaua n iangoa aroia ni karikirakea te ataibwai (man wanawanaia), teiraoin marurungin rabwataia (marurungiia), nanoia iroun te Atua (tamneiia), ao nanoia irouia raraoia (irekerekeia ma aomata). A kona ni katei kouru iaon itera nako aikai. Ngkana ko tangiria n reitanako am maroro iaon arora n riki bwa Kristo ni kaeineti ma itera aikai, ai moarara riki nakoia te roro n rikirake, kataia kabongana are mwaneweaki n “Bwaai n Ibuobuoki Riki Tabeua.”

Bwaai n Ibuobuoki Riki Tabeua

Buoka karikirakeaia ataei ma kairake “inanon te ataibwai ao te marurung, ao ni karekea tangiran te Atua ao te aomata.”

E kabwarabwara Beretitenti Steven J. Lund te burokuraem ae Ataei ao Kairake, are e rangi n teretere ni mwakoron Ruka 2:52, n teina aei:

Te burokuraem ibukiia Ataei ao Kairake bon te bwai ni mwakuri ni buokiia ataein te Moanrinan n rikirake kanga ana reirei Kristo ao ni karekea te onimaki ae kaonaki n te nonoori n taraia bwa aekakira aron taraakin te kukurei. A kona ni karekea te kantaninga ao ni kariariai tokin kawai ni mwamwananga ao kawai ni kairi iaon kawain te berita, ike a na bwabetitoaki ao ni kamatoaki ma ana bwai n tituaraoi te Tamnei ae Raoiroi ao n te tai ae waekoa a kaain kiraati n te kooram ao Bootaki n Ataeinnaine, ike a na namakina iai te kimwareirei ni buokiia aomata man karaoan ae kanga ana mwakuri ni ibuobuoki Kristo. Ana katei aia kouru, ae bubura ao ae euarereke, bwa e aonga ni uota te tamaroa nakon maiuia ao ni katotonga te Tia Kamaiu” (“Kunean te Kimwareirei Inanon Kristo,” Riaona, Nob. 2020, 36–37).

Kanakoraoan Ara Anga reirei

Kairiia taan reireinaki ake a aki kamatebwai koroboki aika tabu ni mweengaia. E ngae ngke iai kaain te kiraati ake eaki reke warekan Mataio 2 ao Ruka 2 imwain wakinan te kiraati, a bon kona naba n tibwauai aia nonori aika uaana. Kakoaua bwa a na bane n reke aia tai kaain te kiraati n ibuobuoki ao n anga aia iango nakon te marooro.